Lucas 5 - Tsimane

Jesús jịꞌcaveyacsi ferdyeꞌ muꞌin tạbity in

¹ Yirisĉan mạyedyeꞌ muꞌ Jesús tsiquimꞌquedyeꞌve tsiques mọꞌ jịjcaij muꞌ, Genesaret tịj mọꞌ tsiques. Anic daiꞌ muntyiꞌ ĉọshte in mạꞌjeꞌ seꞌvepte in Jenꞌsiꞌ p̂eyacdyeꞌ muꞌ, yódyesdyemꞌ p̂eyes Jesús u. Muꞌin muntyiꞌ in vaj meij taꞌquijcati in, mạꞌjeꞌ tsanꞌ c̣hẹiꞌyaꞌjete Jesús ĉúti in.

² Muꞌcheꞌ muꞌ päräꞌ covamba nạijte jámancheꞌ, yạjquictyiꞌ tạbitytyiꞌ in, ĉaĉaij na c̣hiconꞌnaĉan sạjiꞌ muꞌin.

³ Muꞌ na Jesús yoctyiꞌcheꞌ covamba p̂aiꞌjoij Simóntyiꞌcheꞌ, chat qui Jesús jajiti: —Damꞌ majyayaꞌ jéme covamba mi. Chat muꞌcheꞌ qui p̂utsquenꞌyi, chat muꞌchetucsi jịꞌchiyacsi muntyiꞌ in.

⁴ Aty meꞌsiꞌ muꞌ Jesús jịꞌchiyacsi chat qui Simón jajiti: —Jụdyej, q̂uinꞌ chat majyaꞌ jịjcajamꞌ miꞌin, vaꞌcajquicac sạjiꞌ q̂uinꞌ miꞌin, jeveꞌdaĉamꞌ.

⁵ Vorjete Simón: —Meꞌ buty, Jịꞌchiyacsity, a nash tsanꞌ inoj dyutsenꞌjeꞌ tsedyedyeꞌ tsun jeveꞌdaqui tsun mijam yiris jäqueꞌ tạbedyeꞌ tsun. Meꞌ tsanꞌ meꞌ, mis qui namꞌ p̂eyacdyeꞌ yiꞌ q̂uinꞌ, tupuj vaꞌquequeꞌ yụ.

⁶ Meꞌdye vaꞌcajquiqui sạjiꞌ muꞌin, q̂uinꞌdyemꞌ a raꞌ jiꞌñicsi tạbedyeꞌ in, mạꞌjeꞌ verꞌyiꞌ sạjiꞌ muꞌin.

⁷ Mọꞌdyes qui vaijvaijjeyaqui penꞌdyeꞌ muꞌin yoctyiꞌchety covamba in. Muꞌin qui atsij nọ́tacsi in. Pärenꞌdye covamba bänꞌjeyacsi in, chajchajyi covamba yụꞌtaqui in, aty mạꞌjeꞌ pechi in.

⁸ Aty Simón cạvepteyaꞌ ferdyeꞌ muꞌ Jesússiꞌ, chat qui dyụtsyi muꞌsiꞌyaꞌ vej muꞌ, jéte: —Mi Jịꞌchiyacsity, pạrejyeva yụ́yaꞌ, ĉaĉaij nash yụ anic juchajtumtyiꞌ muntyiꞌ.

⁹ Simón judyeyaꞌ penꞌdyeꞌ muꞌ anic där irijyi in cạveꞌ mọꞌ tạbedyeꞌ in.

¹⁰ Chimeꞌdye muꞌ Santiago, judyeyaꞌ Juan, Zebedeoty ạvaꞌ muꞌ, muꞌin carijtaquity yiriꞌyaꞌ in Simóntum in, chimeꞌdye muꞌin tạbedyeꞌ cạveꞌ in anic muꞌin irijyi in. Jesús jajiti Simón: —Jam raꞌ noiꞌyi mi, úyaꞌ quiꞌ raꞌ yacchuti mi tạbacsity raꞌ muntyiꞌ yụꞌtyeye.

¹¹ Meꞌdye sojquiti in, räj farajjeyactaqui jedyeꞌ muꞌin, chat qui cäc̣häꞌchute Jesús in.

