Marcos 14 - Tsimane

Ayoꞌ dyijyi in tapjete raꞌ in Jesús

¹ Jayej päräꞌdyety mạyedyeꞌ Jiꞌc̣honacdyes feshta, yocsiꞌ tịj mọꞌ: pan jam jiꞌdujraquistumtyiꞌ. Tashchety cudyitity Jenꞌcheꞌ in judyeyaꞌ muꞌin jịꞌchiyacsity yụꞌtacdyeꞌ in queveꞌ in junꞌ buꞌyiꞌ chuc raꞌ tapjete in muꞌ Jesús caminve, chat qui raꞌ jiꞌijate in.

² Yi jítidyeij in: —Jam raꞌ feshtayaꞌ tapjeja, cäjyaꞌ raꞌ tapjeja paj qui jam sac jaꞌyacsejaꞌ räj yoctyiꞌ muntyiꞌ in.

Betaniaĉansiꞌ p̂en tsaꞌmete Jesús jẹrejresyaꞌ

³ Jesús ĉọcte yirity muntyiꞌ Betaniaĉantyiꞌ bayiꞌyity jiquej, Simón tịj muꞌ, muꞌĉan siti Jesús. Aty säcsevaꞌjoijyaꞌ muꞌĉan, yiris p̂en vatyquej ayij, jẹrejres tuiꞌ puñujĉan mọꞌ, mọꞌ puñuj mij jämꞌtacdyeꞌ, anic jiyiꞌ yaꞌiꞌsiꞌ jẹrejres mọꞌĉan mọꞌ jam cafonꞌtacsiꞌ yocsiꞌtum jedyeꞌ yedyes. Chat mọꞌyaꞌ qui tocjetyeꞌ puñus tuj mọꞌ, tsaꞌmepte Jesússiꞌ joꞌnoꞌ muꞌ.

⁴ Fạ́coij tyeij muꞌyaꞌ cạvety in, jítidyeij in: —¿Junꞌ buty meꞌ fibiꞌñeꞌ ọij jẹrejres?

⁵ Anic mọꞌ yaꞌiꞌsiꞌ, tupuj jiꞌmincac yaꞌijtyiꞌyaꞌ querec̣ha, muꞌ qui querec̣ha soꞌmac in muꞌin jayejjotaquity jedyeꞌ in —yi jítidyeij in. Fạraꞌñeꞌ mọꞌ p̂en in.

⁶ Jesús qui jéyacsi: —Paj mọꞌyaꞌ, jam raꞌ meꞌtiñeꞌ mọꞌ p̂en. Anic nash jämꞌ yuꞌtyiyin yụ.

⁷ Räjĉan raꞌ miꞌinyaꞌ muꞌin jayejjotaquity jedyeꞌ in, junꞌsiꞌ ramꞌ ĉụiꞌ nọ́tyeyacsi miꞌin, mạꞌjetiñeꞌ jụijyaꞌ miꞌin. Yụ qui na ramꞌ itŝij, aty raꞌ jam penꞌdyetuyac miꞌin.

⁸ Mọꞌ jämꞌsiꞌ yuꞌtyiyin yụ ĉaĉaij na itŝiꞌ tupuj yocsimꞌ. Tsaꞌmin yụ jeñej buꞌyiꞌ taiꞌtac aꞌ yụ nạcdyedyes raꞌ yụ.

⁹ Yụ jéyac miꞌin, paiꞌ raꞌ junanaj ĉụiꞌ voroꞌyi in jämꞌsiꞌ p̂eyacdyeꞌ Jenꞌsiꞌ muꞌ, räj buꞌyiꞌ raꞌ ọij jac, p̂eyeꞌ raꞌ in junꞌ chuc tsaꞌmin jiquej yụ, muntyiꞌ raꞌ in jam yaquintubiꞌ in.

