Lucas 1 - Tsimane

Tiyacchutis Sánacdyeꞌ

¹ Yụ nash sáñeꞌ ọij mídyes Teófilo, yiꞌ junꞌ chuc muꞌ Jesucristo tsuntum bäꞌyi jiquej. Muꞌyaꞌ jiquej daiꞌ muꞌin sáñeꞌtyiꞌ in junꞌ buty bäꞌyi muꞌ tsuntum jiquej.

² Muꞌin sánaquity in mọꞌdye mọmoꞌ p̂eyacdyeꞌ sáñeꞌ in yódyesdyemꞌ seꞌveꞌsiꞌ tsun, mọꞌ soꞌminsiꞌ tsun in muꞌin cạiꞌtyiꞌ p̂eyacdyeꞌ Jesucristos in, ĉaĉaij na tạꞌcaty muꞌin cạvetety in yoquiꞌdyemꞌ tiyacchutiꞌyaꞌ carijtaqui jiquej u.

^3-4 Mọꞌdyes yụ räj cạvacsebi sánacdyeꞌ muꞌin cạvetetysiꞌ jiquej in judyeyaꞌ yụ jéyacsi chimeꞌ muꞌin cạvetety in aty tiyacchutiꞌyaꞌ carijtacdyeꞌ jiquej muꞌ. Yụ jämꞌ ĉọiꞌ paj qui yụ jéye sánacdyeꞌcheꞌ räj junꞌ junꞌ chuc junꞌtacaque Jesucristo jiquej, paj qui rụijsis meꞌchuiꞌ mi mọꞌ p̂eyacdyeꞌ aty seꞌves jiquej mi, mi nash fer buꞌyity Teófilo.

Anjer p̂eijbite naꞌedyeꞌ raꞌ muꞌ Juansiꞌ chojtacsity muntyiꞌ

⁵ Urucyaꞌ jiquej yoquiꞌdyemꞌ ayoꞌbuꞌyaqueyaꞌ Judeaĉan muꞌ Herodes jiquej u, muꞌyaꞌ yirity cudyitity Jenꞌcheꞌ, Zacarías tịj muꞌ, Abíassiꞌĉantyiꞌ ñuruꞌ, muꞌmun carijtaqui Jenꞌsiꞌĉan acaꞌ muꞌ. Zacaríassiꞌ na p̂en muꞌ Isabel tịj mọꞌ, vóshiꞌ muꞌ chimeꞌ Aarónvunsiꞌ jiquej.

⁶ Zacarías judyeyaꞌ p̂en muꞌ anic rụij bäꞌyi in Jenꞌsiꞌyaꞌ vej muꞌ, räjĉan chiquepte Jenꞌsiꞌ p̂eyacdyeꞌ in, judyeyaꞌ yụꞌtacdyeꞌ muꞌ, mijam jụꞌñiij in.

⁷ Itŝij qui namꞌ ạvaꞌ mọꞌin, ĉaĉaij na säräꞌ buꞌyis mọꞌ p̂en muꞌ, Isabel, judyeyaꞌ muꞌ Zacarías aty chimeꞌ ishoꞌmun aijvun in.

⁸ Yirisĉan mạyedyeꞌ aty tupudyeꞌ muꞌin Abíasĉantyiꞌ ñuruꞌtyity in, muꞌin qui tŝọ́taqui in paj qui Jenꞌsiꞌĉan acaꞌ carijtaqui in.

⁹ Meꞌ buꞌyiꞌ yicdyeꞌ muꞌinsiꞌ in muꞌin cudyitity Jenꞌcheꞌ in, yirity ñuruꞌĉantyiꞌ in yụꞌtac paj qui muꞌ jiꞌcoꞌshayequeꞌtyiꞌ jẹrejres Jenꞌdyes. Muꞌ na Zacarías meꞌ buꞌyi muꞌ yụꞌtac.

