Proverbios 8 - Tsimane

P̂eyaquiꞌ mọꞌ rụijsis dyijyedyeꞌ Jenꞌsiꞌ muꞌ jeñej buꞌyiꞌ muntyiꞌ

¹ Mọꞌ rụijsis dyijyedyeꞌ Jenꞌsiꞌ muꞌ fer p̂eyaquiꞌ, jiꞌmaꞌyacsiꞌ muntyiꞌ in, meꞌdye mọꞌ chimeꞌ chị́dyeꞌ chiferdyeꞌ p̂eyaquiꞌ.

² Mọꞌ jam caminve p̂eyaquiꞌ, junaꞌ ĉụiꞌ seꞌvebijaꞌ jiꞌchäyitidyeꞌ mọꞌ. Mụcuꞌcheꞌ buꞌyiꞌ p̂eyaquiꞌ mọꞌ rụijsis dyijyedyeꞌ, judyeyaꞌ prasayaꞌ chimeꞌ,

³ judyeyaꞌ chụiꞌdyeꞌyaꞌ bäꞌyedyes mọꞌ chimeꞌ, junaꞌ ĉụiꞌ mọmoꞌ mọꞌ rụijsis dyijyedyeꞌ fer voroꞌyiꞌ muntyidyes in.

⁴ Meꞌ yiꞌ rụijsis dyijyedyeꞌ: "Ọij p̂eyacdyeꞌ yụ miꞌindyes, räj jacchety miꞌin, jämꞌ raꞌ seꞌvibutiĉaꞌ miꞌin ọij p̂eyacdyeꞌ yụ", jéyacsiꞌ.

⁵ "Miꞌin jam chịjtyiꞌ miꞌin judyeyaꞌ chimeꞌ miꞌin itŝity dyijyedyeꞌ miꞌin, jemoñeꞌ räj dyijyedyeꞌtum yuꞌti miꞌin", yiꞌ mọꞌ rụijsis dyijyedyeꞌ.

⁶ Yejĉoiꞌ p̂eyaquiꞌ mọꞌ rụijsis dyijyedyeꞌ Jenꞌsiꞌ muꞌ, yiꞌ: "Seꞌvaĉamꞌ jämꞌ miꞌin, yụ raꞌ jämꞌsiꞌ p̂eyacdyeꞌ soꞌmeyac judyeyaꞌ rụijsis jiꞌchäyitidyeꞌ chimeꞌ.

⁷ Anic rụijsis ọij p̂eyacdyeꞌ yụ, jam damꞌ väñäiꞌ yụ, yụ nash fạ́queꞌ mọꞌ väñädyeꞌ.

⁸ Räj mọꞌ p̂eyacdyeꞌ yụ yedyej rụijsis in, mijam damꞌ jiꞌshupqueꞌ yụ väñädyeꞌtumsiꞌ p̂eyacdyeꞌ.

⁹ Tyi chuc dyijyity in anic raꞌ jämꞌ chiqueꞌ in ọij p̂eyacdyeꞌ, chat jorojĉan raꞌ shupquiꞌ muꞌindyes in.

¹⁰ Jụjbutiĉamꞌ ọij jiꞌchäyitidyeꞌ yụ, ĉaĉaij na mọꞌ anic mọjoꞌchaꞌ yaꞌiꞌsiꞌ, uyaꞌyaꞌdye muꞌ yaꞌij jämꞌtyiꞌ oro judyeyaꞌ plata", yiꞌ mọꞌ rụijsis dyijyedyeꞌ.

¹¹ Dadamꞌ mọꞌ mọjoꞌchaꞌ jemonac mọꞌ rụijsis dyijyedyeꞌ Jenꞌsiꞌ muꞌ, uyaꞌyaꞌdye muꞌin yaꞌijtyiꞌ mij in. Mọꞌ dyijtucsejaꞌsiꞌ jedyeꞌ in, ọyaꞌyaꞌ mọꞌin chimeꞌ in.

