Mateos 24 - Tsimane

Jịvaꞌchac raꞌ Jenꞌsiꞌ acaꞌ muꞌ

¹ Chat qui muꞌ Jesús shuban Jenꞌsiꞌĉan acaꞌ muꞌ aty raꞌ jọban muꞌ. Jịꞌchiyactyiꞌ muꞌ ĉọcte in judyeyaꞌ c̣họcoꞌbite Jenꞌsiꞌ acaꞌ in, daiꞌ yocsiꞌ mọꞌyaꞌ acaꞌ in.

² Jesús jéyacsi: —Anicdye meꞌ, där jäjämunsiꞌ ọij acaꞌ cạvejas q̂uinꞌ. Yụ raꞌ jéyac räj ọij q̂uinꞌ cạvetiñes, räj raꞌ jịvaꞌchac in, räj raꞌ mij mọꞌ vänꞌjetac, mijam raꞌ yirity tacyaꞌ jiꞌyajcati.

Jịꞌĉocdyes aty raꞌ ayij jadyiquis tupudyeꞌ

³ Aty mụcuꞌcheꞌ muꞌ Orivocheꞌ muꞌcheꞌ bäꞌyi p̂utsquenꞌyi muꞌ Jesús. Ĉọcte in jịꞌchiyactyiꞌ muꞌ, itŝij yoctyiꞌ yocvety jijtuij in. Jịꞌchiyactyiꞌ jéte in: —Jítiĉamꞌ, ¿junꞌsiꞌ buty raꞌ cạ̈tsiꞌ ọij jítiĉas tsun miꞌin? ¿Jedyeꞌ buty raꞌ jịꞌĉocdyes aty raꞌ caꞌñibunyaꞌ mi, aty raꞌ ayijyaꞌ jadyiquis tupudyeꞌ?

⁴ Jesús vorjeyacsi: —Areꞌĉa miꞌin jam raꞌ seꞌvacsebi miꞌin väñädyeꞌ muntyis muꞌin.

⁵ Daiꞌ raꞌ muntyiꞌ jiꞌcaviti in, yụ́siꞌ raꞌ tịj jiꞌjäcbun yụ in, yi raꞌ in: "Yụ nash Jiꞌc̣honacsity Muntyiꞌ", judyeyaꞌ qui raꞌ daiꞌ anicjeyacsebi väñädyeꞌ muꞌin.

⁶ Chimeꞌdye daiꞌ raꞌ seꞌvetiñeꞌ chutidyeꞌ in, c̣hẹiꞌyaꞌ bäꞌyity in judyeyaꞌ mochtyiꞌ in. Meꞌ raꞌ tsanꞌ seꞌvetiñeꞌ jam qui na ramꞌ cajotyiti miꞌin, meꞌ raꞌ tsanꞌ meꞌ cạ̈tsiꞌ, jambiꞌ qui na ramꞌ ayij jadyiquis tupudyeꞌ.

⁷ Yiris raꞌ jac yocsiꞌtum chutidyeij in, judyeyaꞌ yirity jacchety ayoꞌ jutaqui raꞌ väc̣häꞌtyity muꞌ, chuti raꞌ yoctyiꞌtum in. Junꞌsiꞌ raꞌ ĉụiꞌ mọꞌyaꞌ dáquedyeꞌ chimeꞌ, judyeyaꞌ raꞌ chimeꞌ paiꞌ mọꞌyaꞌ jiꞌcaviti bubacdyeꞌ.

⁸ Meꞌ raꞌ tiyacchutiꞌ ñịbedyes muntyidyes in.

⁹ Chat qui raꞌ meꞌsiꞌ jiꞌmeꞌtyinac ayoꞌyaꞌ in, muꞌin qui raꞌ jịꞌñibeꞌcanac in, judyeyaꞌ raꞌ ijanac in. Räj jacchety muntyiꞌ in fáquinac raꞌ in yụ́dyes.