Judas jiꞌmincate Jesús

¹⁰ Muꞌin yiriꞌtac päräꞌ jiyity jịꞌchiyactyiꞌ Jesústyiꞌ muꞌ, yirity na tịj muꞌ Judas Iscariote. Muꞌ ĉọcsequi tashchety cudyitity Jenꞌcheꞌ in, mạꞌjeꞌ jiꞌmincate muꞌ Jesús.

¹¹ Maꞌjotyepte p̂eyacdyeꞌ in Judassiꞌ. Jéte in: "Tsun raꞌ soꞌmeyac querec̣ha." Chat qui muꞌ tiyacchuti queveꞌ junꞌ buꞌyiꞌ chuc raꞌ jiꞌtaptyeyacsi Jesús.

Jesús säcsi Jiꞌc̣honacdyedyes feshta jịꞌchiyactyiꞌtum muꞌ

¹² Chaꞌsheꞌ in mọꞌ tashches mạyedyeꞌ feshtas, yiꞌ: pan jam jiꞌdujraquistumtyiꞌ, mọꞌdye mạyedyeꞌ ijaiꞌ in oveca feshtadyes Jiꞌc̣honacdyedyes. Chat qui muꞌin jịꞌchiyactyiꞌ muꞌ jéte in: —¿Junaꞌ mạꞌjeꞌ um paj qui mọꞌyaꞌ jämꞌtyeyeyac tsun säcsedyeꞌ Jiꞌc̣honacdyedyes feshtadyes?

¹³ Jesús qui jutacsi päräꞌ jịꞌchiyactyiꞌ muꞌ jéyacsi: —Tạij miꞌin sisvac ọij bäꞌyedyeꞌ, muꞌĉan raꞌ yirity muntyiꞌ rébinac jiꞌveñety ojñiꞌ puñujĉan. Muꞌ raꞌ cäc̣häꞌchutinte miꞌin.

¹⁴ Junaꞌ chuc sisan muꞌ, muꞌyaꞌdye raꞌ miꞌin siti chimeꞌ, quevtinte raꞌ muꞌĉan aꞌtumtyiꞌ acaꞌ. Jétinte raꞌ miꞌin: "Muꞌ Jiꞌchäyintyiꞌ tsun yi jin mi: ¿Jụꞌñisĉan raꞌ vavsiꞌ säcsi u yụ Jiꞌc̣honacdyedyes säcsedyeꞌ jịꞌchiyactyiꞌtum yụ?" jétinte raꞌ miꞌin.

¹⁵ Muꞌ qui raꞌ jiꞌcaviyinac yiris därsiꞌ vavdyeꞌ cheꞌves acas mọꞌ, aty jäꞌmiiꞌtyiꞌ räj mọꞌcheꞌ —jéyacsi Jesús muꞌin päräꞌtyity in.

¹⁶ Sacti in bäꞌyedyeꞌĉan venjoij in. Anicdye meꞌ dạquiqueꞌ mọꞌcheꞌ vavdyeꞌ in yoj jeyacsidyemꞌ jiquej Jesús u. Mọꞌcheꞌ jämꞌtyeꞌ in säcsedyeꞌ Jiꞌc̣honacdyedyes.

¹⁷ Aty shocamyejoiꞌ atsij muꞌ Jesús yoctyiꞌtum jịꞌchiyactyiꞌ muꞌ, muꞌĉan siti in.

¹⁸ Säcsevaꞌjoij in yi muꞌ Jesús: —Yụ raꞌ jéyac, yirity miꞌinĉantyiꞌ q̂uinꞌ jibityintyiꞌ yụ, muꞌ raꞌ jiꞌmincantyiꞌ yụ.

¹⁹ Jịꞌchiyactyiꞌ muꞌ där yoqui in mọꞌ seꞌvepteyaꞌ p̂eyacdyeꞌ in, cäts yirityityij jéte in: —¿Jam adac yụ? —yi jéte in.

