Juan 9 - Tsimane

Jesús jịꞌnaijbajte yirity muntyiꞌ tofety

¹ Jesús miꞌedyeꞌĉan yirity cạvete muntyiꞌ tofej naꞌity.

² Jịꞌchiyactyiꞌ muꞌ jéte in: —Jịꞌchiyacsity, ¿tyis buty juchaj muꞌ meꞌ naꞌi tofej uts muntyiꞌ? ¿Areꞌ jenꞌsiꞌ muꞌ areꞌ tseꞌsiꞌ muꞌ areꞌ ĉụiꞌsimꞌ? —jéte Jesús in.

³ Vorjeyacsi Jesús: —Jam juchadyes tofej naꞌi, mijam ĉụiꞌsidyes juchaj muꞌ, mijam jenꞌsiꞌ juchaj muꞌ. Muꞌ naꞌi meꞌ paj qui jịꞌcavacdyes muntyidyes in paj qui cạvepte in Jenꞌsiꞌ ferdyeꞌ muꞌ.

⁴ Mạij carijtaqui muntyiꞌ in, tsedyedyeꞌ qui namꞌ jam, mọꞌdyes tsun chimeꞌ jemoñeꞌ yejĉojaꞌ carijtaĉaꞌ Jenꞌdyes tsun, muꞌ jutintyiꞌ yụ, jambiꞌdyemꞌ yómoiꞌ jambiꞌdyemꞌ jiyiꞌ tupudyeꞌ.

⁵ Úcheꞌdyemꞌ jaccheꞌ q̂uinꞌ yụ, mạijchucsi yụ úcheꞌ bäꞌyity in —jéyacsi Jesús.

⁶ Ijaij jéyacsi muꞌ Jesús, chat qui muꞌ chupjeꞌ jac sónoꞌyaꞌ muꞌ, jämꞌtyeꞌ bọjcaꞌ chat qui tofetysiꞌ vej muꞌ tayayajjajibuti bọjcaꞌyaꞌ.

⁷ Chat qui Jesús jajiti: —Tạij ojñiꞌve Siloéve jịjcava mi, favajquica vej mi. (Ọij miquis ojñiꞌ Siloé yiꞌ caꞌ yiꞌ "Jutactyiꞌ".) Anicdye meꞌ muꞌ tofety favajquiĉan vej muꞌ. Caꞌñibun anic jämꞌ naijbun muꞌ.

⁸ Muꞌin na chị́yetety in judyeyaꞌ muꞌin cạvetety jiquej in muꞌ cọdaquity querec̣ha jiquej, yi jítidyeij in: —Jam adac utsdye mọmoꞌ jiquej cọdacvaꞌjoijtyiꞌ querec̣ha? —yi in.

⁹ Pạrej na yi voryi in: —Muꞌdye tyuꞌ u. Pạrej na yi in: —Jam u muꞌ, anic qui namꞌ c̣hac joꞌmeij —yi in. Muꞌdye tofety jiquej yi jéyacsi: —Yụ́dye nash.

¹⁰ Mọꞌdyes qui jéte in: —¿Junꞌ caꞌ jiquej naijbun mi?

¹¹ Vorjeyacsi muꞌ: —Muꞌ muntyiꞌ Jesús tịj muꞌ, muꞌ jämꞌtyeꞌ bọjcaꞌ mọꞌyaꞌdye tayayajjibun vej yụ, judyeyaꞌ jin yụ "Siloéve raꞌ favajquiqui vej mi", jin yụ. Meꞌdye muꞌve favajquiĉan vej yụ meꞌĉandye naijbun yụ —jéyacsi.

¹² Jéte in: —¿Junaꞌ muꞌ q̂uinꞌ u jiꞌnaijbuntyiꞌ? Vorjeyacsi: —Jam chịj yụ junaꞌ raꞌ muꞌ.

Fariseo cọdyetyete p̂eyacdyeꞌ in muꞌ tofety jiquej

^13-14 Jịꞌjutyitidyesĉan mạyedyeꞌ muꞌ Jesús jämꞌtyeꞌ bọjcaꞌ, mọꞌyaꞌ jịꞌnaijbajte tofety muntyiꞌ. Mọꞌdyes qui muꞌ muntyiꞌ cạte in fariseoyaꞌ.

¹⁵ Cọdyetyete p̂eyacdyeꞌ in: —¿Junꞌ caꞌ naijbun jiquej mi? —jéte in. Vorjeyacsi muꞌ: —Muꞌ nash tayayajjibun vej yụ bọjcaꞌyaꞌ, chat qui yụ meꞌsiꞌ favajquiĉan vej yụ, judyeyaꞌ qui naijbun yụ —jéyacsi.

