Tashches Pedros 4 - Tsimane

Jenꞌdyes bäꞌjaꞌ

¹ Cristos ñịbeꞌ cạveꞌ aꞌ muꞌ, meꞌdye raꞌ miꞌin chimeꞌ jịꞌĉojtiñeꞌ, mọꞌdyes q̂uinꞌ jäꞌmiiꞌtyejamꞌ dyijyedyeꞌĉan miꞌin, vatyquej raꞌ meꞌ ñịbeꞌ cạvetiñeꞌ. Tyi chuc ñịbeꞌ cạveꞌ aꞌĉan jụijyaꞌ muꞌ, aty jam jiꞌsäsdyi juchajyaꞌ,

² aty raꞌ jam meꞌchuiꞌ aꞌc̣his dyijyedyeꞌ aꞌsiꞌ muꞌ úcheꞌ jaccheꞌ, meꞌdye Jenꞌsimꞌ dyijyedyeꞌ meꞌchupte junꞌ quiꞌ chuc jadyic muꞌ.

³ Tashcheꞌ jiquej meꞌ bäꞌyi miꞌin jịjcatacsebi dyijyedyeꞌ miꞌin muꞌinsiꞌ in jam anicjetetysiꞌ Jenꞌ in. Q̂uinꞌ aty jam tupuj meꞌ bäꞌyi miꞌin, anic där aꞌc̣his meꞌchutiñeꞌ dyijyedyeꞌ jiquej miꞌin, voꞌvodyeꞌcheꞌ bäꞌyi jiquej miꞌin, judyeyaꞌ shuꞌquedyeꞌcheꞌ miꞌin, tyeijtyiꞌ miꞌin judyeyaꞌ feshtadyeꞌ räjĉan dyijtutiñeꞌ miꞌin, chimeꞌdye jämꞌtacdyeꞌcheꞌ ĉúti miꞌin, mọꞌ nash äcäijjeꞌ Jenꞌ, meꞌ bäꞌyi jiquej miꞌin.

⁴ Muꞌin na penꞌdyeꞌ jiquej miꞌin, q̂uinꞌ muꞌin in anic där äjjinac in meꞌquiꞌdye jịjcatacsebi miꞌin aꞌc̣his dyijyedyeꞌvun muꞌin, mọꞌdyes qui muꞌin ñäñinac in.

⁵ Muꞌin raꞌ meꞌtyity in Jenꞌ raꞌ cọdyetacsi p̂eyacdyeꞌ junꞌ chuc bäꞌyi jiquej in, q̂uinꞌ aty muꞌ jäꞌmiiꞌtyi jịꞌcäts yụꞌtacsi raꞌ juchadyeꞌyaꞌ räj muntyiꞌ in, jam yirity vaꞌ in, säñity in judyeyaꞌ tsạꞌtyiꞌ in.

⁶ Mọꞌdyes muꞌin säñity in seꞌvetaque jiquej in mọꞌ jämꞌsiꞌ p̂eyacdyeꞌ Jenꞌsiꞌ muꞌ paj qui tsạꞌ buꞌyi ạꞌedyeꞌĉan in, cätsdye Jenꞌtum in. Mọꞌ sänꞌdyeꞌ muꞌin vaꞌtacdyeꞌ shupquiꞌ muꞌin, cätsdye räj jacchety muntyiꞌ in.

⁷ Aty c̣hẹiꞌyaꞌ jadyic raꞌ räj ọij jac, jämꞌ ĉujcatac, rụij dyijyejamꞌ tupuj qui cọdyetinte Jenꞌ.

⁸ Anic dadamꞌ mọjoꞌchaꞌ jemonac q̂uinꞌ paj qui fer mạꞌjitidyeij bäꞌyi miꞌin. Vaj meij mạꞌjitiĉaꞌ bäꞌjaꞌ jụijyaꞌ tsun, aty raꞌ jam dyijtucsebijaꞌ juchaj muꞌin, meꞌ tsanꞌ daiꞌ quiꞌ juchatusinꞌ jụijyaꞌ in jam raꞌ dyijtucsebijaꞌ juchaj muꞌin.

⁹ Chimeꞌdye jiꞌdyäquitac ĉụiꞌsiꞌĉan acaꞌ miꞌin, jam raꞌ doroiꞌjiĉunꞌdyi miꞌin.

¹⁰ Jenꞌ räjenꞌdye soꞌminac carijtacdyedyes muꞌ, junꞌ junꞌ chuc soꞌminac, meꞌ meꞌ carijtaĉamꞌ nọ́tacsejam yoctyiꞌ in, ĉaĉaij na muꞌ meꞌdyes soꞌminac carijtacdyedyes miꞌin.

