Lucas 3 - Tsimane

Juan bäꞌyi cäjyasĉan jac

¹ Muꞌ Juan jasoꞌmiti p̂eyacdyeꞌ Jenꞌ jiquej yoquiꞌdyemꞌ muꞌ Tiberio ayoꞌbuꞌyi jiquej u, yiriꞌtac ĉanamꞌ jiyiꞌ yómodyeꞌ tyitiꞌ ayoꞌbuꞌyedyeꞌ muꞌ. Muꞌ Tiberio mujuꞌchaty jacchety ayoꞌ. Poncio Pilato Judeaĉan ayoꞌbuꞌyi, muꞌ na Herodes, Galileaĉan muꞌ ayoꞌbuꞌyi, muꞌ na Felipe, vojity muꞌ, päräꞌĉan bäꞌyedyeꞌ ayoꞌbuꞌyi, Itureaĉan judyeyaꞌ Traconiteĉan. Muꞌ Lisanias, Abiliniaĉan muꞌĉan muꞌ ayoꞌbuꞌyi.

² Muꞌ na Anás judyeyaꞌ muꞌ Caifás, muꞌin tashchety cudyitity Jenꞌcheꞌ in. Aty meꞌsiꞌ muꞌ Juan, Zacaríaty ạvaꞌ muꞌ, cäjyasĉan muꞌ jac muꞌ jasoꞌmiti p̂eyacdyeꞌ Jenꞌ.

³ Muꞌve socorꞌjeꞌ mọꞌ jac c̣hẹiꞌyaꞌ muꞌ cojiro Jordán, paiꞌ voroꞌtacsi Jenꞌsiꞌ p̂eyacdyeꞌ muꞌ. Jéyacsi muntyiꞌ in: "Dyijyevac juchajcheꞌ miꞌin, jiꞌchojtiĉamꞌ, chat qui raꞌ muꞌ Jenꞌ vayacjibunac juchaj miꞌin."

⁴ Meꞌ muꞌ jịꞌcätseꞌ Juan mọꞌ sánacdyeꞌ sáñeꞌsiꞌ jiquej muꞌ Isaías jasoꞌmitity p̂eyacdyeꞌ Jenꞌ jiquej, yiꞌ: "Cäjyasĉan jac muꞌĉan raꞌ yirity fer p̂eyaquity, yi muꞌ: Jämꞌ yụꞌtyevac majmi Ayodyes tsun, chụiꞌjevac jäꞌmiij paj qui muꞌĉan tyeij muꞌ Ayoꞌ.

⁵ Räj raꞌ rudyudyuꞌjeyac q̂ueꞌbeiꞌĉaĉan, mụcuꞌyaꞌmun chimeꞌ nayeyejjeyac, cätsjeyac mọꞌ chimeꞌ bujtyuꞌ, chụiꞌjeyac räj dochtiꞌyaꞌ majmi, jämꞌ raꞌ q̂ueiꞌjeyac majmi Ayodyes.

⁶ Räj raꞌ muntyiꞌ in cạvepte raꞌ in Jenꞌtyiꞌ jutactyiꞌ muꞌ Jiꞌc̣honacsity", yiꞌ sánacdyeꞌ.

⁷ Daiꞌ muntyiꞌ in ĉọshte in muꞌ Juan mạꞌjeꞌ tsanꞌ muꞌyaꞌ jiꞌchojti in. Juan jéĉunacsi: —¡Där ac̣hiꞌtyity miꞌin jeñejtyity nas miꞌin! Jeñej aty raꞌ mọꞌ jiꞌchojtidyeꞌ tupuj jiꞌc̣honnac ĉúti u miꞌin därsiꞌyaꞌ vaꞌtacdyeꞌ Jenꞌsiꞌ muꞌ, meꞌ aty ĉúti u miꞌin.

⁸ Jemoñeꞌ tashcheꞌ jäꞌmij rụij bäꞌyi miꞌin, mọꞌ raꞌ jịꞌĉoiꞌ aty dyijyi juchajcheꞌ miꞌin. Jam raꞌ ĉụiꞌ dyijtuti miꞌin mijam raꞌ yi miꞌin: "Tsun nash vóshiꞌ Abrahamvuntyiꞌ, mọꞌtum tupuj c̣hoñi tsun", jam raꞌ yi miꞌin. Yụ jéyac Jenꞌ tupuj mij jiꞌmunacsi uts in Abrahamtyiꞌ vóshiꞌ muꞌ.