¹⁶ Pạrej muꞌin fariseo yi in: —Muꞌ muntyiꞌ meꞌjintyiꞌ mi jam nash muꞌ Jenꞌyaty atsij, meꞌdyes qui jam ạ̈räjjeꞌ mọꞌ mạyedyeꞌ jịꞌjutyitidyes —yi in. Pạrej na yi muꞌyaꞌ in: —Juchajtumtyiꞌ jụijyaꞌ muꞌ muntyiꞌ, junꞌdyemꞌ joꞌmes meꞌchuiꞌ ferdyeꞌ —yi in. Mijam méquiꞌ cäts dyijyi muꞌcheꞌ in.

¹⁷ Fariseo in cuvij jéte in muꞌ muntyiꞌ: —Muꞌ na jiꞌnaijbuntyiꞌ mi ¿tyi buty muꞌ ĉọ́te mi, jätäjyi mi u? —jéte in. Vorjeyacsi muꞌ tofety jiquej: —Muꞌ nash jasoꞌmitity p̂eyacdyeꞌ Jenꞌ —jéyacsi.

¹⁸ Muꞌin na judíoty ayoꞌ muꞌin mijam méquiꞌ muꞌin anicyi in muꞌ tofety jiquej, aty muꞌ naijbudaque. Jenꞌ qui fayepte in judyeyaꞌ tseꞌ muꞌ,

¹⁹ jébite jenꞌ in: —¿Uts caꞌ ạvaꞌ miꞌin? ¿Muꞌ caꞌ tofej naꞌity jiquej? ¿Junꞌ qui caꞌ naijbun? —jéyacsi in.

²⁰ Yi jenꞌ muꞌ judyeyaꞌ tseꞌ muꞌ vorjeyacsi in: —Rụijdye meꞌ uts ạvaꞌ tsun tofej naꞌi jiquej muꞌ,

²¹ mijam qui namꞌ chịj tsun junꞌ raꞌ jiquej naijbudaque, mijam chịj chimeꞌ tsun tyi raꞌ jajiꞌnaijbun. Muꞌdye raꞌ ạvaꞌ jíbutiĉaꞌ miꞌin, muꞌ nash chịj, aty p̂urety atsvun, muꞌ tupuj jínac junꞌ chuc muꞌ naijbun —jéyacsi in.

²² Meꞌ yi jenꞌ muꞌ judyeyaꞌ tseꞌ muꞌ, ĉaĉaij na quijnacsi muꞌin judíoty ayoꞌ in. Muꞌin na aty yụꞌtyeꞌ p̂eyacdyeꞌ in, yiꞌ: tyi chuc anicjetety in muꞌ Jesús, yity in muꞌ nash Jiꞌc̣honacsity Muntyiꞌ, muꞌin raꞌ vaꞌcac in paj qui jam penꞌdyetucsi vajmuꞌyaijĉan in.

²³ Mọꞌdyes qui yi jenꞌ muꞌ: "Ạvaꞌ raꞌ jíbutiĉaꞌ miꞌin, aty p̂urety muꞌ", jéyacsi.

²⁴ Judíoty ayoꞌ muꞌin quivij fayebajte in muꞌ muntyiꞌ. Jéte in: —Jam raꞌ ticamem junꞌ chuc jiquej mi, jítiĉamꞌ Jenꞌsiꞌyaꞌ vej muꞌ junꞌ chuc muꞌ jiꞌchäĉun mi, chịj tsun uts muntyiꞌ juchajtumtyiꞌ —jéte in.

²⁵ Muꞌ qui vorjeyacsi: —Yụ jam chị́yete vatyquej raꞌ meꞌ juchajtumtyiꞌ, vatyquej raꞌ jam. Mọꞌ mọmoꞌ chịj yụ, tofejdyemꞌ jiquej yụ, q̂uinꞌ chat aty naijbun yụ —jéyacsi muꞌ tofety jiquej.

²⁶ Cuvij jéte in: —¿Junꞌjibun caꞌ? ¿Junꞌ caꞌ jiꞌnaijbun? —jéte in.

²⁷ Vorjeyacsi muꞌ: —Aty inoj jéyac, miꞌin na jam anicjitiĉaꞌ miꞌin. ¿Junꞌ qui bu raꞌ daiꞌ quiꞌ jévaꞌqueyac? ¿Mạꞌjeꞌ adac miꞌinmun cäc̣häꞌchutinte chimeꞌ? —jéyacsi muꞌ muntyiꞌ.

