Mateos 26 - Tsimane

Ayoꞌ dyijyi in tapjete raꞌ in Jesús

¹ Aty meꞌsiꞌ jịꞌchiyacsi muꞌ Jesús, jéyaqui jịꞌchiyactyiꞌ muꞌ:

² —Miꞌin nash chịj jayej päräꞌdyety mạyedyeꞌ Jiꞌc̣honacdyes feshta. Aty raꞌ meꞌsiꞌ, yụ Anictyity Muntyiꞌ, jiꞌmeꞌtyin raꞌ yụ in ayoꞌyaꞌ, muꞌin qui raꞌ pactyin yụ in croshcheꞌ.

³ Muꞌin tashchety cudyitity Jenꞌcheꞌ in judyeyaꞌ muꞌin tashchety ĉọjcacsity in vajmuꞌyaij tsudyujñiti in ayosĉan acaꞌ, tashchetysiꞌ cudyitity Jenꞌcheꞌ, tịj muꞌ Caifás.

⁴ Muꞌĉan vaj meij dyijyi in caminve raꞌ tapjete in muꞌ Jesús judyeyaꞌ jiꞌijate in.

⁵ Yi jítidyeij in: —Jam raꞌ feshtayaꞌ tapjeja, cäjyaꞌ raꞌ tapjeja paj qui jam sac jaꞌyacsejaꞌ räj yoctyiꞌ muntyiꞌ in.

P̂en tsaꞌmete Jesús jẹrejresyaꞌ

⁶ Muꞌ Jesús ĉọcte yirity muntyiꞌ Betaniaĉantyiꞌ muꞌ, bayiꞌyity jiquej, Simón tịj muꞌ, muꞌĉan siti Jesús.

⁷ Säcsevaꞌjoij muꞌĉan yiris p̂en vatyquej ayij, jẹrejres tuiꞌ puñujĉan, mọꞌ puñuj mij jämꞌtacdyeꞌ. Anic jiyiꞌ yaꞌiꞌsiꞌ mọꞌ jẹrejres, mọꞌyaꞌ tsaꞌmete Jesús joꞌnoꞌchemꞌ.

⁸ Jịꞌchiyactyiꞌ muꞌ aty mọꞌ cạveꞌ in, fạ́coij tyeij muꞌin in, yi in: —¿Junꞌ dash meꞌ fibiꞌjeyac ọij jẹrejres?

⁹ Anic nash mọꞌ yaꞌiꞌsiꞌ, tupuj jiꞌmincac, muꞌ qui querec̣ha soꞌmac in muꞌin jayejjotaquity jedyeꞌ in.

¹⁰ Jesús chị́yacsebi dyijyedyeꞌ muꞌinsiꞌ in, chat qui jéyaqui jịꞌchiyactyiꞌ muꞌ: —¿Junꞌ dash meꞌ miꞌin mọꞌ p̂eijtiñeꞌ p̂en? Anic jämꞌsiꞌ yuꞌtyiyin yụ.

¹¹ Räjĉan raꞌ miꞌinyaꞌ muꞌin jayejjotaquity jedyeꞌ in, yụ qui na ramꞌ itŝij, aty raꞌ jam penꞌdyetuyac miꞌin.

¹² Ọij p̂en q̂uinꞌ aty tsaꞌmin yụ, jeñej buꞌyiꞌ taiꞌtac aꞌ yụ nạcdyedyes raꞌ yụ.

¹³ Yụ jéyac miꞌin, paiꞌ junanaj ĉụiꞌ voroꞌyi in Jenꞌsiꞌ p̂eyacdyeꞌ muꞌ, räj buꞌyiꞌ raꞌ ọij jac p̂eyeꞌ raꞌ in junꞌ chuc tsaꞌmin jiquej yụ, muntyiꞌ raꞌ in jam mọꞌ yaquintubiꞌ in.

