Judassi' 1 - Tsimane

Tashches voryedyeꞌ Judassiꞌ

¹ Yụ nash Judas úñity Jesucristoty muꞌ judyeyaꞌ anictyity vojity muꞌ Santiagoty. Yụ vorjeyac räj miꞌin fayactyiꞌ Jenꞌtyiꞌ miꞌin mạꞌjeyacdyety muꞌ Ạvatusinꞌtyiꞌ tsun, muꞌ Jesucristo ĉujcanactyiꞌ.

² Yụ cọdyete Jenꞌ paj qui muꞌ ñịbeꞌ ĉúnac judyeyaꞌ paj qui muꞌ soꞌminac maꞌjodyeꞌ ĉojtyiꞌĉandyes miꞌin, paj qui chimeꞌ dadamꞌ mujuꞌchaꞌ mạꞌjeyacsity bäꞌyi miꞌin.

Cäjsis jiꞌchäyitidyeꞌ cạiꞌtyiꞌ in

³ Chätidyeꞌ mạꞌjeyacdyety yụ, aty raꞌ sáñeꞌyaꞌ yụ miꞌindyes, fer mạꞌjeꞌ tsanꞌ yụ p̂eyeꞌ mọꞌ c̣honꞌdyedyes p̂eyacdyeꞌ, mọꞌ vaj meꞌ jiꞌc̣honsinꞌsiꞌ tsun. Meꞌ tsanꞌ meꞌ jemoñeꞌ qui namꞌ yocsiꞌ jiꞌchäyitidyeꞌ soꞌmeyac ọ́cheꞌ sánacdyeꞌcheꞌ. Mọꞌdyes raꞌ yụ jéyac: jiꞌfercatac Jenꞌdyes miꞌin, ferdyeꞌ yụꞌtacac miꞌin, chimeꞌ ñutsjevac mọꞌ jiꞌchäyitidyeꞌ paj qui jam cäj jiꞌshupqueꞌ yoctyiꞌ in, ĉaĉaij na mọꞌdye jiꞌchäyitidyeꞌ Jenꞌ soꞌmisinꞌ tsun anicjejaty muꞌ, mọꞌ jiꞌchäyitidyeꞌ jam raꞌ junꞌ cäj jiꞌshupcac.

⁴ Q̂uinꞌ pạrej muꞌyaꞌ in jeñej buꞌyi jụjjetety Jenꞌ in meꞌ buꞌyi yuꞌti in, itŝij chäteꞌ jiꞌsäsdyi tsunyaꞌ in. Muꞌin jam irijyity Jenꞌcheꞌ in, anic cäj jịꞌchiyacsi in, yi in tupuj ac̣hiꞌ bäꞌjaꞌ tsun ĉaĉaij na muꞌ Jenꞌ anic jämꞌyity, muꞌ jam dyijtubusinꞌ juchaj tsun, yi in. Muꞌindye mọmoꞌ vaꞌquecte in muꞌ Jesucristo, Ayoꞌ tsun, muꞌ yirity ayotuja tsun. Urucyaꞌdye jiquej mọꞌ p̂eyacsiꞌ sánacdyeꞌ muꞌin meꞌtyity in, yiꞌ vaꞌtacdyeꞌ raꞌ soꞌmac in muꞌin meꞌtyity in.

⁵ Meꞌ tsanꞌ aty chị́yetiñeꞌ miꞌin ọij p̂eyacdyeꞌ, yụ qui na ramꞌ quivij jiꞌdyijvebadyeyac junꞌ chuc muꞌ Jenꞌ jiquej jiꞌc̣honacsi Egiptoĉantyiꞌ muꞌin Israeltyiꞌ vóshiꞌ jiquej in. Meꞌ tsanꞌ meꞌ, jäquiꞌve qui namꞌ muꞌ jiꞌsänacsi muꞌin jam anicjetety in.

⁶ Chimeꞌdye muꞌin anjer in muꞌin jam jịꞌcätsety in mọꞌ yụꞌtacdyeꞌ soꞌmacsis Jenꞌ jiquej, judyeyaꞌ farajjeꞌ in mọꞌ bäꞌyedyeꞌ yóĉandyemꞌ Jenꞌ yụꞌtacsi jiquej u, mọꞌdyes qui muꞌ Jenꞌ vaꞌcacsequi vaꞌtacdyeꞌĉan, muꞌĉan yejĉoij c̣họꞌcoij tojmadyeꞌĉan in, ĉäꞌräij in junꞌsiꞌ chuc ayijyaꞌ tupudyeꞌ Jenꞌsiꞌ muꞌ, aty raꞌ jịꞌcäts yụꞌtacsiyaꞌ juchadyeꞌyaꞌ muꞌin.

