Tashches Pedros 2 - Tsimane

¹ Mọꞌdyes yacchuvac mọꞌ yoc yoc dyijyedyeꞌ aꞌc̣his miꞌin, judyeyaꞌ väñädyeꞌ chimeꞌ miꞌin, mijam raꞌ ac̣hiꞌ dyijyity miꞌin jämꞌ yuꞌti miꞌin, mijam raꞌ jịꞌfajquiyitidyeij dyijyedyeꞌ miꞌin judyeyaꞌ mijam raꞌ p̂iijtidyeij bäꞌyi miꞌin.

² Yojdyemꞌ joijnoꞌ u fer mạꞌjebiꞌ tseꞌsiꞌ tashin mọꞌ, meꞌdye miꞌin chimeꞌ fer mạꞌjebimac anicsis p̂eyacdyeꞌ Jenꞌsiꞌ muꞌ, mọꞌ jeñej buꞌyiꞌ säcsedyeꞌ paj qui p̂añi Jenꞌdyes miꞌin c̣honꞌdyeꞌĉan miꞌin.

³ Meꞌ raꞌ miꞌin ĉaĉaij na aty chị́yetinte muꞌ Ayoꞌ där jämꞌyity muꞌ.

Cristo tsạꞌchucsity mij buꞌyi

⁴ C̣hẹiꞌyaꞌjemac muꞌ Ayoꞌ, muꞌ jeñej buꞌyity mij tsạꞌchucsity. Yódyemꞌ muꞌin acaijtyiꞌ jiquej u in vaꞌquecte yirity acadyety mij in, meꞌdye chimeꞌ muntyiꞌ in meꞌjetedye muꞌin vaꞌquecte Ayoꞌ in. Muꞌ qui namꞌ Jenꞌ jatsimꞌti, anic yaꞌity Jenꞌsiꞌyaꞌ vej muꞌ.

⁵ Meꞌ buꞌyidye miꞌin chimeꞌ jeñej buꞌyi tsạꞌtyiꞌ mij acadyety jämꞌtyes Jenꞌ, yóĉandyemꞌ bäꞌyiꞌ Ạꞌedyeꞌ umꞌ. Meꞌ buꞌjaꞌ tsun Jenꞌsiꞌ buꞌjaꞌ acaꞌ muꞌ, mọꞌdyes bäꞌjamꞌ Jenꞌdyes miꞌin junꞌ chuc muꞌ mạꞌjeꞌ. Jenꞌsiꞌyaꞌ vej muꞌ carijtaqui raꞌ miꞌin, jeñej buꞌyi cudyitity jiquej in muꞌcheꞌ, jam qui namꞌ cuꞌdyeꞌ soꞌmetinte, yocsiꞌdye tuyetinte miꞌin ĉojtyiꞌĉansiꞌ, mọꞌ maꞌjotyes Jenꞌ. Jesucristoscheꞌ tịj muꞌ, meꞌ soꞌmetinte.

⁶ Mọꞌdyes yiꞌ sánacdyeꞌ: "Yụ nash tsimꞌte yirity mij, muꞌ mujuꞌchaty tapchuquity acadyety, anic yaꞌijtyiꞌ muꞌ mij, Jerusalénĉan yụꞌte yụ. Tyi chuc anicjetety in muꞌ mij buꞌyity muꞌin raꞌ jam junꞌ fibidyes shupqui in."

⁷ Miꞌin na anicjetintety Jenꞌ anic yaꞌij miꞌindyety shupqui, yoctyiꞌ na in vaꞌquecte mọmoꞌ in, yiꞌ ọij sánacdyeꞌ: "Muꞌ mij vaꞌquectety acaijtyiꞌ jiquej in, muꞌdye q̂uinꞌ mujuꞌchaꞌ yụꞌtac acadyety", yiꞌ sánacdyeꞌ.

⁸ Chimeꞌdye yocsiꞌ sánacdyeꞌ yiꞌ: "Uts mij meꞌdyety yụꞌtac taꞌchitidyety muntyity in paj qui muꞌcheꞌ tach tŝọij in", yiꞌ sánacdyeꞌ. Muꞌin meꞌ tach tŝọijtyiꞌ in ĉaĉaij na muꞌin vaꞌquequety mọꞌ p̂eyacdyeꞌ in, muꞌdye Jenꞌ jäꞌmiij meꞌ buꞌyi yụꞌtacsi muꞌin meꞌtyity in.