Judas jiꞌmincate Jesús

¹⁴ Mọꞌdye mạyedyeꞌ yirity jịꞌchiyactyiꞌ Jesústyiꞌ muꞌ, Judas Iscariote tịj muꞌ, muꞌ ĉọcsequi muꞌin tashchety cudyitity Jenꞌcheꞌ in.

¹⁵ Yi muꞌ jéyacsi: —Jiꞌtaptyeyeyac Jesús jụijyaꞌ, ¿juñucsiꞌ bu raꞌ yaꞌityitiĉaꞌ yụ miꞌin? Chat qui muꞌin yaꞌityete in chibin quiꞌtac ficha plata.

¹⁶ Chat qui muꞌ Judas tiyacchuti queveꞌ junꞌ buꞌyiꞌ chuc raꞌ jiꞌtaptyeyacsi in muꞌ Jesús.

Jesús säcsi Jiꞌc̣honacdyedyes feshta jịꞌchiyactyiꞌtum muꞌ

¹⁷ Chaꞌsheꞌ in mọꞌ tashches mạyedyeꞌ feshtas, yiꞌ pan jam jiꞌdujraquistumtyiꞌ. Jịꞌchiyactyiꞌ Jesústyiꞌ muꞌ ĉọcte in jéte in: —¿Junaꞌ mạꞌjeꞌ um paj qui mọꞌyaꞌ jämꞌtyeyeyac tsun säcsedyeꞌ Jiꞌc̣honacdyedyes feshtadyes?

¹⁸ Jesús vorjeyacsi: —Tạij sisvac ọij bäꞌyedyeꞌ, ĉọctinte raꞌ muꞌ muntyiꞌ jéyactyiꞌ yụ, jétinte raꞌ miꞌin: "Muꞌ Jiꞌchäyintyiꞌ tsun yi jin mi: Aty c̣hẹiꞌyaꞌ tupudyeꞌ yụ, mísiꞌĉan raꞌ acaꞌ säcsi jebeiꞌ yụ Jiꞌc̣honacdyedyes feshta jịꞌchiyactyiꞌtum yụ."

¹⁹ Anicdye meꞌ, jịꞌchiyactyiꞌ muꞌ chiquepte p̂eyacdyeꞌ in, muꞌĉan jịjcaij in jämꞌtyeꞌ in mọꞌ Jiꞌc̣honacdyedyes säcsedyeꞌ.

²⁰ Aty shocamyejoiꞌ atsij muꞌ Jesús, mesayaꞌ bäꞌyi jịꞌchiyactyiꞌtum muꞌ säcsi in.

²¹ Säcsevaꞌjoij in yi muꞌ Jesús: —Yụ raꞌ jéyac, yirity miꞌinĉantyiꞌ q̂uinꞌ muꞌ raꞌ yuꞌtyin yụ ayoꞌyaꞌ in.

²² Anic där yoqui jịꞌchiyactyiꞌ muꞌ cäts yirityityij jéte in: —Jịꞌchiyacsity, ¿jam adac yụ? —jéte in.

²³ Jesús vorjeyacsi: —Yódyetydyemꞌ jibityintyiꞌ u yụ mọꞌdye pijiꞌ, muꞌdye raꞌ yuꞌtyin yụ.

²⁴ Yụ Anictyity Muntyiꞌ yụ ijac raꞌ yụ ĉaĉaij na yiꞌ mọꞌ sánacdyeꞌ. Meꞌ tsanꞌ meꞌ, muꞌ qui na raꞌ jiꞌmincantyiꞌ yụ där raꞌ ñịbeꞌ cạveꞌ muꞌ. Damꞌdye jämꞌ jam naꞌaque jiquej muꞌ meꞌtyity muntyiꞌ.

²⁵ Chat qui yi muꞌ Judas, muꞌ jiꞌmincatety raꞌ Jesús, jéte: —Jịꞌchiyacsity, ¿jam adac yụ? Jesús vorjajiti: —Anicdye meꞌ yoj yidye bu um.

