Uñedye' 10 - Tsimane

Pedro judyeyaꞌ Cornelio

¹ Muꞌyaꞌ jiquej yirity muntyiꞌ Romaĉantyiꞌ, Cesareaĉan bäꞌyity, Cornelio tịj muꞌ, ayoꞌ yiritytyity ñuruꞌ väc̣häꞌtyity Romaĉantyiꞌ in. Italiaĉantyiꞌ in, jéyacsi in.

² Cornelio dyijyity tsanꞌ Jenꞌcheꞌ räjtumdye chätidyeꞌ muꞌ timaꞌquete Jenꞌ in. Nọ́tyetacsi muꞌin judío jayejjotaquity jedyeꞌ in, räjĉan cọdaqui Jenꞌcheꞌ.

³ Yirisĉan mạyedyeꞌ aty yómoꞌquiꞌve tsun, yirity Jenꞌtyiꞌ anjer muꞌ jiꞌcaviti Cornelioyaꞌ, jafaijti: —Cornelio —jajiti.

⁴ Jämꞌ itŝijyi muꞌ cạvete muꞌ anjer, jéte: —¿Jedyeꞌveij tyuꞌ um? Vorjajiti anjer: —Jenꞌ seꞌvibun mísiꞌ cọdacdyeꞌ, judyeyaꞌ cavibun nọ́tacdyeꞌ mi jayejjotaquityyaꞌ jedyeꞌ in.

⁵ Jutacseva muntyiꞌ in paj qui Jopeve jịjcaij in, paj jäcte in muꞌ Simón, Pedro yocsiꞌ tịj muꞌ.

⁶ Yoctyiꞌyaꞌ Simón q̂uinꞌ dyäqui, carijtyety shoꞌpaꞌ, tsävcheꞌ bäꞌyity mar —jajiti anjer.

⁷ Jọban qui muꞌ anjer jap̂iyitity. Cornelio fayaqui päräꞌ úñity muꞌ judyeyaꞌ yirity väc̣häꞌtyity muꞌ, muꞌ chị́yetety judyeyaꞌ chiqueptety p̂eyacdyeꞌ, judyeyaꞌ dyijyity tsanꞌ Jenꞌcheꞌ chimeꞌ.

⁸ Muꞌ Cornelio jéyacsi räj jätäjjajishdyi chuc muꞌ anjer, chat qui jutacsi paj qui Jopeĉan jịjcaij in, quevicte in muꞌ Pedro.

⁹ Nojno mạyedyeꞌ quichĉan tsun aty majmiyaꞌ in c̣hẹiꞌyaꞌ tyiti Jope atsvun in. Mọꞌdye hora muꞌ Pedro fajcheꞌ jịjcaij acaꞌ bojvi, yócheꞌdyemꞌ jịꞌjutyitidyescheꞌ muntyis u muꞌin, muꞌcheꞌ cọdaqui Jenꞌcheꞌ.

¹⁰ Dáquis muꞌcheꞌ játŝuti Pedro mạꞌjeꞌ tsanꞌ säcsi, jambiꞌ qui namꞌ jejmucsiꞌ in, chat qui muꞌ Jenꞌ jajiꞌcaviyiti yiris jịꞌcavacdyeꞌ.

¹¹ Vanacyiꞌ vatyquej mạyedyeꞌcheꞌ cạveꞌ, mọꞌches yiris jedyeꞌ jịꞌĉojtuyeĉuñeꞌ muꞌ jeñej yirity tyäꞌväty cạvete, joꞌmety chạij, sababa buꞌyi quipdyivevej.

¹² Yóĉandyemꞌ jäꞌchäiꞌ o, mọꞌĉan yoc yoc jebacdyeꞌ ayij in, vajedyedyeꞌ in judyeyaꞌ jaijtyiꞌ chimeꞌ in.

¹³ Pedro qui yiris seꞌveꞌ p̂eyacdyeꞌ jajiti: —Tạij Pedro, ijacseva judyeyaꞌ jebacsi ram.

¹⁴ Vorjete Pedro: —Jam yụ tupuj ujacsi joꞌmes in, Ayoꞌ, jam yụ jämꞌdyeyaꞌ jebeiꞌ joꞌmes jam jebacsis tsun judío tsun —yi Pedro jéte.