¹⁰ Anic raꞌ daiꞌ farajjin yụ in, aty jam raꞌ cäc̣häꞌchubun yụ in, pạrej raꞌ fạ́cacsi yoctyiꞌ in jiꞌmeꞌtacsi raꞌ in ayoꞌyaꞌ.

¹¹ Chat qui raꞌ daiꞌ muꞌyaꞌ vaꞌve jịꞌchiyacsity in, jeñej buꞌyi raꞌ jasoꞌmitity p̂eyacdyeꞌ Jenꞌ in, meꞌ buꞌyi raꞌ in, meꞌdyes qui daiꞌ muntyiꞌ in anicjeyacsebiban raꞌ in cäjsis p̂eyacdyeꞌ muꞌin.

¹² Dadamꞌ raꞌ mujuꞌchaꞌ ac̣hiꞌyi muntyiꞌ in, araj raꞌ räj muntyiꞌ in aty raꞌ jam mạꞌjitidyestum bäꞌyi in.

¹³ Tyi chuc jam peñity in junꞌ quiꞌ chuc jadyic tupudyeꞌ, muꞌin raꞌ c̣hoñi in.

¹⁴ Paiꞌ bäꞌyity jacchety muntyiꞌ in, räj raꞌ muꞌin seꞌveꞌ in mọꞌ p̂eyacdyeꞌ Jenꞌsiꞌ muꞌ, mọꞌ p̂eyeꞌ aty raꞌ ayoꞌbuꞌyi Jenꞌ, chat aty raꞌ meꞌsiꞌ q̂uinꞌdyemꞌ raꞌ ayij jadyiquis tupudyeꞌ.

¹⁵ Muꞌ Daniel jiquej jasoꞌmitity p̂eyacdyeꞌ Jenꞌ, sánacdyeꞌ muꞌ p̂eyeꞌ mọꞌ jiꞌac̣hiꞌtacsis raꞌ jämꞌtacdyeꞌ. Mọꞌĉan raꞌ yụꞌtac Jenꞌsiꞌĉan acaꞌ muꞌ. (Tyi chuc p̂eyeꞌ ọij sánacdyeꞌ paj jämꞌ chiqueꞌ jätäjyiꞌ chuc.)

¹⁶ Aty cạvetiñeꞌyaꞌ miꞌin aty mọꞌĉan mọꞌ yụꞌtac Jenꞌsiꞌĉan acaꞌ muꞌ, chat qui raꞌ muꞌin Judeaĉantyiꞌ in yiristum muꞌvedye yacchuti ĉaꞌjoij in, paj mụcuꞌcheꞌ jịjcaij in.

¹⁷ Tyi chuc jorojyaꞌ acaꞌ jụijyaꞌ aty seꞌveꞌyaꞌ mọꞌ, paj jam junꞌ sisan ĉụiꞌsiꞌĉan acaꞌ muꞌ paj jam jäcaĉan jubij muꞌ.

¹⁸ Meꞌdye chimeꞌ tyi chuc quịjodyeꞌĉan jụijyaꞌ, paj jam junꞌ acatuban muꞌ jätaĉan quịꞌsiꞌ muꞌ, paj yiristum ĉaꞌjoij muꞌ.

¹⁹ ¡Där raꞌ ñịbeꞌ cạveꞌ in mọꞌin p̂en jạjtsis in, judyeyaꞌ tsiꞌyity ạvaꞌ mọꞌin!

²⁰ Cọdyemac Jenꞌ paj qui jam tsịvuꞌvudyeꞌĉan cavꞌquinac in, mijam raꞌ jịꞌjutyitidyesĉan mạyedyeꞌ chimeꞌ.

²¹ Anic raꞌ mọjoꞌchas därsiꞌ ñịbedyes jịꞌĉojtyeꞌ raꞌ muntyiꞌ in, jam jeñej tashches jiquej yoquiꞌdyemꞌ jämaqueyaꞌ ọij jac jiquej o, ọyaꞌyaꞌ ñịbeꞌ cạveꞌ muntyiꞌ in, mijam raꞌ cuvij joꞌmes chaꞌsheꞌ ñịbedyes.

