Juan 7 - Tsimane

Jesústyiꞌ vojity muꞌ jam anicjete in

¹ Aty meꞌsiꞌ muꞌ Jesús paiꞌ nati, socorꞌjeꞌ Galileaĉansiꞌ bäꞌyedyeꞌ in. Judeaĉan qui namꞌ jam jịjcaij ĉaĉaij na muꞌĉantyiꞌ judíoty ayoꞌ muꞌin mạꞌjeꞌ ijate in.

² Aty c̣hẹiꞌyaꞌ mọꞌ feshta tyitiꞌ p̂isijsisĉansiꞌ acaꞌ.

³ Jesústyiꞌ vojity muꞌ yi, jéte in: —Jam raꞌ úyaꞌ mọmoꞌ mi, damꞌdye jämꞌ Judeaĉan jịjcavaꞌ, muꞌĉan jịꞌcaveyacseva ferdyeꞌ mi muꞌin cäc̣häꞌchuntyiꞌ in, paj qui muꞌin chimeꞌ cavibun ferdyeꞌ in.

⁴ Jeshaꞌ muꞌ mạꞌjeꞌ chị́yactyiꞌ muntyiꞌyaꞌ, muꞌ raꞌ jam jumĉan yụꞌtyeꞌ ferdyeꞌ muꞌ. Damꞌdye jämꞌ jịꞌcaveyacsi mi muntyisyaꞌ vej in paj qui räj cavin in —jéte in vojity muꞌ.

⁵ Ĉụiꞌtyiꞌ qui namꞌ vojity muꞌ jam anicjete in.

⁶ Vorjeyacsi Jesús: —Jambiꞌ ayij tupudyeꞌ yụ paj qui jiꞌcaviti muntyiꞌyaꞌ yụ. Miꞌin na jam meꞌ, junꞌsiꞌ chuc ĉụiꞌ mọmoꞌ tupudyeꞌ ayij miꞌin, tupuj muꞌĉan jịjcaij miꞌin.

⁷ Muꞌin jacchety muntyiꞌ in jam junꞌ fáquinac in, mijam jedyeꞌ jiꞌmeꞌtyiyinac in, yụ na fáquin yụ in ĉaĉaij na yụ jorojĉanjeyacsebi aꞌc̣his dyijyedyeꞌ muꞌin.

⁸ Tạij miꞌin, cạvecvac mọꞌ feshta, yụ raꞌ jam muꞌĉan jịjcaij, jam raꞌ yụ cạvequeꞌ, ĉaĉaij na jambiꞌ ayij tupudyeꞌ yụ —jéyacsi Jesús.

⁹ Taĉan Galileaĉan muꞌ Jesús.

Jesús feshtaĉan p̂isijsisĉan acaꞌ

¹⁰ Aty sactiyaꞌ in vojity muꞌ Jesústyiꞌ, chat qui muꞌ Jesús muꞌĉan jịjcaij Jerusalénĉan, feshta cạvequeꞌ. Camin venjoij muꞌĉan, mijam chịj muntyiꞌ in.

¹¹ Muꞌĉantyiꞌ judíoty ayoꞌ in quevte tsanꞌ in muꞌ Jesús, yi in: —¿Janaꞌ buty muꞌ Jesús?

¹² Daiꞌ muꞌin muntyiꞌ in p̂eijvaꞌte in, jítidyeij in: "Anic rụijtyity muꞌ", yi in. Pạrej na yi in: "Jam nash muꞌ rụijtyity, cäj jịꞌchiyacsi muntyiꞌ in", yi in.

¹³ Chabaꞌ chabaꞌ p̂iyiti in ĉaĉaij na quijnacsi in muꞌin judíoty ayoꞌ in.

