Santiagos 5 - Tsimane

Santiago p̂eyeyacsi jedyeꞌtumtyiꞌ in

¹ Seꞌvibutiĉamꞌ ọij p̂eyacdyeꞌ miꞌin jedyeꞌtumtyiꞌ. Tárejamꞌ miꞌin, äjyejamꞌ chimeꞌ, därsiꞌ tyuꞌ raꞌ ñịbedyes cạvetiñeꞌ miꞌin.

² Fibidyes mọmoꞌ jedyeꞌ miꞌin meꞌchutiñes, räj raꞌ mọꞌ mọtstaqui miꞌin, jämꞌtyiꞌvun quịꞌsiꞌ miꞌin, räj ramꞌ tạbaij.

³ Chimeꞌdye fibidyety querec̣ha miꞌin, muꞌ äꞌñejijcatintety q̂uinꞌ miꞌin, ĉaĉaij na jadyiquis tupudyeꞌ aty chaꞌshejaꞌ. Räj raꞌ buntaqui querec̣ha miꞌin, oro judyeyaꞌ plata miꞌin. Muꞌjinac raꞌ jiꞌmeꞌtyiyinac Jenꞌ, muꞌsiꞌ raꞌ chicäjrädyemꞌ jeñej buꞌyiꞌ raꞌ tŝij shupquimꞌ mọꞌ raꞌ jiꞌmunac miꞌin.

⁴ Jeshaꞌ pạrej shuꞌatucsi úñity miꞌin quịjodyeꞌĉan carijtaquity in, tári muꞌin otejjeyaqui in ĉaĉaij na jam rụij jiyaꞌdyeyacsi miꞌin. Mọꞌ raꞌ jiꞌmeꞌtyiyinac ĉaĉaij na muꞌ mujuꞌchaty Jenꞌ aty seꞌvacsebi táredyeꞌ muꞌin, junꞌ chuc ñịbeꞌ jịꞌcavacsi miꞌin querec̣hatumtyiꞌ miꞌin.

⁵ Miꞌin ĉụiꞌ mọmoꞌ maꞌjotyiti bäꞌyi miꞌin úcheꞌ jaccheꞌ, mọꞌ mọmoꞌ dyijtutiñeꞌ miꞌin feshtaij bäꞌyi miꞌin, mijam yiris jedyeꞌ jayejjotaqui miꞌin. Anic jämꞌ räjĉan säcsi miꞌin, yojdyemꞌ babes vaca shushdyes o, meꞌ miꞌin, meꞌdyes vaꞌtacdyedyety raꞌ miꞌin.

⁶ Jiꞌmeꞌtacsi jiꞌujacsi miꞌin muꞌin itŝity juchaj in, muꞌin jam junꞌ ĉụiꞌ ñutsjitity in.

Jemoñeꞌ tyumꞌchutidyeꞌtum bäꞌjaꞌ

⁷ Vojity, tyumꞌchutac bisacdyeꞌyaꞌ Ayoꞌ tsun, yojdyemꞌ muꞌ quịjoijtyiꞌ muntyiꞌ u tyumꞌchutidyeꞌtum biseꞌ mọꞌ quịjodyeꞌĉansiꞌ vädacdyeꞌ sicdyeꞌ muꞌ, Chimeꞌdye biseꞌ tashches añej judyeyaꞌ jäquis, junꞌ quiꞌ chuc shupquiꞌ mọꞌ vädacdyeꞌ.

⁸ Meꞌ raꞌ miꞌin, tyumꞌchutidyeꞌtum bäꞌjamꞌ, fer buꞌjamꞌ miꞌin, atoꞌ o c̣hẹiꞌyaꞌ ayidyeꞌ Ayos muꞌ.

⁹ Vojity, jam ĉa vaj meij ñäñitidyeij p̂iijtidyeij miꞌin, areꞌĉa vaꞌtacdyeꞌ cạtyetinte miꞌin Ayoꞌ, atyuꞌ c̣hẹiꞌyaꞌyeban muꞌ Jenꞌ jịꞌcäts yụꞌtacsity juchadyeꞌyaꞌ muntyiꞌ in.

¹⁰ Vojity yụ, dyijtucsejamꞌ miꞌin muꞌin jasoꞌmitity p̂eyacdyeꞌ Jenꞌ jiquej in, muꞌin Ayoꞌsiꞌcheꞌ tịj p̂eyaquity jiquej in. Cäc̣häꞌchucsebibadac dyijyedyeꞌ muꞌin, junꞌ chuc tyumꞌchutidyeꞌtum ñịbedyes jiꞌcajñeꞌ jiquej in.

¹¹ Jeshaꞌ tsun anic maꞌjoij cạvacsejaꞌ muꞌin meꞌ tyumꞌchutaquety ñịbedyesyaꞌ jiquej in. Miꞌin aty seꞌveptinte mọꞌ tyumꞌchutidyeꞌ Jobvunsiꞌ muꞌ, därsiꞌĉan ñịbedyes tyumꞌchuti jiquej muꞌ. Chịj miꞌin jäquiꞌve qui muꞌ Jenꞌ där jañutyibun, ĉaĉaij na muꞌ Ayoꞌ tsun där jämꞌyity judyeyaꞌ ñịbeꞌ ĉọcsity chimeꞌ.