²² Jenꞌ aty dyijyi damꞌ raꞌ dyäcjeꞌ mạyedyeꞌ ñịbedyes tupudyeꞌ, jam meꞌ jụijyaꞌ a vuty tas muntyiꞌ säñi u in. Tsimꞌtactyidyes mọmoꞌ in, muꞌindyes ramꞌ dyäcjetyetac in ñịbedyes mạyedyeꞌ in paj qui jam men meꞌ buꞌyiꞌ.

²³ Aty raꞌ meꞌsiꞌ jụijyaꞌ, yirity muntyiꞌ jínac jụijyaꞌ: "¡Mush úyaꞌ útsi Jiꞌc̣honacsity Muntyiꞌ!" jam jụijyaꞌ, vatyquej raꞌ yi in: "Muꞌve muꞌ Jiꞌc̣honacsity Muntyiꞌ." Meꞌ yi jụijyaꞌ in, jam raꞌ anicjeyacsebi p̂eyacdyeꞌ miꞌin,

²⁴ ĉaĉaij na atsij raꞌ pạrej muntyiꞌ väñäijtyiꞌ in, jeñej buꞌyi raꞌ Jiꞌc̣honacsity Muntyiꞌ yuꞌti in, judyeyaꞌ jeñej buꞌyi raꞌ jasoꞌmitity p̂eyacdyeꞌ Jenꞌ in, meꞌ buꞌyi raꞌ yuꞌti in. Därsiꞌ raꞌ ferdyeꞌ jịꞌcaveyacsi muntyiꞌ in paj qui muntyiꞌ in anicjeyacsebive väñädyeꞌ muꞌin. Chimeꞌ muꞌinmun raꞌ fer väñätucsi in Jenꞌtyiꞌ tsimꞌtactyiꞌ muꞌ paj qui muꞌinmun anicjeyacsi in chimeꞌ, meꞌ tupuj jụijyaꞌ in.

²⁵ Jäꞌmij tashcheꞌ jịꞌchiqueyeyac q̂uinꞌ ọij, paj qui chịjve miꞌin, jam qui anicyive miꞌin.

²⁶ Vatyquej yi jụijyaꞌ in: "Muꞌyaꞌ cäjyasĉan jac muꞌ Jiꞌc̣honacsity Muntyiꞌ", jam raꞌ junꞌ anicjeyacsi miꞌin. Chimeꞌdye: "Muꞌĉan jijmuꞌsiti", yi jụijyaꞌ in, jam raꞌ junꞌ anicjeyacsi miꞌin.

²⁷ Atsijbanyaꞌ yụ Anictyity Muntyiꞌ yụ jorojĉandye raꞌ yụ jeñej buꞌyi raꞌ vịcuiꞌquedyeꞌ räj mạijyi mạyedyeꞌcheꞌ, räj jịjcaijcheꞌ tsun mạij raꞌ tŝọiꞌ, meꞌyedyeꞌĉandye raꞌ jorojĉanyi yụ.

²⁸ Meꞌ raꞌ cạ̈tsiꞌ ọij p̂eyacdyeꞌ yiꞌ: "Yóyaꞌdyemꞌ säñiꞌsiꞌ jedyeꞌ o, mọꞌyaꞌ vạjmoꞌyaiꞌ shiꞌeꞌ in."

Atsijban raꞌ Anictyity Muntyiꞌ

²⁹ Aty raꞌ jiyiꞌyaꞌ ñịbedyes, chat qui raꞌ tomajyi muꞌ tsun, tyumꞌ raꞌ mọꞌ tyeiꞌ ịvaj, muꞌin na raꞌ ọ́rotaꞌ jọꞌchaij in, judyeyaꞌ raꞌ mạyedyeꞌches chimeꞌ jedyeꞌ bubenꞌyiꞌ in.

