Proverbios 3 - Tsimane

Nanatydyes jiꞌchäyitidyeꞌ in

¹ Ạvaꞌ, jam raꞌ farajjem ọij jiꞌchäyitidyeꞌ soꞌmeyes yụ, dyijtuiꞌ raꞌ ĉojtyiꞌĉan mi ọij jiꞌchäyitidyeꞌ p̂eyacdyeꞌ yụ.

² Mọꞌ raꞌ yiꞌ paj qui anic men úcheꞌ bäꞌyi jaccheꞌ mi, paj qui maꞌjodyeꞌtum bäꞌyi chimeꞌ mi.

³ Jämꞌjeyacsi raꞌ bäꞌyi mi, mijam raꞌ chimeꞌ farajjem anicsis mạꞌjitidyes. Mọꞌ raꞌ jeñej buꞌyiꞌ tyicacdyeꞌ tujĉansiꞌ. Yejĉoij raꞌ meꞌchuiꞌ mi ĉojtyiꞌĉan mi, meꞌ raꞌ bäꞌyi mi.

⁴ Meꞌ bäꞌyi jụijyaꞌ mi, chat qui raꞌ muꞌ Jenꞌ maꞌjotyin. Meꞌdye raꞌ chimeꞌ muntyiꞌ in maꞌjotyin in, vaj cäts raꞌ jämꞌjin in.

⁵ Ĉúta Ayoꞌcheꞌ räj ĉojtyiꞌtum mi, paj qui muꞌ ñútyin mi, mijam raꞌ ĉụiꞌsiꞌcheꞌ dyijyedyeꞌ ĉúti mi.

⁶ Yejĉoij raꞌ dyijtute Ayoꞌ mi, cäc̣häꞌchubite ram dyijyedyeꞌ muꞌ, chat qui raꞌ muꞌ bächän, muꞌ raꞌ jiꞌcaviyin rụijsis majmi.

⁷ Jam raꞌ vaꞌbunyi yi mi: "Yụ anic dyijyedyeꞌtumtyiꞌ." Irijyeva Ayoꞌcheꞌ, meijjevaꞌ räj aꞌc̣his dyijyedyeꞌ mi.

⁸ Meꞌ bäꞌyi jụijyaꞌ mi, chat qui raꞌ mọꞌ ñútyin, jeñej buꞌyiꞌ pịñidyeꞌ paj qui räsh bäꞌyiꞌ aꞌ mi.

⁹ Dyijtume Ayoꞌ tsun, pạrejjeyeme querec̣ha muꞌdyety. Chimeꞌdye sicdyeꞌ vädaqui jụijyam, chipạrejjeyetedye ram muꞌdyes, mọꞌ jämꞌjeyacdyeꞌ shupquiꞌ muꞌdyes.

¹⁰ Meꞌ soꞌmete jụijyam, muꞌ raꞌ damꞌdye cächjiyin. Aty vädaĉan jụijyaꞌ mi, aty qui raꞌ jam tupuj vav acaꞌ mi paj qui jämꞌjeyac mọꞌĉan sicdyeꞌ mi.

¹¹ Ạvaꞌ, jam raꞌ ĉụiꞌtuptem fạraꞌyedyeꞌ Ayos muꞌ, mijam raꞌ yoqui mi jiꞌchäyin jụijyaꞌ vaꞌtacdyeꞌyaꞌ;

¹² ĉaĉaij na muꞌ Ayoꞌ tsun fạraꞌjeĉúnaqui mạꞌjeyactyiꞌ muꞌ, yojdyemꞌ yirity muntyiꞌ u fạraꞌjeĉúnaqui ạꞌyaty ạvaꞌ muꞌ.

¹³ Anic maꞌjoij in Jenꞌsiꞌtumtyiꞌ dyijyedyeꞌ rụijsis in. Muꞌin dyijyedyeꞌ dạqueꞌtyiꞌ in judyeyaꞌ chimeꞌ chicacsi in jedyeꞌ buty cạiꞌ Jenꞌsiꞌ p̂eyacdyeꞌ muꞌ, anic maꞌjoij muꞌin in.

¹⁴ Mọjoꞌchaꞌ yaꞌiꞌ rụijsis dyijyedyeꞌ, uyaꞌyaꞌ muꞌ querec̣ha plata judyeyaꞌ muꞌ oro.

¹⁵ Mọjoꞌchaꞌ mọꞌ yaꞌiꞌ mọꞌ rụijsis dyijyedyeꞌ, uyaꞌyaꞌ yaꞌijtyiꞌ mij in, mọꞌ na dadamꞌ mọjoꞌchaꞌ jämꞌsiꞌ, ọyaꞌyaꞌ räj jacches jedyeꞌ in, mọꞌ mạꞌjejas tsun.