⁹ Miꞌin qui namꞌ tsimꞌtactyiꞌ Jenꞌyaꞌ, anic Jenꞌdyety miꞌin, jeñej buꞌyi cudyitity Jenꞌcheꞌ miꞌin, meꞌ carijtaqui Ayodyes miꞌin, judyeyaꞌ chimeꞌ ĉụiꞌtyiꞌ muntyiꞌ muꞌ, meꞌ buꞌyi pạrejjinac miꞌin. Muꞌ fayinac miꞌin judyeyaꞌ yuꞌnac miꞌin paj qui jịꞌchiqueyacsi muntyiꞌ miꞌin mọꞌ därsiꞌ mạꞌjitidyes muꞌ, junꞌ chuc muꞌ jiꞌc̣honnac miꞌin tojmadyeꞌĉan bäꞌyity jiquej miꞌin, q̂uinꞌ qui namꞌ yuꞌtyinac mạij buꞌyedyeꞌĉan miꞌin.

¹⁰ Tashcheꞌdyemꞌ jiquej miꞌin jam Jenꞌtyiꞌ miꞌin, q̂uinꞌ qui namꞌ aty Jenꞌtyiꞌ muntyiꞌ miꞌin. Tashcheꞌ jiquej jam ñịbeꞌ ĉúnac miꞌin, q̂uinꞌ qui namꞌ aty ñịbeꞌ ĉúbunac miꞌin.

Úñejaꞌ Jenꞌdyes

¹¹ Chätidyeꞌ mạꞌjeyacdyety yụ, miꞌin jam úĉandyety miꞌin, ọij jam ĉụiꞌsiꞌ bäꞌyedyeꞌ miꞌin. Mọꞌdyes yụ ferdyeꞌyaꞌ jéyac miꞌin, yacchuvac aꞌc̣his dyijyedyeꞌ aꞌsiꞌ miꞌin, mọꞌ räjĉan fáquitis jämꞌsiꞌtum dyijyedyeꞌ ạꞌedyes miꞌin.

¹² Jemoñeꞌ rụij bäꞌyi miꞌin muꞌinsiꞌyaꞌ vej muꞌin jam anicjetetyyaꞌ Jenꞌ in. Meꞌ rụij bäꞌyi jụijyaꞌ miꞌin, meꞌ raꞌ tsanꞌ ñäñinac in, väñädyeꞌyaꞌ jiꞌmeꞌtyinac in, muꞌin qui na raꞌ cavibunac in jämꞌsiꞌ dyijyedyeꞌ miꞌin, chat qui raꞌ aty ayijyaꞌ tupudyeꞌ, jịꞌcäts yụꞌtacsi raꞌ muꞌ Jenꞌ muꞌin raꞌ chimeꞌ timaꞌquete in miꞌindyes.

¹³ Cäc̣häꞌchucdyeꞌyaꞌ Ayoꞌ miꞌin, jemoñeꞌ muꞌin chicacsi räj jacchety ayoꞌ miꞌin. Chiquemac muꞌ mujuꞌchaty ayoꞌ,

¹⁴ judyeyaꞌ muꞌin uyaꞌyaty chimeꞌ in, ĉaĉaij na muꞌin yụꞌtac in mujuꞌchatyyaꞌ ayoꞌ paj qui muꞌin soꞌmacsi vaꞌtacdyeꞌ in muꞌin ac̣hiꞌ bäꞌyity in, judyeyaꞌ paj qui timaꞌcacsi in muꞌin rụij bäꞌyity in.

¹⁵ Jenꞌ mạꞌjeꞌ paj qui rụij bäꞌyi miꞌin, paj qui meꞌ jiꞌc̣huꞌc̣huyacsebi p̂eyacdyeꞌ muꞌin itŝiꞌ jety dyijyedyeꞌ in.

¹⁶ Aty c̣honꞌdyeꞌĉan Jenꞌdyes miꞌin, aty jam úñedyeꞌĉan miꞌin. Meꞌ tsanꞌ meꞌ jam qui na ramꞌ cäj dyijyi miꞌin judyeyaꞌ yi miꞌin: "Jeshaꞌ, tsun aty c̣honjaꞌ, q̂uinꞌ junꞌ chuc mạꞌjejaꞌ bäꞌjaꞌ tsun tupuj meꞌ jämꞌtaĉaꞌ", jam raꞌ meꞌ yi miꞌin. Damꞌdye jämꞌ rụij bäꞌyi miꞌin, yojdyemꞌ Jenꞌtyiꞌ úñity umꞌ, meꞌ bäꞌjamꞌ.

