Mateos 9 - Tsimane

Jesús jiꞌchäĉajte yirity puñichjoijtyiꞌ muntyiꞌ

¹ Chat qui muꞌ Jesús muꞌyaꞌ bijti covambacheꞌ nopjan mọꞌ tsiqueꞌ, ĉụiꞌsiꞌĉan bäꞌyedyeꞌ jijtuban muꞌ.

² Yirity tuyete in puñichjoijtyiꞌ muntyiꞌ, turacdyeꞌcheꞌ tuyete in. Jesús aty cạvacsi junꞌ chuc fer anicjete muꞌin in, chat qui jéte muꞌ puñichjoijtyiꞌ muntyiꞌ: —Maꞌjova mi ạvaꞌ yụ, atyuꞌ u vayac juchaj mi.

³ Pạrej muyayaj in jịꞌchiyacsity yụꞌtacdyeꞌ Jenꞌsiꞌ muꞌ, yi in ĉojtyiꞌĉan muꞌin: "Anic ñinacdyeꞌ Jenꞌyaꞌ shupquiꞌ ọij p̂eyacdyeꞌ muꞌ."

⁴ Muꞌ qui namꞌ Jesús chị́yacsebi dyijyedyeꞌ muꞌin mọꞌdyes qui jéyacsi muꞌ: —¿Junꞌ dash meꞌ ac̣hiꞌ dyijyi ĉojtyiꞌĉan miꞌin?

⁵ ¿Jụꞌñis buty raꞌ carij ĉọ́tiñeꞌ miꞌin areꞌ vayac juchaj utssiꞌ muꞌ, areꞌ chäĉän muꞌ? Areꞌ jéte yụ: "Aty vayac juchaj mi", jam jụijyaꞌ, jéte yụ: "Sacyebada miꞌebada." ¿Jätäjyi miꞌin u?

⁶ Q̂uinꞌ raꞌ jịꞌcaveyeyac yụ junꞌ chuc ferdyeꞌ soꞌmac yụ paj qui yụ vayacjetyetacsi juchaj jacchetysiꞌ muntyiꞌ in, ĉaĉaij nash yụ Anictyity Muntyiꞌ. Jajiti muꞌ puñichjoijtyiꞌ muntyiꞌ: —Sacyebada, tapjebadaꞌ jubij mi, tạij acaꞌyaꞌ jịjcabada mi.

⁷ Anicdye meꞌ, muꞌ puñichjoijtyiꞌ jiquej sacyeban judyeyaꞌ acatuban muꞌ.

⁸ Muꞌin muntyiꞌ in, aty meꞌ cạveteyaꞌ in anic irijyi in, chat qui timaꞌquete Jenꞌ in ĉaĉaij na muꞌ soꞌmacsi därsiꞌ ferdyeꞌ muntyiꞌ in.

Jesús jafaijti muꞌ Mateo

⁹ Chat qui muꞌ Jesús jọban miꞌeban muꞌ. Cạvete yirity muntyiꞌ Mateo tịj muꞌ, muꞌ tsimꞌtety querec̣ha Romaĉantyidyety ayoꞌ, acaꞌĉan bäꞌyity muꞌ tsimꞌteĉan querec̣ha. Jesús jafaijti jajiti: —Cäc̣häꞌchutiꞌ ram. Chat qui muꞌ Mateo sacyi cäc̣häꞌchute muꞌ Jesús.

¹⁰ Yirisĉan mạyedyeꞌ muꞌ Jesús säcsequi Mateosĉan acaꞌ. Daiꞌ atsij in juchajtumtyiꞌ muntyiꞌ in judyeyaꞌ tsimꞌtety querec̣ha in, muꞌinmun chimeꞌ mesacheꞌ säcsi in.

¹¹ Fariseo pạrej cạvacsi in, mọꞌdyes qui yi in jéyacsi Jesústyiꞌ jịꞌchiyactyiꞌ muꞌ, yi in: —¿Junꞌ dash meꞌ uts jiꞌchäyinactyiꞌ miꞌin yiriꞌyaꞌ meꞌtyitytum säcsi? Muꞌ säcsi tsimꞌtetytum querec̣ha judyeyaꞌ juchajtumtyiꞌtum in.

¹² Jesús seꞌvacsebi p̂eyacdyeꞌ muꞌin, chat qui jéyacsi: —Muntyiꞌ räshtyiꞌ in jam junꞌ jemonte muꞌ pịñitucsity in, muꞌin chat japacjoijtyiꞌ muntyiꞌ in jemonte pịñitucsity in.

¹³ Jemoñeꞌ dyijtutiñeꞌ miꞌin ọij sánacdyeꞌ Jenꞌsiꞌ muꞌ paj qui tupuj chị́yetiñeꞌ jätäjyiꞌ chuc cạiꞌ mọꞌ, yiꞌ "Yụ mujuꞌchaꞌ mạꞌjeꞌ paj qui ñịbeꞌ ĉọcsi miꞌin, uyaꞌyaꞌ mọꞌ mạꞌjeꞌ yụ mọꞌ jiꞌcoꞌshayacdyeꞌ yụ́dyes", yiꞌ sánacdyeꞌ. Yụ atsij jam rụijtyitydyety in, yụ atsij juchajtumtyidyety in ĉọshseti yụ.

