Titodyes 2 - Tsimane

Rụijsis jiꞌchäyitidyeꞌ

¹ Mi raꞌ jịꞌchiyacsi jụꞌñis chuc rụijsis jiꞌchäyitidyeꞌ.

² Jéyacseva muꞌin ishoꞌmuntyiꞌ in paj qui rụij bäꞌyi in, paj qui jämꞌ ĉujcati in, mijam tyédyeꞌĉan bäꞌyi in jemoñeꞌ dyijyedyeꞌtum bäꞌyi in. Jéyacseva chimeꞌ paj qui yejĉoij anicjete Jenꞌ in, paj yejĉoij mạꞌjeyacsi bäꞌyi in, paj tyumꞌchutidyeꞌtum chimeꞌ bäꞌyi in.

³ Jéyacseva chimeꞌ mọꞌin ishoꞌmunsiꞌ p̂en in, paj qui mọꞌin chimeꞌ räjĉan irijyedyeꞌtum bäꞌyiꞌ in, paj jam ñinacsiꞌ muntyiꞌ in, mijam raꞌ tyeiꞌsiꞌ chimeꞌ bäꞌyi in. Jemoñeꞌ mọꞌin qui jịꞌchiyacsiꞌ in junꞌ chuc bäꞌyiꞌ in mọꞌin anicjetes Jenꞌ in.

⁴ Chimeꞌdye mọꞌin ishoꞌmunsiꞌ p̂en in jemoñeꞌ jịꞌchiyacsiꞌ mọꞌin nanamunsiꞌ p̂en in paj qui mạꞌjeyaquiꞌ in ĉụiꞌtyiꞌ vämtyiꞌ mọꞌin judyeyaꞌ ạvaꞌ mọꞌin.

⁵ Chimeꞌdye mọꞌin ishoꞌmunsiꞌ p̂en in jemoñeꞌ jịꞌchiyacsiꞌ nanamunsiꞌ p̂en in paj qui jam aꞌc̣his dyijyedyeꞌ cạiꞌ in, paj qui jämꞌ ĉujcatiꞌ in, judyeyaꞌ jämꞌyedyeꞌtum bäꞌyiꞌ in, paj qui jämꞌ carijtaquiꞌ acaꞌĉan mọꞌin, paj qui chicaquiꞌ vämtyiꞌ mọꞌin. Meꞌ bäꞌyiꞌ jụijyaꞌ in mọꞌin nanamunsiꞌ p̂en in, muꞌin jorojyaty muntyiꞌ in jam raꞌ mọꞌindyes äcäijjepte in Jenꞌsiꞌ p̂eyacdyeꞌ muꞌ.

⁶ Chimeꞌdye jéyacseva nanamuntyiꞌ sonꞌ in paj qui jämꞌ ĉujcati ĉụiꞌ in.

⁷ Meꞌ mi chimeꞌ rụij bäꞌva räjĉan, tupuj qui muꞌin cäc̣häꞌchutyin in. Rụij jịꞌchiyacseva, jam raꞌ shejvinꞌdyeꞌtum jịꞌchiyacsi mi.

⁸ Rụijsis p̂eyacdyeꞌ soꞌmacseva chat qui raꞌ jam tupuj ñäñibun in. Meꞌ rụij jịꞌchiyacsi jụijyam, tsị́caij raꞌ muꞌin ñinaquity jiquej in, jam raꞌ junꞌ dacbusinꞌ tsunsiꞌ juchaj in.

⁹ Jéyacseva muꞌin úñity in paj chicaqui in ayos p̂eyacdyeꞌ muꞌin, jemoñeꞌ meꞌ bäꞌyi in paj qui räjĉan maꞌjotacsi ayoꞌ muꞌin. Paj jam jiꞌpenꞌti mọmoꞌ p̂eyacdyeꞌyaꞌ in,

¹⁰ mijam raꞌ shiꞌatucsi in. Jemoñeꞌ yedyej rụij bäꞌyity in, mijam raꞌ miquis shuꞌadyeꞌ meꞌchuiꞌ in, paj qui meꞌ muntyiꞌ yi in: "Där jämꞌsiꞌ mọꞌ jiꞌchäyitidyeꞌ Jenꞌsiꞌ muꞌ cäc̣häꞌchuiꞌsiꞌ in", paj qui meꞌ p̂eijbite in Jenꞌsiꞌ p̂eyacdyeꞌ muꞌ, muꞌ Jiꞌc̣honsinꞌtyiꞌ tsun.

¹¹ Q̂uinꞌ aty jemoñeꞌ meꞌ bäꞌjaꞌ ĉaĉaij na muꞌ Jenꞌ aty jiꞌcaviyisinꞌ ñịbeꞌjitidyes muꞌ, mọꞌyaꞌ muꞌ mạꞌjeꞌ paj qui räj jiꞌc̣honsinꞌ úchety muntyiꞌ tsun.

¹² Ọij ñịbeꞌjitidyesyaꞌ muꞌ jísinꞌ paj qui farajjeyaĉaꞌ aꞌc̣his dyijyedyeꞌ tsun, mọꞌ mạꞌjeꞌsiꞌ jacches jedyeꞌ tsun, paj qui rụij bäꞌjaꞌ úcheꞌ jaccheꞌ, paj qui ĉujcatiĉaꞌ tsun paj qui yejĉojaꞌ cäc̣häꞌchuja Jenꞌ úcheꞌ jaccheꞌ,

¹³ junꞌ quiꞌ chuc atsijbanyaꞌ muꞌ Jesucristo Jiꞌc̣honsinꞌtyiꞌ tsun, muꞌdye Jenꞌ mạyedyeꞌchety. Muꞌ bisvaꞌquejaty q̂uinꞌ tsun maꞌjodyeꞌtum raꞌ tiĉunja, mạijquedyeꞌtum raꞌ atsijban.

¹⁴ Muꞌ ĉụiꞌ jiꞌujati tsundyes jiquej, paj qui jiꞌc̣honsinꞌ tsun räj aꞌc̣hisĉan jedyeꞌ, judyeyaꞌ paj qui muꞌ c̣hiconꞌjibusinꞌ aꞌc̣his jedyeꞌ ĉojtyiꞌĉansiꞌ tsun, judyeyaꞌ yuꞌsinꞌ paj qui muꞌdyety tsun, paj qui fer dyijtujaꞌ tsun junꞌ chuc raꞌ jämꞌ bäꞌjaꞌ muꞌdyes.

¹⁵ Jiꞌchäyitidyeꞌ soꞌmacseva, chimeꞌ jiꞌmaꞌyacseva Jenꞌdyes, judyeyaꞌ fạraꞌjeyacseva tyi chuc jam mạꞌjeꞌ chiqueꞌtyiꞌ in, ĉaĉaij nash meꞌ muꞌ Jenꞌ yuꞌtyin mi. Meꞌ raꞌ carijtaqui mi paj qui jam yirity muntyiꞌ äcäijjin in.