¹⁶ Cäc̣häꞌchujaꞌyaꞌ mọꞌ rụijsis dyijyedyeꞌ, mọꞌ raꞌ jísinꞌ paj qui men úcheꞌ bäꞌjaꞌ tsun judyeyaꞌ paj qui jämꞌjeyac muntyiꞌyaꞌ tsun. Därsiꞌ raꞌ bijodyeꞌ soꞌmac tsun.

¹⁷ Cäc̣häꞌchujaꞌ mọꞌ rụijsis dyijyedyeꞌ jụijyaꞌ, meꞌ raꞌ jämꞌyedyeꞌtum bäꞌjaꞌ tsun, mọꞌ raꞌ soꞌmisinꞌ maꞌjodyeꞌ ĉojtyiꞌĉan.

¹⁸ Mọꞌ rụijsis dyijyedyeꞌ tsạꞌchusinꞌ tsun meꞌchujaꞌ jụijyaꞌ, jeñej buꞌyiꞌ mọꞌ tsạꞌchucsis sacacdyeꞌ. Anic maꞌjoij in muꞌin jam farajjeꞌtyiꞌ in.

¹⁹ Muꞌ Ayoꞌ dyijyedyeꞌyaꞌ muꞌ jämꞌtyeꞌ ọij jac, chị́dyeꞌyaꞌ muꞌ jämꞌtyeꞌ räj mạyedyeꞌches jedyeꞌ in.

²⁰ Chị́dyeꞌyaꞌ muꞌ yụꞌtyeꞌ mọꞌin mar in, dyicbaꞌbadyeꞌ chimeꞌ jämꞌtyeꞌ, mọꞌ yụꞌtyes añej jacchedyes.

²¹ Ạvaꞌ, jam raꞌ damꞌ farajjeꞌ mi mọꞌ rụijsis dyijyedyeꞌ, yejĉoij raꞌ cäc̣häꞌchupte mi Jenꞌsiꞌ chị́dyeꞌ muꞌ.

²² Meꞌ jụijyaꞌ mi, anic raꞌ jämꞌyedyeꞌtum bäꞌyi mi,

²³ chat raꞌ jam jedyeij miꞌ mijam raꞌ tachyi jọꞌchaij mi.

²⁴ Jịꞌjutyiti jụijyaꞌ mi, maꞌjodyeꞌtum raꞌ ĉọshi mi, mijam raꞌ damꞌ noiꞌyi mi.

²⁵ Jam raꞌ quijñem jiquijnacdyeꞌ, mọꞌ tŝọ́tacsis raꞌ muꞌin ac̣hiꞌyity in,

²⁶ ĉaĉaij na mi aty ĉúti Ayoꞌcheꞌ, muꞌ raꞌ ñutsjityin mi paj qui jam jedyeij mi.

²⁷ Nọ́tyetacsi ram muꞌin jemoñeꞌtyiꞌ jedyeꞌ in, jam raꞌ quijatutacsi mi.

²⁸ Jam raꞌ jéyacsi mi: "Nojno raꞌ caꞌñibun mi, chat qui raꞌ yụ soꞌmeye." Mọꞌyaꞌ jedyeꞌ jụijyaꞌ mi jemoñeꞌ yiristum soꞌmacsim.

²⁹ Jam raꞌ dyijyi mi junꞌ buꞌyi chuc raꞌ ac̣hiꞌte mi muꞌ chätidyeꞌ mi ạꞌyaty, ĉaĉaij na muꞌ jam yocve dyijtun mi. "Uts nash penꞌdyeꞌ yụ", meꞌ jiꞌjäquin.

³⁰ Jam raꞌ fibiꞌ ĉụiꞌ fạ́quete chätidyeꞌ mi, ĉaĉaij na muꞌ jam p̂iyin.

³¹ Jam raꞌ maꞌjotacsim sonꞌ buꞌyi yuꞌtity jụijyaꞌ in, mijam raꞌ chimeꞌ maꞌjotacsebim dyijyedyeꞌ muꞌin, muꞌin meꞌtyitysiꞌ in.

³² Ĉaĉaij na muꞌ Ayoꞌ tsun äcäijjeyacsi muꞌin ac̣hiꞌyity in, penꞌdyetucsi rụijtyity in.

³³ Muꞌ raꞌ Ayoꞌ soꞌmacsi vaꞌtacdyeꞌ muꞌin ac̣hiꞌ bäꞌyity in chätidyeꞌtumdye raꞌ tyejoij in, muꞌin na rụijtyity in muꞌ raꞌ nọ́tyetacsi räjtumdye chätidyeꞌ muꞌin.

³⁴ Muꞌ Ayoꞌ äcäijjeyacsi muꞌin dyisactety in, muꞌin na jam vaꞌbunnaquity in muꞌ ñịbeꞌjeyacsi.

³⁵ Muꞌin meꞌchuiꞌtyiꞌ in rụijsis dyijyedyeꞌ muꞌin raꞌ timaꞌcac in, muꞌin na fạ́quety in mọꞌ rụijsis dyijyedyeꞌ tsị́cadyeꞌ raꞌ cạveꞌ in.