Santiagos 4 - Tsimane

Jam raꞌ mạꞌjejaꞌ jacches jedyeꞌ

¹ ¿Junas buty shupquiꞌ mọꞌ fáquitidyeꞌ miꞌin judyeyaꞌ chutidyeꞌ miꞌin? Ĉụiꞌsiꞌĉan dyijyedyeꞌ aꞌc̣his miꞌin, mọꞌĉan shupquiꞌ chutidyeꞌ ĉojtyiꞌĉan miꞌin.

² Meꞌ tsanꞌ fer mạꞌjetiñeꞌ jedyeꞌ miꞌin, jam qui namꞌ dạctiñeꞌ, mọꞌdyes qui dyijtutiñeꞌ ijatidyeꞌ miꞌin, paj qui dạctiñeꞌve. Fer mạꞌjetiñeꞌ jedyeꞌ, jam qui namꞌ tupuj dạctiñeꞌ miꞌin, mọꞌdyes jịꞌfajquiyitidyeij miꞌin meꞌĉandye chutidyeij miꞌin, ĉaĉaij na jam cọdyetinte Jenꞌ miꞌin mọꞌdyes qui meꞌ jam dạctiñeꞌ.

³ Meꞌ tsanꞌ cọdyetinte Jenꞌ, jam qui namꞌ rụij cọdaqui miꞌin, mọꞌdyes qui muꞌ Jenꞌ jam jụjtyinac, ĉaĉaij na cäj cọdyetinte miꞌin, cäjsischeꞌ dyijyedyeꞌ cọdaqui miꞌin, paj qui ĉụiꞌsiꞌ dyijyedyeꞌ cạtiñeꞌ miꞌin.

⁴ Jeñej voꞌvoiꞌsiꞌ p̂en miꞌin, jam vämtyis dyijyedyeꞌ cạptes, meꞌ buꞌyi miꞌin, jam Jenꞌsiꞌ dyijyedyeꞌ cạptinte miꞌin, jacches mọmoꞌ dyijyedyeꞌ cạtiñeꞌ. ¿Jam chịj u miꞌin mạꞌjejaꞌ jụijyaꞌ jacches jedyeꞌ, fáquitiĉaꞌ Jenꞌtum, meꞌ shupquejaꞌ?

⁵ Jam fibiꞌ mọꞌ sánacdyeꞌ yiꞌ: "Mọꞌ Ạꞌedyeꞌ yuꞌtyiyisinꞌsiꞌ tsun muꞌ Jenꞌ, jam mạꞌjeꞌ paj qui jiꞌc̣hamꞌsinꞌ yocsiꞌyaꞌ jedyeꞌ", yiꞌ.

⁶ Muꞌ na Jenꞌ dadamꞌ fer ñútyisinꞌ ñịbeꞌjitidyesyaꞌ muꞌ. Sánacdyeꞌ yiꞌ: "Jenꞌ doroiꞌjeĉunacsi muꞌin vaꞌbunnaquity in, muꞌin na seꞌvetety in, jam vaꞌbunnaquity in, muꞌin mọmoꞌ nọ́tyetacsi ñịbeꞌjitidyesyaꞌ muꞌ."

⁷ Mọꞌdyes chiquemac Jenꞌ, fer buꞌjamꞌ dyich buꞌjaꞌ Sọyoꞌyaꞌ, mijam raꞌ damꞌ jụjbitiñeꞌ dyijyedyeꞌ mọꞌ, meꞌ jụijyaꞌ bäꞌyi miꞌin, yacchunac raꞌ mọꞌ.

⁸ C̣hẹiꞌyaꞌjemac Jenꞌ chat qui raꞌ muꞌ chimeꞌ c̣hẹiꞌyaꞌjinac. Juchajtumtyiꞌ miꞌin farajjevac juchaj miꞌin, yojdyemꞌ favac un o, meꞌjevac mọꞌ, c̣hiconꞌjevac. Miꞌin päräꞌ dyijyedyeꞌ cạtiñety, Jenꞌsiꞌ judyeyaꞌ jacches, jemoñeꞌ miꞌin jämꞌ yụꞌtaqui ĉụiꞌtyiꞌ ĉojtyiꞌ miꞌin.