³⁰ Chat qui raꞌ cheꞌve cavibubun yụ in jịꞌĉocdyes Anictyitydyes Muntyiꞌ yụ. Räj jacchety muntyiꞌ in, yoc yoc p̂eyaquity in fer raꞌ tári in aty cavinyaꞌ yụ in Anictyity Muntyiꞌ yụ, jiꞌĉujtuyibun raꞌ yụ in, dyicbaꞌbadyeꞌ raꞌ jijtuiꞌ yụ, därsiꞌyaꞌ raꞌ ferdyeꞌ yụ judyeyaꞌ mạijquedyeꞌtum raꞌ atsijban yụ.

³¹ Anic raꞌ fer mạꞌiꞌ tujyiꞌ, chat qui raꞌ yụ jutaqui anjer yụ paj qui paiꞌ ọij jac jịjcaij in, jätisve, judyeyaꞌ rocve, judyeyaꞌ jijtuijve tsun, judyeyaꞌ siticheꞌ tsun, räj raꞌ dyụ́tsedyeꞌve jac jịjcaij in, meꞌ meꞌ raꞌ jäcacsi tsimꞌtactyiꞌ yụ in.

³² Dyijtuvac raꞌ miꞌin jedyeꞌ chuc jiꞌĉuyinac mọꞌ cätidyeꞌ higuera. Mọꞌ cätidyeꞌ aty tiyacchutiꞌ coꞌñeyebanꞌ jụijyaꞌ, mọꞌ jiꞌchäquiyinac aty c̣hẹiꞌyaꞌ tupudyeꞌ juñꞌyebanꞌ.

³³ Meꞌdye raꞌ chimeꞌ aty cạvetiñeꞌ mọꞌ cạ̈tsiꞌ jéyacsis yụ q̂uinꞌ, chat qui raꞌ q̂uinꞌdyemꞌ chịj miꞌin aty c̣hẹiꞌyaꞌ ayidyeꞌ yụ.

³⁴ Yụ jéyac, jambiꞌ raꞌ jụꞌñij mọtsi uts muntyiꞌ in räj raꞌ cạ̈tsiꞌ ọij.

³⁵ Mạyedyeꞌches jedyeꞌ in judyeyaꞌ ọij jac mọtsiꞌ raꞌ in, yụ́siꞌ qui namꞌ p̂eyacdyeꞌ jam junꞌ mọtsiꞌ, mọꞌ ramꞌ cạ̈tsiꞌ.

Jam tyi chị́yeꞌ in tupudyeꞌ ayidyeꞌ muꞌ

³⁶ Mijam tyi chịj junꞌsiꞌ chuc raꞌ ayij jadyiquis tupudyeꞌ, mijam hora chị́yac. Mijam anjer mạyedyeꞌchety chịj in, mijam yụ Jenꞌtyiꞌ Ạvaꞌ yụ, meꞌdye Jenꞌ mọmoꞌ yirity chịj.

³⁷ Aty raꞌ atsijbanyaꞌ yụ Anictyity Muntyiꞌ yụ, mijam raꞌ chị́vaꞌjoij muntyiꞌ in, yojdyemꞌ tomity muntyiꞌ jiquej u in Noétum jiquej in.

³⁸ Jambiꞌ ayij bänedyeꞌ jiquej, yejĉoij mọmoꞌ ĉụiꞌ bäꞌyi muntyiꞌ in, säcsi mọmoꞌ in, judyeyaꞌ vämi in, ĉụiꞌdye chaꞌsheꞌ in mọꞌ mạyedyeꞌ aty sitiyaꞌ covambaĉan muꞌ Noé.

³⁹ Muꞌin jam chị́vaꞌjoij in, ĉụiꞌdye vatyquej shupquetiꞌ ojñiꞌ jiꞌp̂utacsi räj muntyiꞌ in. Meꞌdye raꞌ muꞌin chimeꞌ muntyiꞌ in atsijbanyaꞌ yụ Anictyity Muntyiꞌ yụ, jam raꞌ chị́vaꞌjoij in.

