Santiagos 2 - Tsimane

Vaj cäts raꞌ cạvacsejaꞌ räj muntyiꞌ in

¹ Vojity yụ, miꞌin anicjetintety Jesucristo, muꞌ mạijquedyeꞌtum bäꞌyity Ayoꞌ tsun, jemoñeꞌ vaj cäts cạvacsi muntyiꞌ miꞌin, jam raꞌ uyaꞌyaꞌ cạvacsi pạrej miꞌin.

² Vatyquej säsnac jụijyaꞌ päräꞌ muntyiꞌ in vajmuꞌyaijĉan miꞌin. Yirity jedyeꞌtumtyiꞌ muntyiꞌ jämꞌtyiꞌĉantyiꞌ quịꞌsiꞌ judyeyaꞌ sontica oromꞌ. Yoctyiꞌ na atsij anic ñịbety, aꞌc̣hityĉantyiꞌ quịꞌsiꞌ seijbotyĉan.

³ Miꞌin tiĉunꞌtinteyaꞌ jämꞌtyiꞌĉantyiꞌ quịꞌsiꞌ, jétinte: "Úcheꞌ bäꞌva jämꞌsiꞌcheꞌ bäꞌyaquis", jétinte jụijyaꞌ miꞌin. Muꞌ na ñịbety jam meꞌjetinte, jétinte mọmoꞌ: "Rụiꞌquenꞌ tyä muꞌyam, jam jụijyaꞌ, mụijyaꞌ p̂utsquenꞌ mi", jétinte miꞌin.

⁴ Meꞌ yi jụijyaꞌ miꞌin, mọꞌ jiꞌĉuyinac aty jam vaj cäts cạvacsi muntyiꞌ miꞌin, mijam rụijsisyaꞌ dyijyedyeꞌ cạvacsi miꞌin.

⁵ Vojity mạꞌjeyacdyety yụ, seꞌvevac jämꞌ ọij p̂eyacdyeꞌ. Muꞌ Jenꞌ tsimꞌtacsi muꞌin ñịbety in muntyisyaꞌ vej muꞌin, anicyedyeꞌyaꞌ qui namꞌ muꞌin jedyeꞌtumtyiꞌ shupqui in Jenꞌsiꞌyaꞌ vej muꞌ. Muꞌdye yụꞌtacsi paj qui Jenꞌyadyety in ayoꞌbuꞌyedyeꞌĉan muꞌ yoj jeyacsidyemꞌ jiquej u. Yi muꞌ Jenꞌ muꞌin raꞌ meꞌ soꞌmac in yódyetydyemꞌ mạꞌjetety u in.

⁶ Miꞌin qui namꞌ jam meꞌ, äcäijjeyacsi miꞌin muꞌin ñịbety in. Yụ raꞌ jéyac: ¿tyi ĉaĉaij meꞌtyinac u? ¿Tyi ĉaĉaij jiꞌmeꞌtyinac ayoꞌyaꞌ u?

⁷ ¿Jam adac muꞌin jedyeꞌtumtyiꞌ in? Muꞌin ñiñepte in Jesucristos tịj muꞌ, mọꞌ jämꞌsiꞌ tsundyes, mọꞌ jiꞌjäcbitintes miꞌin yoquiꞌdyemꞌ jụjjetinteyaꞌ jiquej u.

⁸ Yiꞌ ọij mọjoꞌchas yụꞌtacdyeꞌ sánacdyeꞌches, yiꞌ mọꞌ: "Mạꞌjeyacsejamꞌ fer chätidyeꞌ miꞌin, yojdyemꞌ ĉụiꞌ mạꞌjiti u miꞌin", yiꞌ. Chiquetiñeꞌ jụijyaꞌ miꞌin ọij yụꞌtacdyeꞌ, där raꞌ jämꞌ shupqui miꞌin.

⁹ Jam qui namꞌ meꞌ jụijyaꞌ miꞌin, jam vaj cäts cạvacsi muntyiꞌ jụijyaꞌ miꞌin, shupquiꞌ raꞌ vatyquej juchaj miꞌintum mọꞌ yụꞌtacdyeꞌ jiꞌmeꞌtyinac juchadyeꞌyaꞌ miꞌin.