Jesús yụꞌtyeꞌ säcsedyeꞌ jiꞌdyijvitidyes

²⁶ Tacaꞌ säcsevaꞌjoij in, muꞌ Jesús tapjete muꞌ pan, yoshoropaij jéte Jenꞌ, chat qui q̂uemiꞌvete, soꞌmaqui jịꞌchiyactyiꞌ muꞌ, jéyacsi: —Miyaꞌĉa uts, jebemac ĉaĉaij na uts nash jeñej buꞌyi ĉụiꞌsiꞌ aꞌ yụ.

²⁷ Tyéquis qui tapjeꞌ yoshoropaij jéte Jenꞌ, soꞌmaqui jịꞌchiyactyiꞌ muꞌ, jéyacsi: —Räjenꞌdye raꞌ miꞌin tyétiñeꞌ.

²⁸ Ọij nash jeñej buꞌyiꞌ ĉụiꞌsiꞌ chäsh yụ, mọꞌ chäsh yụ ferdyeꞌ jasoꞌmitiꞌ p̂eyacdyeꞌ Jenꞌsiꞌ muꞌ, muntyidyes yụꞌtac mọꞌ p̂eyacdyeꞌ. Chäshi raꞌ yụ daiꞌdyes muntyiꞌ in vayacdyes juchaj muntyis in.

²⁹ Yụ jéyac, aty raꞌ jam quivij tyeij yụ ovas fiꞌ mọꞌ, mụiꞌsis qui raꞌ tyeij yụ yiriꞌyaꞌ miꞌintum penꞌdyetuyacyaꞌ atsvun ayoꞌbuꞌyedyeꞌĉan Jenꞌsiꞌ yụ.

Jesús jajiti: "Mi Pedro ticamitiꞌ raꞌ yụ mi."

³⁰ Chat qui Jenꞌsiꞌ jimacdyeꞌ jimeꞌ in chat qui shupqui in mụcuꞌcheꞌ Orivocheꞌ jịjcaij in.

³¹ Jesús jéyacsi jịꞌchiyactyiꞌ muꞌ: —Ọij q̂uinꞌ tsedyedyeꞌ räjenꞌdye raꞌ farajjitiĉaꞌ yụ miꞌin, ĉaꞌjoij raꞌ miꞌin. Meꞌ raꞌ cạ̈tsiꞌ sánacdyeꞌ yiꞌ: "Jenꞌ raꞌ ijacsebi muꞌ ĉọjcaiꞌtyiꞌ oveca in, chat qui raꞌ jiꞌpaiꞌcac oveca in."

³² A na raꞌ vañinyebanyaꞌ yụ, yụ chum raꞌ tashcheꞌ Galileave jịjcaij, jäꞌquiijdye raꞌ miꞌin.

³³ Pedro qui yi jéte: —Meꞌ raꞌ tsanꞌ räjenꞌdye farajjin in, yụ qui na ramꞌ yejĉoij jam junꞌ farajjeye mi.

³⁴ Jesús vorjete: —Yụ raꞌ jéye, ọij q̂uinꞌ tsedyedyeꞌ, jambiꞌ raꞌ p̂oñi ojtereꞌ, chibin quiꞌ raꞌ yi mi: "Yụ jam cäc̣häꞌchutety uts Jesús."

³⁵ Pedro vorjete: —Meꞌ raꞌ tsanꞌ yụ́mun ijan yụ in, jam qui ramꞌ junꞌ ticameye. Chiyidye muꞌin yoctyiꞌ räj in.

Getsemaníĉan muꞌ Jesús cọdyetyete Jenꞌ muꞌ

³⁶ Chat qui muꞌ Jesús jịꞌchiyactyiꞌtum muꞌ cätidyeꞌĉan jịjcaij in Getsemaníĉan. Jesús jéyaqui jịꞌchiyactyiꞌ muꞌ: —Úyaꞌ chum p̂utsquenꞌyejamꞌ, mujuꞌveyaꞌ raꞌ damꞌ jịjcaij yụ, muꞌyaꞌ raꞌ cọdajquiqui Jenꞌcheꞌ yụ.

