Mateos 20 - Tsimane

Jịꞌĉocdyes p̂eyacdyeꞌ muꞌin carijtaquity in

¹ Meꞌ buꞌyiꞌ ayoꞌbuꞌyedyeꞌ Jenꞌsiꞌ muꞌ, jeñej buꞌyiꞌ yirity muntyiꞌ quevacsity carijtaquity in. Pamꞌ sacyi muꞌ quevacsequi muntyiꞌ in paj qui ovaĉan carijtaqui in.

² Muꞌ jéyacsi, "Yụ raꞌ yaꞌityeꞌ mạyedyeꞌ yirity ficha plata", chat qui jutacsi paj qui carijtaqui in quịjodyeꞌĉan muꞌ.

³ Aty mocheꞌ tsun, quivij sacti prasayaꞌ jịjcaij, cạvacsi yoctyiꞌ muntyiꞌ itŝity carijtacdyeꞌ in.

⁴ Chat qui muꞌ jéyacsi: "Tạij miꞌin chimeꞌ, carijtaĉamꞌ quịjodyeꞌĉan yụ, yụ raꞌ yaꞌityepyac carijtacdyeꞌ miꞌin." Jụjjete in, muꞌĉan jịjcaij in.

⁵ Aty quichĉan tyiti tsun yoctyiꞌ qui tucsi carijtaquity in, judyeyaꞌ aty rocve tsun chimeꞌdye yoctyiꞌ qui tucsi carijtaquity in.

⁶ Aty jäꞌdyäijdyety tsun cuvij prasayaꞌ jịjcaij, cạvacsi yoctyiꞌ muntyiꞌ in rụiꞌcujcuquen in. Muꞌ jéyacsi: "¿Junꞌ dash úyaꞌ meꞌ buꞌyi miꞌin dyutsenꞌ mạyedyeꞌ?"

⁷ Muꞌin vorjete in: "Ĉaĉaij na jam tyi jiꞌcarijtyin tsun in." Muꞌ muntyiꞌ jéyacsi: "Tạij miꞌin yụ́sĉan quịjodyeꞌ jịjcajamꞌ muꞌĉan carijtaĉamꞌ."

⁸ Aty shocam, muꞌ muntyiꞌ jéyaqui nọ́taquity muꞌ: "Fayacsebada muꞌin carijtaquity in, yaꞌitacsebada, tashcheꞌ raꞌ muꞌin jäquiꞌ atsijtyiꞌ in junꞌ quiꞌ chuc muꞌin tashcheꞌ atsijtyiꞌ in."

⁹ Anicdye meꞌ, tashcheꞌ muꞌin ĉọshtety in muꞌin jäꞌdyäijdyety tsun sitity carijtacdyeꞌĉan in. Muꞌin soꞌmac in yirity ficha plata.

¹⁰ Jäquiꞌve yoctyiꞌ ĉọshte in muꞌin pamꞌ tiyacchuiꞌ carijtaquity in, jeñej raꞌ mujuꞌchaꞌ soꞌmac ĉúti in, jam na meꞌ, vaj meꞌdye jịjcaij in, yirity mọmoꞌ ficha plata soꞌmac in.

¹¹ Aty soꞌmacyaꞌ in, chat tiyacchuiꞌ p̂eijte in muꞌ muntyiꞌ.

¹² Yi jéte in: "Uts jäquiꞌ atsijtyiꞌ in yiris mọmoꞌ hora carijtaqui in, tsun na dyutsenꞌjety tsanꞌ mạyedyeꞌ carijtaqui tsun, meꞌquiꞌ tsanꞌ jịꞌĉojte tsun tsun. Uts na vaj meꞌdye yaꞌityitiĉaꞌ tsun miꞌin jäquiꞌ atsijtyiꞌtum in," yi jéte in.

¹³ Muꞌ quịjodyeꞌtumtyiꞌ jéte muꞌ yirity carijtaquity muntyiꞌ: "Chätidyeꞌ, yụ jam shiꞌatuye ĉaĉaij na mídye tashcheꞌ jụjjiptim p̂eyacdyeꞌ yụ, meꞌ buꞌyi yirity ficha yaꞌityeye yiris mạyedyeꞌ.

