Marcos 3 - Tsimane

Muntyiꞌ putyuijtyiꞌ un

¹ Jesús cuvij ĉọ́queꞌ mọꞌ vajmuꞌyadyeꞌ judíos muꞌin. Muꞌĉan chimeꞌdye yirity muntyiꞌ putyuijtyiꞌ un.

² Fariseo na in cạvevaꞌte Jesús in junꞌ a ĉa jiꞌchäĉajte jịꞌjutyitidyesĉan mạyedyeꞌ yi in, ĉaĉaij na mạꞌjeꞌ jiꞌmeꞌte ayoꞌyaꞌ in.

³ Jesús yi jéte muꞌ muntyiꞌ putyuijtyiꞌ un: —Sacyeva tashcheꞌ buꞌva.

⁴ Chat qui muꞌ Jesús jéyacsi muntyiꞌ in: —¿Jụꞌñis buty tupuj yụꞌtyejaꞌ jịꞌjutyitidyesĉan mạyedyeꞌ? ¿Areꞌ jämꞌsiꞌ areꞌ aꞌc̣his? ¿Tupuj buty jiꞌchäĉajsha muntyiꞌ, areꞌ jiꞌmeꞌyeja mọmoꞌ? ¿Jätäjyiꞌ buty yụꞌtacdyeꞌ Jenꞌsiꞌ muꞌ? —jéyacsi Jesús. Muꞌin na memꞌ c̣huꞌc̣huij in, mijam damꞌ voryi in.

⁵ Jesús chijämꞌ jịꞌfajte in meꞌĉandye jiꞌtarete in, ĉaĉaij na anic yäcäj ĉojtyiꞌ muꞌin. Chat qui muꞌ Jesús jéte muꞌ muntyiꞌ putyuijtyiꞌ un: —Chụiꞌjebadaꞌ un mi. Meꞌdye muꞌ chụiꞌjeyaĉan un muꞌ, meꞌĉandye jämꞌjobanꞌ un muꞌ.

⁶ Fariseo shuban in, chat qui ĉọcsequi in muꞌin cäc̣häꞌchutety Herodes in, dyijyi in junꞌ buꞌyi chuc raꞌ jiꞌijate in Jesús.

Shach muntyiꞌ ĉọcte Jesús in tsiqueꞌve jịjcaij in

⁷ Jesús räjtumdye jịꞌchiyactyiꞌ muꞌ tsiqueꞌve jịjcaij in. Chimeꞌdye Galileaĉantyiꞌ in shach muꞌin tyeij ĉọcte in.

⁸ Muntyiꞌ in aty chị́qui in junꞌ chuc jịꞌcaveyacsi därsiꞌ ferdyeꞌ muꞌ, shach vatyquej tyeij ĉọcte in paiꞌ bäꞌyity in, Judeaĉantyiꞌ in judyeyaꞌ Jerusalénĉantyiꞌ in, Idumeaĉantyiꞌ in judyeyaꞌ nopety cojiro Jordán in judyeyaꞌ Tiroĉantyiꞌ in judyeyaꞌ Sidónĉantyiꞌ chimeꞌ in, meꞌ meꞌ ĉọcte in muꞌĉantyiꞌdye paiꞌtyity in.

⁹ Jesús jéyaqui jịꞌchiyactyiꞌ muꞌ paj qui yụꞌtyeyete covamba in paj qui jam quec̣hete muntyiꞌ in.

¹⁰ Muntyiꞌ fer mạꞌjeꞌ tocoꞌjete in ĉaĉaij na jiꞌchäcacseban japacjoijtyiꞌ in.

¹¹ Chimeꞌdye junꞌsiꞌ ĉụiꞌ cạveteyaꞌ in muꞌin sọyoꞌtumtyiꞌ muntyiꞌ in, dyụtsyi in Jesússiꞌyaꞌ vej muꞌ, äjyedyeꞌtum p̂eyaqui jéte in: —Mi nash Jenꞌtyiꞌ Ạvaꞌ muꞌ.

¹² Jesús ferdyeꞌtum jéyacsi paj qui jam jịꞌchiqueyacsi muntyiꞌ in.

Jesús tsimꞌtacsi yiriꞌtac päräꞌ jiyi jutactyiꞌ muꞌ

¹³ Jesús mụcuꞌcheꞌ jịjcaij, chat qui fayacsi muntyiꞌ in jụꞌñity chuc dyijtucsi, muꞌin ĉọcte in.

¹⁴ Yụꞌtacsi yiriꞌtac päräꞌ jiyi in penꞌdyetutety raꞌ in, muꞌin raꞌ jutactyiꞌ muꞌ paj qui cạyacsity p̂eyacdyeꞌ in.

¹⁵ Chimeꞌdye soꞌmacsi ferdyeꞌ muꞌ paj qui tupuj meijjetyetacsi sọyoꞌ in.

¹⁶ Ọij nash tịj muꞌin: Simón, Pedro chimeꞌdye jịꞌtiꞌete,

¹⁷ Santiago judyeyaꞌ vojity muꞌ Juan, Zebedeoty ạvaꞌ in. Yocsiꞌ tịj soꞌmacsi muꞌ Jesús: "Pururu Buꞌyity in", meꞌ jéyacsi.