³⁷ Jesús cạte muꞌ Pedro judyeyaꞌ muꞌin päräꞌ in Zebedeoty ạvaꞌ muꞌ. Därsiꞌ táredyeꞌ játŝuti tyumꞌyi ĉojtyiꞌ muꞌ.

³⁸ Jéyacsi chibintyity in: —Anic tyumꞌyi ĉojtyiꞌ yụ, jeñej raꞌ säñi ĉúti yụ. Úyaꞌ chum tacyaꞌ miꞌin, dyij buꞌjamꞌ yụ́tum.

³⁹ Jesús dadamꞌ mujuꞌveyaꞌ jịjcaij, dyụtsyi muꞌve täjjequeꞌ jac jáfiyaꞌ muꞌ. Cọdyetyete Jenꞌ muꞌ, jéte: —Yụ́tyiꞌ Jenꞌ, tupuj jụijyaꞌ mi, jiꞌc̣hontiꞌ paj qui jam därsiꞌ ñịbedyes jịꞌĉojtyeꞌ yụ, jam qui na ramꞌ yojdyemꞌ mạꞌjeꞌ uij, meꞌ raꞌ yuꞌtim mis dyijyedyeꞌ.

⁴⁰ Aty meꞌsiꞌ cọdyetyete Jenꞌ muꞌ, quivij chimuꞌve, yóĉandyemꞌ farajjeyacsetaqui jiquej u muꞌin chibintyity jịꞌchiyactyiꞌ umꞌ, dạcacseshan ĉọshvaꞌjoij in. Jesús jajiti Pedro: —¿Mijam buty yiris hora dyij buꞌyi yụ́tum miꞌin?

⁴¹ Dyij buꞌjamꞌ miꞌin, cọdaĉamꞌ Jenꞌcheꞌ paj qui jam jịꞌĉojtac miꞌin juchadyeꞌyaꞌ. Meꞌ tsanꞌ dyijyedyeꞌĉan mạꞌjetiñeꞌ cäc̣häꞌchutinte Jenꞌ miꞌin, aꞌsiꞌ qui namꞌ miꞌin itŝiꞌ ferdyeꞌ mọꞌ.

⁴² Cuvij muꞌ Jesús chimuꞌcheꞌ jịjcaban cọdyebajte Jenꞌ muꞌ, jéte: —Yụ́tyiꞌ Jenꞌ, jam tupuj jiꞌc̣hontiꞌyam ñịbedyesĉan yódyesdyemꞌ raꞌ jịꞌĉojtyeꞌsiꞌ u yụ, yụꞌtaqui raꞌ ĉụiꞌsiꞌ dyijyedyeꞌ mi.

⁴³ Quivij chimuꞌve muꞌ Jesús camanꞌ, ĉọcseshan jịꞌchiyactyiꞌ muꞌ, dạcacseshan ĉọshvaꞌjoij in, ĉaĉaij na ĉush játŝuti in.

⁴⁴ Quivij muꞌ Jesús yạjquicsetaqui, muꞌchemꞌ cọdyetyete Jenꞌ muꞌ, aty chibin quiꞌyis mọꞌ cọdacdyemꞌ soꞌmete Jenꞌ.

⁴⁵ Aty meꞌsiꞌ quivij chimuꞌve camanꞌ jéyacseĉan jịꞌchiyactyiꞌ muꞌ: —¿Tacaꞌ yejĉoij ĉọshiꞌ u miꞌin? ¿Tacaꞌ yejĉoij jịꞌjutyiti chimeꞌ u miꞌin? A nash ayij tupudyeꞌ yụ Anictyity Muntyiꞌ yụ, a nash raꞌ soꞌmac yụ juchajtumtyiꞌyaꞌ in.