²⁰ Jesús vorjeyacsi: —Yirity jịꞌchiyactyiꞌ yụ miꞌinĉantyiꞌ q̂uinꞌ yiriꞌtac päräꞌ jiyity miꞌin yódyetydyemꞌ aty jibityintyiꞌ u yụ mọꞌdye pijiꞌ, muꞌdye raꞌ jiꞌmincan yụ.

²¹ Yụ Anictyity Muntyiꞌ ijac raꞌ yụ ĉaĉaij na meꞌ yiꞌ mọꞌ sánacdyeꞌ. Meꞌ tsanꞌ meꞌ, muꞌ qui na ramꞌ jiꞌmincantyiꞌ yụ, där raꞌ ñịbeꞌ cạveꞌ muꞌ. Damꞌdye jämꞌ jiquej jam naꞌaqueyaꞌ muꞌ meꞌtyity muntyiꞌ.

Jesús yụꞌtyeꞌ säcsedyeꞌ jiꞌdyijvitidyes

²² Tacaꞌ säcsevaꞌjoij in, muꞌ Jesús tapjete muꞌ pan, yoshoropaij jéte Jenꞌ, chat qui q̂uemiꞌvete, soꞌmaqui jịꞌchiyactyiꞌ muꞌ, jéyacsi: —Miyaꞌĉa uts, uts nash jeñej buꞌyi ĉụiꞌsiꞌ aꞌ yụ —yi.

²³ Tyéquis qui tapjeꞌ, yoshoropaij jéte Jenꞌ, soꞌmaqui jịꞌchiyactyiꞌ muꞌ, räjdye muꞌin tyeij in.

²⁴ Jesús qui jéyacsi: —Ọij nash jeñej buꞌyiꞌ ĉụiꞌsiꞌ chäsh yụ, daiꞌdyes raꞌ muntyiꞌ yụ raꞌ yụꞌtyeꞌ, mọꞌ ferdyeꞌ jasoꞌmitiꞌ raꞌ mụiꞌsis p̂eyacdyeꞌ Jenꞌsiꞌ muꞌ, yụꞌtyeyacsis raꞌ muntyiꞌ in.

²⁵ Yụ jéyac, aty raꞌ jam quivij tyeij yụ ovas fiꞌ mọꞌ, junꞌ quiꞌ chuc venchuiꞌ mọꞌ tupudyeꞌ ayoꞌbuꞌyedyeꞌĉan Jenꞌsiꞌĉan yụ, muꞌĉan raꞌ tyeij yụ mụiꞌsis fiꞌ mọꞌ.

Jesús jajiti: "Mi Pedro ticamitiꞌ raꞌ yụ mi"

²⁶ Muꞌin qui jimeꞌ in Jenꞌdyes jimacdyeꞌ muꞌ chat qui shupqui in mụcuꞌcheꞌ Orivocheꞌ jịjcaij in.

²⁷ Jesús jéyaqui jịꞌchiyactyiꞌ muꞌ: —Räjenꞌdye raꞌ farajjitiĉaꞌ yụ miꞌin, ĉaꞌjoij raꞌ miꞌin. Meꞌ raꞌ cạ̈tsiꞌ sánacdyeꞌ yiꞌ: "Jenꞌ raꞌ ijacsebi muꞌ ĉọjcacsity oveca in, chat qui raꞌ jiꞌpaiꞌcac oveca in."

²⁸ A na raꞌ vañinyebanyaꞌ yụ, yụ chum raꞌ tashcheꞌ venjoij muꞌve Galileave jäquiꞌdye raꞌ miꞌin —yi Jesús jéyacsi.

²⁹ Chat qui muꞌ Pedro yi jéte: —Meꞌ raꞌ tsanꞌ räjenꞌdye farajjin in, yụ qui na ramꞌ yejĉoij jam junꞌ farajjeye mi.

³⁰ Jesús vorjajiti: —Yụ raꞌ jéye, ọij q̂uinꞌ tsedyedyeꞌ, jambiꞌ raꞌ päräꞌ quiꞌ p̂oñi ojtereꞌ, mi raꞌ chibin quiꞌ yi: "Yụ jam cäc̣häꞌchutety Jesús."