¹¹ Tyi chuc soꞌmac voroꞌtacdyedyes, paj rụij jéyacsi Jenꞌsiꞌ p̂eyacdyeꞌ muꞌ, tyi chuc soꞌmac nọ́tacsedyedyes, paj nọ́tacsi yoctyiꞌ in Jenꞌsiꞌyaꞌ ferdyeꞌ muꞌ. Meꞌ raꞌ carijtaqui miꞌin paj qui timaꞌcac muꞌ Jenꞌ Jesucristoscheꞌ tịj muꞌ. Räjĉan buꞌyiꞌ raꞌ därsiꞌ ferdyeꞌ muꞌ judyeyaꞌ ayoꞌbuꞌyedyeꞌ muꞌ, jam raꞌ jụꞌñisĉan mạyedyeꞌ mọtsimꞌ. Paj meꞌ.

Ñịbeꞌ cạveꞌ in anicjetety Jenꞌ in

¹² Chätidyeꞌ, mạꞌjeyacdyety yụ, jam raꞌ äjyi miꞌin därsiꞌ ñịbedyes jịꞌĉojtiñeꞌ jụijyaꞌ miꞌin, mijam raꞌ yi miꞌin: "¿Junꞌ buty meꞌ joꞌmes jịꞌĉojtyejaꞌ?"

¹³ Dadamꞌ maꞌjovac jịꞌĉojtacdyeꞌĉan miꞌin, yojdyemꞌ muꞌ Cristo ñịbeꞌ cạveꞌ jiquej u, meꞌ buꞌyidye raꞌ shupqui miꞌin. Meꞌ raꞌ chat dadamꞌ cätssistum maꞌjodyeꞌ shupqui miꞌin, atsijbanyaꞌ muꞌ Cristo aty jiꞌcavitiyaꞌ ferdyeꞌ muꞌ.

¹⁴ Ñäñinac jụijyaꞌ in cäc̣häꞌchucdyeꞌyaꞌ Cristo, maꞌjoij raꞌ mọmoꞌ miꞌin ĉaĉaij na mọꞌ jorojĉanyiꞌ Jenꞌsiꞌ Ạꞌedyeꞌ muꞌ, mọꞌ där mọjoꞌchaꞌ jämꞌsiꞌ, mọꞌ räjĉan tŝútyinacsiꞌ.

¹⁵ Areꞌĉa miꞌin paj jam yirity miꞌin vaꞌtacdyeꞌ cạtiñeꞌ ĉụiꞌsidyes juchaj miꞌin, paj jam mọꞌ ñịbeꞌ jiꞌcavinac. Paj jam ujacsedyeꞌ muntyiꞌ mijam shuꞌadyeꞌ mijam raꞌ yoctyisĉan jedyeꞌ jiꞌc̣hamꞌdyidyeꞌ, mọꞌ jiꞌmeꞌyinac.

¹⁶ Ñịbedyes qui namꞌ jịꞌĉojtiñeꞌyaꞌ Cristodyes, jam raꞌ tsị́catyetiñeꞌ miꞌin, yoshoropaij jétinte ramꞌ Jenꞌ ĉaĉaij na Cristoty aty miꞌin.

¹⁷ A toꞌ o raꞌ venchuiꞌ tupudyeꞌ, muꞌ raꞌ Jenꞌ tiyacchuiꞌ jịꞌcäts yụꞌtacsi juchadyeꞌyaꞌ muntyiꞌ in, ĉụiꞌtyiꞌ chum raꞌ muntyiꞌ muꞌ tashi jịꞌcäts yuꞌsinꞌ. Tsun chum jịꞌcäts yuꞌsinꞌ jụijyaꞌ, ¿junꞌ bu raꞌ muꞌin cạveꞌ in jam anicjeptety in mọꞌ jämꞌsiꞌ p̂eyacdyeꞌ Jenꞌsiꞌ muꞌ?

¹⁸ Mọꞌdye jiꞌjäqueꞌ sánacdyeꞌ, yiꞌ: "Ñịbedyes chum raꞌ jịꞌĉojtyeꞌ in muꞌin rụijtyity in chat qui raꞌ q̂uinꞌdyemꞌ c̣hoñi in." Meꞌ buꞌyi jụijyaꞌ muꞌin in, dadamꞌ raꞌ muꞌin ñịbeꞌ cạveꞌ in tsäquiꞌsisĉan muꞌin juchajtumtyiꞌ in jam irijjetety Jenꞌ in.

¹⁹ Mọꞌdyes tyi chuc ñịbedyes jịꞌĉojtyeꞌ jụijyaꞌ in, Jenꞌsiꞌyaꞌ dyijyedyeꞌ muꞌ, paj rụij bäꞌyi in paj ĉúti Jenꞌcheꞌ in, muꞌ jämꞌtacsity jiquej muꞌdye raꞌ ñutsjeyacsi judyeyaꞌ jämꞌ ĉọjcacsi ĉaĉaij na muꞌ räjĉan jịꞌcätseꞌtyiꞌ p̂eyacdyeꞌ muꞌ.