Marcos 2 - Tsimane

Jesús jiꞌchäĉajte yirity puñichjoijtyiꞌ muntyiꞌ

¹ Nojnoĉanyaꞌ muꞌ Jesús caꞌñibun Capernaumĉan jijtuban muꞌ. Muntyiꞌ chị́qui in a namꞌ acaꞌĉan muꞌ Jesús.

² Ñur tyeij muntyiꞌ in ĉọcte in sät tŝọij chụiꞌdyeꞌyaꞌ in, itŝiꞌ vav yụꞌtyeꞌ mọꞌyaꞌ in. Jesús qui voroꞌtacsi Jenꞌsiꞌ p̂eyacdyeꞌ muꞌ.

³ Tute in yirity puñichjoijtyiꞌ muntyiꞌ vạjpedyeꞌ muntyiꞌ in turacdyeꞌcheꞌ cạte in.

⁴ Jam qui namꞌ junꞌyi Jesúsyaꞌ jịjcaij in ĉaĉaij na sät muꞌyaꞌ muntyiꞌ in. Bojvi qui fajcheꞌ acaꞌ in mọꞌyaꞌ qui cósheꞌ in taiꞌyaꞌ mọꞌ acaꞌ muꞌyaꞌ qui jịꞌchate turacdyeꞌcheꞌ in muꞌ puñichjoijtyiꞌ muntyiꞌ.

⁵ Jesús aty cạvacsi junꞌ chuc fer anicjete in, mọꞌdyes qui jéte muꞌ puñichjoijtyiꞌ muntyiꞌ: —Yụ jéye ạvaꞌ yụ, q̂uinꞌ aty vayac juchaj mi.

⁶ Muꞌyaty na jịꞌchiyacsity yụꞌtacdyeꞌ in, ĉojtyiꞌĉan muꞌin dyijyi in, yi in:

⁷ "¿Junꞌ buty meꞌ yi uts muntyiꞌ? Anic ñinacdyeꞌ Jenꞌyaꞌ shupquiꞌ mọꞌ p̂eyacdyeꞌ muꞌ, jeñej Jenꞌ yuꞌti muꞌ, ĉaĉaij na yirity mọmoꞌ muꞌyaꞌ Jenꞌ, muꞌ tupuj vayacjibusinꞌtyiꞌ juchaj muntyis tsun", yi in.

⁸ Muꞌ na Jesús chị́yacsebi aꞌc̣his dyijyedyeꞌ muꞌin. Jéyacsi: —¿Junꞌ meꞌ dyijyi ĉojtyiꞌĉan u miꞌin?

⁹ ¿Jụꞌñis buty carij ĉọ́tiñeꞌ miꞌin, areꞌ vayac juchaj utssiꞌ muꞌ, areꞌ chäĉän muꞌ? ¿Areꞌ jéte yụ, "Aty vayac juchaj mi", jam jụijyaꞌ, areꞌ jéte yụ "Sacyebada, miꞌebada"? ¿Jätäjyi miꞌin u?

¹⁰ Q̂uinꞌ raꞌ jịꞌcaveyeyac yụ junꞌ chuc yụ ferdyeꞌ soꞌmac paj qui yụ vayacjetyetacsi juchaj jacchetysiꞌ muntyiꞌ in, ĉaĉaij nash yụ Anictyity Muntyiꞌ yụ. Chat qui jajiti muꞌ puñichjoijtyiꞌ muntyiꞌ:

¹¹ —A nash yụ jéye, sacyebada, tapjebadaꞌ jubij mi, tạij acaꞌyaꞌ jịjcabada mi.

¹² P̂eyacdyeꞌĉandye muꞌ puñichjoijtyiꞌ muntyiꞌ jiquej sacyeban meꞌĉandye tapjebanꞌ jubij muꞌ muꞌinsiꞌyaꞌ vej in chat qui jọban muꞌ. Anic räj äjjete muntyiꞌ in, timaꞌquete Jenꞌ in. Yi in: —Mijam jämꞌdyeyaꞌ joꞌmes cạvejaꞌ.

