Mateos 4 - Tsimane

Jesucristos jịꞌĉojtacdyeꞌ muꞌ

¹ Chat qui Jenꞌsiꞌ Ạꞌedyeꞌ muꞌ jácati muꞌ Jesús cäjyasĉan jac jácati, muꞌĉan qui Sọyoꞌ mạꞌjeꞌ tsanꞌ jajiꞌĉujti aꞌc̣hisyaꞌ dyijyedyeꞌ.

² Vạjpedyeꞌ quiꞌtac mạyedyeꞌ meꞌquiꞌ muꞌĉan jam damꞌ säcsi, mọꞌdyes qui aty meꞌsiꞌ chiqueꞌ dáquis muꞌ.

³ Sọyoꞌ jaĉucdyi jajiti: —Mi nash Jenꞌtyiꞌ Ạvaꞌ jụijyam, uts mij in jiꞌmunacseva paj pan shupqui in.

⁴ Jesús vorjeꞌ: —Jam, ĉaĉaij na yiꞌ sánacdyeꞌ: "Jam nash säcsedyeꞌ ramꞌ jạtsaꞌchuti muntyiꞌ, chimeꞌ Jenꞌsiꞌmun p̂eyacdyeꞌ muꞌ, mọꞌ raꞌ jạtsaꞌchuti", yiꞌ p̂eyacdyeꞌ Jenꞌsiꞌ muꞌ.

⁵ Chat meꞌsiꞌ mọꞌ Sọyoꞌ jácati Jenꞌsiꞌĉan bäꞌyedyeꞌ muꞌ Jerusalénĉan, fajcheꞌ jácati Jenꞌsiꞌcheꞌ acaꞌ muꞌ.

⁶ Chat qui yiꞌ Sọyoꞌ jajiti: —Mi Jenꞌtyiꞌ Ạvaꞌ jụijyam, roiꞌyebada mụijyaꞌ úchety, ĉaĉaij na yiꞌ sánacdyeꞌ: "Jenꞌ raꞌ jutacsi anjer muꞌ, muꞌin qui raꞌ ĉujcan in judyeyaꞌ tapchun in unĉan muꞌin paj qui jam areꞌ tŝọij mi."

⁷ Jesús vorjete: —Chimeꞌdye yocsiꞌ sánacdyeꞌ yiꞌ: "Jam raꞌ jịꞌĉojtem muꞌ Jenꞌ Ayoꞌ mi."

⁸ Därtyiꞌcheꞌ qui mụcuꞌ jácati mọꞌ Sọyoꞌ jajiꞌcaviyiti räj jacches bäꞌyedyeꞌ in, räjtumdye jedyeꞌ mọꞌ.

⁹ Sọyoꞌ jajiti: —Yụ raꞌ soꞌmeye räj ọij cạves q̂uinꞌ mi, yụ́yaꞌ dyụtsyi jụijyaꞌ mi, yụ timaꞌquitiꞌ jụijyaꞌ mi.

¹⁰ Jesús vorjeꞌ: —Tạij jọbada Satanás, yiꞌ nash sánacdyeꞌ: "Jenꞌ Ayoꞌ mi muꞌ timaꞌqueme, mumꞌ yirity cọdyeme."

¹¹ Chat qui jọbanꞌ mọꞌ Sọyoꞌ yạjquibajte muꞌ Jesús, anjer qui atsij in nọ́tyete in chat jiꞌsäcsete in.

Jesús tiyacchuiꞌ carijtacdyeꞌ muꞌ Galileaĉan

¹² Aty seꞌveꞌyaꞌ p̂eyacdyeꞌ muꞌ Jesús junꞌ chuc ĉärꞌte in muꞌ Juan, chat qui roiꞌjeꞌ muꞌ Galileaĉan jịjcaij muꞌ.

¹³ Damꞌtuquimꞌ Nazaretĉan, Capernaumve qui jịjcaij muꞌ bäꞌyi, tsiqueꞌves mọꞌ bäꞌyedyeꞌ. Mọꞌ jac vóshiꞌvunsiꞌ Zabulónsiꞌ jiquej judyeyaꞌ Naftalísiꞌ jiquej.

¹⁴ Meꞌ cạ̈tsiꞌ p̂eyacdyeꞌ Isaíassiꞌ jasoꞌmitis Jenꞌ jiquej.

