Tashches Pedros 3 - Tsimane

Junꞌ chuc raꞌ bäꞌyi p̂entum in

¹ Miꞌin p̂en miꞌin jemoñeꞌ seꞌvetinte vämtyiꞌ miꞌin, meꞌ raꞌ chat jụj jaꞌyetinte vämtyiꞌ miꞌin, jam anicjetety Jenꞌ jụijyaꞌ muꞌ. Meꞌ raꞌ tsanꞌ jam jétinteyaꞌ Jenꞌsiꞌ p̂eyacdyeꞌ muꞌ, chiquetinte qui namꞌ jụijyaꞌ miꞌin, tupuj jụj jaꞌyetinte muꞌ, ĉaĉaij na raꞌ muꞌ cavinac junꞌ chuc jämꞌ bäꞌyi miꞌin.

² Muꞌ raꞌ cavibunac rụijsis dyijyedyeꞌ miꞌin junꞌ chuc irijyedyeꞌtum bäꞌyi miꞌin, chat qui raꞌ jụjjibunac p̂eyacdyeꞌ vämtyiꞌ miꞌin.

³ Jam raꞌ mọꞌ mọmoꞌ dyijtutiñeꞌ miꞌin jämꞌ yuꞌtidyeꞌ aꞌ miꞌin, mijam raꞌ mọjoꞌchaꞌ dyijtutiñeꞌ mọꞌ miꞌin junꞌ chuc raꞌ jämꞌ yụꞌtaquiꞌ fin miꞌin, judyeyaꞌ quịꞌsiꞌ miꞌin, judyeyaꞌ shaporo miꞌin judyeyaꞌ sontica oro chimeꞌ, jam raꞌ joꞌmemes dyijtutiñeꞌ miꞌin.

⁴ Dyijtuvac mọjoꞌchaꞌ ĉojtyiꞌĉan mọꞌ jämꞌ yuꞌtidyeꞌ miꞌin, jämꞌsiꞌ dyijyedyeꞌ meꞌchuvac, jam raꞌ ashyiꞌ miꞌin, jämꞌyedyeꞌtum raꞌ bäꞌyiꞌ miꞌin, mọꞌ jämꞌ yuꞌtidyeꞌ jam mọtsis, mọꞌ nash maꞌjotyeꞌ Jenꞌ.

⁵ Meꞌ nash bäꞌyiꞌ jiquej in mọꞌin urucyaꞌ munsiꞌ in, cäc̣häꞌchutes Jenꞌ jiquej in. Mọꞌin ĉútis Jenꞌcheꞌ jiquej in chicaquiꞌ vämtyiꞌ jiquej in, mọꞌ mọꞌinsiꞌ jämꞌ yuꞌtidyeꞌ jiquej mọꞌin.

⁶ Meꞌ jiquej mọꞌ Sara chimeꞌ chicaquiꞌ vämtyiꞌ mọꞌ Abraham jiquej, yiꞌ jéyaquiꞌ "Mi nash ayoꞌ yụ", jéyaquiꞌ jiquej vämtyiꞌ mọꞌ. Meꞌdye raꞌ miꞌin chimeꞌ, yódyemꞌ Sara jiquej o, mọꞌsiꞌ raꞌ dyijyedyeꞌ cäc̣häꞌchubitiñeꞌ miꞌin q̂uinꞌ chimeꞌ, rụij bäꞌyiꞌ jụijyaꞌ miꞌin judyeyaꞌ jam noiꞌyedyeꞌtum bäꞌyiꞌ jụijyaꞌ miꞌin.

