Mateos 21 - Tsimane

Jesús siteꞌ Jerusalén

¹ Jesús jịꞌchiyactyiꞌtum muꞌ aty c̣hẹiꞌyaꞌ tyiti Jerusalén in, aty raꞌ venjoij in Betfagéyaꞌ, mọꞌ mụcuꞌves bäꞌyedyeꞌ Orivoves. Muꞌyaꞌ dyäcyi in chat qui muꞌ Jesús päräꞌ jutaqui jịꞌchiyactyiꞌ muꞌ.

² Muꞌ jéyacsi: —Tạij miꞌin sisvac ọij tashcheꞌ buꞌyis bäꞌyedyeꞌ. Mọꞌĉan raꞌ yiris dạquictiñeꞌ bórico, saꞌbas ạvaꞌtumsiꞌ. Dajjetiñeꞌ raꞌ miꞌin, úyaꞌ raꞌ tuyitiĉaꞌ yụ miꞌin.

³ Mạꞌjeꞌ dyäcjiĉunꞌnac jụijyaꞌ in jéyacsi raꞌ miꞌin: "Ayoꞌ tsun jemonacsi, q̂uinꞌdye raꞌ jiꞌcaꞌñiyibunac."

⁴ Ọij meꞌ jiyiꞌ paj qui cạ̈tsiꞌ mọꞌ sánacdyeꞌ jasoꞌmitis p̂eyacdyeꞌ Jenꞌ, yi muꞌ:

⁵ Jéyacseva muꞌin Siónĉan bäꞌyity in: "Atyuꞌ ĉushnac ayoꞌ miꞌin. Muꞌ ĉụiꞌ uyaꞌyaꞌ yuꞌti foquiꞌquiij bóricocheꞌ, bóricoscheꞌ ạvaꞌ mọꞌ", yiꞌ sánacdyeꞌ.

⁶ Sacti in päräꞌ jịꞌchiyactyiꞌ muꞌ, chiquete in jätäjjeyacsi chuc muꞌ.

⁷ Tuyete in ạvaꞌtumdye mọꞌ bórico, jämꞌchuyete quịꞌsiꞌ muꞌin, chat qui foquinꞌti muꞌ Jesús, chat qui miꞌi muꞌ.

⁸ Shach muꞌyaꞌ muntyiꞌ in, pạrej natstyeyete in mụijyaꞌ quịꞌsiꞌ muꞌin, yócheꞌdyemꞌ raꞌ yútyi muꞌ u. Pạrej shantuij in chimeꞌdye natsjeyete mụijyaꞌ in

⁹ Anic shach muꞌyaꞌ muntyiꞌ penꞌdyetutety in, pạrej tashcheꞌ buꞌyi in, pạrej jäquiꞌ in. Vaj meꞌ jeꞌ p̂eyacdyeꞌ in, fer p̂eyaqui in, yi in: —¡Timaꞌqueja uts Davidtyiꞌ vóshimꞌ! Muꞌ nash jutactyiꞌ Ayoꞌtyiꞌ tsun, ¡paj Jenꞌ ñịbeꞌjajiti! ¡Timaꞌqueja muꞌ Jenꞌ mạyedyeꞌchety!

¹⁰ Aty shupquequi Jerusalénĉan, räj sacyi muꞌĉantyiꞌ in maꞌjotyete in, yi jítidyeij in: —¿Tyi buty uts joꞌmety muntyiꞌ?

¹¹ Pạrej muntyiꞌ voryi in: —Uts nash Jesús, muꞌ nash jasoꞌmitity p̂eyacdyeꞌ Jenꞌ, Nazaretĉan bäꞌyity muꞌ, mọꞌ Galileas jac bäꞌyedyeꞌ.