¹⁵ Yiꞌ sánacdyeꞌ: "Muꞌin bäꞌyity in Zabulónsiꞌĉan jac jiquej judyeyaꞌ Neftalísiꞌĉan chimeꞌ, judyeyaꞌ marꞌve bäꞌyity in, judyeyaꞌ pamꞌvety Jordán bäꞌyity in, judyeyaꞌ Galileaĉan bäꞌyity in, yóĉandyemꞌ jam judío u in.

¹⁶ Muꞌin tojmadyeꞌĉan bäꞌyity jiquej in, muꞌin därsiꞌ mạijquedyeꞌ cạveꞌ in, mọꞌ qui mạijchucsiꞌ muꞌin tojmadyeꞌĉantyiꞌ in muꞌin säñi bäꞌyity in", yiꞌ sánacdyeꞌ. Jesús meꞌ jịꞌcätseꞌ ọij sánacdyeꞌ voroꞌyedyeꞌyaꞌ muꞌ.

¹⁷ Chat qui Jesús tiyacchuiꞌ voroꞌtacsi, yi muꞌ: —Dyijyevac juchajcheꞌ miꞌin, atyuꞌ u c̣hẹiꞌyaꞌ ayoꞌbuꞌyi raꞌ Jenꞌ.

Jesús fayacsi vạjpedyeꞌ tạbity in

¹⁸ Sinve Mar Galilea nati Jesús. Cạvacsi päräꞌ muntyiꞌ in, Simón judyeyaꞌ muꞌ Andrés, vojitytum, muꞌin tạbity in. Simón, Pedro chimeꞌ tịj muꞌ. Muꞌin vaꞌcajquiqui sạjiꞌ tsiqueꞌĉan in.

¹⁹ Jesús jéyacsi: —Cäc̣häꞌchutiĉamꞌ yụ, miꞌin tạbity, tạbacsity raꞌ muntyiꞌ yụꞌtyeyac.

²⁰ Yiristum farajjetaque sạjiꞌ muꞌin judyeyaꞌ cäc̣häꞌchute in.

²¹ Aty mujuꞌveyaꞌ muꞌ Jesús päräꞌ muntyiꞌ cạvacsi, Santiago judyeyaꞌ Juan vojity muꞌ, muꞌ Zebedeoty ạvaꞌ muꞌ. Covambacheꞌ jenꞌtum in, raꞌbacvaꞌjoban sạjiꞌ in. Jesús fayacsi,

²² chimeꞌdye muꞌin yiristum farajjeyactaqui jenꞌ muꞌin judyeyaꞌ covamba muꞌin chimeꞌ, chat qui cäc̣häꞌchute in muꞌ Jesús.

Jesús daiꞌ jịꞌchiyacsi muntyiꞌ in

²³ Jesús räj socorꞌjeꞌ mọꞌĉansiꞌ bäꞌyedyeꞌ in Galileaĉansiꞌ, muꞌ jịꞌchiyacsi vajmuꞌyadyeꞌĉan judío in, muꞌĉan voroꞌtacsi Jenꞌsiꞌ p̂eyacdyeꞌ muꞌ, p̂eyeꞌ aty c̣hẹiꞌyaꞌ ayoꞌbuꞌyi raꞌ Jenꞌ. Chimeꞌdye jiꞌchäcacseban japacjoijtyiꞌ in, räj muꞌin areꞌreijtyiꞌ in.

²⁴ Paiꞌ buꞌyiꞌ jac seꞌveꞌ in junꞌ chuc muꞌ Jesús, Siriaĉantyiꞌ chimeꞌ seꞌveꞌ in. Mọꞌdyes tuyete in räj muꞌin areꞌreijtyiꞌ in, japacjoijtyiꞌ in, judyeyaꞌ ñeꞌity in, judyeyaꞌ puñichjoijtyiꞌ in, judyeyaꞌ sọyoꞌtumtyiꞌ in, räj meꞌ meꞌ jiꞌchäcacseban muꞌ Jesús judyeyaꞌ meijjetyetacseban sọyoꞌ chimeꞌ.

²⁵ Anic shach muntyiꞌ cäc̣häꞌchute in, Galileaĉantyiꞌ in judyeyaꞌ Decápolisĉantyiꞌ in, Jerusalénĉantyiꞌ in, Judeaĉantyiꞌ in, judyeyaꞌ nopej Jordán bäꞌyity in, meꞌ meꞌ cäc̣häꞌchute in.