⁹ Atyuꞌ raꞌ tuiꞌ vaꞌtacdyeꞌ Jenꞌ, mọꞌ p̂aquidyeꞌ aty jäꞌmiiꞌtyiꞌ, jeñej yirity muntyiꞌ p̂ạiꞌ jam väshis cätidyeꞌ judyeyaꞌ jiꞌcoꞌshayeꞌ, meꞌdye raꞌ chimeꞌ Jenꞌ jịvaꞌchacsi muꞌin jam rụij bäꞌyity in, tsäquiꞌsis raꞌ vaꞌtacdyeꞌ cạiꞌ in —jéyacsi muꞌ Juan.

¹⁰ Jéte muntyiꞌ in: —¿Junꞌ qui bu raꞌ tsun?

¹¹ Vorjeyacsi Juan: —Tyi chuc päräꞌ meꞌchute quịꞌsiꞌ jụijyaꞌ, jemoñeꞌ soꞌmetinte muꞌ itŝity quịꞌsiꞌ, judyeyaꞌ chimeꞌ tyi chuc säcsedyeꞌtumtyiꞌ jụijyaꞌ, jemoñeꞌ soꞌmetinte tyi chuc itŝity säcsedyeꞌ —jéyacsi muꞌ Juan.

¹² Chimeꞌdye atsij ĉọshte in muꞌin tsimꞌtety querec̣ha in ayodyety Romaĉantyidyety. Muꞌin chimeꞌ jéte in: —Jịꞌchiyacsity, tsun na, ¿junꞌ qui bu raꞌ tsun?

¹³ Vorjeyacsi Juan: —Jemoñeꞌ miꞌin jam raꞌ cäj cọdyetaqui querec̣ha miꞌin, cäts ramꞌ cọdyetacsi miꞌin, junꞌ chuc yi ayoꞌ.

¹⁴ Chimuꞌdye ĉọshte muꞌin väc̣häꞌtyity in, jéte in: —Tsun na, ¿junꞌ qui bu raꞌ tsun? Vorjeyacsi Juan: —Jam raꞌ c̣hojvacdyeꞌyaꞌ chutacsi jedyeꞌ muntyiꞌ miꞌin, mijam raꞌ c̣họcoꞌtacsi väñädyeꞌyaꞌ miꞌin. Maꞌjovac yaꞌitacdyeꞌtum ịvajyity miꞌin, mọꞌ ramꞌ dyijtutiñeꞌ.

¹⁵ Muꞌin muntyiꞌ in anic bisacdyeꞌ jeꞌ in ayidyeꞌ raꞌ Jiꞌc̣honacsity Muntyiꞌ. Mọꞌdyes dyijtute Juan in, yi jítidyeij in: "¿Jam buty uts Jiꞌc̣honacsity Muntyiꞌ?"

¹⁶ Muꞌ na Juan yi räj jéyacsi: —Jam nash yụ, yụ nash ojñiꞌĉan chojtyeyac miꞌin. Muꞌ na raꞌ atsijtyiꞌ muntyiꞌ, muꞌ raꞌ yuꞌtyiyinac pạrej Jenꞌsiꞌ Ạꞌedyeꞌ muꞌ, pạrej raꞌ tŝij yuꞌtyiyinac. Muꞌ mujuꞌchaꞌ fer buꞌyity, jam jeñej yụ uyaꞌyaꞌ yụ, mijam tupuj c̣hacjepte yụ yujches coꞌsis muꞌ, meꞌ ĉúti yụ.

¹⁷ Muꞌ raꞌ jịꞌcäts yụꞌtacsi muntyiꞌ in juchadyeꞌyaꞌ muꞌin, jeñej yirity muntyiꞌ tyiftety trivo. Muꞌ tyiftactyiꞌ jämꞌ yụꞌtac acaꞌĉan, mọꞌ qui namꞌ siꞌ muꞌ coshtac tŝijĉan, jam quivꞌjoiꞌsiꞌĉan, chimeꞌjeyacsidye raꞌ muntyiꞌ in.

¹⁸ Meꞌdye muꞌ Juan yoc yoc p̂eyacdyeꞌ muꞌ jiꞌshupqueyacsi voroꞌtacsiyaꞌ Jenꞌsiꞌ p̂eyacdyeꞌ muꞌ, fercheꞌ muꞌ jéyacsi paj qui jụjyi in.