Jesús jiꞌshupcacsi Jenꞌsiꞌĉantyiꞌ acaꞌ in jiꞌmincaquity in

¹² Jesús siti Jenꞌsiꞌĉan acaꞌ muꞌ, chat qui muꞌ jiꞌshupcacsi räj muꞌin jiꞌmincaquity in judyeyaꞌ yaꞌity in. Muꞌ äpjeyacsebi mesa muꞌin cambiyaijtyiꞌ querec̣ha in judyeyaꞌ bäꞌyaquis muꞌin jiꞌmincaiꞌtyiꞌ jiꞌcoꞌshayacdyedyes ọꞌtoꞌ in.

¹³ Jéyacsi muꞌ: —Yiꞌ mọꞌ Jenꞌsiꞌ sánacdyeꞌ muꞌ: "Ọij acaꞌ yụ cọdacdyedyes mọmoꞌ yụ́cheꞌ" yiꞌ, miꞌin qui namꞌ jam meꞌ, muꞌĉan jiꞌbäꞌyacsi miꞌin shushuꞌaty muntyiꞌ in.

¹⁴ Chat qui atsij muꞌĉan in tofety muntyiꞌ in judyeyaꞌ muꞌin väiꞌväiꞌyity in, ĉọshte muꞌin in muꞌ Jesús yóĉandyemꞌ Jenꞌsiꞌ acaꞌ umꞌ. Muꞌ qui jiꞌchäcacseban.

¹⁵ Chimeꞌdye muꞌin miquiꞌmuntyiꞌ in fer p̂eyaqui yi in: "Timaꞌqueja uts Davidtyiꞌ vóshiꞌ muꞌ." Muꞌin na tashchety cudyitity Jenꞌcheꞌ in judyeyaꞌ muꞌin jịꞌchiyacsity yụꞌtacdyeꞌ Jenꞌsiꞌ in, aty cạvepte Jesússiꞌ ferdyeꞌ in, judyeyaꞌ seꞌvacsebi p̂eyacdyeꞌ miquiꞌmuntyis in, muꞌyaꞌdye fạ́coij tyeij muꞌin in.

¹⁶ Muꞌin jéte in muꞌ Jesús: —¿Jam adac seꞌvacsebi p̂eyacdyeꞌ mi muꞌin timaꞌquintyiꞌ in? Jesús vorjeyacsi: —Yụ nash seꞌvacsebi timaꞌcacdyeꞌ muꞌin. Miꞌin na ¿jam adac mọꞌ p̂eyetiñeꞌ sánacdyeꞌ yiꞌ: "Mi Jenꞌ mi nash yụꞌtacsi muꞌin miquity in judyeyaꞌ joijnoꞌ in paj qui muꞌin anic rụij timaꞌquin in?"

¹⁷ Chat qui muꞌ Jesús muꞌĉan shuban, yạjquibanꞌ mọꞌ bäꞌyedyeꞌ Jerusalén, Betaniave qui jịjcaij, muꞌĉan qui ĉọshi.

Jesús soꞌmeꞌ vaꞌtacdyeꞌ mọꞌ cätidyeꞌ higuera

¹⁸ Nojno mạyedyeꞌ pamꞌ muꞌ Jesús Jerusalénve jijtuban, dáquistum miꞌeban.

¹⁹ Cạveꞌ yiris cätidyeꞌ higuera jeijsis majmi. Mọꞌ ĉọ́queꞌ itŝiꞌ na mọs väsh, shan mọmoꞌ mọꞌyamꞌ. Chat qui jeꞌ muꞌ cätidyeꞌ: —¡Q̂uinꞌ chat jadyic mi meꞌquiꞌdye jebac väsh mi! Yédyeꞌĉan mọmoꞌ sacñenꞌ tyeiꞌ mọꞌ cätidyeꞌ.

²⁰ Muꞌin jịꞌchiyactyiꞌ muꞌ aty cạveꞌ in anic äjyi muꞌin in. Yi jéte Jesús in: —¿Junꞌ cavintum sacñenꞌ tyeiꞌ o?