¹⁰ Aty Jenꞌsiꞌĉan acaꞌ yirity muꞌ jiꞌcoꞌshayevaꞌqueꞌ jẹrejres, muꞌin jorojyaty daiꞌtyiꞌ in, cọdaqui muꞌin Jenꞌcheꞌ in.

¹¹ Meꞌĉandye yirity anjer jiꞌcaviti Zacaríasyaꞌ, ĉụiꞌdye vatyquej muꞌyaꞌ rụiꞌcujcuij tacve buꞌyi yóyaꞌdyemꞌ mọꞌ jiꞌcoꞌshayaquis jẹrejres o.

¹² Muꞌ na Zacarías aty meꞌ cạveteyaꞌ muꞌ anjer, tyumꞌ tyeij ĉojtyiꞌ muꞌ noiꞌyi muꞌ.

¹³ Muꞌ na anjer yi jajiti: —Jam raꞌ noiꞌyi mi Zacarías, a nash Jenꞌ jụjjibun cọdacdyeꞌ mi, ạvaꞌyi raꞌ mi ĉụiꞌsiꞌĉan p̂en mi mọꞌ Isabel, Juan raꞌ yụꞌtyeyete tịj mi.

¹⁴ Där raꞌ maꞌjoij mi ạvaꞌtum mi, judyeyaꞌ raꞌ daiꞌ yoctyiꞌ in maꞌjoij muꞌdyes chimeꞌ in, naꞌiyaꞌ muꞌ.

¹⁵ Muꞌ raꞌ ạvaꞌ mi fer buꞌyi raꞌ Jenꞌsiꞌyaꞌ vej muꞌ. Muꞌ raꞌ jam damꞌ c̣homꞌ tyeij pashsiꞌ tyédyeꞌ, mijam raꞌ vino tyeij muꞌ. Naꞌi ramꞌ muꞌ jasäsdyi raꞌ Jenꞌsiꞌ Ạꞌedyeꞌ muꞌ.

¹⁶ Muꞌ raꞌ jịꞌcaꞌnacseban Jenꞌyaꞌ daiꞌ muꞌin Israeltyiꞌ vóshiꞌ in, paj qui muꞌin cäc̣häꞌchubajte in Jenꞌ Ayoꞌ muꞌin.

¹⁷ Muꞌ raꞌ Juan jäꞌmij tashcheꞌ voroꞌtacsi muntyiꞌ in jambiꞌdyemꞌ atsij muꞌ Ayoꞌ tsun. Fer buꞌyi raꞌ judyeyaꞌ dyijyedyeꞌtum chimeꞌ, yojdyemꞌ Elíasvun jiquej u. Chimeꞌdye raꞌ jiꞌjämꞌ yụꞌtacseban muntyiꞌ in ĉụiꞌtyiꞌtum ạvaꞌ muꞌin, chimuꞌdye raꞌ yi paj qui muꞌin jam chiquetety Jenꞌ in rụij buꞌbanꞌ dyijyedyeꞌ muꞌin. Meꞌ raꞌ ạvaꞌ mi jäꞌmij raꞌ yi paj qui muntyiꞌ in jäꞌmiiꞌtyiꞌ ĉojtyiꞌ muꞌin, paj qui tiĉunꞌteve in Ayoꞌ tsun atsijyaꞌ muꞌ —yi muꞌ anjer jajiti Zacarías.

¹⁸ Vorjete Zacarías yi jéte: —¿Junꞌ bu raꞌ meꞌ tupuj chịj yụ meꞌ raꞌ cạ̈tsiꞌ ọij p̂eyacdyeꞌ ạvaꞌyi raꞌ tsun? A qui namꞌ ishoꞌmun atsvun tsun —yi jéte Zacarías.

¹⁹ Vorjajiti anjer: —Yụ nash Gabriel anictyity jutactyiꞌ Jenꞌtyiꞌ yụ, muꞌ nash jutin yụ paj qui yụ soꞌmeye ọij jämꞌsiꞌ p̂eyacdyeꞌ.