¹² Yiꞌ mọꞌ: "Yụ nash rụijsis dyijyedyeꞌ, anic rụij dyijyiꞌ yụ. Yụ jịꞌchicacsis mọꞌ jämꞌsiꞌ jiꞌchäyitidyeꞌ paj qui meꞌ dyijyi in", meꞌ meꞌ p̂eyaquiꞌ, yiꞌ mọꞌ rụijsis dyijyedyeꞌ Jenꞌsiꞌ muꞌ.

¹³ "Tyi chuc irijyity Ayoꞌcheꞌ in muꞌin anic fạ́queꞌ in räj aꞌc̣his dyijyedyeꞌ. Yụ fạ́cacsi muꞌin vaꞌbunyity in judyeyaꞌ fibiꞌnaquity in judyeyaꞌ muꞌin ac̣hiꞌyity in judyeyaꞌ muꞌin väväjñity chimeꞌ in.

¹⁴ Yụ rụij dyijyis judyeyaꞌ ferdyeꞌ chimeꞌ meꞌchuiꞌsiꞌ yụ, mọꞌdyes yụ soꞌmacsiꞌ muntyiꞌ in paj qui muꞌin rụij dyijyi in judyeyaꞌ jämꞌ carijtaqui in.

¹⁵ Yụ nọ́tyetacsiꞌ úchety ayoꞌ in dyijyedyeꞌyaꞌ yụ paj qui rụij ayoꞌbuꞌyi in judyeyaꞌ paj qui rụijsis jutacdyeꞌ yụꞌtyeyacsi muntyiꞌ in", meꞌ yiꞌ mọꞌ rụijsis dyijyedyeꞌ.

¹⁶ Yụ́syaꞌ dyijyedyeꞌ nọ́tyetacsiꞌ yụ úchety ayoꞌ in judyeyaꞌ muꞌin fer buꞌyity in paj qui rụij ayoꞌbuꞌyi in.

¹⁷ Yejĉoiꞌ p̂eyaqui mọꞌ rụijsis dyijyedyeꞌ Jenꞌsiꞌ muꞌ, yiꞌ: "Tyi chuc fer mạꞌjin yụ in meꞌdye raꞌ yụ mạꞌjeyacsiꞌ chimeꞌ. Tyi chuc quivintyiꞌ yụ, daquin raꞌ yụ in, muꞌin raꞌ soꞌmac rụijsis dyijyedyeꞌ muꞌindyes in", yiꞌ mọꞌ rụijsis dyijyedyeꞌ.

¹⁸ Tyi chuc meꞌchuntyiꞌ yụ in soꞌmac raꞌ in därsiꞌ bijodyeꞌ judyeyaꞌ raꞌ chimeꞌ timaꞌcac in.

¹⁹ Mọꞌ mọjoꞌchas ñịbeꞌyedyes soꞌmacsiꞌ yụ, uyaꞌyaꞌ jämꞌtyiꞌ oro judyeyaꞌ plata.

²⁰ Tyi chuc cäc̣häꞌchuntyiꞌ yụ in räjĉan raꞌ rụij bäꞌyi in anicsistum dyijyedyeꞌ in.

²¹ Tyi chuc mạꞌjin yụ in, yụ soꞌmacsiꞌ därsiꞌ ñịbeꞌyedyes, mijam raꞌ quijatutacsiꞌ", yiꞌ mọꞌ rụijsis dyijyedyeꞌ Jenꞌsiꞌ muꞌ.

Anicsisyaꞌ dyijyedyeꞌ muꞌ, muꞌ Jenꞌ jämꞌtyeꞌ ọij jac judyeyaꞌ mạyedyeꞌches jedyeꞌ in

²² Mọꞌ rụijsis dyijyedyeꞌ yiꞌ: "Muꞌ Ayoꞌ tạꞌcaty meꞌchun yụ jambiꞌdyemꞌ carijtyeꞌyaꞌ räj jedyeꞌ in.

²³ Muꞌ Ayoꞌ tashcheꞌ yuꞌtyin yụ, itŝiꞌdyemꞌ jac jiquej yụ na aty tạꞌcas yụꞌtac.

²⁴ Jambiꞌdyemꞌ muꞌ Jenꞌ jämꞌtyeꞌ mọꞌ mar, mijam cojiro muꞌyaꞌ, mijam jinac chimeꞌ tashiꞌ jiꞌshupquin yụ", yiꞌ mọꞌ rụijsis dyijyedyeꞌ.