¹⁹ Muꞌ chimeꞌ fạraꞌjeĉunꞌte tsanꞌ muꞌ Herodes muꞌĉantyiꞌ ayoꞌ, ĉaĉaij na muꞌ Herodes anic där aꞌc̣his bäꞌyi muꞌ, jäcbite vojitysiꞌ p̂en muꞌ, Erodías tịj mọꞌ, mọꞌtum qui bäꞌban, daiꞌ joꞌmes aꞌc̣his dyijyedyeꞌ muꞌ.

²⁰ Dadamꞌ mọjoꞌchaꞌ yocsiꞌ juchaj muꞌ, muꞌ tapjajiti muꞌ Juan, chat qui jaĉärꞌti.

Jiꞌchojtidyeꞌ Jesucristos

²¹ Jambiꞌdyemꞌ ĉärꞌtac muꞌ Juan chojtacsevaꞌjoij muntyiꞌ in, meꞌĉandye shupqueti muꞌyaꞌ muꞌ Jesús, chịmoꞌdyemꞌ ĉọ́te jiꞌchojtacdyeꞌ. Aty meꞌsiꞌ jiꞌchojti muꞌyaꞌ chat qui cọdaqui Jenꞌcheꞌ muꞌ Jesús, meꞌĉandye vanacyiꞌ mạyedyeꞌcheꞌ,

²² mọꞌches chạiꞌ Jenꞌsiꞌ Ạꞌedyeꞌ muꞌ, rụij buꞌyiꞌ Jesúscheꞌ tŝọiꞌ játŝuti, jeꞌñes ọꞌtoꞌ, joꞌmes jiꞌcavitiꞌ. Chat vatyquej yiꞌ mạyedyeꞌches p̂eyacdyeꞌ yiꞌ seꞌveꞌ: —Mi nash mạꞌjeyacdyety Ạvaꞌ yụ, anic maꞌjotacdyety.

Tịj muꞌin vóshiꞌvun Jesucristoty

²³ Jesucristo aty chibin quiꞌtac yómodyeꞌ tyiti muꞌ, chat tiyacchuti voroꞌyi. Jeñej Joséty ạvaꞌ muꞌ meꞌ ĉọpte muntyiꞌ in. Joséty na jenꞌ jiquej muꞌ Elí tịj muꞌ,

²⁴ muꞌ Elí ạvaꞌ muꞌ Matattyiꞌ, muꞌ Matat ạvaꞌ muꞌ Levíty, muꞌ Leví ạvaꞌ muꞌ Melquity, muꞌ Melqui ạvaꞌ muꞌ Janaty, muꞌ Jana ạvaꞌ muꞌ yoctyiꞌ Joséty.

²⁵ Uts na José ạvaꞌ muꞌ Matatíastyiꞌ, muꞌ Matatías ạvaꞌ muꞌ Amóstyiꞌ, muꞌ Amós ạvaꞌ muꞌ Nahúmtyiꞌ, muꞌ Nahúm ạvaꞌ muꞌ Eslityiꞌ, muꞌ Esli ạvaꞌ muꞌ Nagaityiꞌ.

²⁶ Muꞌ Nagai ạvaꞌ muꞌ Maattyiꞌ, muꞌ Maat ạvaꞌ muꞌ yoctyiꞌ Matatíastyiꞌ, muꞌ Matatías ạvaꞌ muꞌ Semeityiꞌ, muꞌ Semei ạvaꞌ muꞌ Josectyiꞌ, muꞌ Josec ạvaꞌ muꞌ Judáty jiquej.

²⁷ Chimeꞌdye muꞌ Judá ạvaꞌ muꞌ Joanántyiꞌ, muꞌ Joanán ạvaꞌ muꞌ Resaty. Muꞌ Resa ạvaꞌ muꞌ Zorobabeltyiꞌ, muꞌ Zorobabel ạvaꞌ muꞌ Salatieltyiꞌ, muꞌ Salatiel ạvaꞌ muꞌ Nerity jiquej.

²⁸ Muꞌ Neri ạvaꞌ muꞌ yoctyiꞌ Melquity, muꞌ Melqui ạvaꞌ muꞌ Adity, muꞌ Adi ạvaꞌ muꞌ Cosamtyiꞌ, muꞌ Cosam ạvaꞌ muꞌ Elmadamtyiꞌ, muꞌ Elmadam ạvaꞌ muꞌ Ertyiꞌ jiquej.