Jesús jiꞌchäĉajte yirity muntyiꞌ bayiꞌyitaquity aꞌ muꞌ

¹² Yirisĉan mạyedyeꞌ muꞌ Jesús yocsiꞌĉan bäꞌyedyeꞌ. Atsij yirity japacjoijtyiꞌ muntyiꞌ, räj bayiꞌyitaquity aꞌ muꞌ. Nạijte muꞌ Jesús ĉọsh tyeij ĉọshte muꞌ, muꞌyaꞌ dyụtsyi cọdaqui muꞌcheꞌ jéte: —Jịꞌchiyacsity, meꞌ buty jụjyi mi, jämꞌjibubunꞌ aꞌ mi.

¹³ Meꞌdye muꞌ Jesús tocoꞌjajiti unyaꞌ muꞌ, jajiti: —Mạꞌjeꞌ yụ —jajiti—, jämꞌjobada. Meꞌĉandye jämꞌjobanꞌ mọꞌ bayiꞌyidyemꞌ.

¹⁴ Yi Jesús jajiti: —Jam raꞌ jịꞌchiqueyacsi mi yoctyiꞌ in, tạij muꞌyam jiꞌcavicda mi cudyitityyaꞌ Jenꞌcheꞌ, muꞌ raꞌ chäyibun aꞌ mi, chat qui raꞌ cạyete cuꞌdyem, yoj yidyemꞌ Moisés jiquej u. Mọꞌ raꞌ jịꞌĉocdyes muntyisyaꞌ vej muꞌin aty jämꞌjobanꞌ bayiꞌyidyeꞌ jiquej mi —yi Jesús jajiti.

¹⁵ Meꞌ tsanꞌ jam mạꞌjeꞌ Jesús, yejĉoij qui namꞌ jịꞌchiqueyacsi in, räj muꞌin paiꞌ bäꞌyity in seꞌvaqui in. Daiꞌ vatyquej tyeij atsij muntyiꞌ in mạꞌjeꞌ seꞌveshbite p̂eyacdyeꞌ in, jätäjyi chuc muꞌ, chimeꞌ muꞌin mạꞌjeꞌ in paj qui jiꞌchäcacseban areꞌredyeꞌyaꞌ muꞌin.

¹⁶ Muꞌ qui namꞌ Jesús räjĉan cäjyaꞌ jịjcaij, cọdaqui Jenꞌcheꞌ muꞌ.

Jesús jiꞌchäĉajte yirity puñichjoijtyiꞌ muntyiꞌ

¹⁷ Yirisĉan mạyedyeꞌ muꞌ Jesús jịꞌchiyacsi muntyiꞌ in. Pạrej muꞌyaꞌ chimeꞌ fariseo in judyeyaꞌ jịꞌchiyacsity yụꞌtacdyeꞌ in Jenꞌsiꞌ muꞌ, muꞌin pạrej Galileaĉansiꞌ bäꞌyedyeꞌ atsijtyiꞌ in, judyeyaꞌ pạrej Judeaĉansiꞌ bäꞌyedyeꞌ atsijtyiꞌ in judyeyaꞌ pạrej Jerusalénĉantyiꞌ chimeꞌ in, muꞌyaꞌdye muꞌin chimeꞌ in seꞌvepte p̂eyacdyeꞌ in. Muꞌ na Jesús meꞌchupte Jenꞌsiꞌ ferdyeꞌ muꞌ paj qui tupuj jiꞌchäcacseban muntyiꞌ in.

¹⁸ Yirity muntyiꞌ turacdyeꞌcheꞌ tute in puñichjoijtyiꞌ. Mạꞌjeꞌ tsanꞌ chụiꞌ buꞌyi jiꞌsiste in muꞌsiꞌyaꞌ vej muꞌ.

¹⁹ Q̂uiꞌchiij qui namꞌ muꞌĉan in, jam junꞌyi in. Chat qui bojvi in fajcheꞌ acaꞌ in, taiꞌyaꞌ qui acaꞌ cósheꞌ in, muꞌyaꞌ quic̣henꞌ jịꞌchate turacdyeꞌcheꞌ in Jesússiꞌyaꞌ vej muꞌ jịꞌtŝote in.