⁹ Tárejamꞌ juchadyes miꞌin, aty raꞌ jam maꞌjoij miꞌin, paj meꞌquiꞌdye meꞌchutiñeꞌ dyisdyeꞌ miꞌin, tárejamꞌ juchadyes miꞌin.

¹⁰ Ọyaꞌyaꞌjeyacac dyijyedyeꞌ miꞌin Ayoꞌsiꞌyaꞌ vej muꞌ, chat qui raꞌ Jenꞌ mujuꞌchaꞌ yuꞌtyinac.

Jam raꞌ ñinacsejaꞌ chätidyeꞌ tsun

¹¹ Vojity, jam raꞌ vaj meij ñäñitidyeij miꞌin. Tyi chuc ñiñete vojity muꞌ, judyeyaꞌ dyijtupte juchaj muꞌ, jam muꞌ mọmoꞌ ñiñete, Jenꞌsiꞌmun yụꞌtacdyeꞌ ñiñepte, meꞌ buꞌyiꞌ mọꞌ shupquiꞌ, jam jämꞌ ĉọpte Jenꞌsiꞌ yụꞌtacdyeꞌ muꞌ, ñiñepte mọmoꞌ. Ñiñejaꞌ jụijyaꞌ mọꞌ yụꞌtacdyeꞌ, aty qui jam chiquejaꞌ mọꞌ, ñiñejaty qui shupquejaꞌ tsun.

¹² Yirity mọmoꞌ muꞌ Jenꞌ yụꞌtyety yụꞌtacdyeꞌ, muꞌdyemꞌ yirity jịꞌcäts yụꞌtacsity juchadyeꞌyaꞌ muntyiꞌ in. Muꞌdyemꞌ tupuj jiꞌc̣honsinꞌ tsun judyeyaꞌ chimuꞌdye tupuj vaꞌquicsinꞌ tsun. Jeshaꞌ miꞌin jam yụꞌtactyiꞌ paj qui ñiñetinte ĉụiꞌtyiꞌ chätidyeꞌ miꞌin.

Jam raꞌ fibiꞌnaĉaꞌ areꞌĉa yirisĉan mạyedyeꞌ tsun

¹³ Seꞌvibutiĉamꞌ ọij jämꞌ p̂eyacdyeꞌ yụ. Pạrej muꞌyaꞌ yi miꞌin: "Q̂uinꞌ vatyquej raꞌ nojno yocsiꞌĉan bäꞌyedyeꞌ jịjcaij tsun, yiris raꞌ yómodyeꞌ muꞌĉan raꞌ carijtaqui tsun, jiꞌmincaquity raꞌ jedyeꞌ tsun judyeyaꞌ raꞌ yaꞌij tsun, bijoyequi raꞌ querec̣ha muꞌĉan tsun", yi miꞌin.

¹⁴ Mijam chịj miꞌin junꞌ chuc raꞌ nojno jiyiꞌ mạyedyeꞌ. Miꞌin jeñej buꞌyi jịꞌsaꞌ, meꞌ buꞌyi miꞌin, mọꞌ jam men buꞌyis, meꞌtuquimꞌ mọtsis, meꞌdye miꞌin chimeꞌ cavin mọtsi.

¹⁵ Damꞌdye jämꞌ jemoñeꞌ yi miꞌin: "Jenꞌ yíyaꞌ meꞌ raꞌ carijtaĉaꞌ jambiꞌdyemꞌ sänjaꞌ jụijyaꞌ tsun", jemoñeꞌ meꞌ yi miꞌin.

¹⁶ Miꞌin qui namꞌ vaꞌbunyedyeꞌtum p̂eyaqui miꞌin. Därsiꞌ mọꞌ juchaj shupquiꞌ meꞌ vaꞌbunnaĉaꞌ jụijyaꞌ tsun.

¹⁷ Chị́yebijaty jụijyaꞌ rụijsis dyijyedyeꞌ Jenꞌsiꞌ muꞌ, jedyeꞌ chuc muꞌ mạꞌjeꞌ, jam qui namꞌ meꞌ junꞌtaĉaꞌyaꞌ, juchaj mọꞌ shupquiꞌ tsun.