Biblia Todo Logo
Bìoball air-loidhne

- Sanasan -

Tashches Pedros 5 - Tsimane


Jiꞌchäyitidyeꞌ ĉọjcacsitydyes anicjetety Jenꞌ in

1 Q̂uinꞌ yụ raꞌ soꞌmeyac ọij p̂eyacdyeꞌ miꞌin ĉọjcacsity muꞌin anicjetety Jenꞌ in. Yụ chimeꞌdye meꞌ buꞌyi ĉọjcacsity, yụ cạveptety Cristos ñịbedyes jiquej muꞌ, yụ́mun raꞌ chimeꞌ penꞌdyetute aty jiꞌcavitiyaꞌ muꞌ, mạyedyeꞌchestum ferdyeꞌ atsijbanyaꞌ raꞌ muꞌ.

2 Q̂uinꞌ yụ jéyac, ĉọjcabimac Jenꞌtyiꞌ oveca buꞌyity in, ĉaĉaij na meꞌdyes carijtacdyeꞌ miꞌin paj qui ĉọjcacsi miꞌin. Jam raꞌ carij ĉọ́tiñeꞌ mọꞌ ĉọjcacsedyeꞌ miꞌin, mijam raꞌ querec̣hadyeꞌyas dyijtutiñeꞌ miꞌin, jämꞌsiꞌyamꞌ dyijyedyeꞌ ĉọjcacsejamꞌ, mọꞌ mạꞌjeꞌ Jenꞌ.

3 Jam qui na ramꞌ sonꞌ buꞌyi yuꞌti miꞌin, jam raꞌ jeñej ayoꞌ miꞌin, damꞌdye jämꞌ rụij bäꞌyi miꞌin paj qui muꞌin cäc̣häꞌchubunac in rụijsis dyijyedyeꞌ miꞌin, meꞌ raꞌ ĉọjcacsi miꞌin Jenꞌtyiꞌ oveca buꞌyity in.

4 Meꞌ jämꞌ ĉọjcacsi jụijyaꞌ miꞌin, atsijbanyaꞌ qui raꞌ muꞌ Tashchety Ĉujcasinꞌtyiꞌ tsun, muꞌ raꞌ soꞌminac bijodyeꞌ mọjoꞌchas jämꞌsiꞌ, mọꞌ bijodyeꞌ jam raꞌ jụꞌñisĉan mạyedyeꞌ mọtsis.


Jiꞌchäyitidyeꞌ anicjetetydyes Jenꞌ in

5 Miꞌin nanamuntyiꞌ seꞌvacsejamꞌ muꞌin ĉọjcacsity anicjetety Jenꞌ in. Jemoñeꞌ räj vaj meij seꞌvitidyeij miꞌin, jam raꞌ fibiꞌnacdyeꞌtum bäꞌyi miꞌin. Mọꞌdye p̂eyes mọꞌ sánacdyeꞌ yiꞌ: "Jenꞌ doroiꞌjeĉunacsi muꞌin vaꞌbunyity in, muꞌin na seꞌvetety in jam vaꞌbunyity in, muꞌin mọmoꞌ nọ́tyetacsi ñịbeꞌjitidyesyaꞌ muꞌ", yiꞌ sánacdyeꞌ.

6 Mọꞌdyes jämꞌ seꞌvemac muꞌ ferdyeꞌtumtyiꞌ Jenꞌ, muꞌ ayotumac, chat qui raꞌ aty mạꞌjeꞌyaꞌ muꞌ, muꞌ raꞌ mujuꞌchaꞌ buꞌyi yuꞌnac jiꞌcajñiyinac jedyeꞌ chuc jịꞌĉojtiñeꞌyaꞌ miꞌin.

