Mateos 28 - Tsimane

Vañinyedyeꞌ Jesússiꞌ

¹ Aty meꞌsiꞌ mọꞌ mạyedyeꞌ jịꞌjutyitidyes aty raꞌ nạijjoiꞌyaꞌ mọꞌ dọmico, chat qui mọꞌ María Magdalena judyeyaꞌ yocsiꞌ María, sactiꞌ in ĉọĉajte in ruꞌdyeiꞌyaꞌ.

² Meꞌĉandye fer bubaquiꞌ jac, ĉaĉaij na aty chạij yirity Ayoꞌtyiꞌ anjer muꞌ, mạyedyeꞌcheꞌ jijtuij muꞌ burꞌjebajte muꞌyaty därtyiꞌ mij ruꞌdyeiꞌyaty jiquej, judyeyaꞌ muꞌcheꞌdye qui bäꞌyi.

³ Muꞌ anjer jeñej venaiꞌquedyeꞌ meꞌ muꞌ, judyeyaꞌ quịꞌsiꞌ muꞌ anic jiyi juiꞌbuty jeñej tsafaꞌ, joꞌmety.

⁴ Muꞌin väc̣häꞌtyity in aty cạveteyaꞌ in, fer noiꞌyi in, noc̣hoꞌnoc̣hoyequi in, meꞌĉandye säñej tŝọij in jeñej säñity, meꞌ tŝọij in.

⁵ Muꞌ anjer jéyacsi p̂en in: —Jam raꞌ noiꞌyi miꞌin, yụ nash chị́yeyac miꞌin quevtinte muꞌ Jesús, muꞌ pactety croshcheꞌ jiquej in.

⁶ Aty itŝij atsvun úĉan, aty nash vañinyeban muꞌ yoj yetaquidyemꞌ jiquej u. Ayijamꞌ cạveshvac ọij toꞌ, yóĉandyemꞌ meꞌ buꞌyi jiquej u.

⁷ Tạij miꞌin cavinyejamꞌ jéyacseĉajshamꞌ jịꞌchiyactyiꞌ muꞌ: "A nash vañinyeban muꞌ, muꞌ chum raꞌ tashcheꞌ Galileave jịjcaij muꞌ, muꞌve raꞌ cạvetinte miꞌin," jéyacsi raꞌ miꞌin. Ọij nash p̂eyacdyeꞌ miꞌindyes.

⁸ Meꞌdye mọꞌin p̂en in cavintum miꞌebanꞌ in, maꞌjodyeꞌtum in judyeyaꞌ noiꞌyedyeꞌtum in, shujmun tyebanꞌ in jéyacseĉanꞌ in jịꞌchiyactyiꞌ muꞌ.

⁹ Reptete vatyquej in muꞌ Jesús muꞌ qui vorjeyacsi. Dyụtsyiꞌ mọꞌyaꞌ in tocoꞌjepte yuj in, maꞌjotyete in.

¹⁰ Jesús jéyacsi: —Jam raꞌ noiꞌyiꞌ miꞌin. Tạij miꞌin, jéyacsejamꞌ jịꞌchiyactyiꞌ yụ muꞌin vojity buꞌyity yụ in. Jéyacsejamꞌ paj qui Galileave jịjcaij in, paj muꞌve cavin yụ in.

Väc̣häꞌtyitysiꞌ p̂eyacdyeꞌ jéyacsis ayoꞌ in

¹¹ Jäquiꞌve aty jọbanꞌ mọꞌin p̂en in, pạrej väc̣häꞌtyity in muꞌin ĉọjcaquity ruꞌdyesyaꞌ jiquej in, bäꞌyedyeꞌĉan jịjcaij muꞌin in, ĉọcsequi muꞌin tashchety cudyitity Jenꞌcheꞌ in, räj jéyacsi muꞌĉantyiꞌ in junꞌ chuc cạveꞌ in.

¹² Muꞌin tashchety cudyitity Jenꞌcheꞌ in vajmuꞌyaꞌjeyacsi in muꞌintum tashchetytum ĉọjcacsity in, chịmoꞌdye p̂eyeꞌ in. Chat qui dyijyi in soꞌmacsi querec̣ha muꞌin väc̣häꞌtyity in paj qui väñäij muꞌin in.

¹³ Muꞌin ayoꞌ jéyacsi in: —Meꞌ raꞌ jéyacsi muntyiꞌ miꞌin: "Ĉọshvaꞌjoijtyiꞌ tsun tsedyedyeꞌ, vatyquej atsij jịꞌchiyactyiꞌ Jesústyiꞌ muꞌ, muꞌin shuꞌayeti in aꞌ muꞌ Jesúsvunsiꞌ", meꞌ buꞌyi raꞌ jéyacsi miꞌin.

¹⁴ Chimeꞌdye seꞌvaqui jụijyaꞌ muꞌ ayoꞌ Romaĉantyiꞌ, tsundye raꞌ jiꞌc̣huꞌc̣huyebajte paj qui jam miꞌincheꞌ tŝọiꞌ mọꞌ vaꞌtacdyeꞌ —jéyacsi judíoty ayoꞌ muꞌin.

¹⁵ Anicdye meꞌ, jụjyi in muꞌin väc̣häꞌtyity in querec̣hadyes muꞌin chicacsebi in p̂eyacdyeꞌ muꞌin judíotysiꞌ ayoꞌ muꞌin. Anicdye meꞌ mọꞌdyemꞌ q̂uinꞌ muꞌin judío in paiꞌ bäꞌyity in anicjeꞌ in mọꞌ väñädyeꞌ.

Jesús jiꞌcaviti jịꞌchiyactyiꞌyaꞌ muꞌ

¹⁶ Muꞌin yiriꞌtac yirity jiyi jịꞌchiyactyiꞌ muꞌ, muꞌcheꞌ jịjcaij in mụcuꞌcheꞌ Galileaĉan, yócheꞌdyemꞌ jéyacsaque jiquej u.

¹⁷ Muꞌin jịꞌchiyactyiꞌ in aty cạveteyaꞌ in, muꞌin dyụtsyi in maꞌjotyete in, meꞌ tsanꞌ meꞌ pạrej qui namꞌ ĉojtyiꞌĉan yi in, "Vatyquej raꞌ jam muꞌ."

¹⁸ Jesús c̣hẹiꞌyaꞌjeyacsi jéyacsi: —Jenꞌ yuꞌtyin yụ paj qui yụ ayoꞌbuꞌyi räjdyes in, mạyedyeꞌchedyes judyeyaꞌ jacchedyes.

¹⁹ Mọꞌdyes tạij miꞌin, paiꞌ ọij jac jịjcajamꞌ yoc yoc p̂eyaquity in ĉọcseĉamꞌ, jịꞌchiyacsi raꞌ miꞌin paj qui cäc̣häꞌchun yụ in, chimeꞌ raꞌ chojtacsi miꞌin Jenꞌsiꞌcheꞌ tịj muꞌ, judyeyaꞌ Ạvascheꞌ tịj yụ, judyeyaꞌ Ạꞌedyescheꞌ tịj muꞌ.

²⁰ Jịꞌchiyacsi raꞌ jämꞌ miꞌin paj qui muꞌin chimeꞌ räj chäquibun p̂eyacdyeꞌ yụ in, räj p̂eyacdyeꞌ yụ soꞌmeyac miꞌin. Yụ raꞌ räjĉan mạyedyeꞌ penꞌdyetuyac miꞌin junꞌ quiꞌ chuc ọij jadyic tupudyeꞌ.