Tashches Timoteodyes 6 - Tsimane

Úñity in

¹ Miꞌin úñedyeꞌĉan bäꞌyity miꞌin jemoñeꞌ jämꞌjeĉunacsi raꞌ ayoꞌ miꞌin, judyeyaꞌ chicacsi chimeꞌ miꞌin. Jam jụijyaꞌ meꞌ bäꞌyi miꞌin, yoctyiꞌ raꞌ muntyiꞌ in cavibunac raꞌ in aꞌc̣his dyijyedyeꞌ miꞌin chat qui raꞌ muntyiꞌ in äcäijjete Jenꞌ miꞌindyesiꞌ, damꞌdye jämꞌ jam meꞌ miꞌin paj qui jam äcäijjibusinꞌ in jiꞌchäyitidyeꞌ tsun.

² Meꞌ tsanꞌ anicjetety Jenꞌ ayoꞌ jụijyaꞌ miꞌin, jam qui na ramꞌ äcäijjetinte ayoꞌ miꞌin. Mijam raꞌ yi miꞌin: "Jam yụ jemoñeꞌ chiquete uts ayoꞌ yụ ĉaĉaij na muꞌ chimeꞌ anicjetety Jenꞌ", jam raꞌ yi miꞌin. Mọꞌdyes q̂uinꞌ jemoñeꞌ dadamꞌ mujuꞌchaꞌ jämꞌ carijtaĉamꞌ, ĉaĉaij na mạꞌjeyacdyety miꞌin, muꞌtumdye anicjetinte Jenꞌ, muꞌ nọ́tyetinte miꞌin carijtacdyeꞌyaꞌ miꞌin. Ọij jiꞌchäyitidyeꞌ jéyacseva judyeyaꞌ jịꞌchiyacseva.

Jam raꞌ meꞌchujaꞌ cäjsis jiꞌchäyitidyeꞌ mijam raꞌ mạꞌjeja querec̣ha

³ Pạrej muꞌyaꞌ cäjsis jiꞌchäyitidyeꞌ tuiꞌtyiꞌ in, mọꞌ jam muꞌsiꞌ rụijsis p̂eyacdyeꞌ Jesucristos Ayoꞌsiꞌ tsun, mọꞌ jịꞌchiyacsejas tsun, muꞌin jam mọꞌ jịꞌchiyacsi in, yocves jiꞌchäyitidyeꞌ muꞌin.

^4-5 Tyi chuc meꞌ jịꞌchiyacsity in, itŝiꞌ jety dyijyedyeꞌ in, vaꞌbunyedyeꞌtum bäꞌyi in. Anic vaꞌves dyijyedyeꞌ muꞌin, mọmꞌ dyijtuiꞌ in mạꞌjeꞌ chuti in p̂eyacdyeꞌyaꞌ muꞌin. Tyi chuc jịjcatacsebi p̂eyacdyeꞌ muꞌin meꞌdye raꞌ muꞌin shupqui in chuti p̂eyacdyeꞌyaꞌ in judyeyaꞌ jiꞌmeꞌtyiyitidyeij dyijyedyeꞌ in, p̂iijtidyeij in, jam qui jämꞌjitidyeij in ac̣hiꞌ qui dyijtutidyeij in, mijam méquiꞌ chịj in, ĉaĉaij na jam rụijsis jedyeꞌ meꞌchuiꞌ in. Vaꞌve dyijyi in, jeñej raꞌ jiꞌchäyitidyeꞌyaꞌ mọꞌyaꞌ querec̣haij in, jedyeꞌtum yuꞌti in, meꞌ ĉúti in.

⁶ Tsun na maꞌjodyeꞌtum bäꞌjaꞌ jụijyaꞌ tsun, meꞌ tsanꞌ jayejjotaĉaꞌtyiꞌ jedyeꞌ tsun, jeñej buꞌyi qui namꞌ jedyeꞌtumtyiꞌ Jenꞌdyes shupquejaꞌ.