¹⁴ Mọꞌdyes tapjeme uts querec̣ha, tạij acatubada. Yụ mạꞌjeꞌ soꞌmete uts jäquiꞌ atsijtyiꞌ vaj cätsdye mítum,

¹⁵ ĉaĉaij na ĉụiꞌtyiꞌ querec̣ha yụ, mọꞌdyes meꞌ tupuj soꞌmacsi yụ, junꞌ chuc mạꞌjeꞌ yụ. ¿Jam buty maꞌjotyitim paj qui yụ ñịbeꞌjeyacsi uts in?"

¹⁶ Chat qui yi muꞌ Jesús: —Muꞌin uyaꞌyaty q̂uinꞌ in muꞌin raꞌ jäquiꞌve mujuꞌchaꞌ shupqui in, muꞌin na mujuꞌchaty q̂uinꞌ in muꞌin qui raꞌ jäquiꞌve uyaꞌyaꞌ shupqui in.

Jesús chibin quiꞌ p̂eyeꞌ sänꞌdyeꞌ muꞌ

¹⁷ Aty majmiyaꞌ in Jerusalénve jịjcaij in, muꞌ Jesús pạrejjeyaqui jịꞌchiyactyiꞌ muꞌ mujuꞌveyaꞌ cạqui, miꞌedyeꞌĉan muꞌ jéyaqui:

¹⁸ —Q̂uinꞌ tsun Jerusalénĉan jịjcajaꞌ tsun. Muꞌĉan raꞌ jiꞌmeꞌtyin yụ in ayoꞌyaꞌ yụ Anictyity Muntyiꞌ yụ, muꞌinyaꞌ raꞌ jiꞌmeꞌtyin yụ in tashchetyyaꞌ cudyitity Jenꞌcheꞌ in judyeyaꞌ muꞌin jịꞌchiyacsityyaꞌ yụꞌtacdyeꞌ in, muꞌin raꞌ yuꞌtyiyin p̂eyacdyeꞌ yụ in jiꞌijacdyes yụ.

¹⁹ Chat qui raꞌ jiꞌmeꞌtyin yụ in yoctyiꞌyaꞌ ayoꞌ in jam judíoyaꞌ in. Muꞌin raꞌ dyisactyin yụ in, judyeyaꞌ raꞌ siꞌbin yụ in, judyeyaꞌ raꞌ croshcheꞌ pactyin yụ in, chibin qui na ramꞌ mạyedyeꞌ meꞌ buꞌyi yụ, chat qui raꞌ vañinyeban yụ.

Cọdacdyeꞌ tseꞌ muꞌ Santiagos judyeyaꞌ Juansiꞌ

²⁰ Ayij Zebedeos p̂en muꞌ päräꞌdye ạvaꞌ mọꞌ, muꞌ Juan judyeyaꞌ muꞌ Santiago, ĉọcte in muꞌ Jesús. Mọꞌ dyụtsyiꞌ Jesússiꞌyaꞌ vej muꞌ, judyeyaꞌ cọdyete mọꞌ.

²¹ Jesús jeꞌ: —¿Jedyeꞌ mạꞌjem? Mọꞌ jéte: —Yụ mạꞌjeꞌ paj qui uts ạvaꞌ yụ úvemun buꞌyi míyaꞌ in aty ayoꞌbuꞌyedyeꞌĉan jụijyam, yoctyiꞌ raꞌ tacve buꞌyi, yoctyiꞌ raꞌ q̂uimve buꞌyi.

²² Jesús vorjebiꞌ ạvaꞌ mọꞌ: —Miꞌin jam chịj jedyeꞌ chuc mọꞌ cạiꞌ mọꞌ p̂eyacdyeꞌ miꞌin. ¿Tupuj buty cätsbutiĉaꞌ yụs ñịbedyes miꞌin? Vorjete in: —Tupujbiyac tsun.