²⁰ Jeshaꞌ mi q̂uinꞌ jam damꞌ anicjibutim yụs p̂eyacdyeꞌ, mọꞌdyes qui raꞌ q̂uinꞌ jepepej shupqui mi, mijam raꞌ junꞌ p̂eyaqui mi junꞌ quiꞌ chuc cạ̈tsiꞌ mọꞌ tupudyeꞌ aty cạ̈tsiꞌyaꞌ mọꞌ p̂eyacdyeꞌ —yi jajiti anjer.

²¹ Muꞌin na muntyiꞌ jorojyaty in bisacdyeꞌ muꞌin jeꞌ in. Yi jítidyeij in: "¿Junꞌtaqui buty muꞌĉan meñi?"

²² Aty men q̂uinꞌdyemꞌ shuban muꞌĉantyiꞌ, jepepej shuban, jam junꞌ p̂eyaĉan. Meꞌ chịj muꞌin jorojyaty in, muꞌ Jenꞌ jiꞌnaijti muꞌĉan Jenꞌsiꞌĉan acaꞌ Zacaríasyaꞌ. Shuban c̣họcoꞌ c̣họcoꞌ qui p̂eyaĉan, yejĉoij jepepej buꞌyi.

²³ Zacarías aty ijaijyaꞌ mọꞌ mạyedyeꞌ carijtacdyeꞌ muꞌ Jenꞌsiꞌĉan acaꞌ, chat caꞌñibun ĉụiꞌsituban bäꞌyedyeꞌ muꞌ.

²⁴ Chat jäquiꞌve mọꞌ p̂en muꞌ Isabel ạvaꞌyiꞌ, tacyaꞌ acaꞌyaꞌ ĉanamꞌ ịvaj, jam shupquiꞌ.

²⁵ Yiꞌ ĉojtyiꞌĉan mọꞌ: "Jenꞌ ñịbeꞌjin yụ, jadyic raꞌ tsị́catacsiꞌ yụ muntyiꞌ in ĉaĉaij na yụ säräꞌ buꞌyis jiquej", yiꞌ mọꞌ Isabel.

Anjer p̂eijbite naꞌedyeꞌ ramꞌ Jesucristos

²⁶ Aty jäbän ịvaj tyitiꞌ mọꞌ Isabel ạvaꞌtum, chat qui muꞌ Jenꞌ jutete muꞌ anjer Gabriel, Nazaretve jutete Galileaĉansiꞌ bäꞌyedyeꞌ.

²⁷ Mọꞌĉan yiris bäꞌyiꞌ nanas, María tịj mọꞌ, jambiꞌ tyushtes sonꞌ. A qui namꞌ tsanꞌ muꞌyaꞌ vämtyidyety mọꞌ aty p̂eyacdyeꞌĉan atsvun. Vämiꞌ raꞌ mọꞌ muꞌcheꞌ, José tịj muꞌsiꞌ vóshiꞌ muꞌ Davidvuntyiꞌ jiquej. Jenꞌ jutete muꞌ anjer muꞌ Gabriel paj qui muꞌ ĉọ́queꞌ mọꞌ María.

²⁸ Siteꞌ jajitiꞌ: —Yụ vorjeye, därsiꞌ ñịbeꞌjitidyes Jenꞌ soꞌmin mi, muꞌ nash penꞌdyetun.

²⁹ Mọꞌ María aty cạveteyaꞌ muꞌ anjer judyeyaꞌ seꞌvepte p̂eyacdyeꞌ muꞌ, chat qui mọꞌ joꞌmequeꞌqueiꞌ cajotyitiꞌ cavin dyijtupte p̂eyacdyeꞌ muꞌ, "Junꞌ buꞌyiꞌ buty cạiꞌ ọij p̂eyacdyeꞌ muꞌ", yiꞌ mọꞌ dyijyiꞌ.

