Santiagos 1 - Tsimane

Tashches voryedyeꞌ Santiagos muꞌ

¹ Yụ nash Santiago, úñity Jenꞌtyiꞌ muꞌ judyeyaꞌ Jesucristoty muꞌ, Ayoꞌ tsun. Yụ nash vorjeyac miꞌin yiriꞌtac päräꞌ jiyity ñuruꞌtyity miꞌin Israeltyiꞌ vóshiꞌ miꞌin, räj meꞌsiꞌdye miꞌin anicjetintety Jenꞌ miꞌin, räj buꞌyity ọij jac, yụ vorjeyac miꞌin.

Dyijyedyeꞌ soꞌmisinꞌsiꞌ Jenꞌ

² Vojity, yụ jéyac miꞌin, meꞌ tsanꞌ jụꞌñis ĉụiꞌ yịjyi ñịbedyes jịꞌĉojtiñeꞌyaꞌ miꞌin, maꞌjodyeꞌtum ramꞌ jiꞌcajñetiñeꞌ.

³ Miꞌin aty chịj muꞌ Jenꞌ ñịbedyesyaꞌ chäyibunac anicyedyeꞌ miꞌin. Jam farajjecajcatiñeꞌ mọꞌ anicyedyeꞌ miꞌin, jịꞌĉojtiñeꞌyaꞌ miꞌin mọꞌ ñịbedyes, mọꞌyaꞌ raꞌ chịj miꞌin tyumꞌchutidyeꞌtum bäꞌyi miꞌin.

⁴ Jam raꞌ damꞌ farajjetiñeꞌ tyumꞌchutidyeꞌ miꞌin, meꞌ bäꞌyi jụijyaꞌ miꞌin, chat qui raꞌ jam jụꞌñiij Jenꞌsiꞌyaꞌ vej miꞌin, mijam qui raꞌ jayej ferdyeꞌ miꞌin chimeꞌ paj qui rụij bäꞌyi Jenꞌdyes miꞌin.

⁵ Pạrej mọꞌyaꞌ tacaꞌ jayej dyijyedyeꞌ miꞌin, jemoñeꞌ cọdyetinte Jenꞌ, chat qui raꞌ muꞌ soꞌminac dyijyedyeꞌ rụijsis. Muꞌ soꞌmacsi räj muntyiꞌ in, mijam damꞌ quijatutacsi dyijyedyeꞌ soꞌmacsi, mijam chimeꞌ fạraꞌjeĉunacsi muꞌin cọdyetety in.

⁶ Jemoñeꞌ qui namꞌ anicyedyeꞌtum cọdyetinteyaꞌ muꞌ Jenꞌ, mijam raꞌ yoc dyijyi miꞌin, ĉaĉaij na jam anicyedyeꞌtum cọdacdyeꞌ jụijyaꞌ tsun, jeñej raꞌ vacamꞌquis pufej, junaꞌ ĉụiꞌ jịjcaiꞌ cạiꞌ tyiꞌmu, meꞌ raꞌ shupquejaꞌ tsun, yoc yoc dyijyejaꞌ jụijyaꞌ tsun.

⁷ Tyi chuc meꞌ dyijyity, muꞌ raꞌ jam junꞌ jụjtac Ayoꞌyaꞌ,

⁸ ĉaĉaij na jam yiris mọmoꞌ dyijyedyemꞌ, cäts mạyedyeꞌ jịjcaiꞌ yocsiꞌ yocsiꞌ dyijyedyeꞌ cạiꞌ muꞌ.

⁹ Muꞌin ñịbety anicjetety Jenꞌ in, tupuj qui namꞌ maꞌjodyeꞌtum bäꞌyi in, ĉaĉaij na muꞌ Jenꞌ mujuꞌchaꞌ yụꞌtacsi.

¹⁰ Muꞌin na jedyeꞌtumtyiꞌ anicjetety Jenꞌ in, meꞌ tsanꞌ uyaꞌyaꞌ yụꞌtacseban Jenꞌ, tupuj qui namꞌ maꞌjodyeꞌtum bäꞌyi in. Jeshaꞌ, muꞌin jedyeꞌtumtyiꞌ muntyiꞌ in, räj meꞌchuiꞌsiꞌ jedyeꞌ in, mọꞌ jeñej buꞌyiꞌ däräs jáme mọꞌin, meꞌtuquimꞌ jiꞌcavitimꞌ judyeyaꞌ qui räj viritimꞌ.