¹⁰ Meꞌ tsanꞌ yirity muntyiꞌ chiqueꞌyaꞌ räj mọꞌ yụꞌtacdyeꞌ jiꞌchäyitidyeꞌ, yiris qui namꞌ jam chiqueꞌyaꞌ mọꞌ, därsiꞌ juchaj soꞌmete Jenꞌ. Meꞌ tsanꞌ yiris mọmoꞌ jiꞌchäyitidyeꞌ jam chiquejaꞌyaꞌ tsun, jeñej qui räjenꞌ mọꞌsiꞌ jiꞌchäyitidyeꞌ mọꞌ vaꞌquecbija tsun, meꞌ shupquiꞌ mọꞌ jiꞌmeꞌtacdyeꞌ tsun.

¹¹ Muꞌ Jenꞌ jísinꞌtyiꞌ jiquej: "Jam raꞌ voꞌvoij miꞌin", chimuꞌdye yi: "Jam raꞌ ujatinte muntyiꞌ miꞌin", yi. Jam qui tsanꞌ voꞌvoij jụijyaꞌ miꞌin, ujatinte qui namꞌ muntyiꞌ jụijyaꞌ miꞌin, vaj meꞌdye juchatutiñeꞌ mọꞌ yụꞌtacdyeꞌ, mọꞌ jiꞌmeꞌtyinac juchadyeꞌyaꞌ miꞌin.

¹² Jemoñeꞌ rụij bäꞌyi miꞌin judyeyaꞌ rụij p̂eyaĉamꞌ chimeꞌ, ĉaĉaij na mọꞌdye raꞌ Jenꞌsiꞌ p̂eyacdyeꞌ muꞌ, mọꞌ jiꞌfarajjiyisinꞌsiꞌ, mọꞌdye raꞌ jịꞌcäts yuꞌnac.

¹³ Jam ñịbeꞌ ĉọcsejaty jụijyaꞌ, meꞌdye raꞌ Jenꞌ jam ñịbeꞌ ĉúsinꞌ tsun chimeꞌ. Ñịbeꞌ na ĉọcsejaty jụijyaꞌ tsun, chat qui raꞌ ñịbeꞌ ĉúsinꞌ, jịꞌcäts yụꞌtacsiyaꞌ juchadyeꞌyaꞌ muntyiꞌ in.

Jam raꞌ p̂eyacdyeꞌyamꞌ anicyejaꞌ Jenꞌcheꞌ

¹⁴ Vojity, jam nọ́tacdyeꞌtum bäꞌjaꞌ jụijyaꞌ tsun, meꞌ tsanꞌ yéjaꞌ tsun, yụ anicjete Jenꞌ, fibis mọꞌ shupquiꞌ anicyedyeꞌ tsun, mọꞌ fibis anicyedyeꞌ tsun jam tupuj jiꞌc̣honsinꞌ tsun.

¹⁵ Muꞌyaꞌ pạrej vojity miꞌin jayejtyity quịꞌsiꞌ jụijyaꞌ muꞌin judyeyaꞌ chimeꞌ säcsedyeꞌ muꞌin.

¹⁶ Jéyacsi jụijyaꞌ miꞌin: "Jäjämꞌyeban ĉa miꞌin, jämꞌ raꞌ c̣hục säcseban miꞌin judyeyaꞌ raꞌ jämꞌtyiꞌĉan quịꞌsiꞌ cäbun miꞌin", vatyquej meꞌ jéyacsi jụijyaꞌ miꞌin, jam qui namꞌ soꞌmacsi jụijyaꞌ miꞌin jedyeꞌ chuc jayejjotaqui in. Memꞌ ĉụiꞌ jéyacsiyaꞌ miꞌin fibis mọꞌ shupquiꞌ p̂eyacdyeꞌ miꞌin, mọꞌ jam junꞌ tupuj nọ́tacsiꞌ.

¹⁷ Meꞌ buꞌyiꞌ chimeꞌ anicyedyeꞌ tsun, p̂eyacdyeꞌyaꞌ mọmoꞌ yéjaꞌ jụijyaꞌ tsun, jam qui namꞌ nọ́tacdyeꞌtum bäꞌjaꞌ jụijyaꞌ tsun, fibis mọmoꞌ shupquiꞌ mọꞌ anicyedyeꞌ tsun.

