Lucas 4 - Tsimane

Jesússiꞌ jịꞌĉojtacdyeꞌ muꞌ

¹ Jesús yạjquibajte muꞌ cojiro Jordán, Jenꞌsiꞌ qui Ạꞌedyeꞌ meꞌchupte muꞌ, mọꞌ jácati cäjyasĉan jac jịjcaij muꞌ.

² Vạjpedyeꞌ quiꞌtac mạyedyeꞌ meꞌquiꞌ jameꞌti Sọyoꞌ, mạꞌjeꞌ tsanꞌ jiꞌpente aꞌc̣hisyaꞌ dyijyedyeꞌ, jam méquiꞌ damꞌjeꞌ säcsedyeꞌ meꞌsiꞌ mạyedyeꞌ, mọꞌdyes qui aty meꞌsiꞌ chiqueꞌ dáquis muꞌ.

³ Mọꞌ Sọyoꞌ yiꞌ jajiti tsanꞌ muꞌ Jesús: —Mi Jenꞌtyiꞌ Ạvaꞌ jụijyam, jeshaꞌ uts mij jiꞌmunme pan.

⁴ Vorjeꞌ Jesús: —Jam, ĉaĉaij nash yiꞌ sánacdyeꞌ: "Jam nash raꞌ säcsedyemꞌ jạtsaꞌchuti muntyiꞌ in."

⁵ Chat cheꞌve jayuꞌti mọꞌ Sọyoꞌ, yiristum mọmoꞌ räj jajiꞌcaviyiti jacches bäꞌyedyeꞌ in.

⁶ Yiꞌ jajiti: —Yụ raꞌ räj soꞌmeye ọij jacches bäꞌyedyeꞌ cạves q̂uinꞌ mi, räjtumdye mọꞌsiꞌ jedyeꞌ mọꞌ paj qui meꞌchuiꞌ mi judyeyaꞌ qui raꞌ chimeꞌ ayoꞌbuꞌyi mi, ĉaĉaij nash yụ aty meꞌ yụꞌtac räjdyes ọij jac, tupuj soꞌmete yụ tyi chuc mạꞌjeꞌ soꞌmete jụijyaꞌ yụ.

⁷ Yụ raꞌ räj soꞌmeye ọij cạves q̂uinꞌ mi, meꞌ dyụtsyi jụijyaꞌ yụ́yam judyeyaꞌ timaꞌquitim —yiꞌ mọꞌ Sọyoꞌ jéte Jesús.

⁸ Vorjeꞌ Jesús: —Yiꞌ sánacdyeꞌ: "Jenꞌ Ayoꞌ mi muꞌ mọmoꞌ timaꞌqueme, mumꞌ yirity cọdyeme" —yi jeꞌ muꞌ Jesús Sọyoꞌ.

⁹ Jerusalénĉan qui jácati mọꞌ Sọyoꞌ, muꞌĉan qui fajcheꞌ acaꞌ jayuꞌti yóyaꞌdyemꞌ mochcheꞌyaꞌ o Jenꞌsiꞌcheꞌ acaꞌ muꞌ. Mọꞌdye jajiti: —Mi nash Jenꞌtyiꞌ Ạvaꞌ jụijyam, roiꞌyebada mụijyaꞌ,

¹⁰ ĉaĉaij nash yiꞌ sánacdyeꞌ: "Jenꞌ raꞌ jutacsi anjer muꞌ, muꞌin raꞌ ĉujcan in, paj qui jam jedyeij mi.

¹¹ Chimuꞌindye raꞌ unĉan chun in paj qui jam areꞌ tŝọij mi mijcheꞌ", yiꞌ sánacdyeꞌ —yiꞌ jajiti Sọyoꞌ.

¹² Jesús vorjeꞌ: —Chimeꞌdye yiꞌ sánacdyeꞌ: "Jam raꞌ jịꞌĉojte mi muꞌ Jenꞌ Ayoꞌ mi."

¹³ Aty meꞌquiꞌ jameꞌtiyaꞌ muꞌ Jesús, chat q̂uinꞌdyemꞌ jayajquibun mọꞌ Sọyoꞌ junꞌ quiꞌ chuc jábiyaꞌ.