¹⁵ Quivij seꞌveꞌ p̂eyacdyeꞌ, yiꞌ: —Jam raꞌ äcäijjeyacsi jebacdyeꞌ mi, a nash yi Jenꞌ tupuj jebacsi miꞌin —jajiti.

¹⁶ Chibin quiꞌ jajiꞌcaviyiti muꞌ Pedro chat qui bojban muꞌ, mạyedyeꞌcheꞌ jịjcaban.

^17-18 Pedro jiꞌdyijvivaꞌbun jedyeꞌ chuc cạiꞌ mọꞌ jịꞌcavacdyeꞌ cạves muꞌ, muꞌin na jutactyiꞌ Cornelioty muꞌ venjoij in. Quequevcapte in Simónsiꞌ acaꞌ muꞌ. Ĉụiꞌdye dạcbite in, chat qui chụiꞌdyeꞌyaꞌ fayacsi in jéyacsi in: "¿Úyaꞌ caꞌ dyäqui muꞌ Simón, Pedro chimeꞌ yocsiꞌ tịj muꞌ?"

¹⁹ Muꞌ na Pedro yejĉoij dyijtuvaꞌbanꞌ mọꞌ jịꞌcavacdyeꞌ cạves jiquej. Chat qui Jenꞌsiꞌ Ạꞌedyeꞌ muꞌ yiꞌ jajiti: —Chibin muntyiꞌ quivintyiꞌ in.

²⁰ Sacyebada chạbada, meꞌ tsanꞌ jam judío in jịjcacseva, jam raꞌ yocve dyijyi mi, ĉaĉaij nash yụ jutacsi —yiꞌ Jenꞌsiꞌ Ạꞌedyeꞌ muꞌ jajiti.

²¹ Meꞌdye muꞌ Pedro chạban muꞌchety, jéyacsi muntyiꞌ in: —¿Yụ caꞌ quivdyiĉaꞌ miꞌin? ¿Jedyeꞌveij tyuꞌ u miꞌin? —jéyacsi muꞌ Pedro.

²² Vorjete in: —Tsun atsij jutactyiꞌ Cornelioty muꞌ väc̣häꞌtyitytyiꞌ ayoꞌ muꞌin Romaĉantyiꞌ in. Muꞌ nash anic jämꞌyity muntyiꞌ, timaꞌquetety Jenꞌ, räjenꞌdye muꞌin judío in jämꞌyity ĉọ́te in. Yirity ca anjer jajiti muꞌ, mi ca raꞌ fayin, muꞌsiꞌĉan ca raꞌ acaꞌ jịjcaij mi, muꞌ ca raꞌ seꞌvibun p̂eyacdyeꞌ mi, yi jajiti muꞌ anjer —jéte in muꞌ Pedro.

²³ Meꞌdye muꞌ jiꞌsitacsi acaꞌĉan jiꞌdyäcacsi, muꞌĉan qui ĉọshi in. Aty nojno mạyedyeꞌ sacjebanꞌ in, chat quivij caꞌñibun in, Pedro jịjcacseban judyeyaꞌ Jopeĉantyiꞌ muntyiꞌ in anicjetety Jesucristo in.

²⁴ Nojno mạyedyeꞌ in venjoij muꞌyaꞌ in Cesareaĉan in, yóĉandyemꞌ bäꞌyi Cornelio u, muꞌ aty jäꞌmij jabisvaꞌti acaꞌyaꞌ muꞌ. Aty vajmuꞌyaꞌjeyacsi chimeꞌ pạrej chätidyeꞌ muꞌ judyeyaꞌ penꞌdyeꞌ muꞌ.

²⁵ Muꞌ Pedro aty raꞌ siti acaꞌĉan, dyụtsyi muꞌ Cornelio Pedrosyaꞌ vej muꞌ, mạꞌjeꞌ tsanꞌ timaꞌquete.

²⁶ Pedro jam mạꞌjeꞌ, sacjebajte, jéte: —Sacyebada, jam raꞌ meꞌ mi, muntyiꞌ nash mọmoꞌ yụ —jéte.

²⁷ P̂eyacdyeꞌtum siti acaꞌĉan in, a na muꞌin daiꞌ muꞌĉan bisacvaꞌjoij in.