¹¹ Aty areꞌyechuij jụijyaꞌ muꞌ tsun, q̂uinꞌdyemꞌ subinꞌyejoiꞌ däräꞌsiꞌ jáme mọꞌ, chat qui jọꞌchaiꞌ mọꞌ, meꞌquiꞌdye veꞌej mọꞌ. Meꞌ raꞌ chimeꞌ muꞌ jedyeꞌtumtyiꞌ muntyiꞌ, meꞌ tsanꞌ fer carijtaqui, vatyquej raꞌ mọmoꞌ mọtsi muꞌ mọꞌtumdye jedyeꞌ muꞌ.

Jịꞌĉojtacdyeꞌ tsun judyeyaꞌ jiꞌpenacdyeꞌ tsun

¹² Anic maꞌjoij muꞌin jam peñity in jịꞌĉojtyeꞌyaꞌ in ñịbedyes. Aty meꞌsiꞌ jiꞌcajñeꞌyaꞌ in mọꞌ, Jenꞌ qui raꞌ yụꞌtacsi paj qui muꞌyaꞌ bäꞌyi in, mọꞌ raꞌ bijodyeꞌ muꞌin soꞌmacsis raꞌ Jenꞌ yódyetydyemꞌ mạꞌjetety u in.

¹³ Junꞌsiꞌ chuc ayijyaꞌ jiꞌpenacdyes dyijyedyeꞌ, jam raꞌ yi miꞌin: "Jenꞌdye meꞌ soꞌmin yụ meꞌdyes mọꞌ jịꞌĉojtyeꞌ yụ", jam raꞌ meꞌ yi miꞌin. Muꞌ Jenꞌ jam tupuj joꞌmesyaꞌ jiꞌmaꞌyac aꞌc̣hisyaꞌ dyijyedyeꞌ, mijam muꞌ chimeꞌ joꞌmesyaꞌ jiꞌmaꞌyeyacsi aꞌc̣hisyaꞌ dyijyedyeꞌ.

¹⁴ Jiꞌmaꞌyisinꞌ aꞌc̣hisyaꞌ dyijyedyeꞌ jụijyaꞌ tsun, mọꞌ jam yocves jijtuiꞌ dyijyedyeꞌ, ĉụiꞌtyiꞌĉan ĉojtyiꞌ tsun mọꞌĉan naꞌiꞌ.

¹⁵ Jämꞌtujcacajaꞌ jụijyaꞌ tsun mọꞌ aꞌc̣his dyijyedyeꞌ tsun, chat qui raꞌ meꞌĉandye juchayejaꞌ, a na jiijjaꞌ juchayejaꞌyaꞌ, chat qui raꞌ ayij mọꞌ sänꞌdyeꞌ.

¹⁶ Vojity mạꞌjeyacdyety yụ, jam raꞌ yirity ĉụiꞌ väñätuti miꞌin.

¹⁷ Räj mọꞌ ñịbeꞌyedyes jämꞌsiꞌ meꞌchujaꞌsiꞌ tsun, räj mọꞌ mạyedyeꞌches jijtuiꞌ, Jenꞌ nash ñịbeꞌjisinꞌ tsun, muꞌ jämꞌtyety mạyedyeꞌches mạijyis. Muꞌ nash räjĉan buꞌyi, mijam damꞌ yocve dyijyi muꞌ, muꞌ Jenꞌ jam jeñej mạyedyeꞌches mạijyis in, pạrej jam mạijchusinꞌ in, muꞌ na Jenꞌ räjĉan muꞌ mạijchusinꞌ.

¹⁸ Muꞌ Jenꞌ ĉụiꞌsiꞌyaꞌ dyijyedyeꞌ muꞌ tsạꞌchusinꞌ judyeyaꞌ chimeꞌ ạvatusinꞌ tsun anicyedyeꞌyaꞌ rụijsis p̂eyacdyeꞌ muꞌ, judyeyaꞌ chimeꞌ tsimꞌsinꞌ paj qui tsun tashcheꞌ buꞌjaꞌ yuꞌsinꞌ muꞌ, jam jeñej yoctyiꞌ in.

