Mateos 19 - Tsimane

Yacchucdyeꞌ p̂en

¹ Jesús aty meꞌsiꞌ jịꞌchiyacsi ọij, chat qui jọban muꞌ yạjquibanꞌ Galilea, roiꞌjeꞌ Judeave jịjcaij nopej Jordán.

² Anic shach muntyiꞌ cäc̣häꞌchute in, Jesús jiꞌchäcacseban japacjoijtyiꞌ in.

³ Pạrej atsij fariseo in mạꞌjeꞌ seꞌveshbite p̂eyacdyeꞌ in, vatyquej raꞌ mọꞌyaꞌ cäjsis tuiꞌ jụijyaꞌ. Jéte in: —Yirity muntyiꞌ tupuj buty yacchuqui p̂en muꞌ ĉụiꞌsiꞌ mạꞌjeꞌ jụijyaꞌ muꞌ? ¿Jätäjyiꞌ buty yụꞌtacdyeꞌ Jenꞌsiꞌ muꞌ?

⁴ Vorjeyacsi Jesús: —¿Jam adac p̂eyetiñeꞌ miꞌin ọij Jenꞌsiꞌ sánacdyeꞌ muꞌ? Yiꞌ, tashcheꞌ jiquej muꞌ Jenꞌ jämꞌtacsi muntyiꞌ in, sonꞌ judyeyaꞌ p̂en jämꞌtacsi.

⁵ Yi muꞌ Jenꞌ: "Meꞌdye qui muꞌ muntyiꞌ yacchuqui ĉụiꞌtyiꞌ jenꞌ muꞌ judyeyaꞌ tseꞌ muꞌ, paj qui pạrejti p̂entum bäꞌyi, aty qui jam päräꞌ muntyiꞌ cạvacsi Jenꞌ, yirity buꞌyi cạvacsi Jenꞌ.

⁶ Mọꞌdyes aty jam päräꞌ muntyiꞌ cạvacsi Jenꞌ, jeñej yirity qui mọmoꞌ. Mọꞌdyes muntyiꞌ in aty jam raꞌ pạrejmun yụꞌtacsi in ĉaĉaij na Jenꞌdye yiriꞌyaꞌ yụꞌtacsi.

⁷ Fariseo jéte in: —Meꞌ yi jụijyaꞌ Jenꞌ, ¿junꞌ qui buty muꞌ meꞌ Moisés yụꞌtyeꞌ yocsiꞌ yụꞌtacdyeꞌ yiꞌ: "Yirity muntyiꞌ mạꞌjeꞌ jụijyaꞌ, tupuj soꞌmeꞌ p̂en muꞌ yiris yacchutidyes paper, chat qui q̂uinꞌdyemꞌ yacchuiꞌ muꞌ?"

⁸ Vorjeyacsi Jesús: —Anicdye meꞌ soꞌminac Moisés p̂eyacdyeꞌ tupuj qui tiĉavꞌcacdyes p̂en miꞌin, ĉaĉaij na anic yäcäj ĉojtyiꞌ miꞌin, jam meꞌdyes Jenꞌ jämꞌtyeꞌ jiquej jämꞌtacsiyaꞌ muntyiꞌ in.

⁹ Yụ na jéyac, yirity muntyiꞌ yacchuiꞌ jụijyaꞌ ĉụiꞌsiꞌ p̂en muꞌ jam voꞌvoiꞌsiꞌ jụijyaꞌ mọꞌ, judyeyaꞌ qui vämi yocsiꞌcheꞌ p̂en jụijyaꞌ muꞌ, aty mọꞌ juchaj shupquiꞌ muꞌ.

¹⁰ Chat qui jịꞌchiyactyiꞌ muꞌ jéte in: —Meꞌ jụijyaꞌ jam junꞌ yacchuĉaꞌ p̂en jụijyaꞌ tsun, damꞌdye jämꞌ jam vämejaꞌ tsun —yi jịꞌchiyactyiꞌ muꞌ.

¹¹ Vorjeyacsi Jesús: —Jam nash ọij räjtumdyes p̂eyacdyeꞌ, pạrej soꞌmac Jenꞌyaꞌ in, muꞌindyes mọmoꞌ ọij p̂eyacdyeꞌ in.