⁷ Meꞌ muꞌin Sodomaĉantyiꞌ jiquej in judyeyaꞌ Gomorraĉantyiꞌ in, judyeyaꞌ chimeꞌ c̣hẹiꞌyaꞌ bäꞌyity in, räjdye meꞌ ac̣hiꞌ bäꞌyi in, yódyemꞌ muꞌin ac̣hiꞌyity anjer jiquej u in, meꞌdye muꞌin chimeꞌ ac̣hiꞌ bäꞌyi in, voꞌvoij mọmoꞌ bäꞌyi in, judyeyaꞌ vaj sonꞌ meꞌti in, meꞌ farajjepte in Jenꞌsiꞌ dyijyedyeꞌ muꞌindyes in, ĉụiꞌ ac̣hiꞌti in judyeyaꞌ ĉụiꞌ ac̣hiꞌtaqui aꞌ in. Mọꞌ jiꞌmeꞌtacdyeꞌ muꞌin vaꞌcac tŝijĉan in, jam raꞌ jụꞌñisĉan mạyedyeꞌ shuban muꞌĉantyiꞌ in. Mọꞌ vaꞌtacdyeꞌ muꞌin mọꞌ jiꞌdyijvisinꞌ paj qui jam meꞌ jämꞌtaĉaꞌ tsun.

⁸ Meꞌdye q̂uinꞌ chimeꞌ in muꞌin cäjsis jiꞌchäyitidyeꞌ tuiꞌtyiꞌ in yejĉoij muꞌin ĉụiꞌ ac̣hiꞌti in. Ĉụiꞌ aꞌc̣his dạqueꞌ in dyijyedyeꞌĉan muꞌin, mọꞌ mọmoꞌ cäc̣häꞌchuqui in, ĉụiꞌ ac̣hiꞌtaqui aꞌ muꞌin. Äcäijjete Jenꞌ in, mijam damꞌ chiquete in, judyeyaꞌ chimeꞌ fạraꞌnacsi in muꞌin fer buꞌyi cheꞌvety in.

⁹ Tashchety ayoꞌ anjertyiꞌ muꞌin tịj muꞌ Miguel, meꞌ tsanꞌ muꞌ mujuꞌchaꞌ ferdyeꞌtumtyiꞌ, jam qui namꞌ fạraꞌñeꞌ mọꞌ Sọyoꞌ yoquiꞌdyemꞌ chutiyaꞌ jiquej mọꞌtum u, jiꞌmeꞌtyiyiti in Moiséssiꞌ aꞌ muꞌ junꞌ chuc raꞌ muꞌ jiquej. Muꞌ anjer Miguel jam méquiꞌ jiꞌshupqueyeꞌ fạraꞌnacdyeꞌ, meꞌ mọmoꞌ jeꞌ: "Yụ raꞌ cọdyete Jenꞌ, muꞌ raꞌ fạraꞌjiĉuñin mi", jeꞌ.

¹⁰ Uts na q̂uinꞌ cäjsis jiꞌchäyitidyeꞌ tuiꞌtyiꞌ in, jụꞌñis chuc jam chiqueꞌsiꞌ in jedyeꞌ chuc mọꞌ cạiꞌ, mọꞌ cavin ñiñeꞌ in. Cätstyeꞌ jebacdyeꞌ in itŝiꞌ méquis dyijyedyeꞌ muꞌin, mọꞌ mọmoꞌ cäc̣häꞌchuiꞌ in, aꞌc̣his aꞌsiꞌ dyijyedyeꞌ muꞌin, mọꞌyaꞌ jiꞌmeꞌti in vaꞌtacdyeꞌĉan yuꞌti in.

¹¹ ¡Jábiyaꞌ raꞌ där ñịbeꞌ cạveꞌ in! Muꞌin jịjcatyeptety in Caínsiꞌ dyijyedyeꞌ jiquej muꞌ. Chimeꞌdye yódyemꞌ Balaamvun jiquej u, meꞌdye uts chimeꞌ q̂uinꞌ querec̣havedyeꞌyaꞌ cäjsis dyijyedyeꞌ jịꞌchiyacsi in. Yódyemꞌ muꞌ chimeꞌ Coré jiquej u, muꞌ vaꞌquecbite Jenꞌsiꞌ p̂eyacdyeꞌ muꞌ, meꞌdye muꞌin chimeꞌ q̂uinꞌtyity in vaꞌquecbite in Jenꞌsiꞌ dyijyedyeꞌ muꞌ, mọꞌ raꞌ jämꞌ jiꞌmeꞌtacsiꞌ sänꞌdyeꞌĉan.