³¹ Pedro fersiꞌyaꞌ p̂eyacdyeꞌ jéte: —Meꞌ raꞌ tsanꞌ yụ́mun ijan yụ in, jam qui na ramꞌ junꞌ ticameye. Chiyidye muꞌin yoctyiꞌ räj in.

Getsemaníĉan muꞌ Jesús cọdyete Jenꞌ muꞌ

³² Jesús jịꞌchiyactyiꞌtum muꞌ cätidyeꞌĉan jịjcaij in Getsemaníĉan. Jesús jéyaqui jịꞌchiyactyiꞌ muꞌ: —Úyaꞌ chum p̂utsquenꞌyejamꞌ, yụ raꞌ cọdajquiqui Jenꞌcheꞌ yụ.

³³ Mujuꞌveyaꞌ jịjcaij muꞌ Jesús cạcsi muꞌ Pedro judyeyaꞌ Santiago judyeyaꞌ Juan. Muꞌyaꞌ därsiꞌ táredyeꞌ játŝuti muꞌyaꞌdye tyumꞌyi ĉojtyiꞌ muꞌ.

³⁴ Jéyacsi chibintyity in: —Anic tyumꞌyi ĉojtyiꞌ yụ jeñej raꞌ säñi ĉúti yụ. Úyaꞌ chum tacyaꞌ miꞌin ñuts buꞌjamꞌ miꞌin.

³⁵ Jesús dadamꞌ mujuꞌveyaꞌ jịjcaij, dyụtsyi muꞌve täjjequeꞌ jac jáfiyaꞌ muꞌ. Cọdyete Jenꞌ jéte: —Tupuj jụijyaꞌ meꞌ jiꞌc̣hontiꞌ mi, paj qui jam tŝútyin yụ mọꞌ ñịbedyes tupudyeꞌ.

³⁶ Chimeꞌdye Jesús jéte: —Yụ́tyiꞌ Jenꞌ itŝiꞌ méquiꞌ carij mídyes, yụ cọdyeye jiꞌc̣hontiꞌ paj qui jam därsiꞌ ñịbedyes jịꞌĉojtyeꞌ yụ, jam qui na ramꞌ yojdyemꞌ mạꞌjeꞌ uij, yuꞌtiꞌ ramꞌ yojdyemꞌ mis dyijyedyeꞌ u.

³⁷ Aty meꞌsiꞌ cọdyete Jenꞌ quivij chimuꞌyaꞌ jijtuban, dạcacseshan muꞌin chibintyity in ĉọshvaꞌjoij in. Jesús jajiti Pedro: —¿Ĉọshi caꞌ mi Simón? ¿Mijam buty yiris hora dyij buꞌyi yụ́tum miꞌin?

³⁸ Dyij buꞌjamꞌ miꞌin, cọdaĉamꞌ Jenꞌcheꞌ paj qui jam peñiꞌ jịꞌĉojtacyaꞌ miꞌin. Meꞌ tsanꞌ dyijyedyeꞌĉan mạꞌjetiñeꞌ cäc̣häꞌchutinte Jenꞌ miꞌin, aꞌsiꞌ qui namꞌ miꞌin itŝiꞌ ferdyeꞌ mọꞌ.

³⁹ Cuvij muꞌ Jesús chimuꞌcheꞌ jịjcaban cọdyeĉajte Jenꞌ muꞌ, chịmoꞌdye cọdacdyemꞌ soꞌmete Jenꞌ.

⁴⁰ Aty meꞌsiꞌ quivij chimuꞌyaꞌ jijtuban dạcacseshan ĉọshvaꞌjoij in ĉaĉaij na ĉush játŝuti in. Aty jéyacseshan muꞌ Jesús muꞌin na memꞌ c̣huꞌc̣huij in jam tupuj jéte in.