¹⁸ Chimeꞌdye muꞌ yụꞌtacsi muꞌ Andrés judyeyaꞌ Felipe judyeyaꞌ Bartolomé, judyeyaꞌ Mateo, judyeyaꞌ Tomás judyeyaꞌ Santiago, Alfeoty ạvaꞌ muꞌ, judyeyaꞌ Tadeo judyeyaꞌ Simón, muꞌ nash cäc̣häꞌchucsity muꞌin fạ́cacsity Romaĉantyiꞌ in,

¹⁹ judyeyaꞌ muꞌ Judas Iscariote, muꞌ raꞌ jiꞌmincatety Jesús. Meꞌ meꞌ jutactyiꞌ jiquej muꞌ.

Ñäñitidyeꞌ muꞌin, "Sọyoꞌ soꞌmete ferdyeꞌ", yi in

²⁰ Jesús siti acaꞌĉan. Cuvij shach ĉọcte muntyiꞌ in, sät tŝọij in, mọꞌdyes qui muꞌ Jesús jịꞌchiyactyiꞌtum muꞌ jam qui junꞌ tupuj säcsi in.

²¹ Chị́qui in ĉụiꞌtyiꞌ chätidyeꞌ muꞌ, atsij muꞌin in mạꞌjeꞌ tsanꞌ jeshajte in, ĉaĉaij na pạrej dyijyi in aty shapuij ĉọ́te in.

²² Muꞌyaꞌ chimeꞌ jịꞌchiyacsity yụꞌtacdyeꞌ in Jerusalénvety in. Chimeꞌdye muꞌin p̂eijte in yi in: "Muꞌ Beelzebú, sọyoty ayoꞌ mọꞌin, muꞌsiꞌyaꞌ ferdyeꞌ muꞌ Jesús meijjetyetacsi sọyoꞌ in", yi in.

²³ Jesús fayacsi muꞌin yity in, yụꞌtyeyeyacsi jịꞌĉocdyes p̂eyacdyeꞌ, jéyacsi: —Satanás jam ĉụiꞌ tupuj meijjiti.

²⁴ Jeshaꞌ bäꞌyedyeꞌĉantyiꞌ chuti ayoꞌtum jụijyaꞌ muꞌin, mijam raꞌ men meꞌ buꞌyiꞌ mọꞌ bäꞌyedyeꞌ.

²⁵ Chimeꞌdye vaj chätidyeꞌ jụijyaꞌ in vaj meij chuvaꞌtidyeij in, cavin raꞌ mọtsi in.

²⁶ Meꞌdye raꞌ muꞌ chimeꞌ Satanás vaj meij chutidyeiꞌ bäꞌyiꞌyaꞌ sọyoꞌ in, jam raꞌ men meꞌ buꞌyiꞌ ayoꞌbuꞌyedyeꞌ Satanássiꞌ, cavin raꞌ mọtsimꞌ.

²⁷ Chimeꞌdye jam tyi tupuj sisbite acaꞌ muꞌsiꞌ ferdyeꞌtumtyis muntyiꞌ paj qui shiꞌatute jedyeꞌ muꞌ. Jemoñeꞌ tashcheꞌ chum saptac muꞌ ferdyeꞌtumtyiꞌ muntyiꞌ, chat q̂uinꞌdyemꞌ tupuj räj cạpte acaꞌĉansiꞌ jedyeꞌ in ĉaĉaij na aty jiꞌpente in.

²⁸ Yụ jéyac, Jenꞌ tupuj jụꞌñis ĉụiꞌ mọmoꞌ vayacjetyetacsi juchaj muntyis muꞌin, judyeyaꞌ jụꞌñis ĉụiꞌ ñäñitidyeꞌ muꞌin,

²⁹ muꞌin na ac̣hiꞌ p̂eijbitety in Jenꞌsiꞌ Ạꞌedyeꞌ muꞌ, muꞌin jam raꞌ damꞌ muꞌ Jenꞌ vayacjetyetacsi juchaj muꞌin, tacyaꞌ buꞌyiꞌ ramꞌ mọꞌ juchadyeꞌ muꞌin.

³⁰ Meꞌ jéyacsi muꞌ Jesús ĉaĉaij na yi jiquej in: "Uts nash Jesús sọyoꞌtumtyiꞌ", yi jéte in.

Jesússiꞌ tseꞌ muꞌ judyeyaꞌ vojity muꞌ ĉọcte in

³¹ Jesússiꞌ tseꞌ muꞌ judyeyaꞌ vojity muꞌ muꞌyaꞌ venjoij in. Jorojyaꞌ buꞌyi jiꞌvorvete in.

³² Daiꞌ muꞌyaꞌ Jesúsyaꞌ bäꞌyi in. Muꞌin jéte in: —Mosh tyuꞌ jorojyaꞌ tseꞌ mi, judyeyaꞌ vojity mi, mạꞌjeꞌ nash cavin in —yi jéte in.

³³ Jesús qui vorjeyacsi: —¿Mọꞌyaꞌ adac ĉaĉaij tseꞌ yụ? ¿Muꞌyaꞌ adac ĉaĉaij vojity yụ in?

³⁴ Chat qui muꞌ paiꞌ cạvi cọtoij buꞌyityyaꞌ in, yi muꞌ jéyacsi: —Uts q̂uinꞌ in muꞌin nash tseꞌtucsi yụ judyeyaꞌ vojitytucsi yụ.

³⁵ Tyi chuc chiqueꞌ in mọꞌ jiꞌchäyitidyeꞌ junꞌ chuc mạꞌjeꞌ muꞌ Jenꞌ, muꞌindyemꞌ vojitytucsi yụ judyeyaꞌ tseꞌtucsi yụ.