⁴⁰ Päräꞌ raꞌ quịjodyeꞌĉan in, yirity raꞌ ĉụiꞌ moñi, yoctyiꞌdyety raꞌ tacyaꞌ.

⁴¹ Meꞌdye raꞌ chimeꞌ p̂en in, päräꞌ raꞌ musacvaꞌjoiꞌ in, yiris raꞌ ĉụiꞌ moñiꞌ, yocsiꞌdyety raꞌ tacyaꞌ.

⁴² Mọꞌdyes ĉujcati raꞌ miꞌin, ĉaĉaij na jam chäyitiĉaꞌ miꞌin, ĉụiꞌdye raꞌ atsijban yụ Ayoꞌ miꞌin.

⁴³ Jeshaꞌ yirity muntyiꞌ chịj jụijyaꞌ muꞌ junꞌsiꞌ chuc ĉụiꞌ atsij muꞌ shushuꞌaty muntyiꞌ, muꞌ raꞌ tsạꞌ buꞌyi muꞌ ĉọjcaqui acaꞌ muꞌ paj qui jam jasäsbuti jashuꞌatuti jedyeꞌ muꞌ.

⁴⁴ Meꞌdye raꞌ miꞌin chimeꞌ, jemoñeꞌ räjĉan ĉujcati miꞌin bisdyiĉaꞌ yụ miꞌin Anictyity Muntyiꞌ yụ, jam raꞌ chị́vaꞌjoij miꞌin, junꞌsiꞌ raꞌ ĉụiꞌ mọmoꞌ atsijban yụ mijam dyijtucdyeꞌĉan.

Rụijtyity úñity judyeyaꞌ ac̣hiꞌyity

⁴⁵ Meꞌ nash carijtaqui muꞌ dyijyedyeꞌtumtyiꞌ úñity, jịꞌcätsaquity p̂eyacdyeꞌ. Ayoꞌ muꞌ yocve jịjcaijyaꞌ, yụꞌtaqui tashchety úñity muꞌ paj qui räjĉan mạyedyeꞌ soꞌmacsi säcsedyeꞌ yoctyiꞌ úñity in.

⁴⁶ Där raꞌ maꞌjoij muꞌ tashchety úñity muꞌ jadaquishun jụijyaꞌ muꞌ yejĉoij jämꞌ carijtaqui chiqueptety p̂eyacdyeꞌ ayos muꞌ.

⁴⁷ Jéyac yụ, muꞌ meꞌtyity úñity mujuꞌchaꞌ raꞌ fer buꞌyi yụꞌtac ayoꞌyaꞌ muꞌ, muꞌ raꞌ jayuꞌti paj qui räj ĉọjcaiꞌtyiꞌ jedyeꞌ muꞌ.

⁴⁸ Ac̣hiꞌyity na úñity jụijyaꞌ yocdye muꞌ. Yi mọmoꞌ muꞌ: "Tacaꞌ men raꞌ atsijban ayoꞌ yụ."

⁴⁹ Chat qui tiyacchuiꞌ muꞌ ñịbeꞌ jịꞌcavacsi yoctyiꞌ úñity in judyeyaꞌ muꞌmun tyetyetacsi judyeyaꞌ jebetyetacsi muꞌin shuꞌquity muntyiꞌ in.

⁵⁰ Vatyquej c̣honꞌyebanyaꞌ shupqueshan ayoꞌ muꞌ, jam raꞌ chị́vaꞌjoij úñity muꞌ, meꞌtacvaꞌjoij raꞌ jadaquishun muꞌ.

⁵¹ Chat qui raꞌ muꞌ ayoꞌ muꞌ jämꞌsiꞌ vaꞌtacdyeꞌ jasoꞌmiti, vaꞌcac raꞌ yóĉandyemꞌ muꞌin u in ac̣hiꞌ dyijyity in, jämꞌ yuꞌti tsanꞌ in. Muꞌĉan raꞌ där tári judyeyaꞌ raꞌ querechjeyaqui modyin muꞌ.