⁷ Jeshaꞌ, naꞌejaꞌyaꞌ tsun, mijam yiris jedyeꞌ tujaꞌ ọ́cheꞌ jaccheꞌ. Meꞌdye raꞌ chimeꞌ sänjaꞌyaꞌ, mijam raꞌ yiris jedyeꞌ cạjaꞌ.

⁸ Mọꞌdyes q̂uinꞌ tsun mọꞌyaꞌ säcsedyeꞌ jụijyaꞌ tsun judyeyaꞌ quịꞌsiꞌ tsun, tupuj maꞌjodyeꞌtum bäꞌjaꞌ tsun.

⁹ Muꞌin na mạꞌjeꞌ úcheꞌ jaccheꞌ dụriꞌñeꞌtyiꞌ jedyeꞌ in, muꞌin raꞌ meꞌtyity in jiꞌpenacdyeꞌ raꞌ jịꞌĉojtyeꞌ in, querec̣hamꞌ dyijtute in, mọꞌdyes qui aꞌc̣his dyijyedyeꞌ cạiꞌ in, chat qui Sọyosĉan jibej tŝọij in, chat qui raꞌ vaꞌtacdyeꞌ cạiꞌ in tsäquiꞌsisĉandyety raꞌ in.

¹⁰ Tyi chuc fer mạꞌjetety querec̣ha in, mọꞌ jiꞌshupqueyacsiꞌ jụꞌñis ĉụiꞌ mọmoꞌ juchaj. Pạrej muꞌyaꞌ dyijyi in fer mạꞌjete querec̣ha in, mọꞌ jiꞌyacchuyacsiꞌ Jenꞌsiꞌ p̂eyacdyeꞌ muꞌ, anic qui där ñịbeꞌ cạveꞌ in.

Junꞌ chuc raꞌ bäꞌyi in muꞌin anicjetety Jenꞌ in

¹¹ Mi Timoteo, jutactyiꞌ Jenꞌtyiꞌ, jam raꞌ meꞌ aꞌc̣his bäꞌyi mi, ĉaꞌjoyacseva muꞌin aꞌc̣his meꞌchuiꞌtyiꞌ dyijyedyeꞌ in, yụꞌtyevaꞌ ferdyeꞌ mi paj qui rụij bäꞌyi mi, räjĉan chiqueme Jenꞌ. Jam raꞌ farajjeꞌ anicyedyeꞌ mi, mạꞌjeyacsity raꞌ bäꞌyi mi, dyichchuta chimeꞌ, judyeyaꞌ jämꞌyedyeꞌtum raꞌ chimeꞌ mi.

¹² Jeñej yirity majmaijtyiꞌ muntyiꞌ anic jiꞌfercatity majmadyeꞌĉan paj qui bijodyeꞌ soꞌmac, meꞌ buꞌva chimeꞌ jiꞌfercata Jenꞌdyes, meꞌ raꞌ bijodyeꞌ soꞌmin Jenꞌ, muꞌ raꞌ Jenꞌyaꞌ yuꞌtyin, ĉaĉaij na meꞌ muꞌ Jenꞌ fayin, yoquiꞌdyemꞌ p̂eijteyaꞌ jiquej um muꞌ Jesucristo muntyisyaꞌ vej muꞌin, jam noiꞌyedyeꞌtum jéyacsi mi jiquej.

¹³ Q̂uinꞌ chat yụ jéye Jenꞌsiꞌyaꞌ vej muꞌ, muꞌ tsạꞌchucsity räj, judyeyaꞌ Jesucristosyaꞌ vej chimeꞌ muꞌ, muꞌ rụij p̂eyaquity Poncio Pilatoyaꞌ, yoquiꞌdyemꞌ jiꞌmeꞌtacyaꞌ muꞌsiꞌyaꞌ vej jiquej u.