Jesús tiyacchuiꞌ carijtacdyeꞌ muꞌ voroꞌyedyemꞌ Galileaĉan

¹⁴ Jesús Galileaĉan jijtuban muꞌ, anic ferdyeꞌtum muꞌ jasoꞌmiti Jenꞌsiꞌ Ạꞌedyeꞌ muꞌ. Muꞌĉantyiꞌdye paiꞌ bäꞌyity in seꞌvaqui in junꞌ chuc muꞌ Jesús.

¹⁵ Muꞌ jịꞌchiyacsi yóĉaĉandyemꞌ vajmuꞌyaijĉan u in muꞌin judío in, räj timaꞌquebajte in.

Nazaretĉantyiꞌ in jam jụjjete Jesús in

¹⁶ Chat qui muꞌ Jesús Nazaretĉan jịjcaij, yóĉandyemꞌ p̂añiĉan jiquej u. Mọꞌ mạyedyeꞌ jịꞌjutyitidyes, muꞌ Jesús muꞌĉan jịjcaij vajmuꞌyaijĉan judío in, mọꞌ mus yicdyeꞌ muꞌ. Muꞌĉan sacyi p̂eyeꞌ raꞌ Jenꞌsiꞌ sánacdyeꞌ muꞌ.

¹⁷ Soꞌmete in Isaíassiꞌ sánacdyeꞌ jasoꞌmitity p̂eyacdyeꞌ Jenꞌ jiquej. Dajtyeꞌ mọꞌ sánacdyeꞌ dạqueꞌ mọꞌcheꞌ, yóĉandyemꞌ yiꞌĉan o:

¹⁸ "Tŝútyin yụ Ayoꞌsiꞌ Ạꞌedyeꞌ muꞌ, muꞌ tsimꞌtyin yụ paj qui jämꞌsiꞌ p̂eyacdyeꞌ voroꞌtacsi yụ muntyiꞌ in, jéyacsi yụ muꞌin ñịbety in. Chimeꞌdye jutin yụ paj qui yụ jéyacsi muꞌin ĉärꞌtactyiꞌ in, paj qui c̣hoñi in, judyeyaꞌ muꞌin tofety in, paj qui naijbunve in, judyeyaꞌ muꞌin ñịbeꞌtactyiꞌ in paj qui c̣hoñi chimeꞌ in.

¹⁹ Meꞌ buꞌyi muꞌ jutin yụ paj qui yụ jéyacsi muꞌin ayijyaꞌ mọꞌ tupudyeꞌ, Jenꞌ raꞌ ñịbeꞌjeyacsi muntyiꞌ in", yiꞌ mọꞌ sánacdyeꞌ.

²⁰ Chat qui muꞌ Jesús quivij comonꞌjebanꞌ mọꞌ sánacdyeꞌ, soꞌmebajte muꞌ muꞌĉantyiꞌ nọ́taquity, chat qui bäꞌban. Räj muꞌĉantyiꞌ in vaj mọꞌcheꞌ vej muꞌin cạvete in.

²¹ Chat qui jéyacsi: —Ọij q̂uinꞌ mạyedyeꞌ aty yụ́yaꞌ cạ̈tsiꞌ miꞌinsiꞌyaꞌ vej ọij sánacdyeꞌ p̂eyes mụiꞌdye yụ —jéyacsi muꞌ Jesús.

²² Räjenꞌdye seꞌyi in anic äjjepte p̂eyacdyeꞌ in, ĉaĉaij na jämꞌ jiꞌshupqueyacsi p̂eyacdyeꞌ muꞌ. Yi jítidyeij in: —¿Jam adac utsdye mọmoꞌ Joséty ạvaꞌ muꞌ? —yi vaj muꞌin jíti in.

²³ Jesús jéyacsi: —Meꞌ raꞌ jítiĉaꞌ yụ miꞌin mọꞌ p̂eyacdyeꞌ muntyisyaꞌ in, yiꞌ: "Ĉụiꞌ raꞌ jiꞌchäĉun mi, ĉaĉaij na mi pịñitucsity." Meꞌ raꞌ jítiĉaꞌ yụ miꞌin ĉaĉaij na mạꞌjetiñeꞌ jịꞌcaveyeyac ferdyeꞌ yụ úĉan ĉụiꞌsiꞌĉan bäꞌyedyeꞌ yụ, yojdyemꞌ jịꞌcaveyeyacsi u yụ muꞌĉantyiꞌ in Capernaumĉantyiꞌ jiquej in.