⁴⁶ Sacyejamꞌ, cabuꞌtyum miꞌin. Atyuꞌ meij jijtuij jiꞌmincantyiꞌ yụ.

Tapjete in muꞌ Jesús

⁴⁷ Tacaꞌ p̂eyacvaꞌjoij muꞌ Jesús shupqueti muꞌ Judas, jịꞌchiyactyiꞌ tsanꞌ muꞌ Jesústyiꞌ chimeꞌ muꞌ. Muꞌ tujijtucsi daiꞌtyiꞌ muntyiꞌ in, tuiꞌ in chutidyes coc̣hino muꞌin judyeyaꞌ son paꞌcacdyes muꞌin. Muꞌin jutacsity in tashchety cudyityity Jenꞌcheꞌ in judyeyaꞌ muꞌin tashchety ĉọjcacsity in.

⁴⁸ Muꞌ Judas jiꞌmincatety aty muꞌ jéyacsaque jiquej muntyiꞌ in: "Jorojĉan raꞌ tyi chuc pụꞌsete yụ, muꞌ raꞌ tŝọ́yetinte miꞌin."

⁴⁹ Anicdye meꞌ, muꞌ Judas chụiꞌ buꞌyi Jesúsyaꞌ, jéte: —Yómoiꞌ Jịꞌchiyacsity —jéte. Yédyeꞌĉan mọmoꞌ pụꞌsete.

⁵⁰ Jesús vorjete: —Chätidyeꞌ, jedyetuij chuc atsij mi, meꞌ raꞌ mọmoꞌ jämꞌtaqui mi. Meꞌĉandye ĉọcte in muꞌ Jesús jämꞌchute vatyquej in.

⁵¹ Yirity jịꞌchiyactyiꞌ Jesústyiꞌ muꞌ sanjeyaqui coc̣hino siscajcapte úñity muꞌ, muꞌtyiꞌ tashchetytyiꞌ cudyityity Jenꞌcheꞌ chat qui muꞌ seiꞌjebite chun muꞌ.

⁵² Jesús jajiti: —C̣havjeyaĉada coc̣hino mi, tyi chuc chucsity coc̣hinoyaꞌ, mọꞌyaꞌdye raꞌ ijac in.

⁵³ ¿Jam adac chịj mi, mạꞌjeꞌ jụijyaꞌ yụ, tupuj cọdyetaqui Jenꞌ yụ, muꞌ tupuj jutiyin yụ shach anjer in, paj qui muꞌin ñutsjin yụ in?

⁵⁴ Meꞌ na raꞌ jụijyaꞌ yụ, jam raꞌ tupuj cạ̈tsiꞌ mọꞌ sánacdyeꞌ, yiꞌsiꞌ junꞌ chuc raꞌ ñịbeꞌ cạveꞌ yụ.

⁵⁵ Chat qui muꞌ Jesús jéyacsi muntyiꞌ in: —¿Jedyedyes caꞌ joꞌmes tutiñeꞌ coc̣hino judyeyaꞌ son? Jeñej quiyaij ac̣hiꞌyity muntyiꞌ ĉútiĉaꞌ yụ miꞌin, mạꞌjeꞌ meꞌ tapjitiĉaꞌ yụ miꞌin. Yoquiꞌ na Jenꞌsiꞌĉan acaꞌ yụ jiquej, muꞌĉan jịꞌchiyacsi yụ, jam méquiꞌ ĉushdyiĉaꞌ yụ miꞌin.

⁵⁶ Räj ọij meꞌ q̂uinꞌ jiyi paj qui cạ̈tsiꞌve sánacdyeꞌ muꞌinsiꞌ in jasoꞌmititysiꞌ p̂eyacdyeꞌ Jenꞌ in. Meꞌĉandye muyaꞌ tŝọij räj jịꞌchiyactyiꞌ muꞌ, farajjetacte in muꞌ Jesús.