¹² Anic där tsịcaꞌ in muꞌin penꞌdyetunacyaꞌ in judyeyaꞌ jibityinacyaꞌ in chimeꞌ Jenꞌdyes miꞌin, jeñej ọctumsiꞌ jedyeꞌ, meꞌ shupqui miꞌinyaꞌ muꞌin in. Meꞌ tsanꞌ Jenꞌdyes säcsi miꞌin, muꞌĉandye pạrejjiti in, vaj meij shejvintutidyeij in, ĉụiꞌ mọmoꞌ dyijtuti in, yoctyiꞌ qui namꞌ jam dyijtucsi in. Jeñej dyicbaꞌbadyeꞌ itŝis añej, vaꞌqueques tyiꞌmu, meꞌ buꞌyi muꞌin shupqui in. Chimeꞌdye jeñej jaiꞌsiꞌ cätidyeꞌ, mọꞌ c̣hoijtacsiꞌ, itŝis väsh, meꞌ buꞌyi muꞌin in jeñej buꞌyi anictyity säñity in.

¹³ Jeñej därtyiꞌ pufej marĉantyiꞌ, muꞌ jiꞌshupquety jeshocboꞌ aꞌc̣his, meꞌ buꞌyi in, ĉojtyiꞌĉansiꞌ muꞌin yedyej aꞌc̣his dyijyedyeꞌ jiꞌshupcaqui in, anic monꞌdyeꞌĉan bäꞌyi in, jeñej moñity ọ́rotaꞌ, meꞌ buꞌyi in. Muꞌin meꞌtyity in vaꞌtacdyeꞌĉandyety in, tyimꞌdyesĉan tojmas, muꞌĉan raꞌ vaꞌcac in uts cäjsis jiꞌchäyitidyeꞌ tuiꞌtyiꞌ in.

¹⁴ Enoc jiquej jiꞌjäcacsi muꞌin q̂uinꞌtyity in, muꞌ nash yävätidyeꞌyity vóshiꞌ Adántyiꞌ muꞌ jiquej, jasoꞌmiti p̂eyacdyeꞌ jiquej Jenꞌ. Jäꞌmiij jiꞌjäcacsebi vaꞌtacdyedyes raꞌ muꞌin ac̣hiꞌyitysiꞌ q̂uinꞌ in, yi muꞌ: "Atsij raꞌ Ayoꞌ tsun penꞌdyetute raꞌ in muꞌin anic shachtyity anjer in, junꞌtum raꞌ muꞌin mir, meꞌtum raꞌ in.

¹⁵ Muꞌ raꞌ jịꞌcäts yụꞌtacsi räj juchadyeꞌyaꞌ muntyiꞌ in judyeyaꞌ raꞌ vaꞌtacdyeꞌ soꞌmacsi muꞌin ac̣hiꞌyity in. Muꞌin juchajtumtyiꞌ in jiyi ac̣hiꞌyacñity in, judyeyaꞌ chimeꞌ aꞌc̣hisyaꞌ p̂eyacdyeꞌ ñiñetety Jenꞌ in, muꞌin raꞌ vaꞌtacdyeꞌ soꞌmac in", yi muꞌ jiquej.

¹⁶ Meꞌ muꞌin q̂uinꞌ ac̣hiꞌyity in, fuch mọmoꞌ bäꞌyi in, räjĉan p̂eyacsi yoctyiꞌ in ñinacsi in, mọꞌ mọmoꞌ muꞌin cäc̣häꞌchuiꞌ in ĉụiꞌsiꞌ dyijyedyeꞌ aꞌc̣his muꞌin. Anic där fibiꞌnacdyeꞌtum bäꞌyi in, judyeyaꞌ timaꞌcacdyeꞌtum jéyacsi in muntyiꞌ in, mọmꞌ dyijtuiꞌ in paj qui soꞌmacve in.

Jịꞌchicacdyeꞌ Judassiꞌ

¹⁷ Chätidyeꞌ, mạꞌjeyacdyety yụ, dyijtucsebibajshamꞌ p̂eyacdyeꞌ muꞌin jutactyis Jesucristoty jiquej in.

¹⁸ Muꞌin jínac jiquej in jadyiquis raꞌ tupudyeꞌ pạrej raꞌ muꞌyaꞌ dyisactyepte in p̂eyacdyeꞌ Jenꞌsiꞌ muꞌ, judyeyaꞌ raꞌ ĉụiꞌsiꞌ dyijyedyeꞌ aꞌc̣his cạqui in.