¹² Pạrej muntyiꞌ jam tupuj vämi in, ĉaĉaij na naꞌidyeꞌ meꞌ in jam jämꞌsiꞌ aꞌ muꞌin, yoctyiꞌ na in jäctyetac aꞌ muꞌin muntyiꞌyaꞌ in, mọꞌdyes qui jam tupuj vämi in, judyeyaꞌ chimeꞌ pạrej jam p̂en cạveꞌtyiꞌ in muꞌin mujuꞌchaꞌ carijtaqui Jenꞌdyes in. Tyi chuc tupuj meꞌ yirity bäꞌyity in, jemoñeꞌ memꞌ in, muꞌin raꞌ cäc̣häꞌchuiꞌ in ọij jiꞌchäyitidyeꞌ.

Jesús jụjjeyacsi miquiꞌmuntyiꞌ in

¹³ Pạrej muntyiꞌ in tuyete Jesús miquiꞌmuntyiꞌ in paj qui muꞌ tocoꞌjeyacsi judyeyaꞌ cọdyete Jenꞌ muꞌindyes in. Muꞌin na jịꞌchiyactyiꞌ muꞌ tiyacchuti fạraꞌnacsi in muꞌin tuyetety in.

¹⁴ Jesús jéyacsi jịꞌchiyactyiꞌ muꞌ: —Jam raꞌ ñutsjeĉunacsi miꞌin uts miquiꞌmuntyiꞌ in, paj yụ́yaꞌ atsij in. Tyi chuc sitity raꞌ Jenꞌyaꞌ in ayoꞌbuꞌyedyeꞌĉan muꞌ, muꞌin raꞌ jeñej buꞌyi uts miquiꞌmuntyiꞌ q̂uinꞌ in.

¹⁵ Muꞌ qui Jesús tocoꞌjeyacsetaqui chat qui jọban.

Yirity jedyeꞌtumtyiꞌ muntyiꞌ p̂eyaqui Jesústum

¹⁶ Atsij yirity muntyiꞌ ĉọshte Jesús jéte: —Jịꞌchiyacsity, ¿jedyeꞌ buty jemoñeꞌ jämꞌsiꞌ carijtacdyeꞌ yụ paj qui tupuj Jenꞌyaꞌ bäꞌyi yụ?

¹⁷ Vorjajiti Jesús: —¿Junꞌ dash meꞌ jiꞌjäquem jämꞌsiꞌ jedyeꞌ? Yirity mọmoꞌ jämꞌtyiꞌ muꞌyaꞌ. Mạꞌjeꞌ Jenꞌyaꞌ bäꞌyi jụijyaꞌ mi, jemoñeꞌ chiquepte yụꞌtacdyeꞌ mi.

¹⁸ Muꞌ muntyiꞌ jéte Jesús: —¿Jụꞌñis buty yụꞌtacdyeꞌ? Vorjajiti Jesús: —Ọij nash yiꞌ: jam raꞌ ijate muntyiꞌ mi, jam raꞌ voꞌvoij mi, jam raꞌ shuꞌaij mi, jam raꞌ väñädyeꞌyaꞌ jiꞌmeꞌte muntyiꞌ mi,

¹⁹ jämꞌjeyaqui raꞌ ĉụiꞌtyiꞌ jenꞌ mi judyeyaꞌ tseꞌ mi, judyeyaꞌ fer raꞌ mạꞌjeyacsi chätidyeꞌ mi, yojdyemꞌ ĉụiꞌ mạꞌjiti um, meꞌ meꞌ yiꞌ yụꞌtacdyeꞌ.

²⁰ Muꞌ muntyiꞌ vorjete: —Räj ọij yụ chiqueꞌ. ¿Jụꞌñisdyety buty tacaꞌ jayej yụ?

²¹ Vorjajiti Jesús: —Mạꞌjeꞌ jụijyaꞌ jam jayej jedyeꞌ mi, jemoñeꞌ jiꞌmincaqui tas ĉụiꞌsiꞌ jedyeꞌ mi, judyeyaꞌ muꞌ querec̣ha soꞌmacsi mi muꞌin jayejjotaquity jedyeꞌ in, meꞌ raꞌ chat mọꞌyaꞌ bijodyeꞌ mi mạyedyeꞌcheꞌ, chat qui raꞌ q̂uinꞌdyemꞌ cäc̣häꞌchutim —yi jéte.