²⁸ Pedro jéyacsi: —Miꞌin anic chäyibutiĉaꞌ miꞌin tsunsiꞌ jiꞌchäyitidyeꞌ judíos tsun, tsun jam tupuj cạ̈näꞌnacsi yoctyiꞌ muntyiꞌ tsun, mijam chimeꞌ tupuj yoctyis sitacsebi acaꞌ tsun. Meꞌ tsanꞌ meꞌ yicdyeꞌ tsun, Jenꞌ qui namꞌ jiꞌchäquiyin yụ jịꞌcavacdyeꞌyaꞌ muꞌ, yụ ca raꞌ jam yirity muntyiꞌ äcäijjete, paj tsanꞌ jam judío jụijyaꞌ in.

²⁹ Mọꞌdyes aty fayitiĉaꞌ yụ miꞌin, cavintum mọmoꞌ atsij yụ jam mọꞌ jedyeꞌ yiꞌ. Q̂uinꞌ chat jítiĉamꞌ ¿jedyeꞌ jítiĉaꞌ tyuꞌ caꞌ raꞌ miꞌin? —jéyacsi muꞌ Pedro.

³⁰ Vorjete Cornelio: —Meꞌ yụ, aty vạjpedyeꞌ mạyedyeꞌ jiyiꞌ, yoquiꞌdyemꞌ q̂uinꞌ tsun u, yụ úĉan cọdaqui Jenꞌcheꞌ yụ yịñijdyeꞌtum Jenꞌsiꞌyaꞌ vej muꞌ cọdaqui yụ, yómos cọdacdyeꞌ tsun. Meꞌĉandye yirity muntyiꞌ jiꞌcaviti yụ́yaꞌ, anic pashyity quịꞌsimꞌ.

³¹ Muꞌ jin yụ: "Cornelio, muꞌ Jenꞌ aty seꞌvibun cọdacdyeꞌ mi, judyeyaꞌ cạvepye nọ́tacdyeꞌ mi muꞌin jayejjotaquitydyes jedyeꞌ in soꞌmacsi mi.

³² Jutacseva muntyiꞌ in paj Jopeve jịjcaij in, paj Simón jäcte in, Pedro yocsiꞌ tịj muꞌ. Yoctyiꞌyaꞌ Simón dyäqui carijtyetyyaꞌ shoꞌpaꞌ, tsävcheꞌ mar bäꞌyity", muꞌ jin yụ.

³³ Anicdye meꞌ jutacsiij paj qui jiquin in. Ñịbeꞌjitim atsij úyam. Q̂uinꞌ chat aty úyaꞌ tsun Jenꞌsiꞌyaꞌ vej muꞌ, mạꞌjeꞌ tsun seꞌvebiyac p̂eyacdyeꞌ mi, jätäjjin chuc muꞌ Jenꞌ —yi Cornelio jéte muꞌ Pedro.

Voroꞌyedyeꞌ Pedros Corneliosĉan acaꞌ

³⁴ Pedro tiyacchuiꞌ voroꞌtacsi: —Q̂uinꞌ chat aty ĉúti yụ junꞌ chuc muꞌ Jenꞌ vaj cäts cạvacsi räj muntyiꞌ in,

³⁵ meꞌ tsanꞌ judío in, meꞌ tsanꞌ yoctyiꞌ chimeꞌ in, tyi chuc irijyity muꞌcheꞌ in judyeyaꞌ rụij bäꞌyity in, räj muꞌ jụjjeyac Jenꞌyaꞌ in.

³⁶ Jämꞌ chị́yetiñeꞌ miꞌin mọꞌ p̂eyacdyeꞌ soꞌminsiꞌ tsun Israeltyiꞌ vóshiꞌ tsun, muꞌ Jesucristo jämꞌ yuꞌbun tsun Jenꞌyaꞌ, muꞌdye Jesucristo ayoꞌbuꞌyi räjdyes in, judío in judyeyaꞌ jam judío in.

³⁷ Chimeꞌdye chịj miꞌin junꞌ chuc carijtaqui muꞌ Jesucristo räj buꞌyiꞌ ọ́ĉan jac Israelĉan carijtaqui muꞌ. Aty jäquiꞌve voroꞌtacsiyaꞌ muꞌ Juan chojtacsity muntyiꞌ jiquej, muꞌ Jesucristo muꞌĉan tiyacchuiꞌ carijtaqui muꞌ Galileaĉan.