²¹ Jesús vorjeyacsi: —Yụ jéyac, anicjetinte Jenꞌ jụijyaꞌ miꞌin, judyeyaꞌ jam yocve dyijyi ĉojtyiꞌĉan jụijyaꞌ miꞌin, chimeꞌjetiñeꞌ raꞌ miꞌin chimeꞌ, yójeꞌdyemꞌ yụ u sacñenꞌ jiꞌtyeij ọij cätidyeꞌ q̂uinꞌ. Jam raꞌ mọꞌ mọmoꞌ meꞌjetiñeꞌ, chimeꞌdye miꞌin raꞌ tupuj jétinte uts mụcuꞌ: "Roiꞌjevaꞌ ojñiꞌĉan", meꞌdye raꞌ cạ̈tsiꞌ p̂eyacdyeꞌ miꞌin.

²² Jedyeꞌ chuc cọdyetinte Jenꞌ, anicjetinte jụijyaꞌ, jụjbunac raꞌ cọdacdyeꞌ miꞌin.

¿Tyi buty jayuꞌti muꞌ Jesús?

²³ Chat qui muꞌ Jesús atsijban Jenꞌsiꞌyaꞌ acaꞌ muꞌ jijtuban, muꞌĉan siti. Aty jịꞌchiyacsiyaꞌ muntyiꞌ in, chat qui muꞌin tashchety cudyitity Jenꞌcheꞌ in judyeyaꞌ muꞌin tashchety ĉọjcacsity in ĉọcte jéte in: —¿Tyi caꞌ meꞌ yuꞌtyin mi ọij carijtacdyeꞌ mi? ¿Tyi buty soꞌmin mi yụꞌtacdyeꞌ meꞌsis?

²⁴ Jesús vorjeyacsi: —Yụ raꞌ chimeꞌ jéyac yiris cọdacdyeꞌ, vorjitiĉaꞌ jụijyaꞌ yụ miꞌin, chat qui yụ raꞌ jéyac tyi buty yuꞌtyin yụ.

²⁵ ¿Tyi buty jayuꞌti muꞌ Juan paj qui muꞌ chojtacsi muntyiꞌ jiquej in, Jenꞌ buty jayuꞌti, areꞌ muntyiꞌ meꞌ yụꞌte in? —jéyacsi Jesús. Muꞌin ayoꞌ in jítidyeij in, yi in: —¿Jätäjjeja bu raꞌ tsun? Jéja na raꞌ jụijyaꞌ tsun: "Jenꞌ nash jayuꞌti", muꞌ raꞌ jísinꞌ: "¿Junꞌ dash ĉaĉaij jam anicjetinte miꞌin?"

²⁶ Tsun na raꞌ jéja jụijyaꞌ: "Muntyiꞌ nash yụꞌte in", muꞌin muntyiꞌ raꞌ fáquisinꞌ tsun in ĉaĉaij na jutactyiꞌ Jenꞌtyiꞌ ĉọ́te in muꞌ Juan —jítidyeij in.

²⁷ Mọꞌdyes qui jéte Jesús in: —Jam chịj tsun tyi raꞌ meꞌ buꞌyi yụꞌte muꞌ Juan. Jesús jéyacsi: —Yụ chimeꞌ jam raꞌ damꞌ jéyac miꞌin tyi buty yuꞌtyin yụ paj qui yụ meꞌ jiꞌshupcacsi.

Jịꞌĉocdyes p̂eyacdyeꞌ päräꞌ ạvaꞌ muntyity

²⁸ Jesús jéyacsi: —Seꞌvibutiĉamꞌ jämꞌ ọij p̂eyacdyeꞌ yụ. Muꞌyaꞌ jiquej yirity muntyiꞌ päräꞌ ạvaꞌ muꞌ. Muꞌ muntyiꞌ jéyaqui muꞌ tashchety ạvaꞌ muꞌ: "Ạvaꞌ yụ, q̂uinꞌ raꞌ carijtaqui mi quịjodyeꞌĉan yụ."

²⁹ Muꞌ ạvaꞌ muꞌ voryi: "Jam mạꞌjeꞌ yụ." Meꞌ tsanꞌ meꞌ yi, jábiyaꞌ qui namꞌ yocve dyijyi muꞌ, muꞌĉan jịjcaij carijtaqui.