¹⁴ Aty vạjpedyeꞌ mạyedyeꞌ feshtas tyitiꞌ mọꞌ, chat q̂uinꞌdyemꞌ sacti muꞌ Jesús, muꞌĉan jịjcaij siti Jenꞌsiꞌĉan acaꞌ muꞌ, tiyacchuti jịꞌchiyacsi muntyiꞌ in.

¹⁵ Muꞌin judíoty ayoꞌ in anic äjjepte muꞌin in jiꞌchäyitidyeꞌ muꞌ. Yi in: —¿Junꞌ buty meꞌ muꞌ, meꞌ tsanꞌ jam jịꞌchiyac yụꞌtacdyeꞌ, uts na meꞌ räj chị́yeꞌ muꞌ? —yi in.

¹⁶ Vorjeyacsi Jesús: —Jam nash ọij ĉụiꞌsiꞌ jiꞌchäyitidyeꞌ yụ, muꞌ Jenꞌ jutintyiꞌ yụ, muꞌsiꞌ nash jiꞌchäyitidyeꞌ muꞌ.

¹⁷ Tyi chuc mạꞌjeꞌ cạpte in Jenꞌsiꞌ dyijyedyeꞌ muꞌ, muꞌin raꞌ chäyibun yụ in jiꞌchäyitidyeꞌ yụ, mọꞌ anic Jenꞌsiꞌ muꞌ, jam ĉụiꞌsiꞌ mọꞌ jiꞌchäyitidyeꞌ yụ.

¹⁸ Jeshaꞌ muꞌyaꞌ pạrej ĉụiꞌsiꞌ mọmoꞌ jiꞌchäyitidyeꞌ jịꞌchiyacsi in, mọꞌ mọmoꞌ mạꞌjeꞌ in paj qui timaꞌcacsi muntyiꞌ in. Muꞌ na mạꞌjeꞌtyiꞌ paj qui mọꞌ timaꞌcacdyeꞌ muꞌdyes tyi chuc jajutitity, muꞌ nash rụijtyity, rụijsis mọmoꞌ p̂eyacdyeꞌ p̂eyeꞌ, meꞌ nash yi yụ paj qui timaꞌcacdyes Jenꞌdyes muꞌ.

¹⁹ Meꞌ tsanꞌ muꞌ Moisés yuꞌtyiyinac mọꞌ yụꞌtacdyeꞌ Jenꞌsiꞌ muꞌ, uts na jam damꞌ chiquetiñeꞌ mọꞌ, dadamꞌ qui mạꞌjetiñeꞌ ijatiĉaꞌ yụ miꞌin —jéyacsi muꞌ Jesús judíoty ayoꞌ muꞌin.

²⁰ Vorjete in: —Anic sọyoꞌtumtyiꞌ mi, ¿tyi ĉaĉaij mạꞌjeꞌ ijan u? —jéte in.

²¹ Vorjeyacsi Jesús: —Carijtaquiyaꞌ yụ jiquej jịꞌjutyitidyesĉan mạyedyeꞌ, jiꞌchäĉajteyaꞌ yụ muꞌ muntyiꞌ, mọꞌ jiꞌfajquiyitiĉaꞌ yụ miꞌin.

²² Meꞌdye miꞌin chimeꞌ carijtaqui miꞌin jịꞌjutyitidyesĉan mạyedyeꞌ. Pạrej mọꞌdye mạyedyeꞌ seiꞌtaqui ạvaꞌsiꞌ aꞌ miꞌin, aty mọꞌ tupudyeꞌ seiꞌtacdyesiꞌ venchuiꞌ, ĉaĉaij na meꞌ yiꞌ yụꞌtacdyeꞌ sáñeꞌsiꞌ muꞌ Moisés jiquej. (Jam Moisés yụꞌtyeꞌ mọꞌ seiꞌtacdyeꞌ, tạꞌcas mọmoꞌ meꞌ yi in vóshiꞌvun miꞌin.)