³⁰ Quivij jap̂iyiti muꞌ anjer jajitiꞌ: —Jam raꞌ noiꞌyiꞌ mi María, ĉaĉaij nash muꞌ Jenꞌ maꞌjotyin mi.

³¹ Jạjtsiꞌ nash raꞌ mi, sonꞌ raꞌ ạvaꞌ mi, yụꞌtyeyete raꞌ tịj mi Jesús.

³² Muꞌ raꞌ fer buꞌyi, jéte raꞌ in: Ạvaꞌ Jenꞌtyiꞌ mujuꞌchaty. Jenꞌ Ayoꞌ tsun jayuꞌti raꞌ ayoꞌbuꞌyi, yódyemꞌ Davidvun u, vóshiꞌvun muꞌ jiquej.

³³ Muꞌ raꞌ ayoꞌbuꞌyi Israeltyidyes vóshiꞌ in, muꞌsiꞌ raꞌ jam jụꞌñisĉan mạyedyeꞌ mọtsiꞌ ayoꞌbuꞌyidyemꞌ, meꞌ buꞌyi raꞌ ạvaꞌ mi —jajitiꞌ anjer mọꞌ María.

³⁴ Vorjete María: —¿Junꞌdyemꞌ yụ meꞌ ạvaꞌyiꞌ ĉaĉaij na jam tyi tyushtyin sonꞌ yụ in? —yiꞌ mọꞌ María jéte.

³⁵ Vorjajitiꞌ anjer: —Jenꞌsiꞌ qui na ramꞌ Ạꞌedyeꞌ tŝútyin mi, Jenꞌsiꞌ ferdyeꞌ muꞌ juñum buꞌyiꞌ raꞌ mícheꞌ. Ạvaꞌ raꞌ mi anictyity tsimꞌtactyiꞌ Jenꞌtyiꞌ muꞌ, jéte raꞌ in Jenꞌtyiꞌ Ạvaꞌ muꞌ.

³⁶ Chimeꞌdye ĉụiꞌsiꞌ chätidyeꞌ mi, Isabel, mọꞌ säräꞌ buꞌyis jeꞌsiꞌ jiquej in, meꞌ tsanꞌ ishoꞌ mọꞌ, aty chimeꞌ ạvaꞌtum q̂uinꞌ, aty jäbän ịvaj tyitiꞌ mọꞌ jạjtsiꞌ,

³⁷ ĉaĉaij na Jenꞌdyes jam méquiꞌ carij —jajitiꞌ anjer mọꞌ María.

³⁸ Jụjyiꞌ mọꞌ chat qui vorjete: —Jụdyej, paj meꞌ cạ̈tsiꞌ yụ́tum ọij Jenꞌsiꞌ p̂eyacdyeꞌ muꞌ, yoj jitiꞌdye bu um, ĉaĉaij nash yụ Jenꞌsiꞌ úñis muꞌ —yiꞌ María jéte muꞌ anjer. Jọban qui muꞌ.

María ĉọ́queꞌ mọꞌ Isabel

³⁹ Chat qui mọꞌ María sactiꞌ miquiꞌmuntyiꞌcheꞌ mụcuꞌ jịjcaiꞌ, yiris bäꞌyedyeꞌ Judeaĉansiꞌ, cavin mọꞌcheꞌ jịjcaiꞌ,

⁴⁰ yócheꞌdyemꞌ Zacaríassiꞌ p̂en umꞌ. Ventyequeꞌ rụij buꞌyiꞌ siteꞌ vorjeꞌ mọꞌĉan Isabel.

⁴¹ Aty seꞌvebiꞌ voryedyemꞌ Marías, meꞌĉandye yitarꞌyi ạvamꞌ voꞌcoĉantyimꞌ Isabeltyiꞌ, chat qui játŝutiꞌ Jenꞌsiꞌ Ạꞌedyeꞌ muꞌ mọꞌ Isabel.