¹⁷ Ạ̈räjjeyacsevac räj muntyiꞌ in, mạꞌjeyacsejamꞌ muꞌin chimeꞌ anicjetety Jenꞌ in, irijyevac Jenꞌcheꞌ chimeꞌ, chiquemac muꞌ mujuꞌchaty ayoꞌ Romaĉantyiꞌ.

Yojdyemꞌ ñịbedyes jịꞌĉojtyeꞌ Cristo u, meꞌdye raꞌ tsun chimeꞌ

¹⁸ Miꞌin úñity jämꞌyedyeꞌtum chiquemac ĉụiꞌtyiꞌ ayoꞌ miꞌin, jam raꞌ muꞌin mọmoꞌ chicacsi miꞌin, muꞌin jämꞌyity in judyeyaꞌ jam ashyity in, chiquemac chimeꞌ muꞌin voroꞌshaquity ayoꞌ miꞌin.

¹⁹ Jeshaꞌ, jịꞌñibeꞌcac jụijyaꞌ miꞌin, meꞌ tsanꞌ itŝity juchaj miꞌin, jemoñeꞌ dyijyimꞌ Jenꞌcheꞌ miꞌin, mọꞌ muꞌ maꞌjotyeꞌ Jenꞌ.

²⁰ Ĉụiꞌsiꞌ juchaj jiꞌmeꞌtyinac vaꞌtacdyeꞌyaꞌ jụijyaꞌ miꞌin, meꞌ tsanꞌ tyumꞌchutidyeꞌtum jiꞌcajñetiñeꞌ jụijyaꞌ miꞌin, mọꞌ jam jämꞌ shupquiꞌ miꞌindyes. Rụij chat bäꞌyi jụijyaꞌ miꞌin, meꞌ tsanꞌ meꞌ jịꞌñibeꞌcanac jụijyaꞌ in, tyumꞌchutidyeꞌtum jiꞌcajñetiñeꞌ jụijyaꞌ miꞌin, mọꞌ maꞌjotyeꞌ Jenꞌ.

²¹ Mọꞌ nash dyijyedyeꞌ Jenꞌsiꞌ muꞌ fayinacyaꞌ jiquej, muꞌ mạꞌjeꞌ paj qui miꞌin cäc̣häꞌchubitinte Jesucristos dyijyedyeꞌ muꞌ, junꞌ chuc muꞌ tyumꞌchutidyeꞌtum jiꞌcajñise ñịbedyes muꞌ, yoquiꞌdyemꞌ ñịbeꞌ cạvise tsundyes jiquej u.

²² Muꞌsiꞌ jam méquis juchaj muꞌ mijam väñädyeꞌ muꞌ.

²³ Meꞌ tsanꞌ fạraꞌñete jiquej in, muꞌ qui namꞌ jam vortacsi, meꞌ tsanꞌ jịꞌñibeꞌcate in, jam qui namꞌ junꞌ c̣hojvacsi, Jenꞌchemꞌ ĉúti muꞌ paj qui ñutsjajiti, muꞌdye Jenꞌ rụij jịꞌcäts yụꞌtacsity juchadyeꞌyaꞌ muntyis muꞌin.

²⁴ Muꞌdye Cristo ĉụiꞌsiꞌĉan aꞌ muꞌ cabusinꞌ juchaj tsun, croshcheꞌ ijac muꞌ, muꞌtum sänjaꞌ tsun paj qui aty jam junꞌsinꞌ juchaj tsun, paj qui rụij bäꞌjaꞌ Jenꞌdyes. Muꞌ nash jịꞌĉojtyeꞌ areꞌredyeꞌ tsundyesiꞌ paj qui tsạꞌ buꞌjaꞌ Jenꞌdyes.

²⁵ Miꞌin jiquej yojdyemꞌ moñis oveca o, meꞌ jiquej monꞌdyeꞌĉan bäꞌyi miꞌin, q̂uinꞌ qui namꞌ aty camanꞌyeban miꞌin Ayoꞌyaꞌ, q̂uinꞌ aty cäc̣häꞌchutinte, muꞌ nash ĉujcanac miꞌin judyeyaꞌ ñutsjinac chimeꞌ.