¹² Vojity yụ, yụ jéyac, yụꞌtiñeꞌ p̂eyacdyeꞌ jụijyaꞌ miꞌin, jam raꞌ yụꞌtiñeꞌ tsäquiꞌyistumsiꞌ p̂eyacdyeꞌ miꞌin, paj qui chịj in anicsis mọꞌ p̂eyacdyeꞌ miꞌin. Jam raꞌ jiꞌjäctiñeꞌ mạyedyeꞌcheꞌ, mijam raꞌ jiꞌjäctiñeꞌ ọij jac chimeꞌ, mijam raꞌ yocsiꞌ jiꞌjäctiñeꞌ chimeꞌ paj qui chịj in anicsis mọꞌ p̂eyacdyeꞌ miꞌin. Junꞌsiꞌ chuc yụꞌtiñeꞌ p̂eyacdyeꞌ jụijyaꞌ, yi miꞌin, "Meꞌ raꞌ yụ", jam jụijyaꞌ, yi raꞌ miꞌin: "Jam raꞌ meꞌ yụ." Jemoñeꞌ jịꞌcätsetiñeꞌ, jam raꞌ tsäquiꞌyistum p̂eyacdyeꞌ yụꞌtiñeꞌ miꞌin areꞌĉa vaꞌtacdyeꞌ cạtyetinte miꞌin muꞌ Jenꞌ.

Cọdacdyeꞌ Jenꞌcheꞌ areꞌreijtyidyes in

¹³ Tyi chuc miꞌinĉantyiꞌ in carijsis jịꞌĉojtyeꞌtyiꞌ in, jemoñeꞌ muꞌin meꞌtyity in cọdaqui Jenꞌcheꞌ in. Vatyquej muꞌyaꞌ jụijyaꞌ maꞌjoijtyiꞌ in, jemoñeꞌ jimaqui Jenꞌdyes in.

¹⁴ Vatyquej pạrej muꞌyaꞌ areꞌreijtyiꞌ jụijyaꞌ in, jemoñeꞌ muꞌin fayacsi muꞌin ĉọjcacsity anicjetety Jenꞌ in, chat qui raꞌ muꞌin cọdyete Jenꞌ in areꞌreijtyidyes in, judyeyaꞌ Ayoꞌsiꞌ tịj jiꞌjäcbite in taiꞌteyaꞌ in aseijteyaꞌ.

¹⁵ Anicyedyeꞌtum cọdaqui Jenꞌcheꞌ jụijyaꞌ in, muꞌ raꞌ areꞌreijtyiꞌ jäquijcate in, chäĉän raꞌ muꞌ, Ayoꞌ raꞌ sacjebajte. Juchaj na raꞌ mọꞌyaꞌ jụijyaꞌ muꞌ, Jenꞌ raꞌ vayacjajibubun.

¹⁶ Mọꞌdyes vaj meꞌ p̂eijvac ĉụiꞌsiꞌ juchaj miꞌin. Chimeꞌdye vaj meij cọdyemac Jenꞌ miꞌin, paj qui muꞌ jiꞌchäĉunac miꞌin. Muꞌ rụijtyity muntyiꞌ fer cọdyete Jenꞌ jụijyaꞌ, anic ferdyeꞌtum shupquiꞌ cọdacdyeꞌ muꞌ, jụjjajibuti raꞌ cọdacdyeꞌ muꞌ.

¹⁷ Elías jiquej, meꞌ tsanꞌ muꞌ muntyiꞌ mọmoꞌ yojdyemꞌ tsun u, muꞌ qui namꞌ fer cọdyete Jenꞌ paj qui jam añeiꞌ. Rụijdye meꞌ, chibin yómodyeꞌ judyeyaꞌ jäbän ịvaj, meꞌquiꞌ jam damꞌ tŝọiꞌ añej.

¹⁸ Chimuꞌdye cọdyebajte Jenꞌ, chat qui muꞌ Jenꞌ jịꞌtŝobanꞌ mọꞌ añej judyeyaꞌ mọꞌ jac jiꞌchäĉanꞌ sacacdyeꞌ in.

¹⁹ Vojity, vatyquej pạrej muꞌyaꞌ farajjeptety in rụijsis majmi Jenꞌsiꞌ muꞌ, juchajĉan bäꞌban, jemoñeꞌ miꞌin fercheꞌ jịꞌcaꞌñebajtinte Jenꞌyaꞌ.

²⁰ Där jämꞌsiꞌ dyijyedyeꞌ muꞌ, muꞌ jịꞌcaꞌñebajtetysiꞌ, seꞌvepte jụijyaꞌ muꞌsiꞌ p̂eyacdyeꞌ muꞌ, chat qui raꞌ muꞌ Jenꞌ vayacjajibuti juchaj muꞌ, judyeyaꞌ qui raꞌ jajiꞌc̣hondyi paj qui jam säñi muꞌ.