¹⁹ Muꞌindye raꞌ yi in paj qui yoc yoc dyijyi in muꞌin anicjetety Jenꞌ in. Meꞌ muꞌin cäjsis jiꞌchäyitidyeꞌ tuiꞌtyiꞌ in ĉụiꞌsiꞌ aꞌ jabächäti in, junꞌ chuc mạꞌjeꞌ bäꞌyi in meꞌ muꞌin in, jam qui namꞌ junꞌ meꞌchupte in Jenꞌsiꞌ Ạꞌedyeꞌ muꞌ.

²⁰ Miꞌin na chätidyeꞌ mạꞌjeyacdyety yụ, jam raꞌ meꞌ miꞌin, miꞌin aty anicjebitinte rụijsis p̂eyacdyeꞌ Jenꞌsiꞌ muꞌ, mọꞌdye ramꞌ yejĉoij cäc̣häꞌchubitinte paj qui fer buꞌyi bäꞌyi Jenꞌdyes miꞌin. Cọdyemac Jenꞌ, jätäjyiꞌ chuc raꞌ mọꞌ Ạꞌedyeꞌ muꞌ, meꞌ raꞌ cọdaqui miꞌin.

²¹ Yejĉojamꞌ bäꞌjamꞌ miꞌin paj qui miꞌincheꞌ buꞌyiꞌ Jenꞌsiꞌ mạꞌjitidyes muꞌ. Yejĉojamꞌ bisbimac mọꞌ tupudyeꞌ Jesucristos Ayos tsun, muꞌ där ñịbeꞌ ĉúsinꞌtyiꞌ tsun, judyeyaꞌ raꞌ yuꞌsinꞌ paj qui räjĉan Jenꞌyaꞌ bäꞌjaꞌ tsun.

²² Muꞌyaꞌ pạrej jụijyaꞌ in aty mạꞌjeꞌ yocve dyijyi in, cäjsis jiꞌchäyitidyeꞌ seꞌveꞌ in, jemoñeꞌ jämꞌyedyeꞌtum nọ́tacsi miꞌin muꞌin meꞌtyity in.

²³ Yoctyiꞌ na in jụj jaꞌyacsejamꞌ paj qui jam tŝijĉan vaꞌcac in, meꞌ raꞌ miꞌin ñutsjetacsi miꞌin tŝijyaꞌ. Muꞌyaꞌ pạrej aꞌc̣his dyijyedyeꞌ jabächäti in, jemoñeꞌ jämꞌyedyeꞌtum vortacsi jịꞌchiqueyacsi miꞌin, areꞌĉa meꞌĉandye säsnac miꞌin. Jeñej ọctumtyiꞌ quịꞌsiꞌ meꞌ buꞌyiꞌ shupquiꞌ aꞌc̣his dyijyedyeꞌ muꞌin, mijam raꞌ damꞌ cäc̣häꞌchucsebi miꞌin.

Jadyiquis timaꞌcacdyeꞌ Jenꞌsiꞌ

²⁴ Timaꞌqueja muꞌ Jenꞌ mạijquedyeꞌtumtyiꞌ. Muꞌsiꞌyaꞌ ferdyeꞌ muꞌ ñutsjinac miꞌin paj qui jam peñi juchajĉan miꞌin, judyeyaꞌ chimeꞌ paj qui jam jụꞌñiij miꞌin aty canacyaꞌ miꞌin ĉụiꞌsiꞌyaꞌ vej muꞌ, muꞌ mạijquedyeꞌtumtyiꞌ Jenꞌ, muꞌyaꞌ raꞌ där maꞌjoij miꞌin cätssisyaꞌ maꞌjodyeꞌ.

²⁵ Jesucristoscheꞌ tịj muꞌ Ayoꞌsiꞌ tsun timaꞌqueja muꞌ dyijyedyeꞌtumtyiꞌ Jenꞌ, muꞌ yiritytyity muꞌ Jiꞌc̣honsinꞌtyiꞌ tsun. Timaꞌqueja muꞌ, muꞌ räjdyes ayoꞌbuꞌyity, anic ferdyeꞌtumtyiꞌ muꞌ, judyeyaꞌ mumꞌ yirity mạijquedyeꞌtumtyiꞌ, anic mujuꞌchaꞌ buꞌyity muꞌ, tạꞌcatydye meꞌ, meꞌdye raꞌ yejĉoij räjĉan. ¡Paj jam jụꞌñisĉan mạyedyeꞌ mọtsiꞌ timaꞌcacdyeꞌ muꞌ! Paj meꞌ.