⁴² Chat qui fer p̂eyaquiꞌ Isabel jeꞌ María: —Därsiꞌ ñịbeꞌjitidyes soꞌmin mi muꞌ Jenꞌ, jam jeñej yocsiꞌ p̂en in. Meꞌdye chimeꞌ ạvaꞌ mi voꞌcoĉantyiꞌ mi, där ñịbeꞌjibun.

⁴³ Mi nash raꞌ Ayoꞌsiꞌ tseꞌ muꞌ, muꞌ nash yụ́tyiꞌ Ayoꞌ chimeꞌ tsanꞌ meꞌ ĉushdyiꞌ q̂uinꞌ mi, mọꞌ därsiꞌ ñịbeꞌjitidyes shupquiꞌ yụ́dyes.

⁴⁴ Mụiꞌdye seꞌvepye voryedyeꞌ mi muꞌ voꞌcoĉantyiꞌ ạvaꞌ yụ yitarꞌyi maꞌjodyeꞌtum.

⁴⁵ Muꞌ Jenꞌ anic maꞌjodyeꞌtum yuꞌtyin mi anicyedyedyes mi, anicyiꞌ mi cạ̈tsiꞌ raꞌ mọꞌ p̂eyacdyeꞌ Jenꞌsiꞌ soꞌminsiꞌ —yiꞌ jajitiꞌ Isabel mọꞌ María.

⁴⁶ Mọꞌ qui p̂eyaquiꞌ María yiꞌ: —Yụ nash timaꞌquetes Jenꞌ ĉojtyiꞌĉan yụ,

⁴⁷ anic maꞌjoiꞌ muꞌdyes yụ ạꞌedyeꞌĉan yụ, muꞌ Jiꞌc̣hoñintyiꞌ yụ,

⁴⁸ ĉaĉaij na muꞌ dyijtun yụ, meꞌ tsanꞌ yụ ñịbeꞌ úñis muꞌ, tsimꞌtyin qui namꞌ yụ. Muntyiꞌ raꞌ in jam jụꞌñisĉan mạyedyeꞌ farajjeꞌ dyijtun yụ in, yi raꞌ in: "Anic ñịbeꞌjajitiꞌ mọꞌ", meꞌ raꞌ jiꞌjäquin yụ in,

⁴⁹ ĉaĉaij na muꞌ mujuꞌchaꞌ ferdyeꞌtumtyiꞌ Jenꞌ anic där ñútyin yụ. Tịj muꞌsiꞌ anic mujuꞌchaꞌ rụijtyity Jenꞌ, jéte in.

⁵⁰ Jenꞌ ñịbeꞌ ĉọcsi tyi chuc irijyity muꞌcheꞌ in.

⁵¹ Därsiꞌyaꞌ ferdyeꞌ muꞌ dyäcjeĉunacsebi dyijyedyeꞌ muꞌin vaꞌbunnaquitysiꞌ in.

⁵² Muꞌ jiꞌshupcacseban muꞌin ayoꞌbuꞌyity in, chat qui yụꞌtacsi in muꞌin ñịbeꞌ bäꞌyity in.

⁵³ Muꞌ qui soꞌmacsi jedyeꞌ in muꞌin dáquity in, muꞌin qui na jedyeꞌtumtyiꞌ in dạ̈räꞌ muꞌ jutacseban, itŝiꞌ jedyeꞌ unĉan muꞌin.

⁵⁴ Muꞌ nọ́tacsi Israeltyiꞌ vóshiꞌ in, muꞌin nash úñity muꞌ dyijtucsi muꞌ judyeyaꞌ ñịbeꞌ ĉọcsi.

⁵⁵ Meꞌ jịꞌcätsaqui p̂eyacdyeꞌ muꞌ yụꞌtyeyacsis jiquej vóshiꞌvun jiquej tsun, mọꞌ jayuꞌtis Abraham, räjtumdye vóshiꞌtum, muꞌ Jenꞌ räjĉan raꞌ ñịbeꞌ ĉọcsi —meꞌ yiꞌ p̂eyacdyeꞌ Marías.