Jesús p̂eyeꞌ yịñijdyeꞌ Jenꞌdyes jịꞌĉoiꞌsiꞌ táredyeꞌ

¹⁴ Atsij muꞌin jịꞌchiyactyiꞌ Juantyiꞌ muꞌ, muꞌ chojtacsity. Muꞌin ĉọcte Jesús in, jéte in: —Tsun judyeyaꞌ fariseo in pucmun yịñij Jenꞌdyes tsun. ¿Junꞌ dash muꞌin jịꞌchiyactyiꞌ mi mijam damꞌ yịñij Jenꞌdyes in?

¹⁵ Jesús qui vorjeyacsi: —Jeshaꞌ, muꞌin feshtaijtyiꞌ in vämitydyes in jam muꞌin tupuj táredyeꞌtum yịñij in tacaꞌdye muꞌ muꞌyaꞌ vämity jụijyaꞌ. A qui na ayijyaꞌ tupudyeꞌ jäcac muꞌ, chat q̂uinꞌdyemꞌ yịñij penꞌdyeꞌ muꞌ. Meꞌdye raꞌ yụ chimeꞌ, aty jäcacyaꞌ yụ q̂uinꞌdyemꞌ raꞌ yịñij jịꞌchiyactyiꞌ yụ.

¹⁶ Jeshaꞌ muꞌ ishoijtyiꞌ quịꞌsiꞌ shẹiꞌjoij jụijyaꞌ, jam junꞌ raptac mụiꞌtyityyaꞌ quịꞌsiꞌ. Meꞌ na jụijyaꞌ mọꞌ raꞌ raptacdyeꞌ muꞌ shätimꞌ, chat qui raꞌ muꞌ ishoꞌ quịꞌsiꞌ quivij peñi shẹiꞌjoij.

¹⁷ Chimeꞌdye muntyiꞌ in mijam junꞌ bijtyeꞌ in mụiꞌsis tyédyeꞌ vino urucyasĉan shoꞌpaꞌ. Meꞌ jụijyaꞌ aty pashiꞌ tyeiꞌ mọꞌ tyédyeꞌ, topjoiꞌ raꞌ mọꞌ shoꞌpaꞌ, räj raꞌ naiꞌ tŝọiꞌ mọꞌ tyédyeꞌ, mọꞌtumdye raꞌ moñiꞌ shoꞌpaꞌtum. Jemoñeꞌ bijtac mụiꞌsisĉan shoꞌpaꞌ paj qui jam vaj meꞌ moñiꞌ in.

Jairos ạvaꞌ muꞌ judyeyaꞌ yocsiꞌ p̂en japacjoiꞌsiꞌ

¹⁸ Tacaꞌ p̂eyacvaꞌjoij muꞌ Jesús, meꞌĉandye atsij yirity muntyiꞌ judío muꞌ, muꞌ tashcheꞌ buꞌyity vajmuꞌyadyeꞌĉan. Dyụtsyi Jesúsyaꞌ jéte: —Mụiꞌdye säñiꞌ ạvaꞌ yụ. Atsiva, tocoꞌjecbivaꞌ aꞌ mọꞌsiꞌ, meꞌ jụijyaꞌ mi, tsạꞌebanꞌ raꞌ mọꞌ.

¹⁹ Chat qui muꞌ Jesús sacjeꞌ jịjcate muꞌ muntyiꞌ räjtumdye jịꞌchiyactyiꞌ muꞌ.

²⁰ Ĉụiꞌdye ayij yiris p̂en japacjoiꞌsiꞌ. Aty yiriꞌtac päräꞌ jiyiꞌ yómodyeꞌ meꞌ buꞌyiꞌ chäshvaquiꞌ aꞌ mọꞌ. C̣hẹiꞌyaꞌjete Jesús murujrucheꞌ muꞌ, tocoꞌjepte ĉaptacdyeꞌve quịꞌsiꞌ muꞌ.

²¹ Yiꞌ dyijyiꞌ tashcheꞌ ĉojtyiꞌĉan mọꞌ: "Täjyedyeꞌĉan ramꞌ quịꞌsiꞌ muꞌ, chäĉänꞌ yụ."

²² Camanꞌyi muꞌ Jesús vejtuiꞌ mọꞌ p̂en, yi jeꞌ: —Maꞌjova mi ạvaꞌ yụ, aty anicyedyeꞌyaꞌ chäĉänꞌ q̂uinꞌ mi. P̂eyacdyeꞌĉandyemꞌ chäĉänꞌ mọꞌ p̂en.

²³ Aty ventyecbite acaꞌ in muꞌ tashcheꞌ buꞌyitysiꞌ vajmuꞌyadyeꞌĉan in, dạcacsequi boñity in nạcdyedyes nanasvundyesiꞌ, judyeyaꞌ uyaꞌquiꞌdyi tárevaꞌqueꞌ mọꞌ nanas in.