²⁴ Yụ jéyac miꞌin, meꞌ tsanꞌ jasoꞌmitity p̂eyacdyeꞌ Jenꞌ, ĉụiꞌsiꞌĉantyiꞌ bäꞌyedyeꞌ in jam méquiꞌ jụjyi muꞌcheꞌ in, meꞌdye yụ chimeꞌ úĉan ĉụiꞌsiꞌĉan bäꞌyedyeꞌ yụ jam jụjtiĉaꞌ yụ miꞌin.

²⁵ Urucyaꞌ jiquej, yoquiꞌdyemꞌ muꞌ Elías u, jasoꞌmitity p̂eyacdyeꞌ Jenꞌ jiquej u, räjdye ọij jac dáqui muntyiꞌ in ĉaĉaij na chibin yómodyeꞌ choc jam méquiꞌ añeiꞌ. Israelĉan jam méquiꞌ jayej in mọꞌin ñịbes muñemunsiꞌ in.

²⁶ Meꞌ tsanꞌ meꞌ, muꞌ qui namꞌ Jenꞌ jam mọꞌindyes jutete muꞌ Elías paj qui mọꞌin nọ́tacsi jiquej muñes p̂en in, muꞌ na Elías nọ́tyequeꞌ yiris p̂en, jam Israelsiꞌ vóshiꞌ muꞌ, Sareptaĉan bäꞌyis c̣hẹiꞌyas bäꞌyedyeꞌ Sidón mọꞌĉansiꞌ nọ́tyequeꞌ.

²⁷ Chimeꞌdye urucyaꞌ jiquej yoquiꞌdyemꞌ muꞌ Eliseo u, jasoꞌmitity p̂eyacdyeꞌ Jenꞌ jiquej u, Israelĉan jam méquiꞌ jayej bayiꞌyitaquity aꞌ in, meꞌ tsanꞌ meꞌ muꞌ qui namꞌ Eliseo jam yirity jiꞌchäĉajte Israeltyiꞌ vóshiꞌ, meꞌdye Naamán mọmoꞌ, jam Israeltyiꞌ vóshiꞌ muꞌ, muꞌ jiꞌchäĉajte Siriaĉantyiꞌ muntyiꞌ —jéyacsi Jesús.

²⁸ Aty seꞌvepte p̂eyacdyeꞌ in, fạ́coij vatyquej tyeij in yósiꞌdyemꞌ vajmuꞌyaijtyiꞌ u in.

²⁹ Jorojyasve bäꞌyedyeꞌ muꞌve cạte in, vocve jịjijcayete in ĉaĉaij na mọꞌ mụcuꞌches bäꞌyedyeꞌ. Dyijyi tsanꞌ in mạꞌjeꞌ tacjete Jesús in páshesheiꞌve mụcuꞌ.

³⁰ Muꞌ na meꞌĉandye dyenjemcacseban yạjquicseban.

Yirity sọyoꞌtumtyiꞌ muntyiꞌ

³¹ Chat qui muꞌ Jesús Capernaumĉan jịjcaij, Galileaĉansiꞌ bäꞌyedyeꞌ. Mọꞌ mạyedyeꞌ jịꞌjutyitidyes jịꞌchiyacsi muntyiꞌ in.

³² Anic muꞌin äjjepte jiꞌchäyitidyeꞌ in ĉaĉaij na ĉụiꞌsiꞌtum ferdyeꞌ muꞌ jịꞌchiyacsi muntyiꞌ in.

³³ Yóĉandyemꞌ vajmuꞌyaijĉan u in, muꞌĉan yirity sọyoꞌtumtyiꞌ muntyiꞌ. Muꞌ äjñete Jesús jéte:

³⁴ —Tạij jọbada, jam raꞌ tsun meꞌtiĉaꞌ miꞌin, mi Jesús Nazaretĉantyiꞌ. ¿Mạꞌjeꞌ buty jịꞌmotstiĉaꞌ tsun miꞌin? Yụ nash chị́yeye, mi nash Anictyity Jutactyiꞌ Jenꞌtyiꞌ muꞌ —jéte mọꞌ sọyoꞌ.