⁴¹ Cuvij cọdajquiqui Jenꞌcheꞌ muꞌ. Aty ijaijyaꞌ chibin quiꞌ ĉọsseshan jéyacseshan: —¿Tacaꞌ yejĉoij ĉọshi u miꞌin? ¿Tacaꞌ yejĉoij jịꞌjutyiti chimeꞌ u miꞌin? Aty meꞌquiꞌdye atoꞌ o ayij tupudyeꞌ yụ Anictyity Muntyiꞌ yụ, a nash raꞌ soꞌmac yụ juchajtumtyiꞌyaꞌ in.

⁴² Sacyejamꞌ cabuꞌtyum miꞌin. Atyuꞌ u meij jijtuij jiꞌmincantyiꞌ yụ.

Tapjete in muꞌ Jesús

⁴³ Tacaꞌ p̂eyacvaꞌjoij muꞌ Jesús shupqueti muꞌ Judas, jịꞌchiyactyiꞌ tsanꞌ muꞌ Jesústyiꞌ chimeꞌ muꞌ. Muꞌ tujijtucsi daiꞌtyiꞌ muntyiꞌ in, tuqui chutidyes coc̣hino muꞌin judyeyaꞌ son paꞌcacdyes muꞌin. Jutacsity in muꞌin tashchety cudyityity Jenꞌcheꞌ in judyeyaꞌ jịꞌchiyacsity yụꞌtacdyeꞌ in judyeyaꞌ tashchety ĉọjcacsity in.

⁴⁴ Muꞌ Judas jiꞌmincatety Jesús aty muꞌ tashcheꞌ jéyacsaque muntyiꞌ in: "Jụꞌñity chuc raꞌ pụꞌsetety yụ, muꞌ raꞌ tŝọ́yetinte miꞌin, cạtinte raꞌ miꞌin anic raꞌ jämꞌ ĉọjcatinte miꞌin", jéyacsaque muꞌ Judas.

⁴⁵ Anicdye meꞌ shupqueti muꞌ Judas chụiꞌ buꞌyi Jesúsyaꞌ jéte: —¡Jịꞌchiyacsity! Yédyeꞌĉan mọmoꞌ pụꞌsete.

⁴⁶ Chat muꞌin muntyiꞌ in muꞌdye tŝọ́tyete in tapjete in.

⁴⁷ Yirity penꞌdyeꞌ Jesústyiꞌ sanjeyaqui coc̣hino siscajcapte úñity muꞌtyiꞌ tashchetytyiꞌ cudyitity Jenꞌcheꞌ, chat qui muꞌ seiꞌjebite chun muꞌ.

⁴⁸ Jesús jéyacsi: —¿Jedyedyes caꞌ joꞌmes tutiñeꞌ coc̣hino judyeyaꞌ son? Jeñej quiyaij ac̣hiꞌyity muntyiꞌ ĉútiĉaꞌ yụ miꞌin, mạꞌjeꞌ meꞌ tapjitiĉaꞌ yụ miꞌin.

⁴⁹ Yoquiꞌ na Jenꞌsiꞌĉan acaꞌ jiquej yụ, muꞌĉan jịꞌchiyacsi yụ. ¿Junꞌ caꞌ jam yiristum ĉushdyiĉaꞌ yụ miꞌin tapjitiĉaꞌ miꞌin? Meꞌ tsanꞌ meꞌ, meꞌjitiĉamꞌ mọmoꞌ miꞌin paj qui cạ̈tsiꞌve mọꞌ sánacdyeꞌ.

⁵⁰ Meꞌĉandye jịꞌchiyactyiꞌ muꞌ muyaꞌ tŝọij in farajjetacte in muꞌ Jesús.

⁵¹ Yirity muꞌyaꞌ chimeꞌ nanaty cäc̣häꞌc̣häyevaꞌjoijtyiꞌ Jesúsyaꞌ, meꞌ mọmoꞌ bus buꞌyi yirity méquiꞌvetyyaꞌ tyäꞌväty. Muꞌ tsanꞌ tapjete chimeꞌ in.