¹⁴ Jenꞌsiꞌyaꞌ vej muꞌ yụ jéye paj qui yejĉoij chiqueꞌ mi mọꞌ p̂eyacdyeꞌ, yódyesdyemꞌ soꞌminsiꞌ jiquej u mi, jam raꞌ damꞌ farajjem, yejĉoij raꞌ meꞌ bäꞌyim, paj qui jam jụꞌñiij mi muntyisyaꞌ vej muꞌin, junꞌ quiꞌ chuc atsijbanyaꞌ muꞌ Jesucristo Ayoꞌ tsun.

¹⁵ Jenꞌdye raꞌ yụꞌtyeꞌ tupudyeꞌ jutacdyes muꞌ Jesucristodyes. Muꞌ Jenꞌ mujuꞌchaꞌ jämꞌyedyeꞌtumtyiꞌ Ayoꞌ, mumꞌ yirity ferdyeꞌtum ayoꞌbuꞌyity, ayoꞌ muꞌin räj ayoty in judyeyaꞌ fer buꞌyitytyiꞌ in.

¹⁶ Mumꞌ yirity meꞌ buꞌyi, mijam raꞌ jụꞌñisĉan mạyedyeꞌ säñi. Fersiꞌĉan mạijquedyeꞌ bäꞌyi muꞌ, mijam tyi c̣hẹiꞌyaꞌjete in, mijam tyi chimeꞌ nạijte in, muꞌ jam jorojĉan. ¡Muꞌ ramꞌ timaꞌqueja, paj jam mọtsiꞌ timaꞌcacdyemꞌ ferdyeꞌtumtyiꞌ Jenꞌ! Paj meꞌ.

¹⁷ Jéyacseva muꞌin jedyeꞌtumtyiꞌ in paj jam vaꞌbunyedyeꞌtum bäꞌyi in. Jéyacseva chimeꞌ paj qui jam mọtsitycheꞌ querec̣ha ĉúti in, jemoñeꞌ Jenꞌchemꞌ ĉúti in, muꞌ soꞌmisinꞌtyiꞌ räj jedyeꞌ chuc jemonjaꞌsiꞌ, anic mọjoꞌchaꞌ mọꞌcheꞌ soꞌmisinꞌ, paj qui maꞌjodyeꞌtum bäꞌjaꞌ tsun.

¹⁸ Jéyacseva chimeꞌ paj qui ñịbeꞌjitidyestum bäꞌyi in, paj qui ĉụiꞌsiꞌyaꞌ jedyeꞌ nọ́tacsi muntyiꞌ in, paj jam quijatutacsi muꞌin jayejjotaquity jedyeꞌ in.

¹⁹ Meꞌ raꞌ jụijyaꞌ bäꞌyi muꞌin jedyeꞌtumtyiꞌ in, muꞌin raꞌ tapjeꞌ in mạyedyeꞌches bijodyeꞌ in, mọꞌ aty jäꞌmiiꞌtyis mọꞌcheꞌ, muꞌcheꞌ raꞌ jiꞌbiseyacsi Jenꞌ muꞌin raꞌ tacchedyety in.

Jadyiquis voroꞌtacdyeꞌ Pablosiꞌ

²⁰ Mi Timoteo, jämꞌ chiquevaꞌ mọꞌ p̂eyacdyeꞌ, rụij raꞌ voroꞌtacsi mi. Jam raꞌ fibis cäc̣häꞌchucsebim p̂eyacdyeꞌ muntyis muꞌin, mọꞌ jeꞌ in chị́dyeꞌtumsiꞌ p̂eyacdyeꞌ, jeꞌsiꞌ in. Jam namꞌ meꞌ rụijsis, anic cäjsis mọꞌ p̂eyacdyeꞌ muntyis muꞌin.

²¹ Pạrej muꞌyaꞌ in aty jụjtacsebi p̂eyacdyeꞌ muꞌin, muꞌin aty vaꞌve shupqui in, aty farajjepte in Jenꞌsiꞌ p̂eyacdyeꞌ muꞌ. Yụ cọdyete Jenꞌ paj qui muꞌ räjĉan soꞌminac ñịbeꞌjitidyes.