²⁴ Yi Jesús jéyacsi: —Shubadac miꞌin, jam nash mọꞌ säñiꞌ nanas, ĉọshiꞌ nash mọꞌ. Muꞌĉantyiꞌ in dyisacte in muꞌ Jesús mọꞌ seꞌvepteyaꞌ in p̂eyacdyeꞌ.

²⁵ Aty jiꞌshupcacsiyaꞌ muntyiꞌ in Jesús qui siti yóĉandyemꞌ mọꞌ nanas o. Tapjebiꞌ un mọꞌ, sacyebanꞌ vatyquej.

²⁶ Muntyiꞌ in paiꞌ jịꞌchiqueyacsi yoctyiꞌ in, räj chị́qui in junꞌ chuc jiꞌchäĉänꞌ mọꞌ nanas.

Jesús jịꞌnaijtacseban päräꞌ tofety in

²⁷ Chat qui jọban muꞌ Jesús. Päräꞌ tofety muntyiꞌ jịjcabajte in, fer p̂eyaqui in, yi in: —Davidtyiꞌ vóshiꞌ muꞌ, ñịbeꞌjitiĉaꞌ raꞌ tsun miꞌin.

²⁸ Aty acaꞌĉan muꞌ siti Jesús, chat qui muꞌin tofety ĉọcte in. Yi jéyacsi muꞌ Jesús: —¿Meꞌ buty anicjitiĉaꞌ yụ miꞌin paj qui meꞌ jịꞌnaijbadyeyac miꞌin? Vorjete muꞌin in: —Anicdye meꞌ, Jịꞌchiyacsity.

²⁹ Chat qui muꞌ Jesús tocoꞌjeyacsebi vej muꞌin, jéyacsi: —Meꞌ raꞌ chäĉän miꞌin ĉaĉaij na anicyi miꞌin.

³⁰ Meꞌĉandye naijbun in. Jesús fercheꞌ jéyacsi: —Jam raꞌ junꞌ jịꞌchiqueyacsi miꞌin yoctyiꞌ muntyiꞌ in.

³¹ Aty jọbanyaꞌ in cavin jịꞌchiqueyacsi yocsiꞌve bäꞌyity in.

Jesús jiꞌp̂eijjajte yirity jepepej muntyiꞌ

³² Aty jọban muꞌin tofety jiquej in, chat qui tuyete in jam p̂eyaquity muntyiꞌ, ĉaĉaij na sọyoꞌtumtyiꞌ muꞌ.

³³ Jesús meijjetyebajte mọꞌ sọyoꞌ, meꞌĉandye p̂eyaĉan muꞌ muntyiꞌ. Anic äjyi muntyiꞌ in, yi in: —¡Mijam jämꞌdyeyaꞌ joꞌmes cạvejaꞌ tsunsiꞌĉan jac Israelĉan!

³⁴ Muꞌin na fariseo yi in: —Sọyoty ayoꞌ mọꞌin jasoꞌmiti ferdyeꞌ, mọꞌdyes qui meꞌ muꞌ Jesús tupuj meijjetyetacsi sọyoꞌ in.

Jesús ñịbeꞌ ĉọcsi muntyiꞌ in

³⁵ Jesús räj socorꞌjeꞌ mọꞌĉansiꞌ bäꞌyedyeꞌ in. Muꞌĉan vajmuꞌyadyeꞌĉan judío in jịꞌchiyacsi muꞌ, judyeyaꞌ voroꞌtacsi Jenꞌsiꞌ p̂eyacdyeꞌ muꞌ, p̂eyeꞌ aty c̣hẹiꞌyaꞌ ayoꞌbuꞌyi raꞌ Jenꞌ. Chimeꞌdye muꞌ jiꞌchäcacseban muntyiꞌ, yịjyi areꞌredyeꞌ muntyis in judyeyaꞌ japacjodyeꞌtumtyiꞌ in, meꞌ meꞌ jiꞌchäcacseban.

³⁶ Jesús aty cạvacsiyaꞌ daiꞌtyiꞌ muntyiꞌ in, muꞌ ñịbeꞌ ĉọcsi ĉaĉaij na muꞌin joꞌmequeꞌqueij cajotyiti in, itŝiꞌ tyeiꞌ dyijyedyeꞌ muꞌin, jeñej oveca in jam ĉọjcacsis in, meꞌ cạvacsi muntyiꞌ in.

³⁷ Mọꞌdyes muꞌ Jesús jéyacsi jịꞌchiyactyiꞌ muꞌ: —Anic därsiꞌ vädacdyeꞌ mọꞌyaꞌ, itŝij qui namꞌ tyi vädaquity in.

³⁸ Cọdyemac miꞌin muꞌ meꞌchuiꞌtyiꞌ vädacdyeꞌ paj qui muꞌ yụꞌtacsi vädaquity muntyiꞌ in, cạyacsity p̂eyacdyeꞌ in.