Proverbios 9 - Tsimane

Mọꞌ rụijsis dyijyedyeꞌ fayisinꞌ, feshta buꞌyi jämꞌtyiyisinꞌ

¹ Mọꞌ rụijsis dyijyedyeꞌ jämꞌ yụꞌtyeꞌ feshta buꞌyiꞌ muntyidyes in. Acaꞌ buꞌyiꞌ yuꞌti, yävätidyeꞌ säräꞌ p̂otsoꞌvi mọꞌ.

² Chat qui bijoiꞌ cuꞌdyeꞌ mọꞌ judyeyaꞌ jämꞌtyeꞌ tyédyes vino judyeyaꞌ räj mesacheꞌ yụꞌtyeꞌ, meꞌ buꞌyiꞌ ca carijtaquiꞌ mọꞌ rụijsis dyijyedyeꞌ.

³ Chat qui jutaquiꞌ úñis in paj qui mọꞌin jiꞌvorvacsequiꞌ in feshtaijtyiꞌ raꞌ muntyiꞌ in. Bäꞌyedyeꞌĉan jịjcaiꞌ in, prasayaꞌ fer mọꞌyaꞌ p̂eyaquiꞌ in fayacsiꞌ muntyiꞌ in paj qui muꞌin atsij in seꞌveꞌ in mọꞌ rụijsis dyijyedyeꞌ.

⁴ Yiꞌ in: "Tyi chuc jam chị́dyeꞌtumtyiꞌ in paj atsij in ĉọ́teꞌ in mọꞌ rụijsis dyijyedyeꞌ."

⁵ Yiꞌ mọꞌ rụijsis dyijyedyeꞌ: "Atsijamꞌ, jibityitiĉamꞌ ọij säcsedyeꞌ vinomun raꞌ chimeꞌ tyeij miꞌin, mọꞌ jämꞌtyes yụ", yiꞌ mọꞌ fayacsiꞌ.

⁶ "Miꞌin itŝity dyijyedyeꞌ miꞌin, aty raꞌ jam meꞌ miꞌin, rụijsis raꞌ dyijyedyeꞌ cäc̣häꞌchutiñeꞌ raꞌ miꞌin, mọꞌ raꞌ tsạꞌchunac", yiꞌ mọꞌ rụijsis dyijyedyeꞌ.

Ọij anicsis dyijyedyeꞌ

⁷ Tyi chuc fạraꞌjeĉunꞌte muꞌ vaꞌbunnaquity muntyiꞌ, muꞌ raꞌ jañäñiti mọꞌdyes. Meꞌdye chimeꞌ, tyi chuc fạraꞌjeĉunꞌte muꞌ ac̣hiꞌyity muntyiꞌ muꞌ raꞌ jañäñiti chimeꞌ.

⁸ Anicdye meꞌ, fạraꞌjeĉunꞌte jụijyam yirity vaꞌbunnaquity muntyiꞌ fáquin raꞌ. Muꞌ na dyijyedyeꞌtumtyiꞌ muntyiꞌ fạraꞌjeĉunꞌte jụijyam muꞌ raꞌ mạꞌjin.

⁹ Jịꞌchiqueyete mi dyijyedyeꞌtumtyiꞌ muntyiꞌ jụijyaꞌ, dadamꞌ raꞌ dyijyedyeꞌtumtyiꞌ shupqui muꞌ. Meꞌdye chimeꞌ jịꞌchiyete jụijyam rụij bäꞌyity muntyiꞌ, dadamꞌ raꞌ meꞌchuiꞌ chị́dyeꞌ muꞌ.

¹⁰ Paj qui dyijyedyeꞌtum shupquejaꞌ, jemoñeꞌ qui namꞌ tashcheꞌ chum irijyejaꞌ Ayoꞌcheꞌ. Chị́yeja muꞌ rụijtyity Jenꞌ jụijyaꞌ chat q̂uinꞌdyemꞌ raꞌ tupuj chicacsejaꞌ junꞌ chuc raꞌ bäꞌjaꞌ tsun.

¹¹ Chiqueꞌ jụijyam mọꞌ rụijsis dyijyedyeꞌ, men raꞌ bäꞌyi úchem.

¹² Cäc̣häꞌchuiꞌ jụijyam rụijsis dyijyedyeꞌ, jämꞌ raꞌ shupquiꞌ mídyes, vaꞌquiqueꞌ jụijyaꞌ mi mọꞌ rụijsis dyijyedyeꞌ, ĉụiꞌ raꞌ ñịbeꞌ cạveꞌ mi.

Mọꞌ aꞌc̣his dyijyedyeꞌ anic fayisinꞌ muntyiꞌ tsun

¹³ Mọꞌ aꞌc̣his dyijyedyeꞌ räjĉan fayivaꞌsinꞌ, mọꞌ jeñej buꞌyiꞌ yiris meꞌtaquis p̂en, itŝis tsị́cadyeꞌ mọꞌ, chiꞌitŝiꞌdye dyijyedyeꞌ chimeꞌ mọꞌ.

¹⁴ Mọꞌ p̂en ĉụiꞌsiꞌyaꞌ acaꞌ bäꞌyiꞌ, chimeꞌ prasayaꞌ jịjcaiꞌ, mọꞌyaꞌ fer p̂eyaquiꞌ.

¹⁵ Meꞌ tsanꞌ ĉụiꞌsiꞌtum dyijyedyeꞌ natiꞌ muꞌĉan in, aty qui namꞌ fayacsiꞌyaꞌ mọꞌ,

¹⁶ jéyacsiꞌ: "Atsijamꞌ úyaꞌ tyi chuc itŝity dyijyedyeꞌ, sisva yụ́yaꞌ", yiꞌ.

¹⁷ "Mọjoꞌchaꞌ jämꞌdyis ĉọ́jaꞌ mọꞌ shuꞌaiꞌsiꞌ tyédyeꞌ, judyeyaꞌ mọꞌ shuꞌaiꞌsiꞌ säcsedyeꞌ, mọꞌ caminve jebejas, mọꞌ mọjoꞌchaꞌ jämꞌdyis ĉọ́jaꞌ", yiꞌ mọꞌ p̂en fayacsi muntyiꞌ in jiꞌmaꞌyacsiꞌ.

¹⁸ Tyi chuc fayactyiꞌ jụijyaꞌ in jam chịj in junꞌ chuc aty säñi in muꞌin ĉọ́quety jiquej in, aty säñitysiꞌĉan ĉärꞌtacdyeꞌ vaꞌcac in.