¹⁸ Vatyquej muꞌyaꞌ yirity yi jụijyaꞌ: "Jam vaj cäts buꞌjaꞌ tsun, yirity anicjejaty Jenꞌ, yoctyiꞌ na nọ́tacdyeꞌtum bäꞌjaty", yi muꞌ jụijyaꞌ. Jam na meꞌ, muꞌin anicyity mọmoꞌ in, jam qui namꞌ nọ́tacdyeꞌtum jụijyaꞌ in, jam jorojĉan mọꞌ anicyedyeꞌ muꞌin. Nọ́tacdyeꞌtum bäꞌyi jụijyaꞌ in, mọꞌ jịꞌĉocsebiꞌ anicyedyeꞌ muꞌin.

¹⁹ Vatyquej chimeꞌ yirity yi, "Yụ anicjeꞌ ọij p̂eyacdyeꞌ yiꞌsiꞌ: Muꞌyaꞌ yirity mọmoꞌ Jenꞌ." Anic tsanꞌ jämꞌ mọꞌ anicyedyeꞌ muꞌ, tacaꞌ qui namꞌ jayej anicyedyemꞌ. Jeshaꞌ, mọꞌin chimeꞌ sọyoꞌ in mọꞌ anicjeꞌ in, junꞌ chuc muꞌyaꞌ yirity mọmoꞌ Jenꞌ, meꞌ tsanꞌ meꞌ, mọꞌ qui namꞌ jam tupuj jiꞌc̣honacsiꞌ, noc̣hoꞌc̣hoyequiꞌ mọmoꞌ in quijnacdyeꞌtum Jenꞌyaꞌ in.

²⁰ Anic cäj cạiꞌ dyijyedyeꞌ mi. Q̂uinꞌ yụ raꞌ jịꞌchiqueyeye, jam rụij bäꞌjaꞌ jụijyaꞌ tsun, fibis mọꞌ shupquiꞌ anicyedyeꞌ tsun.

²¹ Dyijtuja vóshiꞌ tsun Abraham. Jenꞌ rụij jayuꞌti muꞌ Abraham chicacdyeꞌyaꞌ muꞌ soꞌmete tsanꞌ ạvaꞌ muꞌ Isaac jiꞌcoꞌshayacdyety tsanꞌ jiquej.

²² Mọꞌ jiꞌchäquiyisinꞌ tsun Abraham jam anicjete mọmoꞌ, chimeꞌdye chiquete, chicacdyeꞌyaꞌ muꞌ mọꞌyaꞌ jịꞌcätsaqui anicyedyeꞌ muꞌ.

²³ Mọꞌdyes qui cạ̈tsiꞌ mọꞌ sánacdyeꞌ yiꞌ: "Abraham anicjete Jenꞌ meꞌdyes qui muꞌ Jenꞌ rụij jayuꞌti". Chimeꞌdye yi muꞌ Jenꞌ: "Abraham penꞌdyeꞌ yụ."

²⁴ Ọij jorojĉanjisinꞌ, jam anicyedyeꞌyaꞌ mọmoꞌ muꞌ Jenꞌ rụij yuꞌsinꞌ tsun, jemoñeꞌ nọ́tacdyeꞌtum bäꞌjaꞌ chimeꞌ.

²⁵ Meꞌdye mọꞌ chimeꞌ jiquej Rahab, meꞌtaquis p̂en, Jenꞌ rụij jayuꞌti nọ́tacdyeꞌyaꞌ mọꞌ, ĉaĉaij na mọꞌ tiĉunacsiꞌ muꞌin cạvequety jac jiquej in. Jijmuꞌsacsiꞌ chum judyeyaꞌ qui yocve jịjijcayacsebanꞌ.

²⁶ Jeshaꞌ, muntyis aꞌ tsun, itŝiꞌ tsạꞌsiꞌ jụijyamꞌ, aty mọꞌ säñis aꞌ. Meꞌdye mọꞌ chimeꞌ anicyedyeꞌ tsun, jam nọ́tacdyeꞌtum bäꞌjaꞌtyiꞌ Jenꞌdyes jụijyaꞌ tsun, fibis mọꞌ shupquiꞌ anicyedyeꞌ tsun jam yaꞌiꞌ.