Jesús muꞌinsiꞌyaꞌ vej tashchety ayoꞌ judíoty muꞌin

⁵⁷ Muꞌin tapjetety Jesús in cạte in ayosĉan acaꞌ tashchetysiꞌ cudyitity Jenꞌcheꞌ, tịj muꞌ Caifás. Muꞌĉan tsudyujñiti atsvun in muꞌin jịꞌchiyacsity yụꞌtacdyeꞌ Jenꞌsiꞌ in judyeyaꞌ muꞌin tashchety ĉọjcacsity in.

⁵⁸ Jäꞌquiij muꞌ Pedro cäc̣häꞌchute Jesús, junꞌ quiꞌ chuc chaꞌsheꞌ p̂ejyaꞌ acaꞌ. Muꞌĉan siti väc̣häꞌtyitytum judyeyaꞌ muꞌtum buꞌyi bäꞌyi, muꞌin ĉọjcaiꞌtyiꞌ in acaꞌ muꞌ, muꞌĉan bisaqui, mạꞌjeꞌ chịj junꞌ chuc raꞌ muꞌ Jesús.

⁵⁹ Muꞌin tashchety cudyitity Jenꞌcheꞌ in räjtumdye tashchety ayoꞌ in muꞌin quevacsi tsanꞌ muntyiꞌ in paj qui väñädyeꞌyaꞌ yụꞌtyeyete p̂eyacdyeꞌ in ijacdyedyes Jesússiꞌ muꞌ,

⁶⁰ jam qui namꞌ dạcbite in. Meꞌ tsanꞌ daiꞌ väñädyeꞌ tuyete Jesús in, jam qui namꞌ junꞌ tupuj ijacdyeꞌ yụꞌtyeyete in. Chijämꞌdye atsij yoctyiꞌ päräꞌ in,

⁶¹ yi muꞌin in: —Yi jiquej uts muntyiꞌ: "Yụ tupuj jịvaꞌchapte Jenꞌsiꞌ acaꞌ muꞌ, chibin raꞌ mạyedyeꞌ joꞌmejtebanꞌ quivij jämꞌbanꞌ yụ", yi uts Jesús —jéyacsi väñäijtyiꞌ in.

⁶² Chat qui muꞌ tashchety cudyitity Jenꞌcheꞌ sacyi jéte muꞌ Jesús: —Aty seꞌvacsebi p̂eyacdyeꞌ um muꞌin p̂iijbuntyiꞌ juchaj in. ¿Jam bu raꞌ voryi mi? ¿Jam bu raꞌ ĉụiꞌ ñutsjitim?

⁶³ Jesús c̣huꞌc̣huij mọmoꞌ jam jätäjyi. Muꞌ tashchety cudyitity Jenꞌcheꞌ muꞌ cuvij jéte: —Yụ jiꞌjäcbite Jenꞌsiꞌ tịj muꞌ, muꞌ tsạꞌ buꞌyitysiꞌ, paj qui rụij p̂eyaqui mi. Jítiĉaꞌ tsun miꞌin: "¿Mi adac Jiꞌc̣honacsity Muntyiꞌ? ¿Mi adac Jenꞌtyiꞌ Ạvaꞌ muꞌ?

⁶⁴ Jesús vorjete: —Meꞌ nash yoj yidyeꞌ bu um. Yụ jéyac, yirisĉan raꞌ mạyedyeꞌ naijtiĉaꞌ yụ miꞌin Anictyity Muntyiꞌ yụ tacve buꞌyi raꞌ Jenꞌyaꞌ yụ, muꞌ mujuꞌchaꞌ ferdyeꞌtumtyiꞌ. Chimeꞌdye raꞌ yirisĉan mạyedyeꞌ jiꞌĉujtuyitiĉaꞌ yụ miꞌin dyicbaꞌbadyeꞌ raꞌ jijtuiꞌ yụ.