²⁰ Jesús aty meꞌ cạvacsi junꞌ chuc fer anicjete in, mọꞌdyes qui jajiti muꞌ puñichjoijtyiꞌ muntyiꞌ: —Yụ jéye chätidyeꞌ yụ, q̂uinꞌ aty vayac juchaj mi.

²¹ Muꞌyaty na fariseo in judyeyaꞌ muꞌin jịꞌchiyacsity yụꞌtacdyeꞌ Jenꞌsiꞌ in, meꞌ dyijyi muꞌin in, yi ĉojtyiꞌĉan in: "¿Junꞌ buty meꞌ yi uts muntyiꞌ? Anic ñinacdyeꞌ Jenꞌdyes shupquiꞌ mọꞌ p̂eyacdyeꞌ muꞌ, jeñej Jenꞌ yuꞌti muꞌ, ĉaĉaij na yirity mọmoꞌ muꞌyaꞌ Jenꞌ muꞌ tupuj vayacjibusinꞌtyiꞌ juchaj muntyis tsun."

²² Muꞌ na Jesús chị́yacsebi aꞌc̣his dyijyedyeꞌ muꞌin. Jéyacsi: —¿Junꞌ meꞌ dyijyi ĉojtyiꞌĉan u miꞌin?

²³ ¿Jụꞌñis buty carij ĉọ́tiñeꞌ miꞌin, areꞌ vayac juchaj utssiꞌ muꞌ, areꞌ chäĉän muꞌ? ¿Areꞌ jéte yụ "Aty vayac juchaj mi", jam jụijyaꞌ, areꞌ jéte yụ: "Sacyebada, miꞌebada"? ¿Jätäjyi miꞌin u?

²⁴ Q̂uinꞌ raꞌ jịꞌcaveyeyac yụ junꞌ chuc yụ ferdyeꞌ soꞌmac paj qui vayacjetyetacsiij juchaj jacchetysiꞌ muntyiꞌ in, ĉaĉaij nash yụ Anictyity Muntyiꞌ yụ. Chat qui jajiti muꞌ puñichjoijtyiꞌ muntyiꞌ: —Sacyebada, tapjebadaꞌ jubij mi, tạij acaꞌyaꞌ jịjcabada mi —jajiti Jesús.

²⁵ P̂eyacdyeꞌĉandye muꞌ puñichjoijtyiꞌ muntyiꞌ jiquej sacyeban tapjebanꞌ jubij muꞌ muꞌinsiꞌyaꞌ vej muꞌin, chat qui jọban acaꞌyamꞌ titimaꞌquebajte Jenꞌ.

²⁶ Där äjyi muntyiꞌ in, anic irijyi in chitimaꞌquetedye Jenꞌ muꞌin in, yi jítidyeij in: —Anic där äjyejaꞌ cạvejas q̂uinꞌ, jam jämꞌdyeyaꞌ meꞌ joꞌmes cạvejaꞌ jiquej.

Jesús jafaijdyi muꞌ Leví

²⁷ Aty meꞌsiꞌ yạjquicseban. Cạvete yirity muntyiꞌ, Leví tịj muꞌ, muꞌ tsimꞌtety querec̣ha Romaĉantyidyety ayoꞌ, yóĉandyemꞌ tsimꞌteĉan querec̣ha u, muꞌĉan bäꞌvaꞌjoij. Jesús jajiti: —Cäc̣häꞌchutiꞌ ram.

²⁸ Sacyi muꞌ Leví farajjetaque tashches dyijyedyeꞌ muꞌ, chat qui cäc̣häꞌchute muꞌ Jesús.

²⁹ Yirisĉan mạyedyeꞌ muꞌ Leví jämꞌtyeꞌ därsiꞌ feshta Jesúsdyesiꞌ. Chimeꞌdye atsij muꞌin in tsimꞌtety querec̣ha in daiꞌ in, judyeyaꞌ yoctyiꞌ chimeꞌ muntyiꞌ in, muꞌinmun muꞌyaꞌ cheꞌyeij chimeꞌ mesayaꞌ in.