²⁸ Chat qui fạraꞌñete in, jéte in: —Mi adac ĉaĉaij cäc̣häꞌchutety muꞌ, tsun na Moisésvun cäc̣häꞌchute.

²⁹ Chịj tsun muꞌdye Jenꞌ jap̂iyiti muꞌ Moisés, uts Jesús jam méquiꞌ chịj tsun junaty raꞌ muꞌ atsij —jéte in.

³⁰ Vorjeyacsi muꞌ muntyiꞌ: —Yụ anic där äjjebiyac p̂eyacdyeꞌ miꞌin. Muꞌ jiꞌnaijbuntyiꞌ yụ, muꞌ nash rụijtyity, miꞌin qui namꞌ jam chịj junaty chuc muꞌ.

³¹ Chị́jaꞌ tsun muꞌ Jenꞌ jam jụjtacsebi cọdacdyeꞌ muꞌin juchajtumtyis in. Muꞌin na irijyity muꞌcheꞌ in judyeyaꞌ chiqueptety in p̂eyacdyeꞌ muꞌ, muꞌinsiꞌ tupuj jụjtacsebi cọdacdyeꞌ muꞌin.

³² Tsun jam jämꞌdyeyaꞌ seꞌvaĉaꞌ joꞌmes p̂eyacdyeꞌ yirity naꞌi muntyiꞌ tofety, judyeyaꞌ naijbudaque.

³³ Jam Jenꞌyaty jụijyaꞌ atsij uts muntyiꞌ, junꞌdyemꞌ raꞌ meꞌ jiꞌcaviyisinꞌ ferdyeꞌ —jéyacsi.

³⁴ Vorjete in: —Mi nash tạꞌcaty juchajtumtyiꞌ naꞌity, meꞌ tsanꞌ meꞌ mi qui namꞌ mujuꞌchaꞌ yuꞌti mạꞌjeꞌ jiꞌchäyitiĉaꞌ tsun miꞌin —jéte in. Mọꞌdyes qui vaꞌquecte in paj qui jam penꞌdyetucsive vajmuꞌyaijĉan in.

Tofety buꞌyity Jenꞌdyes in

³⁵ Jesús chị́qui aty vaꞌquecte in muꞌ tofety muntyiꞌ jiquej, muꞌ qui dạcte jéte: —¿Anicjete buty mi muꞌ Anictyity Muntyiꞌ? —jéte.

³⁶ Voryi muꞌ muntyiꞌ: —Jítiꞌ tyi buty muꞌ paj qui yụ anicjete —jéte.

³⁷ Vorjajiti Jesús: —A nash cavitiꞌ jiquej mi, yụ nashuꞌ, yódyetytum q̂uinꞌ p̂eyaqui mi —jéte.

³⁸ Chat qui muꞌ muntyiꞌ dyụtsyi Jesúsyaꞌ jéte: —Anicyi yụ mícheꞌ —jéte.

³⁹ Chat qui yi Jesús: —Atsij yụ úcheꞌ jaccheꞌ jijtuij yụ paj qui yụ jorojĉanjeyacsebi yụ dyijyedyeꞌ muntyis muꞌin. Chimeꞌdye raꞌ tyi chuc chäyiti tofej ĉojtyiꞌĉan muꞌ, yụ raꞌ jịꞌnaijte ĉojtyiꞌĉan muꞌ. Muꞌ na jam chäyitity tofety ĉojtyiꞌĉan muꞌ, yụ raꞌ jịꞌcaveyete tofedyeꞌ muꞌ —yi muꞌ Jesús.

⁴⁰ Muꞌĉantyiꞌ fariseo in seꞌvepte p̂eyacdyeꞌ in, chat qui jéte in: —¿Tofej buty ĉútiĉaꞌ tsun miꞌin? —jéte in.

⁴¹ Muꞌ Jesús vorjeyacsi: —Tofej buꞌyi ĉúti jụijyaꞌ miꞌin, a vuty itŝiꞌ juchaj ĉúbunac Jenꞌ u miꞌin. Jam na meꞌ miꞌin, yi mọmoꞌ miꞌin "Jam méquiꞌ tofej buꞌyi tsun", yi miꞌin, mọꞌdyes qui tacaꞌ mọꞌyaꞌ juchaj miꞌin Jenꞌsiꞌyaꞌ vej muꞌ —jéyacsi Jesús.