³⁵ Jesús jeꞌ: —C̣huꞌc̣huva mi, meijyebada ọ́ĉan muntyiꞌĉansiꞌ —jeꞌ muꞌ Jesús mọꞌ sọyoꞌ. Sọyoꞌ jiꞌñeꞌete muꞌ muntyiꞌ, mụijyamꞌ jajivaꞌchati muntyisyaꞌ vej muꞌin, chat qui mọꞌ sọyoꞌ q̂uinꞌdyemꞌ meijyebanꞌ muntyiꞌĉansiꞌ, jam qui namꞌ muꞌ jụꞌñij muntyiꞌ.

³⁶ Där irijyi muntyiꞌ in jítidyeij in: —¿Junꞌ buꞌyiꞌ buty p̂eyacdyeꞌ muꞌ? Anic där fersiꞌ p̂eyacdyeꞌ muꞌ, ĉụiꞌsiꞌ p̂eyacdyeꞌ muꞌ soꞌmacsi sọyoꞌ in mọꞌin q̂uinꞌdyemꞌ chiquepte p̂eyacdyeꞌ in, mọꞌin cavin meijyebanꞌ mọꞌĉansiꞌ in.

³⁷ Muꞌin na paiꞌ bäꞌyity in seꞌvaqui chimeꞌ in junꞌ chuc muꞌ Jesús.

Jesús jiꞌchäquebibajte Simónsiꞌ quis muꞌ

³⁸ Shuban muꞌ Jesús muꞌĉan vajmuꞌyaijĉan in, Simónsiꞌĉan qui jịjcaij acaꞌ. Mọꞌ na quis muꞌ Simónsiꞌ jubijĉan mọꞌ, anic fer japacjoiꞌ jänjänyevaꞌjoiꞌ. Mọꞌdyes qui muꞌin in jéte Jesús in.

³⁹ Muꞌ ĉọ́queꞌ, p̂eyaquimꞌ muꞌ meꞌĉandye jiyiꞌ jänjändyemꞌ chäĉänꞌ, chat qui mọꞌ sacyebanꞌ mọꞌdye jiꞌsäcsacsebanꞌ.

Jesús jiꞌchäcacseban areꞌreijtyiꞌ in

⁴⁰ Aty siti tsun, q̂uinꞌdyemꞌ tuyete in muꞌ Jesús räj japacjoijtyiꞌ muntyiꞌ in, yịjyi japacjodyeꞌ muꞌinsiꞌ in, chätidyeꞌ muꞌin, muꞌin tuyete in. Muꞌ qui Jesús tocoꞌtacsi unyaꞌ muꞌ, räj muꞌ jiꞌchäcacseban.

⁴¹ Chimeꞌdye meijjetyetacseban sọyoꞌ daiꞌ in. Äjyedyeꞌtum mọꞌin shubanꞌ in yiꞌ in: —Mi nash Jenꞌtyiꞌ Ạvaꞌ mi —yiꞌ mọꞌin sọyoꞌ in. Jesús dyäcjeĉunacsebi p̂eyacdyeꞌ mọꞌin, ĉaĉaij na mọꞌin sọyoꞌ in jämꞌ chị́yete in muꞌ Jesús in muꞌ Jiꞌc̣honacsity Muntyiꞌ muꞌ.

Jesús voroꞌtacsi vajmuꞌyaijĉan judío in

⁴² Nojno mạyedyeꞌ, aty nạijjoiꞌ, muꞌ Jesús yạjquibanꞌ mọꞌ bäꞌyedyeꞌ, cäjyaꞌ qui jịjcaij muꞌ. Muꞌin na muntyiꞌ in cäc̣henꞌ jäquiꞌdye cäc̣häꞌchute in, chaꞌshejcate in mạꞌjeꞌ tsanꞌ nọ́te in paj qui jam yạjquicsebanve.

⁴³ Jesús jéyacsi: —Damꞌdye jämꞌ yocve jịjcaij yụ, yocsiꞌĉan bäꞌyedyeꞌ in, paj qui chimeꞌ muꞌĉan jiꞌseꞌveyacsi yụ jämꞌsiꞌ p̂eyacdyeꞌ p̂eyeꞌ yụ, mọꞌ ayoꞌbuꞌyidyes raꞌ Jenꞌsiꞌ muꞌ. Meꞌdyes muꞌ jutin yụ paj qui meꞌ voroꞌtacsi yụ —jéyacsi Jesús.

⁴⁴ Meꞌdye muꞌ muꞌve jịjcaij, muꞌĉaĉan voroꞌtacsi yóĉaĉandyemꞌ vaj muꞌyaijĉan judío u in Judeaĉansiꞌ jac.