³⁰ Chat qui muꞌ muntyiꞌ yoctyiꞌ ạvaꞌ jéyaqui muꞌ chimeꞌ paj qui chimuꞌĉandye carijtaqui. Muꞌ ạvaꞌ yoctyiꞌ muꞌ jụjyi tsanꞌ yi: "Jụdyej," jéyaqui jenꞌ muꞌ, jam qui namꞌ muꞌĉan jịjcaij.

³¹ Yụ raꞌ jéyac: ¿jụꞌñity buty ạvaꞌ muꞌ chicaqui jenꞌ? Vorjete in: —Muꞌ tashchety ạvaꞌ muꞌ, chicaqui ĉụiꞌtyiꞌ jenꞌ muꞌ. Jesús jéyacsi: —Yụ jéyac, mọꞌin meꞌtaquis p̂en in judyeyaꞌ muꞌin tsimꞌtety querec̣ha in, muꞌin raꞌ tashcheꞌ buꞌyi raꞌ siti in Jenꞌsiꞌĉan ayoꞌbuꞌyedyeꞌĉan, jäquiꞌcheꞌ raꞌ miꞌin.

³² Meꞌ tsanꞌ atsij muꞌ Juan chojtacsity jiquej jiꞌchäquiyinac mọꞌ rụijsis majmi Jenꞌsiꞌ muꞌ, miꞌin qui namꞌ jam jụjtinte. Meꞌ tsanꞌ cạvacsi miꞌin junꞌ chuc muꞌin tsimꞌtety querec̣ha in judyeyaꞌ mọꞌin meꞌtaquis p̂en in anicjete in, miꞌin qui namꞌ yejĉoij jam dyijyi juchajcheꞌ miꞌin mijam damꞌ anicjetinte miꞌin.

Jịꞌĉocdyes p̂eyacdyeꞌ muꞌin ĉọjcaptety quịjodyeꞌ in

³³ Seꞌvibutiĉaꞌ raꞌ miꞌin yocsiꞌ jịꞌĉocdyes p̂eyacdyeꞌ yụ. Muꞌyaꞌ jiquej yirity muntyiꞌ jämꞌtyety quịjodyeꞌ ova quịꞌtyiꞌ. Sópetuiꞌ judyeyaꞌ jämꞌtyeꞌ cuptaquis ova, judyeyaꞌ jämꞌtyeꞌ chimeꞌ mọꞌĉan moches cạvacdyes quịjodyeꞌ. Aty ijaijyaꞌ jämꞌtyeꞌ joꞌmemes, chat muꞌ yụꞌtyeyacsi ĉọjcaptety in, muꞌin raꞌ jiꞌcheteyebajte in mọꞌ vädacdyeꞌ, chat qui yocsiꞌve jac jịjcaij muꞌ.

³⁴ A na p̂uriꞌyaꞌ mọꞌ cätidyeꞌ, aty chaꞌshaqui tupudyeꞌ intsidyedyeꞌ mọꞌsimꞌ, muꞌ muntyiꞌ jutacseban úñity muꞌ paj qui muꞌve jịjcaij in ĉọcseĉan in muꞌin ĉọjcaptety in quịjodyeꞌ muꞌ, paj qui cọdyetacseban muꞌin jiꞌchetacdyeꞌ muntyidyes in.

³⁵ Muꞌin na ĉọjcaptety in tapjepte úñity in. Yirity úñity muꞌ untupte in, yoctyiꞌ na ijapte in, judyeyaꞌ yoctyiꞌ na farajñepte mijyaꞌ in.

³⁶ Muꞌ muntyiꞌ cuvij yoctyiꞌ úñity muꞌ juteyeyacsi, dadamꞌ daiꞌ jutacsi. Muꞌin na ĉọjcaptety quịjodyeꞌ in anic ñịbeꞌ jịꞌcavacsi muꞌin in, yojdyemꞌ muꞌin tashchety jiquej u in, meꞌjeyacsidye in.