²³ Jesús jéyacsi: —Anicdye meꞌ, cätsbutiĉaꞌ raꞌ ñịbedyes yụ́siꞌ miꞌin, jam qui namꞌ yụ yụꞌtac paj qui yụꞌtacsi yụ tyi chuc raꞌ úvemun buꞌyidyety yụ́yaꞌ in, tacve buꞌyi judyeyaꞌ q̂uimve buꞌyi. Muꞌdye Jenꞌ yụ tsimꞌtacsi tyi chuc raꞌ yụ́yaꞌ úvemun buꞌyity in.

²⁴ Yoctyiꞌ jịꞌchiyactyiꞌ muꞌ yiriꞌtac in, fạ́cacsebi in cọdacdyeꞌ muꞌin päräꞌ vaj vojitysiꞌ in.

²⁵ Mọꞌdyes muꞌ Jesús vajmuꞌyaꞌjeyaqui jịꞌchiyactyiꞌ muꞌ, jéyaqui: —Miꞌindye chịj junꞌ chuc muꞌin jacchety ayoꞌ in anic sonꞌ buꞌyi yuꞌti in ayoꞌbuꞌyi muntyidyes in, meꞌ muꞌin fer buꞌyity in anic fercheꞌ jutacsi muntyiꞌ in.

²⁶ Miꞌin qui na ramꞌ jam meꞌ, pạrej mạꞌjeꞌ jụijyaꞌ mujuꞌchaꞌ buꞌyi yuꞌtity, jemoñeꞌ nọ́taquity yuꞌti yoctyiꞌdyes miꞌin.

²⁷ Tyi chuc mạꞌjeꞌ tashcheꞌ buꞌyi jụijyaꞌ, jemoñeꞌ úñi yuꞌti yoctyidyes in,

²⁸ yojdyemꞌ yụ u Anictyity Muntyiꞌ yụ, ĉaĉaij na jam meꞌdyes atsij yụ jam raꞌ muntyiꞌ ñútyin yụ in. Yụ atsij nọ́tyetacsetity mọmoꞌ yụ daiꞌtyiꞌ muntyiꞌ in. Ĉụiꞌ jiꞌsäsdyi yụ mọꞌdyes meꞌ raꞌ säñi yụ paj qui tupuj jiꞌc̣honacsiij muꞌin in.

Jesús jịꞌnaijtacseban päräꞌ tofety muntyiꞌ in

²⁹ Chat qui jọban in yạjquibanꞌ in mọꞌ Jericó. Shach muntyiꞌ cäc̣häꞌchute Jesús in.

³⁰ Päräꞌ muꞌyaꞌ tofety muntyiꞌ in, jeij majmi bäꞌvaꞌjoij in. Aty chịj in muꞌ Jesús cajnacsi muꞌyaꞌ, muꞌyaꞌdye tiyacchuti fer p̂eyaqui, yi in: —¡Jịꞌchiyacsity, Davidtyiꞌ vóshimꞌ, ñịbeꞌjitiĉamꞌ tsun!

³¹ Muꞌin na muntyiꞌ in dyäcjeĉunacsebi tsanꞌ p̂eyacdyeꞌ muꞌin, mạꞌjeꞌ tsanꞌ jiꞌtyäpacsi in. Muꞌin na dadamꞌ mujuꞌchaꞌ äjyi in, jéte Jesús in: —¡Jịꞌchiyacsity, Davidtyiꞌ vóshimꞌ, ñịbeꞌjitiĉamꞌ tsun!

³² Chat qui muꞌ Jesús dyäcyi, fayacsi tofej muntyiꞌ in, jéyacsi muꞌ: —¿Jedyeꞌ mạꞌjityitiĉaꞌ u miꞌin?

³³ Muꞌin vorjete in: —Jịꞌchiyacsity, paj jiꞌnaijbutiĉaꞌ tsun miꞌin.

³⁴ Jesús ñịbeꞌ ĉọcsi, chat muꞌ qui tocoꞌjeyacsebi vej muꞌin. Tocoꞌyedyeꞌĉan mọmoꞌ, meꞌĉandye naijbun in chat qui muꞌyaꞌdye cäc̣häꞌchute Jesús in.