Tashches Timoteodyes 3 - Tsimane

Junꞌ buty raꞌ muꞌin in ĉọjcacsity anicjetety Jenꞌ in

¹ Ọij anic rụijsis ọij p̂eyacdyeꞌ yiꞌ: Tyi chuc mạꞌjeꞌ yụꞌtac jụijyaꞌ paj qui ĉọjcacsity anicjetety Jenꞌ in, mọꞌ nash anic jämꞌsiꞌ carijtacdyeꞌ shupquiꞌ.

² Tyi chuc raꞌ meꞌ yụꞌtac jụijyaꞌ jemoñeꞌ tashcheꞌ rụij bäꞌyity, mijam raꞌ jụꞌñity, judyeyaꞌ yiritytyity p̂en. Jemoñeꞌ jämꞌ ĉujcatity ĉụiꞌ chimeꞌ judyeyaꞌ dyijyedyeꞌtumtyiꞌ chimeꞌ judyeyaꞌ chịj jiꞌdyäcacsity acaꞌĉan muꞌ judyeyaꞌ chịj chimeꞌ jịꞌchiyacsity Jenꞌsiꞌ p̂eyacdyeꞌ.

³ Mijam raꞌ tyeijtyiꞌ chimeꞌ, mijam raꞌ chucsity, mijam raꞌ fer dyijtutety querec̣ha, jemoñeꞌ jämꞌyity judyeyaꞌ jam ashyity.

⁴ Judyeyaꞌ jämꞌ ĉọjcaquity ạvaꞌ muꞌ judyeyaꞌ p̂en muꞌ, paj qui jämꞌ chiquete in, judyeyaꞌ ạ̈räjjete in.

⁵ Jeshaꞌ, yirity muntyiꞌ jam chịj ĉọjcaquity ạvaꞌ jụijyaꞌ, ¿junꞌ buꞌyi bu raꞌ tupuj ĉọjcacsi muꞌin anicjetety Jenꞌ in?

⁶ Jam raꞌ yụꞌtinte q̂uinꞌdyemꞌ jụjjetety Jenꞌ, areꞌĉa vaꞌbunyi ĉojtyiꞌĉan muꞌ yụꞌtacdyeꞌyaꞌ muꞌ. Meꞌ jụijyaꞌ muꞌ, vaꞌtacdyeꞌ raꞌ cạiꞌ muꞌ, yojdyemꞌ Sọyoꞌ jiquej o vaꞌtacdyeꞌ soꞌmac vaꞌbunyedyedyes mọꞌ.

⁷ Muꞌ raꞌ meꞌ ĉọjcacsity yụꞌtactyiꞌ, jemoñeꞌ tashcheꞌ rụij bäꞌyi muꞌ, jam jụꞌñity muꞌinsiꞌyaꞌ vej muꞌin jam anicjetety Jenꞌ in. Jam meꞌ jụijyaꞌ muꞌ, muꞌin raꞌ cạvepte in aꞌc̣his dyijyedyeꞌ muꞌ, Sọyosĉan raꞌ jibej tŝọij muꞌ meꞌĉandye raꞌ peñi.

Junꞌ buty raꞌ muꞌin in nọ́tacsity anicjetety Jenꞌ in

⁸ Meꞌdye raꞌ chimeꞌ, tyi chuc raꞌ yụꞌtac nọ́tacsity anicjetety Jenꞌ in, jemoñeꞌ jämꞌ ĉujcatity, judyeyaꞌ rụij p̂eyaquity. Chimeꞌdye jam tyeijtyiꞌ, mijam fer dyijtutety querec̣ha.

⁹ Jemoñeꞌ jämꞌ chị́yeptety Jenꞌsiꞌ p̂eyacdyeꞌ muꞌ, mọꞌ caminves jiquej, judyeyaꞌ jemoñeꞌ rụij cạiꞌtyiꞌ mọꞌ p̂eyacdyeꞌ, jämꞌtyiꞌtum ĉojtyiꞌ cäc̣häꞌchupte.