³⁷ Jäquiꞌve qui ĉụiꞌtyiꞌ ạvaꞌ muꞌ jutaqui. Yi muꞌ: "Muꞌ raꞌ chat ạ̈räjjibun ạvaꞌ yụ in."

³⁸ Muꞌin na ĉọjcaptety quịjodyeꞌ in, aty cạvebite ạvaꞌ in, vaj muꞌin jítidyeij in: "Uts nash ạvaꞌ muꞌ aꞌtumtyiꞌ quịjodyeꞌ. Damꞌdye jämꞌ ijaja muꞌ paj qui tsundyes qui ọij jac, säñiyaꞌ aꞌ muꞌ."

³⁹ Anicdye meꞌ, chute in judyeyaꞌ jiꞌshupjajte in quịjodyeꞌĉantyiꞌ chat qui ijate in.

⁴⁰ Chat qui muꞌ Jesús jéyacsi: —Muꞌ aꞌtumtyiꞌ quịjodyeꞌ ĉọcsequi jụijyaꞌ muꞌin ĉọjcaptety quịjodyeꞌ in, ¿junꞌjeyacsi buty raꞌ muꞌ?

⁴¹ Muꞌin vorjete Jesús in: —Muꞌ raꞌ tasjeyacsi ijacsi muꞌin ac̣hiꞌyity muntyiꞌ in, jam raꞌ damꞌ ạ̈räjjeyacsi muꞌ. Chat qui raꞌ muꞌ yoctyiꞌ soꞌmacsi ĉọjcaptety quịjodyeꞌ in. Chat muꞌin raꞌ soꞌmete in jiꞌchetacdyeꞌ in aty ayijyaꞌ tupudyeꞌ vädacdyes mọꞌ cätidyeꞌ.

⁴² Chimeꞌdye muꞌ Jesús jéyacsi: —Jam adac p̂eyetiñeꞌ ọij sánacdyeꞌ yiꞌ: "Muꞌ mij vaꞌquectety acaijtyiꞌ jiquej in, muꞌ q̂uinꞌ mujuꞌchaꞌ yụꞌtac acadyety. Muꞌdye Ayoꞌ tsun meꞌ yi ĉụiꞌsiꞌ dyijyedyemꞌ, mọꞌ anic där äjyejaꞌ tsun."

⁴³ Mọꞌdyes yụ jéyac miꞌin, meꞌ tsanꞌ muꞌ Jenꞌ dyijtunac jiquej miꞌin paj qui Jenꞌsiꞌĉan ayoꞌbuꞌyedyeꞌ muꞌ siti miꞌin, muꞌ qui na ramꞌ vaꞌquicnac miꞌin, yoctyiꞌ qui raꞌ yụꞌtacsi, muꞌin qui raꞌ siti in ayoꞌbuꞌyedyeꞌĉan muꞌ, tyi chuc chiquetety in junꞌ chuc mạꞌjeꞌ muꞌ.

⁴⁴ Tyi chuc jọꞌchaij mijcheꞌ tŝọij fajcheꞌ, muꞌ raꞌ areꞌ tŝọij. Tyi chuc fajcheꞌ jịꞌtŝote mij, muꞌ raꞌ räj nụiꞌ jayuꞌti.

⁴⁵ Muꞌin tashchety cudyitity Jenꞌcheꞌ in judyeyaꞌ muꞌin fariseo in, aty seꞌvepteyaꞌ in jịꞌĉocdyes p̂eyacdyeꞌ muꞌ, anic jịꞌfajqueyete in ĉaĉaij na chịj in muꞌindyemꞌ p̂eyacsi muꞌ Jesús, p̂eyacdyeꞌyaꞌ muꞌ.

⁴⁶ Mọꞌdyes qui muꞌin in mạꞌjeꞌ tsanꞌ jiꞌĉärꞌte in Jesús, jam qui namꞌ junꞌte in ĉaĉaij na quijnacsi muntyiꞌ in, muꞌin na chị́yetety in muꞌ Jesús jutactyiꞌ Jenꞌtyiꞌ muꞌ.