Uñedye' 11 - Tsimane

Pedro jịꞌchiqueyacsi muꞌin Jerusalénĉantyiꞌ anicjetety Jesucristo in

¹ Muꞌin qui in Jenꞌtyiꞌ jutactyiꞌ muꞌ, räjtumdye Judeaĉantyiꞌ anicjetety Jesucristo in chị́qui in muꞌin jam judío in aty muꞌin jụjyaque Jenꞌcheꞌ in.

² Pedro Jerusalénĉan jịjcaij. Aty venjoij muꞌĉan, muꞌin judío anicjetety Jesucristo in fạraꞌjeĉunꞌte in.

³ Pedro jéte in: —¿Junꞌ dash cạ̈näꞌnacsim muꞌin jam judío in? ¿Junꞌ dash jebetacsim chimeꞌ mi? —jéte in.

⁴ Chat qui muꞌ Pedro räj jéyacsi junꞌ chuc cạ̈näꞌnacsi muꞌ, jéyacsi:

⁵ —Jopeĉan nash yụ cọdaqui Jenꞌcheꞌ, muꞌ qui Jenꞌ jiꞌcaviyin yụ yiris jịꞌcavacdyeꞌ. Cạveꞌ vatyquej yụ yiris jedyeꞌ jịꞌĉojtuyeꞌ yụ mạyedyeꞌches jijtuij, jeñej buꞌyi yirity tyäꞌväty, sababa buꞌyi quipdyivevej, joꞌmety chạij yụ́yaꞌ tŝọij.

⁶ Anic jämꞌ cạvi yụ, mọꞌĉan yoc yoc jebacdyeꞌ ayij in, vajru vajedyedyeꞌ in judyeyaꞌ jaijtyiꞌ chimeꞌ in.

⁷ Chat qui yiris seꞌve p̂eyacdyeꞌ yụ, jin yụ: "Tạij mi Pedro, ujacseva mọꞌin in, chat qui raꞌ jebacsim", jin yụ.

⁸ Yụ qui vorjete: "Jam raꞌ yụ junꞌ meꞌ Ayoꞌ, jam yụ jämꞌdyeyaꞌ jebeiꞌ joꞌmes jam jebacsis tsun judío tsun", yi yụ.

⁹ Quivij seꞌveꞌ yụ p̂eyacdyeꞌ yiꞌ jin yụ: "Jam raꞌ äcäijjeyacsim jebacdyeꞌ mi, a nash yi Jenꞌ paj qui tupuj jebacsi miꞌin", yi jin yụ.

¹⁰ Chibin quimꞌ jiꞌcaviyin yụ, chat qui cạc juban mạyedyeꞌcheꞌ jịjcaban.

¹¹ Ĉụiꞌdye vátyequej shupqueti in chibin Cesareaĉantyiꞌ muntyiꞌ in, jutactyiꞌ Cornelioty paj qui yụ́yaꞌ atsij in, acaꞌĉan venchuij in.

¹² Jenꞌsiꞌ Ạꞌedyeꞌ jin yụ paj qui jịjcacsi yụ: "Mijam raꞌ yocve dyijyi mi", jin yụ. Cesareaĉan qui roiꞌjeꞌ yụ, penꞌdyetucsi yụ uts in jäbäntyity rụiꞌcuꞌ in anicjetety Jesucristo chimeꞌ in. Venjoij muꞌĉan tsun, chụiꞌ buꞌyi siti tsun Corneliosĉan acaꞌ muꞌ.

¹³ Jin muꞌ tsun junꞌ chuc muꞌ cạvete yirity anjer rụiꞌcujcuij acaꞌĉan muꞌ, jajiti ca: "Jutacseva muntyiꞌ in paj qui Jopeve jịjcaij in, paj jäcte in muꞌ Simón, Pedro yocsiꞌ tịj muꞌ.

¹⁴ Muꞌ raꞌ jin mi junꞌ buꞌyi chuc raꞌ tupuj c̣hoñi mi räjtumdye chätidyeꞌ mi", yi ca muꞌ anjer jajiti Cornelio.

¹⁵ Tiyacchuiꞌ yụ voroꞌtacsi acaꞌĉantyiꞌ in, jịꞌtŝocsiꞌ vatyquej Jenꞌsiꞌ Ạꞌedyeꞌ muꞌ, yojdyemꞌ tsun tashcheꞌ jiquej u jiꞌtŝusinꞌ judío tsun jiquej.

¹⁶ Yụ qui dyijtupte Ayos p̂eyacdyeꞌ muꞌ, yi muꞌ: "Juan ojñiꞌyaꞌ chojtyinac miꞌin, q̂uinꞌ raꞌ chat jiꞌtŝunac Jenꞌsiꞌ Ạꞌedyeꞌ muꞌ", yi muꞌ.

¹⁷ Anic jorojĉanjisinꞌ Jenꞌ soꞌmacsi Ạꞌedyeꞌ muꞌ muꞌin jam judío in, yojdyemꞌ soꞌmisinꞌ tsun jiquej u, yoquiꞌdyemꞌ anicjejayaꞌ Jesucristo u. Mọꞌdyes yụ jam junꞌ dyäcjeĉunꞌbite Jenꞌsiꞌ dyijyedyeꞌ muꞌ —yi muꞌ Pedro jéyacsi.