¹⁰ Jambiꞌdyemꞌ meꞌ yụꞌtinteyaꞌ paj qui nọ́tacsity, jemoñeꞌ tashcheꞌ chum jịꞌĉojtinte miꞌin junꞌ chuc bäꞌyi muꞌ. Rụij bäꞌyi jụijyaꞌ, tupuj yụꞌtinte.

¹¹ Meꞌdye chimeꞌ jemoñeꞌ mọꞌ p̂en muꞌin jemoñeꞌ dyijyedyeꞌtumsiꞌ, mijam raꞌ misis, jemoñeꞌ jämꞌ ĉujcatis judyeyaꞌ jịꞌcätses p̂eyacdyeꞌ.

¹² Muꞌin nọ́tacsity in jemoñeꞌ yiritytyity p̂en in, judyeyaꞌ jämꞌ ĉọjcaquity ạvaꞌ muꞌin judyeyaꞌ p̂en muꞌin.

¹³ Muꞌin nọ́tacsity in jämꞌ carijtacdyeꞌ Jenꞌdyes shupquiꞌyaꞌ muꞌin in, räj raꞌ muꞌin muntyiꞌ in cạvacsebi in jämꞌsiꞌ dyijyedyeꞌ muꞌin, chat qui raꞌ jam muyejjoij in jịꞌchiqueyacsiyaꞌ in mọꞌ p̂eyacdyeꞌ Jenꞌsiꞌ muꞌ, junꞌ chuc anicjete in muꞌ Cristo Jesús.

Mọjoꞌchaꞌ jämꞌsiꞌ p̂eyacdyeꞌ soꞌmisinꞌsiꞌ Jenꞌ

^14-15 Cavintumdye mạꞌjeꞌ ĉọcye. Meꞌ tsanꞌ meꞌ, vatyquej qui na ramꞌ jambiꞌdyemꞌ tupuj muꞌve yụ, mọꞌdyes yụ sáñeꞌ mídyes ọ́ĉan p̂eyacdyeꞌ paj qui chịjve mi junꞌ chuc raꞌ bäꞌjaꞌ tsun Jenꞌtyiꞌ ạvaꞌ muꞌ. Tsun vaj meij buꞌjaꞌ Jenꞌtyiꞌ ñuruꞌtyity tsun, muꞌ jam jụꞌñisĉan mạyedyeꞌ säñity. Tsun Jenꞌtyiꞌ ñuruꞌtyity tsun, tsun meꞌchupja p̂eyacdyeꞌ muꞌ, judyeyaꞌ rụij cäc̣häꞌchupja, chimeꞌdye tsun jéyacsejaty räj muntyiꞌ in judyeyaꞌ dyijtujaꞌ paj qui jam mọtsiꞌ mijam cäj jiꞌjäcac.

¹⁶ Där jämꞌsiꞌ ọij p̂eyacdyeꞌ Jenꞌsiꞌ muꞌ, mọꞌ caminves jiquej, mọꞌ jiꞌjäctes muꞌ Cristo, muꞌ anicjejaty tsun. Yiꞌ: Muꞌ aꞌtum jiꞌcaviti jeñej muntyiꞌ yi. Jenꞌsiꞌ Ạꞌedyeꞌ muꞌ vañinyedyeꞌyaꞌ muꞌ, mọꞌ jorojĉanjisinꞌ muꞌ Jenꞌtyiꞌ Ạvaꞌ muꞌ. Anjer muꞌin cạvepte ferdyeꞌ in. Räj buꞌyiꞌ jac jiꞌjäcte in, yịjyi muntyiꞌ jacchety in anicjete in, aty meꞌsiꞌ mạyedyeꞌcheꞌ qui Jenꞌyaꞌ jịjcaban muꞌ, muꞌcheꞌ qui bäꞌban muꞌ.