Jesús faijte Mateo

¹³ Jesús quivij sinve jịjcaij tsiqueꞌ. Shach muntyiꞌ ĉọcte in chat qui jịꞌchiyacsi.

¹⁴ Aty yạjquicseban muꞌ Jesús cạvete yirity muntyiꞌ, Leví tịj muꞌ, Alfeoty ạvaꞌ muꞌ, muꞌĉan bäꞌvaꞌjoij yóĉandyemꞌ tsimꞌteĉan querec̣ha u in ayodyety. Jesús jajiti: —Cäc̣häꞌchutiꞌ ram. Leví sacyi cäc̣häꞌchute muꞌ Jesús.

¹⁵ Yirisĉan mạyedyeꞌ muꞌ Jesús säcsequi Levísĉan acaꞌ. Chimeꞌdye muꞌyaꞌ daiꞌ tsimꞌtety querec̣ha in judyeyaꞌ yoctyiꞌ juchajtumtyiꞌ muntyiꞌ chimeꞌ in. Mesayaꞌ penꞌdyetute in muꞌ Jesús räjtumdye jịꞌchiyactyiꞌ muꞌ, ĉaĉaij na daiꞌ muꞌin cäc̣häꞌchutety in.

¹⁶ Fariseo in judyeyaꞌ muꞌin jịꞌchiyacsity in yụꞌtacdyeꞌ Jenꞌsiꞌ muꞌ, aty cạvete in muꞌ Jesús junꞌ chuc muꞌtum säcsi in, jam jämꞌ ĉọiꞌ muꞌin in. Mọꞌdyes qui muꞌin jéyacsi in jịꞌchiyactyiꞌ Jesústyiꞌ muꞌ: —¿Junꞌ dash meꞌ Jịꞌchiyacsity miꞌin jebetacsi uts in tsimꞌtety querec̣ha in judyeyaꞌ yoctyiꞌ juchajtumtyiꞌ muntyiꞌ in?

¹⁷ Jesús seꞌvacsebi p̂eyacdyeꞌ muꞌin chat qui jéyacsi: —Jeshaꞌ, muꞌ muntyiꞌ räshtyiꞌ jam junꞌ jemonte muꞌ pịñitucsity, muꞌ na japacjoijtyiꞌ muꞌ chat jemonte pịñitucsity in. Meꞌ buꞌyidye yụ chimeꞌ atsij jam rụijtyitydyety muntyiꞌ in, yụ atsij juchajtumtyidyety in.

Jesús p̂eyeꞌ yịñijdyeꞌ Jenꞌdyes jịꞌĉoiꞌsiꞌ táredyeꞌ

¹⁸ Yirisĉan mạyedyeꞌ muꞌin jịꞌchiyactyiꞌ Juantyiꞌ muꞌ judyeyaꞌ muꞌin jịꞌchiyactyiꞌ fariseoty in, muꞌin yịñij Jenꞌdyes in. Pạrej muntyiꞌ ĉọcte in muꞌ Jesús jéte in: —Jịꞌchiyactyiꞌ Juantyiꞌ muꞌ judyeyaꞌ muꞌin jịꞌchiyactyiꞌ fariseoty in pucmun yịñij Jenꞌdyes in. Mítyiꞌ na jịꞌchiyactyiꞌ in mijam yịñij Jenꞌdyes in. ¿Junꞌ adac meꞌ in?

¹⁹ Jesús vorjeyacsi: —Muꞌin feshtaijtyiꞌ in vämitydyes in jam muꞌin tupuj yịñij Jenꞌdyes in, jam jịꞌĉoqui táredyeꞌ muꞌin tacaꞌdyemꞌ muꞌyaꞌ jụijyaꞌ muꞌ vämity muntyiꞌ. Tacaꞌ muꞌyaꞌ muꞌ mijam junꞌ yịñij in.

