Mateos 3 - Tsimane

Voroꞌtacdyemꞌ Juan chojtacsity

¹ Aty meꞌsiꞌ atsij muꞌ Juan chojtacsity jiquej, voroꞌtacsi muꞌ cäjyasĉan jac Judeaĉansiꞌ.

² Yi muꞌ: —Dyijyevac juchajcheꞌ miꞌin, aty c̣hẹiꞌyaꞌ ayoꞌbuꞌyi raꞌ muꞌ Jenꞌ.

³ Aty meꞌ voroꞌtacsiyaꞌ muꞌ Juan, cạ̈tsiꞌ ọij p̂eyacdyeꞌ muꞌ Isaíassiꞌ jasoꞌmititysiꞌ Jenꞌ jiquej. Yiꞌ sánacdyeꞌ: "Cäjyasĉan jac muꞌĉan raꞌ yirity fer p̂eyaquity, yi: Jämꞌ yụꞌtyevac majmi Ayodyes tsun, chụiꞌjevac jäꞌmij", yiꞌ sánacdyeꞌ.

⁴ Juan quịꞌsituiꞌ p̂anacsiꞌ fin cameyos, judyeyaꞌ ñutuꞌtacdyeꞌ muꞌ shoꞌpaꞌ, säcsedyemꞌ shọ́coꞌ judyeyaꞌ coroma däräꞌĉantyiꞌ.

⁵ Ĉọcte in Jerusalénĉan bäꞌyity in judyeyaꞌ paiꞌ Judeaĉantyiꞌ in judyeyaꞌ c̣hẹiꞌyaꞌ Jordán bäꞌyity in, räj muꞌin ĉọcte in seꞌvecbite p̂eyacdyeꞌ in.

⁶ Muꞌin p̂eyaqui juchaj muꞌin chat qui muꞌ Juan chojtacsi cojiro Jordánĉan.

⁷ Juan cạvacsi daiꞌ atsij in fariseo in judyeyaꞌ saduceo in, ĉọcte muꞌin chimeꞌ in, mạꞌjeꞌ tsanꞌ jiꞌchojti in muꞌyaꞌ. Jéĉunacsi muꞌ: —¡Där ac̣hiꞌtyity miꞌin jeñejtyity nas miꞌin! Jeñej aty raꞌ mọꞌ jiꞌchojtidyeꞌ tupuj jiꞌc̣honnac därsiꞌyaꞌ vaꞌtacdyeꞌ Jenꞌsiꞌ ĉúti u miꞌin.

⁸ Damꞌdye jämꞌ tashcheꞌ jäꞌmij rụij bäꞌyi miꞌin, mọꞌ raꞌ jịꞌĉoiꞌ anic dyijyi juchajcheꞌ miꞌin.

⁹ Jam raꞌ ĉụiꞌ dyijtuti miꞌin mijam raꞌ yi miꞌin: "Tsun nash vóshiꞌ Abrahamvuntyiꞌ muꞌ." Yụ jéyac Jenꞌ tupuj mij jiꞌmunacsi uts in Abrahamtyiꞌ vóshiꞌ muꞌ.

¹⁰ Jenꞌ aty raꞌ tuiꞌ vaꞌtacdyeꞌ, jeñej yirity muntyiꞌ jịvaꞌchaiꞌ jam väshis cätidyeꞌ, meꞌdye raꞌ chimeꞌ Jenꞌ jịvaꞌchacsi muꞌin jam rụij bäꞌyity in, tsäquiꞌsis raꞌ vaꞌtacdyeꞌ vaꞌtyeyac in.

¹¹ Yụ nash chojtyeyac miꞌin ojñiꞌĉan, mọꞌ jịꞌĉoiꞌ aty dyijyi juchajcheꞌ miꞌin. Muꞌ qui raꞌ atsij mujuꞌchaꞌ fer buꞌyity, jam jeñej yụ, uyaꞌyaꞌ yụ, mijam tupuj yụ cạpte yujches muꞌ. Muꞌ raꞌ Jenꞌsiꞌ Ạꞌedyemꞌ yuꞌtyiyinac miꞌin judyeyaꞌ pạrej raꞌ yuꞌtyiyinac tŝij.

¹² Muꞌ raꞌ jịꞌcäts yụꞌtacsi muntyiꞌ in juchadyes, jeñej yirity muntyiꞌ tyiftety trivo, muꞌ tyiftactyiꞌ jämꞌ yụꞌtac acaꞌĉan muꞌ, mọꞌ na simꞌ jiꞌcoꞌshayac tŝijĉan, jam quivꞌjoiꞌsiꞌĉan, meꞌdye raꞌ chimeꞌ muntyiꞌ in.

Jiꞌchojtidyeꞌ Jesucristos

¹³ Chimeꞌdye muꞌ Jesús atsij Galileaĉantyiꞌ, Jordánve jịjcaij ĉọcte muꞌ Juan, mạꞌjeꞌ jiꞌchojti Juanyaꞌ.

¹⁴ Juan yi jéĉunꞌte: —Damꞌdye jämꞌ yụ jiꞌchojti míyaꞌ, ¿junꞌ buty meꞌ ĉushdyim?

¹⁵ Vorjete Jesús: —Meꞌ raꞌ q̂uinꞌ mi paj qui jịꞌcätsepja Jenꞌsiꞌ dyijyedyeꞌ muꞌ. Jụjyi qui muꞌ.

¹⁶ Aty jiꞌchojtiyaꞌ muꞌ Jesús aty chanamꞌcheꞌ jịjcabanyaꞌ, vanacyiꞌ vatyquej mạyedyeꞌcheꞌ. Cạvepte Jenꞌsiꞌ Ạꞌedyeꞌ muꞌ jeꞌñes ọꞌtoꞌ, joꞌmes chạiꞌ játŝuti muꞌ Jesús.

¹⁷ Seꞌveꞌ vatyquej mạyedyeꞌches p̂eyacdyeꞌ yiꞌ: —Uts nash mạꞌjeyacdyety Ạvaꞌ yụ, anic maꞌjotaqui yụ.