³⁰ Fariseo pạrej in judyeyaꞌ muꞌin jịꞌchiyacsity yụꞌtacdyeꞌ Jenꞌsiꞌ in, chifariseodye muꞌin in, jam muꞌin jämꞌ ĉọiꞌ in, mọꞌdyes jepte in jịꞌchiyactyiꞌ Jesústyiꞌ muꞌ, yi in: —¿Junꞌ dash meꞌ miꞌin tsimꞌtetytum querec̣ha säcsi miꞌin judyeyaꞌ juchajtumtyiꞌ chimeꞌ in?

³¹ Jesús vorjeyacsi: —Jeshaꞌ muntyiꞌ räshtyiꞌ jam junꞌ jemonte muꞌ pịñitucsity, muꞌ na japacjoijtyiꞌ muꞌ chat jemonte.

³² Meꞌ buꞌyidye yụ chimeꞌ, atsij yụ jam rụijtyitydyety muntyiꞌ in, yụ atsij juchajtumtyidyety in judyeyaꞌ jéyacsi yụ paj qui muꞌin dyijyi juchajcheꞌ in.

Jesús p̂eyeꞌ yịñijdyeꞌ Jenꞌdyes jịꞌĉoiꞌsiꞌ táredyeꞌ

³³ Pạrej muntyiꞌ in jéte in muꞌ Jesús: —Jịꞌchiyactyiꞌ Juantyiꞌ muꞌ judyeyaꞌ fariseoty chimeꞌ muꞌin, muꞌin räjĉan cọdaqui Jenꞌcheꞌ in yịñijdyeꞌtum Jenꞌsiꞌyaꞌ vej in. Uts qui namꞌ in jịꞌchiyactyiꞌ mi jam meꞌ in, muꞌin jam damꞌ yịñij cạveꞌ in. ¿Junꞌ buty meꞌ muꞌin in?

³⁴ Jéyacsi Jesús: —Muꞌin feshtaijtyiꞌ in vämitydyes in jam muꞌin tupuj yịñij Jenꞌdyes in, mijam jịꞌĉoqui táredyeꞌ muꞌin tacaꞌdyemꞌ muꞌyaꞌ jụijyaꞌ muꞌ vämity muntyiꞌ. Tacaꞌ muꞌyaꞌ muꞌ mijam junꞌ yịñij in.

³⁵ Meꞌdye yụ chimeꞌ, a qui na ramꞌ ayijyaꞌ tupudyeꞌ yụ́dyes, jäcac raꞌ yụ juban, meꞌquiꞌdye raꞌ penꞌdyetucsi yụ uts in, chat qui raꞌ q̂uinꞌdyemꞌ tári in uts jịꞌchiyactyiꞌ yụ judyeyaꞌ yịñij buꞌban in.

³⁶ Chimeꞌdye jéyacsi ọij jịꞌĉocdyes p̂eyacdyeꞌ, yi muꞌ: —Jeshaꞌ ishoijtyiꞌ quịꞌsiꞌ shẹiꞌjoij jụijyaꞌ, jam damꞌ raptac mụiꞌtyityyaꞌ quịꞌsiꞌ. Meꞌ jụijyaꞌ muꞌ, ac̣hiꞌjoij shupqui muꞌ mụiꞌtyity, judyeyaꞌ chimeꞌ jam jämꞌjajiti muꞌ ishoꞌ.

³⁷ Chimeꞌdye muntyiꞌ in mijam junꞌ bijtyeꞌ in mụiꞌsis tyédyeꞌ vino urucyasĉan shoꞌpaꞌ. Meꞌ jụijyaꞌ, mọꞌ qui na raꞌ pashiꞌyaꞌ tyédyeꞌ, topjeꞌ raꞌ mọꞌ shoꞌpaꞌ, mọꞌtumdye raꞌ moñiꞌ shoꞌpaꞌtum.

³⁸ Jemoñeꞌ bijtac mụiꞌsisĉan shoꞌpaꞌ mọꞌ mụiꞌsis tyédyeꞌ paj qui jam meꞌjajitiꞌ mọꞌ.

³⁹ Chimeꞌdye tyi chuc tyeij jụijyaꞌ urucyas tyédyeꞌ, jam mọꞌ mạꞌjeꞌ mọꞌ mụiꞌsis tyédyeꞌ. Yi in: "Dadamꞌ mọjoꞌchaꞌ jämꞌ tyec mọꞌ urucyas vino", —jéyacsi Jesús.