Titodyes 1 - Tsimane

Tashches voryedyeꞌ Pablos

¹ Yụ nash Pablo úñity Jenꞌtyiꞌ muꞌ judyeyaꞌ jutactyiꞌ Jesucristoty muꞌ. Muꞌ jutin yụ paj qui yụ voroꞌtacsi muꞌin tsimꞌtactyiꞌ Jenꞌtyiꞌ muꞌ muꞌsiꞌ p̂eyacdyeꞌ muꞌ, paj qui anicjepte in. Chimeꞌdye jutin yụ paj qui jịꞌchiyacsi yụ rụijsis p̂eyacdyeꞌ muꞌ, mọꞌ cäc̣häꞌchujas.

² Mọꞌ jísinꞌ junꞌ chuc raꞌ tupuj Jenꞌyaꞌ räjĉan bäꞌjaꞌ tsun, mọꞌ q̂uinꞌ bisvaꞌquejas tsun. Ọij p̂eyacdyeꞌ yuꞌtyiyisinꞌ muꞌ Jenꞌ jiquej, jambiꞌdyemꞌ jämꞌtacyaꞌ ọij jac jiquej, tạꞌcaty muꞌ yi jiquej. Cạ̈tsiꞌ raꞌ mọꞌ ĉaĉaij na muꞌ Jenꞌ jam chịj väñäij.

³ Q̂uinꞌ aty ayij tupudyeꞌ Jenꞌsiꞌ muꞌ, yụꞌtyeꞌ p̂eyacdyeꞌ muꞌ judyeyaꞌ jutacsi muꞌin voroꞌtacsity in paj qui muntyiꞌ in chị́yepte in. Muꞌ Jenꞌ, Jiꞌc̣honsinꞌtyiꞌ tsun, muꞌ yuꞌtyin yụ paj qui yụ voroꞌtacsi p̂eyacdyeꞌ muꞌ.

⁴ Mọꞌdyes qui yụ q̂uinꞌ sáñeꞌ ọij mídyes, Tito, mi jeñej buꞌyi anictyity ạvaꞌ yụ ĉaĉaij na vaj meꞌ anicyedyeꞌ Jenꞌcheꞌ tsun. Yụ cọdyete Jenꞌ muꞌ Ạvatusinꞌtyiꞌ tsun judyeyaꞌ muꞌ Cristo Jesús Ayoꞌ tsun, muꞌ Jiꞌc̣honsinꞌtyiꞌ, paj qui muꞌ soꞌmin ñịbeꞌjitidyes muꞌ judyeyaꞌ maꞌjodyeꞌ ĉojtyiꞌĉandyes mi.

Ĉọjcacsity muꞌin anicjetety Jenꞌ in

⁵ Yạjquiyeyaꞌ yụ jiquej Cretaĉan, yụ yạjquiye paj qui jämꞌ yụꞌtyeꞌ mi jedyeꞌ chuc jayej jämꞌ yụꞌtac muꞌinĉan in. Chimeꞌdye yụ bajaꞌ jéye jiquej paj qui yụꞌtacsi mi muꞌin ĉọjcacsity anicjetety Jenꞌ in, junanaj chuc vajmuꞌyaijĉan in, muꞌĉaĉan raꞌ yụꞌtacsi mi ĉọjcacsity in.

⁶ Tyi chuc raꞌ meꞌ yụꞌtac jụijyaꞌ in jemoñeꞌ rụij bäꞌyity in, mijam raꞌ jụꞌñity in, judyeyaꞌ yiritytyity p̂en in. Jemoñeꞌ muꞌ ạvaꞌ muꞌ anicjetety Jenꞌ in, judyeyaꞌ chicaquity jenꞌ muꞌin judyeyaꞌ tseꞌ muꞌin, mijam raꞌ ac̣hiꞌ bäꞌyity ạvaꞌ muꞌ paj qui jam ñäñinac in.

⁷ Muꞌ ĉọjcacsity anicjetety Jenꞌ in, muꞌ nash yụꞌtac paj qui carijtaqui Jenꞌdyes muꞌ, mọꞌdyes jemoñeꞌ jam jụꞌñity muꞌ, mijam meꞌmeꞌyity, mijam fuchyedyeijtyiꞌ, mijam tyeijtyiꞌ, mijam chucsity, mijam fer dyijtutety querec̣ha chimeꞌ.

⁸ Jemoñeꞌ chịj jiꞌdyäcacsity acaꞌĉan, judyeyaꞌ maꞌjotyety rụijsis dyijyedyeꞌ, judyeyaꞌ jämꞌ ĉujcatity ĉụiꞌ, judyeyaꞌ rụij bäꞌyity cäc̣häꞌchutety Jenꞌ.