^25-26 Chimeꞌ mụcuꞌ jambiꞌdyemꞌ jämꞌtac jiquej, aty yụ tạꞌcas jiꞌshupquin yụ. Anicdye meꞌ, jambiꞌdyemꞌ jämꞌtac ọij jac räjtumdye däräꞌ mọꞌ judyeyaꞌ p̂uijdas mọꞌ, tạꞌcas aty mọꞌyaꞌ yụ.

²⁷ Mọꞌ rụijsis dyijyedyeꞌ yejĉoiꞌ p̂eyaquiꞌ, yiꞌ: "Tashcheꞌ jiquej muꞌ Jenꞌ yoquiꞌdyemꞌ carijtyeꞌyaꞌ u mạyedyeꞌ judyeyaꞌ yụꞌtyeꞌ juñumchuquis mọꞌ, aty yụ tạꞌcas mọꞌyaꞌ.

²⁸ Judyeyaꞌdye muꞌ Jenꞌ jämꞌtacsi cheꞌvedyes dyicbaꞌbadyeꞌ in, judyeyaꞌ chimeꞌ

²⁹ yụꞌtyeyeꞌ namꞌchuquis paj qui jam fonaiꞌtiꞌ mọꞌ ojñiꞌ. Chat qui muꞌ jämꞌ buꞌyedyes yụꞌtyeyeꞌ mọꞌ jac meꞌ buꞌyi tiyacchuiꞌ jämꞌtyeꞌ jiquej.

³⁰ Meꞌ muꞌ Jenꞌ mọjoꞌchastum dyijyedyeꞌ carijtaqui. Yụ räjĉan penꞌdyetute carijtacdyeꞌyaꞌ muꞌ, judyeyaꞌ chimeꞌ muꞌ maꞌjotyin yụ, yụ anic maꞌjoiꞌ muꞌsiꞌyaꞌ vej muꞌ", meꞌ yiꞌ rụijsis dyijyedyeꞌ.

³¹ Yụ chimeꞌ anic där maꞌjotyepte jämꞌtacdyeꞌ muꞌ, judyeyaꞌ muntyiꞌ in chimeꞌ anic där maꞌjotyepte yụ", meꞌ yiꞌ p̂eyaquiꞌ mọꞌ rụijsis dyijyedyeꞌ Jenꞌsiꞌ muꞌ.

³² Mọꞌ rụijsis dyijyedyeꞌ yiꞌ jísinꞌ: "Ạvaꞌ, seꞌvibutiĉamꞌ jämꞌ ọij p̂eyacdyeꞌ yụ, anic där maꞌjoij muꞌin in cäc̣häꞌchubuntyiꞌ ọij dyijyedyeꞌ yụ.

³³ Seꞌvibutiĉamꞌ jämꞌ ọij jiꞌchäyitidyeꞌ yụ, paj qui dyijyedyeꞌtum bäꞌyi miꞌin, mijam raꞌ doroiꞌjibutiĉaꞌ miꞌin.

³⁴ Anic maꞌjoij muꞌin in seꞌvibuntyiꞌ p̂eyacdyeꞌ yụ in. Jeñej buꞌyi chụiꞌdyeꞌyaꞌ yụ bisvaꞌquintyiꞌ yụ in paj qui seꞌvibun yụs p̂eyacdyeꞌ in. Muꞌin raꞌ in anic raꞌ maꞌjoij in.

³⁵ Tyi chuc dạcbun yụs p̂eyacdyeꞌ yụ in, muꞌin raꞌ maꞌjotac Ayoꞌyaꞌ in, ĉaĉaij na mọꞌ tsạꞌchucsis.

³⁶ Muꞌin na vaꞌquicbuntyiꞌ dyijyedyeꞌ yụ in, muꞌin ĉụiꞌ ac̣hiꞌti in ĉụiꞌsiꞌyaꞌ juchaj muꞌin. Meꞌ buꞌyi muꞌin in fạ́quibuntyiꞌ dyijyedyeꞌ yụ in, muꞌin raꞌ sänꞌdyeꞌ soꞌmac in.