⁶⁵ Muꞌ tashchety cudyitity Jenꞌcheꞌ meꞌĉandye shẹiꞌjeyaqui quịꞌsiꞌ muꞌ, yi jéyacsi: —¡Därsiꞌ ñinacdyeꞌ Jenꞌyaꞌ shupquiꞌ ọij p̂eyacdyeꞌ muꞌ! Aty jam junꞌ jemonja tsun tyi chuc p̂eijbitety juchaj utssiꞌ muꞌ. Miꞌindye seꞌveptinte ñinacdyeꞌ muꞌ.

⁶⁶ ¿Jätäjyi tyuꞌ u miꞌin? Ayoꞌ voryi in: —Därsiꞌ juchaj muꞌ, jemoñeꞌ aty ijac muꞌ.

⁶⁷ Chat qui muꞌin in chuꞌbete vejyaꞌ Jesús in judyeyaꞌ päjjete in. Pạrej ĉatjete vejyaꞌ in,

⁶⁸ pạrej majmadyeꞌĉan yi jéte in: —Mi nash Jiꞌc̣honacsity Muntyiꞌ, chị́va, ¿tyi buty päꞌjin mi?

Pedro ticamete Jesús

⁶⁹ Pedro jorojyaꞌ bäꞌvaꞌjoij p̂ejyaꞌ. Ĉọcte yiris nanas mọꞌĉansiꞌdye úñis, jéte: —Mi nash chimeꞌ cäc̣häꞌchutety muꞌ Jesús Galileaĉantyiꞌ.

⁷⁰ Pedro ticamete muꞌinsiꞌyaꞌ vej in räjenꞌdye muꞌĉantyiꞌ in. Yi muꞌ: —Jam chịj yụ jedyeꞌ buty cạiꞌ mis p̂eyacdyeꞌ.

⁷¹ Pedro c̣hẹiꞌyaꞌ jịjcaij chụiꞌdyeꞌyaꞌ. Yocsiꞌ úñis mọꞌĉan janaijti yiꞌ mọꞌ, jéyacsiꞌ muꞌĉantyiꞌ muntyiꞌ in: —Uts nash chimeꞌ cäc̣häꞌchutety Jesús jiquej Nazaretĉan bäꞌyity.

⁷² Quivij muꞌ Pedro ticamete Jesús, tsäquiꞌsistumsiꞌ p̂eyacdyeꞌ jéyacsi: —Yụ jam chị́yete.

⁷³ Damꞌ mọmoꞌ tyäꞌpäiꞌtyiꞌ in cuvij muꞌĉantyiꞌ ĉọcte Pedro in, jéte in: —Anicdye meꞌ, mi nash cäc̣häꞌchutety uts ĉaĉaij na aty jorojĉan yocsiꞌ p̂eyacdyeꞌ mi.

⁷⁴ Pedro tsäquiꞌsistum p̂eyacdyeꞌ jéyacsi: —Jam rụijsis jụijyaꞌ ọij p̂eyacdyeꞌ muꞌdye raꞌ Jenꞌ vaꞌtacdyeꞌ soꞌmin yụ. Jenꞌsiꞌyaꞌ vej muꞌ jéyac yụ, yụ jam chị́yete uts muntyiꞌ. P̂eyacdyeꞌĉan mọmoꞌ meꞌĉandye p̂oñi ojtereꞌ.

⁷⁵ Aty seꞌvepteyaꞌ p̂onꞌdyeꞌ, chat qui muꞌ Pedro q̂uinꞌdyemꞌ dyijtubibajte Jesússiꞌ p̂eyacdyeꞌ muꞌ, yi jiquej jajiti: "Jambiꞌdyemꞌ raꞌ p̂oñi ojtereꞌ, chibin quiꞌdye raꞌ ticamitim." Chat qui muꞌ Pedro shuban där tári muꞌ.