7 Jémac Jenꞌ junꞌ chuc mọꞌ táris miꞌin, ĉútac muꞌcheꞌ miꞌin, ĉaĉaij na muꞌ jämꞌ dyijtunac miꞌin.

8 Doijrojamꞌ jämꞌ miꞌin, dyij buꞌvac, jämꞌ chimeꞌ ĉujcatac ĉaĉaij nash mọꞌyaꞌ mọꞌ Sọyoꞌ räjĉan fáquinacsiꞌ. Mọꞌ jeñej buꞌyiꞌ yirity pupujriꞌ dururujyity paiꞌ natity quevaqui jedyeꞌ chuc raꞌ jebeiꞌ, meꞌ buꞌyiꞌ mọꞌ Sọyoꞌ chimeꞌ mạꞌjeꞌ ac̣hiꞌsinꞌ tsun.

9 Fer buꞌjamꞌ anicyejamꞌ Jenꞌcheꞌ, jam ĉa yäcänyi Sọyoꞌtum miꞌin. Chịj tyuꞌ u miꞌin, muꞌin vojity miꞌin anicjetety Jenꞌ in, paiꞌ bäꞌyity úcheꞌ jaccheꞌ in, meꞌdye muꞌin chimeꞌ jịꞌĉojtyeꞌ in, yojdyemꞌ miꞌin u.

10 Damꞌdyety tyuꞌ u raꞌ ñịbedyes jịꞌĉojtiñeꞌ miꞌin, chat qui raꞌ muꞌ Jenꞌ mạꞌjeyacsity yuꞌtyinac qui raꞌ miꞌin muꞌcheꞌ qui raꞌ bäꞌyi miꞌin, räjĉan raꞌ penꞌdyetutinte muꞌ ayoꞌbuꞌyedyeꞌyaꞌ muꞌ, ĉaĉaij na Cristoty miꞌin. Muꞌdye Jenꞌ ñịbedyesyaꞌ miꞌin räj raꞌ jämꞌ yuꞌbunac ĉojtyiꞌĉan miꞌin paj qui fer buꞌyi bäꞌyi miꞌin, aty qui raꞌ jam yäcänyeban miꞌin.

11 Räjĉan buꞌyiꞌ raꞌ därsiꞌ ferdyeꞌ muꞌ mijam raꞌ jụꞌñisĉan mạyedyeꞌ mọtsiꞌ ayoꞌbuꞌyedyeꞌ muꞌ. ¡Paj meꞌ!


Jadyiquis voryetacdyeꞌ Pedros muꞌ

12 Uts Silvano ñútyin yụ sáñeꞌyaꞌ yụ ọij miquiꞌyas sánacdyeꞌ miꞌindyes q̂uinꞌ. Yụ nash chị́yete uts vojity anic jịꞌcätsety p̂eyacdyeꞌ. Yụ sáñeꞌ ọij miꞌindyes, yụ mạꞌjeꞌ jiꞌmaꞌyeyac Jenꞌyaꞌ miꞌin, chimeꞌdye jéyac ọij p̂eyacdyeꞌ p̂eijbites mọꞌ anicsis mạꞌjitidyes Jenꞌsiꞌ muꞌ. Fer buꞌyi bäꞌjamꞌ, yejĉojamꞌ dyijtubimac mạꞌjitidyes muꞌ.

13 Muꞌin chimeꞌ vorjinac in Babiloniaĉantyiꞌ anicjetety Jenꞌ in, muꞌin tsimꞌtactyiꞌ Jenꞌyaꞌ in yojdyemꞌ miꞌin u. Chimeꞌdye uts Marcos, muꞌ ạvaꞌ buꞌyity yụ, vorjinac chimeꞌ.

14 Miꞌin vaj meij raꞌ vorjitidyeij pụꞌsacdyeꞌtum miꞌin Jenꞌdyes. Yụ cọdyete Jenꞌ paj qui soꞌminac maꞌjodyeꞌ ĉojtyiꞌĉandyes miꞌin yósiꞌdyemꞌ Cristoty u miꞌin.

Copyright 2017 Nuevo Testamento en Chimane

Jen'si' P̂eyacdye'

New Tribes Mission
Lean sinn:



Sanasan