⁷ Miꞌin chimeꞌ sonꞌ miꞌin, jämꞌ bäꞌjamꞌ p̂entum miꞌin chimeꞌ jämꞌjeyaĉamꞌ judyeyaꞌ dyijyedyeꞌtum bäꞌjamꞌ. Jämꞌ bäꞌjamꞌ jämꞌjeyaĉamꞌ p̂en miꞌin, chịj miꞌin ọyaꞌyaꞌ nash p̂ensiꞌ ferdyemꞌ, jam jeñej sonꞌsiꞌ. Meꞌ tsanꞌ meꞌ, vaj cätsdye qui namꞌ p̂entum miꞌin Jenꞌyadyety miꞌin, muꞌyaꞌ raꞌ bäꞌyi miꞌin. Meꞌ jämꞌ bäꞌyi p̂entum jụijyaꞌ miꞌin jam raꞌ yiris jedyeꞌ ñutsjibunac cọdacdyeꞌ miꞌin Jenꞌcheꞌ.

Jam raꞌ jịꞌñibeꞌcac aꞌc̣hisyaꞌ dyijyedyeꞌ tsun

⁸ Jadyiquis raꞌ yụ jéyac: Vaj cäts cạjamꞌ dyijyedyeꞌ miꞌin, mạꞌjitidyeij raꞌ miꞌin judyeyaꞌ jam ashjitidyeij miꞌin ĉaĉaij na vaj vojity miꞌin. Jämꞌyedyeꞌtum raꞌ bäꞌyi miꞌin jam raꞌ vaꞌbunnacdyeꞌtum bäꞌyi miꞌin.

⁹ Jịꞌñibeꞌcanac jụijyaꞌ in, jam raꞌ chimeꞌjeyacsi miꞌin, fạraꞌñinac jụijyaꞌ in, jam raꞌ jiꞌpenꞌti miꞌin, Jenꞌchemꞌ ĉútiĉamꞌ cọdyemac Jenꞌ paj qui muꞌ nọ́tacsi, ĉaĉaij na meꞌdyety muꞌ Jenꞌ meꞌ fayinac miꞌin paj qui muꞌ ñútyinac chimeꞌ miꞌin.

¹⁰ Sánacdyeꞌ yiꞌ: "Tyi chuc mạꞌjeꞌ maꞌjodyeꞌtum bäꞌyi jụijyaꞌ, jemoñeꞌ jiꞌdyäcaqui ĉụiꞌsiꞌ nem muꞌ, paj jam mọꞌ chụꞌ muꞌ aꞌc̣his p̂eyacdyeꞌ p̂eijjanꞌ, mijam väñäij.

¹¹ Jemoñeꞌ yacchuiꞌ ac̣hiꞌ bäꞌyi, paj rụij qui bäꞌyi, jemoñeꞌ dyijtuiꞌ paj qui jämꞌjiti yoctyiꞌtum bäꞌyi.

¹² Muꞌ Ayoꞌ ĉọjcacsi muꞌin rụijtyity in, judyeyaꞌ seꞌvacsebi cọdacdyeꞌ muꞌin, muꞌin na ac̣hiꞌyity in Ayoꞌ doroiꞌjeyacsi", yiꞌ sánacdyeꞌ.

¹³ Jeshaꞌ yụ raꞌ jéyac, ferdyeꞌ yụꞌtacac paj qui rụij bäꞌyi jụijyaꞌ miꞌin, ¿tyi ĉaĉaij jịꞌñibeꞌcanac u? Itŝij.

¹⁴ Meꞌ tsanꞌ meꞌ, jịꞌñibeꞌcac miꞌin, meꞌ tsanꞌ rụij bäꞌyi miꞌin, maꞌjodyeꞌ qui na ramꞌ shupquiꞌ miꞌindyes. Jam raꞌ quijnacsi miꞌin muꞌin jịꞌñibeꞌcanactyiꞌ in, mijam raꞌ noiꞌyi miꞌin.

¹⁵ Cristomꞌ dyijtumac ĉojtyiꞌĉan miꞌin, ayotumac muꞌ. Jemoñeꞌ jäꞌmiiꞌtyi dyijyedyeꞌĉan miꞌin, paj qui tupuj vortacsi miꞌin vatyquej raꞌ jínac jụijyaꞌ in: "¿Junꞌ dash meꞌ jụjjetinte Jenꞌ?" Meꞌ jínac jụijyaꞌ in, jemoñeꞌ chịj rụij vorjeĉunacsi miꞌin.