⁵² Farajjeyactaqui quịꞌsimꞌ cädäj qui ĉaꞌjoij.

Jesús muꞌsiꞌyaꞌ vej tashchety ayoꞌ judíoty muꞌin

⁵³ Muꞌin tapjetety Jesús in cạte in yụꞌte in muꞌsiꞌyaꞌ vej tashchetyyaꞌ cudyitity Jenꞌcheꞌ. Aty muꞌĉan tsudyujñiti in muꞌin tashchety cudyitity Jenꞌcheꞌ in judyeyaꞌ muꞌin tashchety ĉọjcacsity in judyeyaꞌ muꞌin jịꞌchiyacsity yụꞌtacdyeꞌ in.

⁵⁴ Jäꞌquiij muꞌ Pedro cäc̣häꞌchute Jesús junꞌ quiꞌ chuc siti p̂ejsiꞌyaꞌ acas mọꞌ, muꞌsiꞌĉan tashchetysiꞌĉan cudyitity Jenꞌcheꞌ. Muꞌĉan bäꞌyi penꞌdyetucsi väc̣häꞌtyity in muꞌin ĉọjcaiꞌtyiꞌ acaꞌ in, tŝijve cäc̣häꞌ jufiti.

⁵⁵ Muꞌin tashchety cudyitity Jenꞌcheꞌ in räjtumdye tashchety ayoꞌ in quevacsi tsanꞌ muntyiꞌ in paj qui yụꞌtyeyete p̂eyacdyeꞌ in jiꞌijacdyedyes Jesússiꞌ muꞌ, jam qui namꞌ dạcbite in.

⁵⁶ Meꞌ tsanꞌ daiꞌ väñädyeꞌ tuyete Jesús in cäj cäj p̂eyacdyeꞌ jiꞌshupqueyete in.

⁵⁷ Pạrej muꞌĉantyiꞌ sacyi in väñädyeꞌtum p̂eijte Jesús in, yi in:

⁵⁸ —Tsun seꞌvete jiquej yi muꞌ "Yụ raꞌ jịvaꞌchapte Jenꞌsiꞌ acaꞌ muꞌ, mọꞌ jämꞌtyes muntyiꞌ in, chibin raꞌ mạyedyeꞌ joꞌmejtebanꞌ quivij jämꞌbanꞌ yụ, mọꞌ raꞌ jam jämꞌtyes muntyiꞌ in," yi uts Jesús —meꞌ jéyacsi jiꞌmeꞌtety in.

⁵⁹ Meꞌ tsanꞌ yi in jam qui namꞌ cäts buꞌyiꞌ p̂eyacdyeꞌ muꞌin.

⁶⁰ Chat qui muꞌ tashchety cudyitity Jenꞌcheꞌ sacyi muꞌinsiꞌyaꞌ vej muꞌin, jéte muꞌ Jesús: —Aty seꞌvacsebi p̂eyacdyeꞌ um muꞌin p̂iijbuntyiꞌ juchaj in. ¿Jam bu raꞌ voryi mi? ¿Jam bu raꞌ ĉụiꞌ ñutsjitim?

⁶¹ Jesús memꞌ c̣huꞌc̣huij jam damꞌ jätäjyi. Muꞌ tashchety cudyitity Jenꞌcheꞌ muꞌ cuvij jéte: —¿Mi adac Jiꞌc̣honacsity Muntyiꞌ? ¿Mi adac Jenꞌtyiꞌ Ạvaꞌ muꞌ timaꞌcactyiꞌ muꞌ?