²⁹ Muꞌ Er ạvaꞌ muꞌ Jesústyiꞌ, uts Jesús ạvaꞌ muꞌ Eliezertyiꞌ, muꞌ Eliezer ạvaꞌ muꞌ Jorimtyiꞌ, muꞌ Jorim ạvaꞌ muꞌ yoctyiꞌ Matattyiꞌ jiquej.

³⁰ Muꞌ Matat ạvaꞌ muꞌ Levítyiꞌ, muꞌ Leví ạvaꞌ muꞌ Simeóntyiꞌ, muꞌ Simeón ạvaꞌ muꞌ Judáty, muꞌ Judá ạvaꞌ muꞌ Josétyiꞌ, muꞌ José ạvaꞌ muꞌ Jonamtyiꞌ, muꞌ Jonam ạvaꞌ muꞌ Eliaquimtyiꞌ jiquej.

³¹ Muꞌ Eliaquim ạvaꞌ muꞌ Meleaty, muꞌ Melea ạvaꞌ muꞌ Menaty, muꞌ Mena ạvaꞌ muꞌ Matataty, muꞌ Matata ạvaꞌ muꞌ Natántyiꞌ jiquej.

³² Muꞌ Natán ạvaꞌ muꞌ Davidtyiꞌ jiquej, muꞌ David ạvaꞌ muꞌ Isaíty, muꞌ Isaí ạvaꞌ muꞌ Obedtyiꞌ, muꞌ Obed ạvaꞌ muꞌ Booztyiꞌ, muꞌ Booz ạvaꞌ muꞌ Salaty, muꞌ Sala ạvaꞌ muꞌ Naasóntyiꞌ jiquej.

³³ Muꞌ Naasón ạvaꞌ muꞌ Aminadabtyiꞌ, muꞌ Aminadab ạvaꞌ muꞌ Admintyiꞌ, muꞌ Admin ạvaꞌ muꞌ Arnity, muꞌ Arni ạvaꞌ muꞌ Esromtyiꞌ, muꞌ Esrom ạvaꞌ muꞌ Farestyiꞌ, muꞌ Fares ạvaꞌ muꞌ Judáty jiquej.

³⁴ Muꞌ na Judá ạvaꞌ muꞌ Jacobtyiꞌ, muꞌ Jacob ạvaꞌ muꞌ Isaactyiꞌ, muꞌ Isaac ạvaꞌ muꞌ Abrahamtyiꞌ, muꞌ Abraham ạvaꞌ muꞌ Taréty, muꞌ Taré ạvaꞌ muꞌ Nacortyiꞌ jiquej.

³⁵ Muꞌ Nacor ạvaꞌ muꞌ Serugtyiꞌ, muꞌ Serug ạvaꞌ muꞌ Ragautyiꞌ, muꞌ Ragau ạvaꞌ muꞌ Pelegtyiꞌ, muꞌ Peleg ạvaꞌ muꞌ Hebertyiꞌ, muꞌ Heber ạvaꞌ muꞌ yoctyiꞌ Salaty jiquej.

³⁶ Muꞌ Sala ạvaꞌ muꞌ Cainántyiꞌ, muꞌ Cainán ạvaꞌ muꞌ Arfaxadtyiꞌ jiquej, muꞌ Arfaxad ạvaꞌ muꞌ Semtyiꞌ, muꞌ Sem ạvaꞌ muꞌ Noétyiꞌ jiquej, muꞌ Noé ạvaꞌ muꞌ Lamectyiꞌ.

³⁷ Muꞌ Lamec ạvaꞌ muꞌ Matusaléntyiꞌ, muꞌ Matusalén ạvaꞌ muꞌ Enoctyiꞌ, muꞌ Enoc ạvaꞌ muꞌ Jaredtyiꞌ, muꞌ Jared ạvaꞌ muꞌ Mahalaleeltyiꞌ, muꞌ Mahalaleel ạvaꞌ muꞌ yoctyiꞌ Cainántyiꞌ jiquej.

³⁸ Muꞌ Cainán ạvaꞌ muꞌ Enóstyiꞌ, muꞌ Enós ạvaꞌ muꞌ Settyiꞌ, muꞌ Set ạvaꞌ muꞌ Adántyiꞌ, muꞌ Adán ạvaꞌ muꞌ Jenꞌtyiꞌ jiquej.