⁹ Chimeꞌdye jemoñeꞌ rụij cäc̣häꞌchuiꞌtyiꞌ mọꞌ rụijsis p̂eyacdyeꞌ seꞌves jiquej muꞌ, meꞌ raꞌ chat tupuj rụij jịꞌchiyacsi muꞌ rụijsis p̂eyacdyeꞌ, mọꞌyaꞌ raꞌ jiꞌmaꞌyacsi judyeyaꞌ rụijjeyacsebi dyijyedyeꞌ muꞌin fạ́quety Jenꞌsiꞌ p̂eyacdyeꞌ in, jemoñeꞌ meꞌ bäꞌyity in muꞌin raꞌ yụꞌtac in ĉọjcacsity in.

Muꞌin jam seꞌvety p̂eyacdyeꞌ in

¹⁰ Muꞌĉantyiꞌ daiꞌ in jam chiquety p̂eyacdyeꞌ in, dadamꞌ muꞌin judío in meꞌ tsanꞌ jụjjetety Jenꞌ in, fibiꞌ qui namꞌ p̂eyaqui in, seꞌ jaꞌyacsi muntyiꞌ in ĉụiꞌsiꞌyaꞌ dyijyedyeꞌ cäjsis muꞌin, jéyacsi in jemoñeꞌ seiꞌtac aꞌ muꞌin paj qui c̣hoñiꞌ in.

¹¹ Jiꞌdyäcacsebiva mọꞌ cäjsis p̂eyacdyeꞌ muꞌin meꞌtyitysiꞌ in ĉaĉaij na daiꞌ seꞌ jaꞌyacsi muꞌin anicjetety Jenꞌ in räjtumdye chätidyeꞌ muꞌin, judyeyaꞌ anic jaꞌyacsi in väñädyeꞌyaꞌ muꞌin, querec̣haveijdye mọmoꞌ meꞌ buꞌyi jịꞌchiyacsi in, anic där tsịꞌcaꞌ in.

¹² Jeshaꞌ yirity muꞌĉantyiꞌdye urucyaty Cretaĉantyiꞌ jiquej, muꞌ dyijyedyeꞌtumtyiꞌ jiquej p̂eyacsi ĉụiꞌtyiꞌ chätidyeꞌ muꞌ, yi muꞌ: "Uts Cretaĉantyiꞌ muntyiꞌ in yedyej ac̣hiꞌyacñity in, väväjñity in judyeyaꞌ toꞌomuntyiꞌ in judyeyaꞌ säsäcsaꞌ in", yi muꞌ.

¹³ Anicdye meꞌ muꞌin in Cretaĉantyiꞌ in, anic rụijsis ọij p̂eyacdyeꞌ muꞌ jiquej. Mọꞌdyes fercheꞌ fạraꞌjeĉunacseva paj qui jam meꞌ bäꞌyi in, paj qui rụij anicjete Jenꞌ in.

¹⁴ Chimeꞌdye jéyacseva paj qui jam dyijtucsebi urucyas p̂eyacdyeꞌ judíos muꞌin, mijam seꞌvacsebi p̂eyacdyeꞌ muꞌin murujrutyeptety in mọꞌ rụijsis p̂eyacdyeꞌ Jenꞌsiꞌ muꞌ.

¹⁵ Muꞌin c̣hiconꞌtactyiꞌ ĉojtyiꞌ in tupuj jebeiꞌ in jụꞌñis ĉụiꞌ mọmoꞌ säcsedyeꞌ, mọꞌ säcsedyeꞌ jam nash ac̣hiꞌtacsi, muꞌin na aꞌc̣hity ĉojtyiꞌ in, jam anicyity in, muꞌindyes in räj jedyeꞌ chuc jämꞌtaqui in, räj mọꞌ aꞌc̣his shupquiꞌ muꞌindyes in, ĉaĉaij na yedyej aꞌc̣his dyijyedyeꞌ muꞌin räjtumdye ĉojtyiꞌ muꞌin.

¹⁶ Meꞌ tsanꞌ yi in "Tsun nash cäc̣häꞌchute Jenꞌ", mijam qui namꞌ anic cäc̣häꞌchute in, jorojĉanyiꞌ ĉaĉaij na ac̣hiꞌ bäꞌyi in, anic ac̣hiꞌyity cạvacsi muꞌ Jenꞌ, mijam chimeꞌ chiquete in, mọꞌdyes jam tupuj rụij bäꞌyi in mijam tupuj nọ́tyetacsi in.