²⁰ A qui na ramꞌ ayijyaꞌ tupudyeꞌ jäcac raꞌ yụ juban, meꞌquiꞌdye raꞌ penꞌdyetucsi yụ uts in, chat qui raꞌ q̂uinꞌdyemꞌ yịñij jịꞌchiyactyiꞌ yụ.

²¹ Jeshaꞌ ishoijtyiꞌ quịꞌsiꞌ shẹiꞌjoij jụijyaꞌ, jam damꞌ raptac mụiꞌtyityyaꞌ quịꞌsiꞌ. Meꞌ na jụijyaꞌ mọꞌ raꞌ raptacdyeꞌ muꞌ shätimꞌ, chat qui raꞌ muꞌ ishoꞌ quịꞌsiꞌ quivij peñi shẹiꞌjoij.

²² Chimeꞌdye muntyiꞌ in mijam junꞌ bijtyeꞌ in mụiꞌsis tyédyeꞌ vino urucyasĉan shoꞌpaꞌ. Meꞌ jụijyaꞌ aty pashiꞌyaꞌ mọꞌ tyédyeꞌ, top raꞌ tyeiꞌ mọꞌ shoꞌpaꞌ, räj raꞌ naiꞌ tŝọiꞌ mọꞌ tyédyeꞌ mụijyaꞌ, mọꞌtumdye raꞌ moñiꞌ shoꞌpaꞌtum. Jemoñeꞌ bijtac mụiꞌsisĉan shoꞌpaꞌ mọꞌ mụiꞌsis tyédyeꞌ paj qui jam topyetac.

Shorjete trivo in jịꞌjutyitidyesĉan mạyedyeꞌ

²³ Mọꞌ mạyedyeꞌ jịꞌjutyitidyes muꞌ Jesús jịꞌchiyactyiꞌtum muꞌ miꞌi in, cätidyeꞌĉan trivo muꞌĉan tyeij in. Jịꞌchiyactyiꞌ muꞌ shorjepte in trivos väsh muꞌ.

²⁴ Muꞌin fariseo jéte in muꞌ Jesús: —¿Junꞌ dash meꞌ carijtaqui in muꞌin jịꞌchiyactyiꞌ mi? Muꞌin jam ạ̈räjjeꞌ in mọꞌ jịꞌjutyitidyes mạyedyeꞌ, carijtaqui mọmoꞌ in.

^25-26 Jesús vorjeyacsi: —¿Jam adac p̂eyetiñeꞌ mọꞌ urucyas sánacdyeꞌ p̂eijtes muꞌ David jiquej? Yiꞌ junꞌ chuc muꞌ jiquej yoquiꞌdyemꞌ Abiatar yụꞌtac tashchety cudyitity Jenꞌcheꞌ u. Muꞌ David dáqui penꞌdyeꞌtumdye muꞌ, mọꞌdyes qui siti Jenꞌsiꞌĉan acaꞌ jebete muꞌ pan yụꞌtactyiꞌ Jenꞌyaꞌ judyeyaꞌ soꞌmacsi penꞌdyeꞌ muꞌ chimeꞌ. Yiꞌ yụꞌtacdyeꞌ uts pan cudyititydyety mọmoꞌ Jenꞌcheꞌ in, mijam yoctyidyety in, meꞌ tsanꞌ meꞌ jebete qui namꞌ muꞌ David.

²⁷ Chimeꞌdye yi jéyacsi: —Mọꞌ mạyedyeꞌ jịꞌjutyitidyes yụꞌtac paj qui mọꞌ nọ́tacsi muntyiꞌ in, Jenꞌ jam jämꞌte muꞌ muntyiꞌ paj qui ạ̈räjjeꞌ in mọꞌ mạyedyeꞌ.

²⁸ Yụ nash Anictyity Muntyiꞌ bächäiꞌtyiꞌ yụ ọij jịꞌjutyitidyes mạyedyeꞌ in.