¹⁶ Jämꞌyedyeꞌtum raꞌ jéyacsi miꞌin, jam raꞌ vaꞌbunjeĉunacsi miꞌin. Räjĉan raꞌ rụijsis dyijyedyeꞌ cạtiñeꞌ, paj qui jam jiꞌyoquiti ĉojtyiꞌĉan miꞌin. Meꞌ jụijyaꞌ miꞌin tsị́caij raꞌ in muꞌin ñäñinactyiꞌ in, judyeyaꞌ väñädyeꞌyaꞌ c̣họcoꞌtyinactyiꞌ in, ĉaĉaij na raꞌ cavinac in junꞌ chuc rụij bäꞌyi miꞌin anicjetintety Cristo miꞌin.

¹⁷ Jenꞌ meꞌ mạꞌjeꞌyaꞌ paj qui jịꞌñibeꞌcac tsun, rụij bäꞌjaꞌyaꞌ tsun, jämꞌ mọꞌ shupquiꞌ muꞌsiꞌyaꞌ vej muꞌ, meꞌ na jụijyaꞌ vaꞌtacdyeꞌ cạjaꞌ aꞌc̣hisyaꞌ dyijyedyeꞌ ĉụiꞌsiꞌ tsun, mọꞌ chat jam jämꞌ.

¹⁸ Muꞌdye Cristo yirimꞌ ijac tsunsidyesiꞌ juchaj jiquej, mijam raꞌ jụꞌñisĉan mạyedyeꞌ quivij ijac muꞌ. Meꞌ tsanꞌ rụijtyity muꞌ, ñịbedyes qui namꞌ jịꞌĉojtyeꞌ tsundyesiꞌ ac̣hiꞌyejatydyes tsun, paj qui jämꞌ yuꞌsinꞌ Jenꞌyaꞌ. Ijacyaꞌ jiquej muꞌ, mọꞌ sänꞌdyes aꞌ muꞌ säñiꞌ, chat qui Ạꞌedyeꞌyaꞌ Jenꞌsiꞌ muꞌ vañinyeban muꞌ.

¹⁹ Ạꞌedyeꞌyaꞌ muꞌ voroꞌtacsequi muꞌin ĉärꞌtactyiꞌ ạꞌedyeꞌ in.

²⁰ Muꞌin jam anicyaquety jiquej in yoquiꞌdyemꞌ muꞌ Noé jämꞌte covamba u. Meꞌquiꞌ tsanꞌ muꞌ Jenꞌ bisacsevaꞌjoijtyiꞌ jiquej, jam qui namꞌ anicjete in. Juñucsimꞌ anicjete in, q̂uenꞌĉan mọmoꞌ siti muꞌĉan in, muꞌcheꞌ jiꞌcajñeꞌ ojñiꞌ in.

²¹ Mọꞌ ojñiꞌ jiquej jeñej buꞌyiꞌ jiꞌchojtidyeꞌ, mọꞌ jiꞌchojtidyeꞌ jịꞌĉoiꞌ c̣honꞌdyeꞌ tsun q̂uinꞌ, vañinyedyeꞌyaꞌ Jesucristos muꞌ c̣honjaꞌ tsun. Mọꞌ jam c̣hiconꞌjibusinꞌ aꞌ tsun, ĉojtyiꞌ qui namꞌ c̣hiconꞌjibusinꞌ paj qui rụijsisyaꞌ dyijyedyeꞌ cọdaĉaꞌ Jenꞌcheꞌ tsun.

²² Q̂uinꞌ muꞌ aty mạyedyeꞌcheꞌ jịjcaban, tacve buꞌban Jenꞌyaꞌ muꞌ, muꞌcheꞌ qui ayoꞌbuꞌban räj ayodyes in, judyeyaꞌ anjerdyes in judyeyaꞌ fer buꞌyitydyes in, meꞌ buꞌyi ayoꞌbuꞌyi muꞌ q̂uinꞌ.