³⁸ Chịj miꞌin junꞌ chuc muꞌ Jenꞌ jasoꞌmiti Jenꞌsiꞌ ĉụiꞌsiꞌ Ạꞌedyeꞌ muꞌ, jajiꞌtŝuti ferdyeꞌ muꞌ. Muꞌdye Jesús Nazaretĉantyiꞌ paiꞌ nati nọ́tacsi muntyiꞌ in judyeyaꞌ jiꞌchäcacseban muꞌin jameꞌtity sọyoꞌ in. Meꞌ tupuj muꞌ ĉaĉaij na Jenꞌdye japenꞌdyetuti.

³⁹ Tsun nash cạvepte räj carijtacdyeꞌ muꞌ, jịꞌcaveyacsis Jerusalénĉan judyeyaꞌ paiꞌ judíosĉan jac. Aty meꞌsiꞌ ijate qui in croshcheꞌ pacte in.

⁴⁰ Chibin mạyedyeꞌ meꞌ buꞌyi säñi, chat qui Jenꞌ muꞌ jajiꞌtsaꞌibun. Aty meꞌsiꞌ jajutiti qui jiꞌcaviti qui tsunyaꞌ.

⁴¹ Jam qui namꞌ jiꞌcaviti yoctyiꞌyaꞌ in, meꞌdye tsunyamꞌ jiꞌcaviti, ĉaĉaij na muꞌ tashcheꞌ tsimꞌtyin tsun paj qui jịꞌchiqueyacsi muntyiꞌ tsun úchety in. Aty vañinyebanyaꞌ muꞌ tsuntum qui säcseban.

⁴² Muꞌ jutin tsun paj qui voroꞌtacsi muntyiꞌ tsun, judyeyaꞌ jịꞌchiqueyacsi tsun junꞌ chuc muꞌ Jenꞌ aty jayuꞌti muꞌ Jesucristo, muꞌ qui yụꞌtac paj qui jịꞌcäts yụꞌtacsi muntyiꞌ in juchadyeꞌyaꞌ muꞌin räj muntyiꞌ in, tsạꞌtyiꞌ in judyeyaꞌ säñity in.

⁴³ Chimuꞌdye muꞌ p̂eijte jiquej in räj muꞌin jasoꞌmitity p̂eyacdyeꞌ Jenꞌ jiquej in yi in, tyi chuc raꞌ anicjete Jesús, muꞌ raꞌ Jenꞌ vayacjepte juchaj, Jesússiꞌcheꞌ raꞌ tịj muꞌ —jéyacsi muꞌ Pedro.

Jenꞌsiꞌ Ạꞌedyeꞌ muꞌ jịꞌtŝocsiꞌ muꞌin jam judío in

⁴⁴ Tacaꞌ p̂eyacvaꞌjoij muꞌ Pedro meꞌĉandye jịꞌtŝocsiꞌ mọꞌ Jenꞌsiꞌ Ạꞌedyemꞌ muꞌ, muꞌin seꞌvacvaꞌjoijtyiꞌ in mọꞌ p̂eyacdyeꞌ.

⁴⁵ Muꞌin jụjjetety Jesucristo judío in, muꞌ penꞌdyetucsity Pedro, muꞌin chimeꞌ cạveꞌ in, anic äjyi in, ĉaĉaij na muꞌ Jenꞌ jutaqui Ạꞌedyeꞌ muꞌ paj qui mọꞌ jịꞌtŝocsiꞌ muꞌin jam judío chimeꞌ in.

⁴⁶ Muꞌĉantyiꞌ judío in mọꞌ chịj in ĉaĉaij na seꞌvaqui in yocsiꞌĉan p̂eyacdyeꞌ p̂eyaqui in judyeyaꞌ timaꞌquete Jenꞌ in.

⁴⁷ Chat qui yi muꞌ Pedro: —Jam tyi tupuj uts nọ́csi in, tupuj muꞌin jiꞌchojtac q̂uinꞌ in, ĉaĉaij na uts q̂uinꞌ in aty soꞌmac in Jenꞌsiꞌ Ạꞌedyeꞌ muꞌ, yojdyemꞌ tsun jiquej u —jéyacsi muꞌ Pedro.

⁴⁸ Chat qui jutacsi paj qui jiꞌchojti in Jesucristoscheꞌ tịj muꞌ. Muꞌĉan bäꞌyity in nọ́te in muꞌ Pedro: "Taĉan chum raꞌ úĉan mi paj tsanꞌ juñucsiꞌ mạyedyeꞌ", jéte in.