⁵⁶ María mendye jajbuꞌyeꞌ mọꞌ Isabel, chibin ịvaj jajbuꞌyeꞌ, chat qui q̂uinꞌdyemꞌ yạjquibanꞌ ĉụiꞌsitubanꞌ qui acaꞌ mọꞌ.

Naꞌedyeꞌ Juansiꞌ chojtacsity muntyiꞌ

⁵⁷ Ĉụiꞌdye chaꞌsheꞌ tupudyeꞌ mọꞌ Isabelsiꞌ chat qui mọꞌ basdyiꞌ, sonꞌ ạvaꞌ mọꞌ.

⁵⁸ Chätidyeꞌ mọꞌ judyeyaꞌ muꞌin c̣hẹiꞌyaꞌ bäꞌyity in seꞌveꞌ muꞌin in junꞌ chuc muꞌ Jenꞌ där ñịbeꞌjajitiꞌ, muꞌinmun chimeꞌ maꞌjotyebiꞌ ạvaꞌ in.

⁵⁹ Aty q̂uenꞌĉan mạyedyeꞌ tyiti ạvaꞌ mọꞌ chat qui jiꞌseiꞌtaquiꞌ. Dyijyi tsanꞌ in mạꞌjeꞌ tịjdyes yụꞌtyeyete in Zacarías, jenꞌcheꞌ raꞌ tsanꞌ tịꞌi.

⁶⁰ Mọꞌ qui namꞌ tseꞌ muꞌ yiꞌ: —Jam raꞌ meꞌ tịj muꞌ, Juan raꞌ tịj muꞌ.

⁶¹ Chätidyeꞌ mọꞌ vorjeꞌ in: —¿Junꞌ dash meꞌ tịj yụꞌtyeyetinte? Ĉaĉaij na jam yirity chätidyeꞌ miꞌin meꞌ tịj muꞌin —yi jeꞌ in.

⁶² Muꞌ qui jenꞌ muꞌ joijnoty jepte in, c̣họcoꞌ c̣họcoꞌ p̂eyepte in: "¿Tyi bu raꞌ tịj muꞌ ạvaꞌsim?"

⁶³ Muꞌ yiris cọdaqui sánaquis, chat qui muꞌ mọꞌcheꞌ sáñeꞌ: "Juan raꞌ tịj muꞌ." Muꞌĉantyiꞌ in räj äjjepte p̂eyacdyeꞌ in.

⁶⁴ Meꞌĉandye p̂eyaĉan muꞌ Zacarías timaꞌquebajte qui Jenꞌ.

⁶⁵ Muꞌin c̣hẹiꞌyaꞌ bäꞌyity in anic äjyi muꞌin in, paiꞌ vatyquej chị́qui in Judeaĉantyiꞌ in, yóĉandyemꞌ miquiꞌmuntyiꞌ mụcuꞌ u in, räj muꞌin chịj in.

⁶⁶ Muꞌin seꞌvaquity in yi in: "¿Junꞌ buty uts joijnoꞌ?" Anic jorojĉan Jenꞌsiꞌ ferdyeꞌ játŝutyiti.

Zacarías timaꞌquete Jenꞌ

⁶⁷ Jenꞌsiꞌ Ạꞌedyemꞌ játŝuti muꞌ Zacarías joijnoty jenꞌ muꞌ, chat qui muꞌ jasoꞌmiti p̂eyacdyeꞌ, yi muꞌ:

⁶⁸ —Timaꞌqueja muꞌ Jenꞌ, muꞌ ayoꞌ tsun Israeltyiꞌ vóshiꞌ tsun, ĉaĉaij na atsij muꞌ ñútyisinꞌ tsun judyeyaꞌ jiꞌc̣honsinꞌ tsun muntyiꞌ muꞌ.