Rụijsis cäc̣häꞌchucdyeꞌ muꞌ Jenꞌ

¹⁹ Mạꞌjeyacdyety vojity yụty miꞌin cavintum seꞌvaĉamꞌ miꞌin, jam qui na ramꞌ tashcheꞌ tashcheꞌyi p̂eyaqui miꞌin, mijam raꞌ cavintum fạ́coij tyeij miꞌin.

²⁰ Tyi chuc fạ́coij tyeijtyiꞌ jụijyaꞌ in, muꞌin meꞌtyity in mijam méquiꞌ jịꞌcätsepte in rụijsis dyijyedyeꞌ Jenꞌsiꞌ muꞌ.

²¹ Farajjevac yiristum mọꞌ aꞌc̣his dyijyedyeꞌ miꞌin, jam raꞌ ac̣hiꞌ bäꞌyi miꞌin. Jämꞌtyiꞌtum ĉojtyiꞌ jụjjebimac Jenꞌsiꞌ p̂eyacdyeꞌ muꞌ, mọꞌ yuꞌtyiyinacsiꞌ ĉojtyiꞌĉan miꞌin, mọꞌ ferdyeꞌtumsiꞌ mọꞌ tupuj jiꞌc̣honnac miꞌin.

²² Jam seꞌvac mọmoꞌ mọꞌ p̂eyacdyeꞌ, jemoñeꞌ chicac, seꞌvetiñeꞌ jụijyaꞌ mọmoꞌ miꞌin, ĉụiꞌsiꞌ väñädyeꞌ shupqui miꞌin.

²³ Tyi chuc seꞌvaquity mọmoꞌ tsanꞌ mọꞌ p̂eyacdyeꞌ Jenꞌsiꞌ muꞌ, jam qui namꞌ chiquepteyaꞌ, muꞌ meꞌtyity jeñej yirity muntyiꞌ ĉụiꞌ cavitity espejoĉan.

²⁴ Ĉụiꞌ caviti vejyaꞌ, aty meꞌsiꞌ camanꞌjebanꞌ, mijam damꞌ dyijyeban jụꞌñiij chuc vejyaꞌ jiquej, meꞌ buꞌyi muꞌ muntyiꞌ jam chiqueꞌtyiꞌ p̂eyacdyeꞌ Jenꞌsiꞌ.

²⁵ Muꞌ na jämꞌ chiqueꞌtyiꞌ jụijyaꞌ mọꞌ rụijsis p̂eyacdyeꞌ Jenꞌsiꞌ muꞌ, mọꞌ jiꞌfarajjiyisinꞌsiꞌ, muꞌ jämꞌ chiquety jätäjyiꞌ chuc mọꞌ, judyeyaꞌ jam farajjeꞌ, muꞌ raꞌ Jenꞌ jañutyiti räj jedyeꞌ chuc junꞌtaquiyaꞌ.

²⁶ Tyi chuc anic jämꞌ cạptety jiꞌchäyitidyeꞌ Jenꞌsiꞌ muꞌ, meꞌ ĉúti jụijyaꞌ muꞌ, jam qui namꞌ ĉọjcaqui nem jụijyaꞌ ĉụiꞌsimꞌ, fibis raꞌ shupquiꞌ jiꞌchäyitidyeꞌ cạiꞌsiꞌ muꞌ.

²⁷ Muꞌ Jenꞌ Ạvatusinꞌtyiꞌ tsun, muꞌ mạꞌjeꞌ paj qui tsun rụij cạpja jiꞌchäyitidyeꞌ muꞌ mijam cäj, meꞌ mạꞌjeꞌ muꞌ paj qui tsun nọ́tacsejaꞌ muꞌin säntaquity jenꞌ in judyeyaꞌ tseꞌ muꞌin judyeyaꞌ mọꞌin p̂en in säntaquis vämtyis in, mọꞌin ñịbeꞌ cạves in. Chimeꞌdye muꞌ Jenꞌ mạꞌjeꞌ paj qui jam ĉụiꞌ ac̣hiꞌtiĉaꞌ tsun aꞌc̣hisyaꞌ dyijyedyeꞌ jacches.