⁶² Jesús vorjete: —Yụ nashuꞌ, yirisĉan raꞌ mạyedyeꞌ naijtiĉaꞌ yụ miꞌin Anictyity Muntyiꞌ yụ, tacve buꞌyi raꞌ Jenꞌyaꞌ yụ, muꞌ mujuꞌchaꞌ ferdyeꞌtumtyiꞌ, judyeyaꞌ raꞌ chimeꞌ jiꞌĉujtuyibudyiĉaꞌ yụ miꞌin dyicbaꞌbadyeꞌ raꞌ jijtuiꞌ yụ.

⁶³ Muꞌ tashchety cudyitity Jenꞌcheꞌ shẹiꞌjeyaqui quịꞌsiꞌ muꞌ fạ́codyedyes p̂eyacdyeꞌ Jesúsdyes. Chat qui jéyacsi ayoꞌ in: —Aty jam junꞌ jemonja tsun tyi chuc p̂eijbitety juchaj utssiꞌ muꞌ,

⁶⁴ ĉaĉaij na mụiꞌdye seꞌveptinte ñinacdyeꞌ Jenꞌyaꞌ muꞌ. ¿Jätäjyi tyuꞌ u miꞌin? Ayoꞌ yụꞌtyeyete in jiꞌijacdyes p̂eyacdyeꞌ in.

⁶⁵ Chat qui tiyacchuti chuꞌbete in judyeyaꞌ p̂urꞌjete vejyaꞌ in chat qui untute in, jéte in: —Chị́va, ¿tyi caꞌ meꞌjin päꞌjin? Muꞌin väc̣häꞌtyity ĉọjcaiꞌtyiꞌ acaꞌ in pajjete muꞌin chimeꞌ in.

Pedro ticamete Jesús

⁶⁶ Pedro úĉanyamꞌ bäꞌyi p̂ejyaꞌ. Ayij yiris nanas muꞌsiꞌ úñis muꞌ tashchetysiꞌ cudyitity Jenꞌcheꞌ.

⁶⁷ Mọꞌ nạijte muꞌ Pedro jufivaꞌti tŝijve. Jämꞌ chum jacaviti chat qui jéte: —Mi nash chimeꞌ cäc̣häꞌchutety muꞌ Jesús Nazaretĉan bäꞌyity.

⁶⁸ Pedro ticamete, jeꞌ: —Mijam yụ chị́yete muꞌ muntyiꞌ jedyeꞌ raꞌ mis cạiꞌ p̂eyacdyeꞌ. Chat qui muꞌ chụiꞌdyeꞌyaꞌ jịjcaij, chat qui p̂oñi ojtereꞌ.

⁶⁹ Aty muꞌyaꞌ buꞌban muꞌ, mọꞌ nanas cạvebajte, jéyacsiꞌ muꞌĉantyiꞌ in: —Uts nash chimeꞌ cäc̣häꞌchutety Jesús.

⁷⁰ Quivij muꞌ Pedro ticamete Jesús. Damꞌ mọmoꞌ tyäꞌpäiꞌtyiꞌ, cuvij muꞌĉantyiꞌ in jéte Pedro in: —Anicdye meꞌ, mi nash cäc̣häꞌchutety uts ĉaĉaij nash mi Galileaĉan bäꞌyity.

⁷¹ Dadamꞌ qui mujuꞌchaꞌ ticamete, jéyacsi: —Jam rụijsis jụijyaꞌ ọij p̂eyacdyeꞌ, muꞌdye raꞌ Jenꞌ vaꞌtacdyeꞌ soꞌmin yụ, Jenꞌsiꞌyaꞌ vej muꞌ jéyac yụ, yụ jam chị́yete.

⁷² P̂eyacdyeꞌĉandye p̂oñi ojtereꞌ, aty päräꞌ quiꞌ p̂oñi. Pedro dyijtubibajte Jesússiꞌ p̂eyacdyeꞌ muꞌ, yi jiquej: "Jambiꞌ raꞌ päräꞌ quiꞌ p̂oñi ojtereꞌ, chibin quiꞌ raꞌ yi mi: Yụ jam cäc̣häꞌchutety uts Jesús."