²² Muꞌ muntyiꞌ aty seꞌvepteyaꞌ mọꞌ p̂eyacdyeꞌ muꞌ, chat qui jọban muꞌ anic táredyeꞌtum caꞌñibun, ĉaĉaij na anic jiyiꞌ daiꞌ meꞌchuiꞌ jedyeꞌ muꞌ.

²³ Chat qui muꞌ Jesús jéyaqui jịꞌchiyactyiꞌ muꞌ: —Yụ jéyac, anic carij muꞌin jedyeꞌtumtyiꞌ in paj qui Jenꞌyaꞌ bäꞌyi in ayoꞌbuꞌyedyeꞌĉan muꞌ.

²⁴ Cuvij yụ jébadyeyac, dadamꞌ mọjoꞌchaꞌ carij muꞌin jedyeꞌtumtyiꞌ in paj qui Jenꞌyaꞌ bäꞌyi in ayoꞌbuꞌyedyeꞌĉan muꞌ, uyaꞌyaꞌdye carij jiyi yirity cameyo socorꞌmuñi yóquesĉan toꞌ mọꞌ —jéyacsi Jesús.

²⁵ Muꞌin jịꞌchiyactyiꞌ muꞌ äjjepte muꞌin p̂eyacdyeꞌ in, jéte in: —Meꞌ jụijyaꞌ ¿tyi buty tupuj c̣hoñi in?

²⁶ Jesús cạvacsi jéyacsi: —Anicdye meꞌ, muntyiꞌ in jam tupuj ĉụiꞌ c̣hoñi in, Jenꞌ tupuj jiꞌc̣honacsi ĉaĉaij na itŝiꞌ méquiꞌ carij Jenꞌdyes.

²⁷ Chat qui Pedro jéte: —Jeshaꞌ, tsun jiquej räj farajjeyaqui ĉụiꞌsiꞌ jedyeꞌ tsun paj qui cäc̣häꞌchuyac mi. ¿Jedyeꞌ buty raꞌ bijodyeꞌ tsun?

²⁸ Jesús vorjeyacsi: —Yụ anic jéyac, aty raꞌ mọꞌyaꞌ mụiꞌsis jac jụijyaꞌ, yụ nash Anictyity Muntyiꞌ yụ raꞌ ferdyeꞌtum ayoꞌbuꞌyi, miꞌin cäc̣häꞌchutiĉaty q̂uinꞌ yụ miꞌin, miꞌin yiriꞌtac päräꞌ jiyity miꞌin, miꞌin raꞌ chimeꞌ ayoꞌbuꞌyi Israeltyidyes vóshiꞌ in, muꞌin yiriꞌtac päräꞌ jiyi ñuruꞌtyityyaꞌ in, muꞌindyes raꞌ ayoꞌbuꞌyi miꞌin.

²⁹ Tyi chuc farajjeyaqui ĉụiꞌsiꞌ jedyeꞌ in, judyeyaꞌ chätidyeꞌ muꞌin paj qui cäc̣häꞌchun yụ in, muꞌin raꞌ soꞌmac bijodyeꞌ in. Tyi chuc yụ́dyes farajjeyaqui vojity muꞌ, judyeyaꞌ vojiꞌ muꞌ, judyeyaꞌ tseꞌ muꞌ, judyeyaꞌ jenꞌ muꞌ, judyeyaꞌ ạvaꞌ muꞌ, judyeyaꞌ acaꞌ muꞌ, judyeyaꞌ jac muꞌ, muꞌin raꞌ mujuꞌchaꞌ soꞌmac bijodyeꞌ in, cien quiꞌ raꞌ soꞌmac in. Chimeꞌdye raꞌ soꞌmac in paj qui Jenꞌyaꞌ bäꞌyi in.

³⁰ Muꞌin mujuꞌchaty q̂uinꞌ in, muꞌin raꞌ uyaꞌyaꞌ shupqui in, muꞌin na uyaꞌyaty q̂uinꞌ in, muꞌin raꞌ mujuꞌchaꞌ shupqui in.