⁶⁹ Muꞌ jutiyisinꞌ yirity fer buꞌyity Jiꞌc̣honsinꞌtyiꞌ, vóshiꞌ muꞌ Davidvuntyiꞌ úñity Jenꞌtyiꞌ jiquej muꞌ.

⁷⁰ Muꞌ jịꞌcätseꞌ mọꞌ p̂eyacdyeꞌ soꞌmacsis jiquej muꞌ Jenꞌ muꞌin urucyaty jasoꞌmitity p̂eyacdyeꞌ in,

⁷¹ yiꞌ junꞌ chuc raꞌ muꞌ jiꞌc̣honsinꞌ tsun muꞌinyaꞌ fáquisinꞌtyiꞌyaꞌ in paj qui jam muꞌin jiꞌpensinꞌ in.

⁷² Chimeꞌdye yi junꞌ chuc raꞌ ñịbeꞌ ĉúbusinꞌ vóshiꞌvun tsun, muꞌ raꞌ jam farajjeyaqui ĉụiꞌsiꞌ p̂eyacdyeꞌ muꞌ yụꞌtyeyacsis jiquej.

⁷³ Ĉụiꞌsiꞌcheꞌ tịj muꞌ yụꞌtyeyete p̂eyacdyeꞌ muꞌ Abraham vóshiꞌ tsun jiquej.

⁷⁴ Yi muꞌ junꞌ chuc raꞌ jiꞌc̣honsinꞌ fáquisinꞌtyiꞌyaꞌ in, paj qui jam noiꞌyedyeꞌtum cäc̣häꞌchuja muꞌ Jenꞌ.

⁷⁵ Chat qui raꞌ yejĉojaꞌ rụij bäꞌjaꞌ tsun muꞌsiꞌyaꞌ vej muꞌ, mijam raꞌ jụꞌñijaꞌ muꞌyaꞌ junꞌ quiꞌ chuc jadyic tsun.

⁷⁶ Chimeꞌdye mi, ạvaꞌ, muꞌin raꞌ jin in: "uts jasoꞌmitity p̂eyacdyeꞌ muꞌ mujuꞌchaty Jenꞌ", meꞌ raꞌ jin in. Atsijyaꞌ qui na ramꞌ muꞌ Ayoꞌ tsun, mi raꞌ tashi jäꞌmiij jämꞌ yụꞌtyeꞌ majmi muꞌdyes.

⁷⁷ Mi raꞌ voroꞌtacsi Jenꞌtyiꞌ muntyiꞌ muꞌ, chimidye raꞌ jéyacsi mi junꞌ chuc raꞌ Jenꞌ vayacjeyacsebi juchaj muꞌin paj qui jiꞌc̣honacsi.

⁷⁸ Muꞌ Jenꞌ tsuntyiꞌ fer mạꞌjisinꞌ tsun ñịbeꞌ ĉúsinꞌ, jutiyisinꞌ raꞌ Jiꞌc̣honsinꞌtyiꞌ. Muꞌ raꞌ mạijyi yódyemꞌ mạyedyeꞌchety tsun u,

⁷⁹ mạijchucsi raꞌ muꞌin tojmadyeꞌĉantyiꞌ in, muꞌin quijnaquity sänꞌdyeꞌ in, judyeyaꞌ raꞌ soꞌmisinꞌ c̣honꞌdyedyes tsun —yiꞌ mọꞌ p̂eyacdyeꞌ jasoꞌmitis Zacarías.

⁸⁰ Muꞌ ạvaꞌ muꞌ p̂añi, anic ferdyeꞌ cạiꞌ ĉojtyiꞌĉan muꞌ. Muꞌ bäꞌyi cäjyasĉan jac junꞌ quiꞌ chuc chaꞌsheꞌ tupudyeꞌ muꞌ, chat qui jiꞌcaviti Israeltyidyes vóshiꞌ in tiyacchuiꞌ voroꞌtacsi.