Titodyes 3 - Tsimane

Dyijyedyeꞌ muꞌin anicjetetysiꞌ Jenꞌ in

¹ Jéyacseva quivij muꞌin anicjetety Jenꞌ in paj qui chicacsi muꞌin jacchety ayoꞌ in, räjtumdye bäꞌyedyeꞌĉantyiꞌ fer buꞌyity in, jemoñeꞌ seꞌvacsebi yụꞌtacdyeꞌ muꞌin, paj qui rụij bäꞌyi in.

² Jéyacseva chimeꞌ paj qui jam yirity muntyiꞌ ac̣hiꞌ p̂iyiti in, paj qui jam chimeꞌ vaj meij doroiꞌjitidyeij in, jemoñeꞌ jämꞌyedyeꞌtum bäꞌyi in räjtum muntyiꞌ in.

³ Anicdye meꞌ bäꞌjaꞌ jiquej tsun, aꞌc̣his bäꞌjaꞌ jiquej, anic itŝiꞌ jéjaꞌ dyijyedyeꞌ bäꞌjaꞌ jiquej tsun, mijam damꞌ chiqueja Jenꞌ, anic därsiꞌtum monꞌdyeꞌ bäꞌjaꞌ jiquej. Chimeꞌdye aꞌc̣his dyijyedyeꞌ ĉụiꞌsiꞌ cạjaꞌ tsun, mọꞌ bächäsinꞌ jiquej tsun, mọꞌ mọmoꞌ maꞌjotyejaꞌ jiquej. Anic ac̣hiꞌ bäꞌjaꞌ jiquej, jiꞌmeꞌtyiyitiĉaꞌ dyijyedyeꞌ jiquej, judyeyaꞌ fạ́cacsejaꞌ muntyiꞌ in, muꞌin qui chimeꞌ meij fáquisinꞌ in, meꞌ bäꞌjaꞌ jiquej tsun.

⁴ Chat qui ayij mọꞌ tupudyeꞌ, muꞌ Jenꞌ Jiꞌc̣honsinꞌtyiꞌ tsun jutete muꞌ Jesucristo, muꞌyaꞌ qui jiꞌcaviyisinꞌ mạꞌjitidyes muꞌ judyeyaꞌ jämꞌyedyeꞌ muꞌ.

⁵ Muꞌ qui jiꞌc̣honsinꞌ tsun, jam qui namꞌ ĉụiꞌsiꞌyaꞌ jämꞌyedyeꞌ tsun, junꞌ chuc rụij bäꞌjaꞌ. Muꞌdye mọmoꞌ ñịbeꞌ ĉúsinꞌ jiꞌc̣honsinꞌ tsun, ĉụiꞌsiꞌyaꞌ Ạꞌedyeꞌ muꞌ. Muꞌ c̣hiconꞌjisinꞌ tsun aty soꞌmisinꞌyaꞌ Ạꞌedyeꞌ muꞌ, mọꞌyaꞌ qui naꞌebajshaꞌ Jenꞌdyes tsun, yocsiꞌ qui aty dyijyedyeꞌ meꞌchujaꞌ.

⁶ Muꞌ Jenꞌ yi paj qui muꞌ Jesucristo muꞌ Jiꞌc̣honsinꞌtyiꞌ tsun, paj qui muꞌ soꞌmisinꞌ Ạꞌedyeꞌ muꞌ mijam damꞌ quijatutyisinꞌ soꞌmisinꞌ,

⁷ judyeyaꞌ därsiꞌyaꞌ ñịbeꞌjitidyes muꞌ rụij yuꞌsinꞌ ĉụiꞌsiꞌyaꞌ vej muꞌ, q̂uinꞌ aty Jenꞌdyety tsun, Jenꞌyaꞌ qui raꞌ bäꞌjaꞌ tsun, mọꞌ bisvaꞌquejas tsun,

⁸ anic rụijsis ọij p̂eyacdyeꞌ jéyes q̂uinꞌ. Yụ mạꞌjeꞌ paj qui fercheꞌ jịꞌchiyacsi mi muꞌin anicjetety Jenꞌ in paj qui cäc̣häꞌchuiꞌ in jiꞌchäyitidyeꞌ q̂uinꞌ. Jéyacseva paj qui nọ́tacsi bäꞌyi in, mọꞌ nash jämꞌ räjdyes muntyiꞌ in.

⁹ Jam qui na ramꞌ dyijtuiꞌ mi urucyas p̂eyacdyeꞌ muntyis muꞌin, mọꞌ itŝis dyijyedyeꞌ. Jam raꞌ dyijtuiꞌ chimeꞌ mi sánacdyeꞌ tịj jiquej muꞌin, mijam raꞌ vaj meij jítidyeij mi muꞌintum in vaꞌve jeptety yụꞌtacdyeꞌ Jenꞌsiꞌ in. Joꞌmes p̂eyacdyeꞌ muntyis in, anic fibis shupquiꞌ muꞌin.

¹⁰ Muꞌyaꞌ yirity vaꞌve dyijyity jụijyaꞌ, muꞌ yócocoj yụꞌtacsity muꞌin anicjetety Jenꞌ jụijyaꞌ in, muꞌ meꞌtyity, jéme yiriꞌ quiꞌ judyeyaꞌ päräꞌ quiꞌ. Jam mạꞌjeꞌ chäquin jụijyaꞌ muꞌ, vaꞌquecme muꞌ paj jam penꞌdyetucsi muꞌ.

¹¹ Jeshaꞌ muꞌin meꞌtyity in anic ĉụiꞌ ac̣hiꞌti in, ĉụiꞌsidyes juchaj jiꞌmeꞌti in.

Jadyiquis p̂eyacdyeꞌ Pablos Titodyes

¹² Yụ raꞌ jutete míyaꞌ uts Artemas, jam jụijyaꞌ uts Tiquico, paj qui muꞌ ĉúquin. Ventyiquinyaꞌ muꞌ yụꞌtyevaꞌ ferdyeꞌ paj qui Nicópolisve jịjcaij mi, muꞌve raꞌ ĉucdyim, muꞌĉan raꞌ jiꞌjiyeꞌ yụ tupudyeꞌ tsịvuꞌvudyeꞌ.

¹³ Chimeꞌdye yụꞌtyevaꞌ ferdyeꞌ paj qui nọ́tyetacsi muꞌin cạyacsity p̂eyacdyeꞌ in, muꞌ Apolos judyeyaꞌ muꞌ Zenas, muꞌ ñutsjetacsity ayoꞌyaꞌ in. Cạvevaꞌ mi paj qui muꞌin jam jayejjotaqui víte majmiyaꞌ in.

¹⁴ Muꞌin anicjetety Jenꞌ in jemoñeꞌ jämꞌ carijtaqui in paj qui tupuj nọ́tacsi yoctyiꞌ in tyi chuc jayejjotaquity jedyeꞌ in, meꞌ raꞌ jam fibiꞌ bäꞌyi in muꞌin anicjetety Jenꞌ in.

Voryetacdyeꞌ Pablos

¹⁵ Räj úyaty in penꞌdyetuntyiꞌ yụ in, muꞌin chimeꞌ vorjin in. Mi chimeꞌ vorjeyacseva muꞌin anicjetety Jenꞌ in muꞌin mạꞌjintyiꞌ tsun in. Yụ cọdyete Jenꞌ paj qui muꞌ soꞌminac ñịbeꞌjitidyes räjtumdye miꞌin.