¹⁸ Seꞌveptemꞌ p̂eyacdyeꞌ in muꞌin Jerusalénĉantyiꞌ anicjetety Jesucristo in, tyäpäꞌ tyeij muꞌin in, aty jam jätäjyeban quivij in. Timaꞌquete quimꞌ Jenꞌ in, yi in: —Jaij meꞌ, muꞌ Jenꞌ soꞌmacsi muꞌin jam judío in paj qui muꞌin chimeꞌ dyijyi juchajcheꞌ in paj qui räjĉan Jenꞌyaꞌ bäꞌyi in —yi in.

Anicjetety Jenꞌ in Antioquíaĉantyiꞌ in

¹⁹ Aty ijateyaꞌ in muꞌ Esteban chat tiyacchuiꞌ jịꞌñibeꞌcacsi in muꞌin anicjetety Jesucristo in. Meꞌdyes qui ĉaꞌjoij in, yạjquiꞌ in Jerusalén, paiꞌ junanaj ĉụiꞌ jịjcaij yocsiꞌĉan bäꞌyedyeꞌ in, pạrej Feniciaĉan jịjcaij in, judyeyaꞌ pạrej Chipreĉan jịjcaij in, pạrej na Antioquíaĉan jịjcaij in. Meꞌ meꞌ jịjcaij in voroꞌtacsi Jenꞌsiꞌ p̂eyacdyeꞌ in, judío qui na mọmoꞌ jéyacsi in, muꞌin na jam judío in jam jéyacsi in.

²⁰ Meꞌ tsanꞌ meꞌ atsij qui namꞌ pạrej Chipreĉantyiꞌ anicjetety Jesucristo in judyeyaꞌ Cireneĉantyiꞌ chimeꞌ in, muꞌin Antioquíaĉan jịjcaij in, muꞌinmun voroꞌtacsi in jam judío in jéyacsi in mọꞌ p̂eyacdyeꞌ p̂eijtes muꞌ Jesús, Ayoꞌ tsun.

²¹ Jenꞌ nọ́tacsi ferdyeꞌyaꞌ muꞌ, daiꞌ muꞌyaꞌ camanꞌyeban in dyijyeban Jenꞌcheꞌ in, jụjjebajte in Ayoꞌ tsun.

²² Muꞌin Jerusalénĉantyiꞌ anicjetety Jesucristo in chị́qui in aty meꞌ muꞌin in Antioquíaĉan in, jutete qui in muꞌ Bernabé paj qui muꞌve cạvacsequi.

^23-24 Anic na muꞌ jämꞌyity muntyiꞌ, fer anicjetety Jenꞌ chimeꞌ judyeyaꞌ Jenꞌsiꞌtum Ạꞌedyeꞌ bäꞌyity muꞌ. Dạcacsequi muꞌ anicjetety Jenꞌ in, cạvacsi muꞌ Jenꞌ anic nọ́tacsi muꞌin, mọꞌdyes qui där maꞌjoij muꞌ. Yi jéyacsi: "Jam raꞌ méquiꞌ miꞌin farajjetinte Ayoꞌ tsun, yejĉoij ramꞌ ĉojtyiꞌĉan miꞌin cäc̣häꞌchutinte muꞌ" jéyacsi. Meꞌdye qui muꞌin yejĉoij cächquejĉoij in jụjjete Jesucristo in.

²⁵ Sacjebanꞌ muꞌ Bernabé, Tarsove qui jịjcaij muꞌ queviĉajte muꞌĉan Saulo.

²⁶ Muꞌĉan dạcajte, Antioquíaĉan jijtuban Saulotum. Pärenꞌdye muꞌin in jịꞌchiyacsi muꞌĉantyiꞌ anicjetety Jesucristo in, yiris yómodyeꞌmun muꞌĉan meꞌ buꞌyi in, daiꞌ muntyiꞌ jịꞌchiyacsi in. Muꞌĉan Antioquíaĉan yóĉandyemꞌ tiyacchuti tịj soꞌmacsi muꞌin anicjetety Jesucristo in jéyacsi in Cristoty in, jéyacsi in.

²⁷ Aty meꞌsiꞌ pạrej jasoꞌmitity p̂eyacdyeꞌ Jenꞌ in atsij in, Jerusalénĉantyiꞌ muꞌin in, Antioquíaĉan venjoij in.

²⁸ Yirity Agabo tịj muꞌ, muꞌ soꞌmactyiꞌ p̂eyacdyeꞌ Jenꞌsiꞌyaꞌ Ạꞌedyeꞌ muꞌ. Sacyi muꞌ mọꞌ jịꞌchiqueyacsi p̂eyacdyeꞌ, jéyacsi: "Räj buꞌyiꞌ raꞌ jac chiqueꞌ raꞌ dáquis in." Anicdye meꞌ, aty muꞌ ayoꞌbuꞌyi muꞌ Claudio jiquej, muꞌ mujuꞌchaty ayoꞌ, Romaĉantyiꞌ, cạ̈tsiꞌ mọꞌ p̂eyacdyeꞌ.

²⁹ Mọꞌdyes muꞌin Antioquíaĉantyiꞌ anicjetety Jenꞌ in dyijyi in dyimꞌte querec̣ha in anicjetetydyety Jenꞌ in Judeaĉantyiꞌ. Meꞌdye räj anicyity Jenꞌcheꞌ in yụꞌte in junꞌ quiquij chuc tupuj yụꞌte in, meꞌ meꞌ vajmuꞌyaꞌjete querec̣ha in.

³⁰ Chat qui juteyacsi in muꞌin ĉọjcacsity anicjetety Jenꞌ in Judeaĉantyiꞌ in. Bernabé judyeyaꞌ Saulo muꞌin cạyacsi in.