²³ Meꞌdye miꞌin, meꞌ tsanꞌ jịꞌjutyitidyes mạyedyeꞌ, seiꞌtaquimꞌ ạvaꞌsiꞌ aꞌ miꞌin, paj qui meꞌ chiquetiñeꞌ miꞌin mọꞌ seiꞌtacdyes yụꞌtacdyeꞌ. ¿Junꞌ dash mọꞌ jiꞌfajquiyitiĉaꞌ yụ miꞌin, mọꞌ jiꞌchäcacdyeꞌ muntyiꞌ jịꞌjutyitidyesĉan mạyedyeꞌ?

²⁴ Jam raꞌ cavintum ñäñibutiĉaꞌ yụs carijtacdyeꞌ miꞌin, jemoñeꞌ rụij dyijtubutiĉaꞌ miꞌin, meꞌ raꞌ chịj miꞌin anic rụij dyijyi yụ —jéyacsi Jesús.

Muntyiꞌ yi in: ¿Jesús buty Jiꞌc̣honacsity Muntyiꞌ?

²⁵ Pạrej muꞌin Jerusalénĉantyiꞌ yi jítidyeij in: —¿Jam adac uts Jesús mạꞌjeꞌ ujatety in muꞌin ayoꞌ in?

²⁶ Mush tyuꞌ útsi muntyisyaꞌ vej muꞌin jịꞌchiyacsevaꞌjoij, mijam qui namꞌ méquiꞌ jätäjjete in. Areꞌ muꞌin yụꞌtactyiꞌ in anicyeban muꞌcheꞌ chimeꞌ in muꞌ Jiꞌc̣honacsity Muntyiꞌ —yi in.

²⁷ Yoctyiꞌ na yi in: —Atsijyaꞌ raꞌ muꞌ Jiꞌc̣honacsity Muntyiꞌ jam raꞌ tyi chịj in junatyiꞌ chuc muꞌ, uts na Jesús chị́yeja junatyiꞌ chuc muꞌ.

²⁸ Jesús muꞌĉan jịꞌchiyacsi Jenꞌsiꞌĉan acaꞌ muꞌ. Fer p̂eyaqui muꞌĉan jéyacsi: —¿Jaij meꞌ chäyitiĉaꞌ yụ miꞌin, judyeyaꞌ chịj miꞌin junaty chuc atsij yụ? Jam ĉụiꞌsiꞌyaꞌ dyijyedyeꞌ atsij úcheꞌ yụ, yụ nash jutactyiꞌ muꞌ rụijtyitytyiꞌ, yódyetydyemꞌ miꞌin jam junꞌ chị́yetintety u.

²⁹ Yụ qui namꞌ chị́yete ĉaĉaij na muꞌyaty jiquej atsij yụ, muꞌ jutin yụ —jéyacsi Jesús.

³⁰ Dyijyi tsanꞌ in mạꞌjeꞌ jiꞌĉärꞌte in, jam qui namꞌ junꞌte in paj qui tapjete in ĉaĉaij na jambiꞌ ayij tupudyeꞌ muꞌ.

³¹ Muntyiꞌ qui namꞌ daiꞌ anicjete in, yi in: —Muꞌ Jiꞌc̣honacsity Muntyiꞌ, mọꞌ jorojĉanjisinꞌ ĉaĉaij na anic daiꞌ quiꞌ ferdyeꞌ jiꞌcaviyisinꞌ.

Fariseo tsanꞌ in mạꞌjeꞌ ĉärꞌte in muꞌ Jesús

³² Muꞌin fariseo in seꞌvacsebi muntyis p̂eyacdyeꞌ muꞌin, yi in muꞌ Jesús muꞌ Jiꞌc̣honacsity Muntyiꞌ. Mọꞌdyes qui muꞌin fariseo in judyeyaꞌ muꞌin tashchety cudyitity Jenꞌcheꞌ in jutacsi pạrej in muꞌin yụꞌtactyiꞌ ĉọjcaiꞌtyiꞌ in Jenꞌsiꞌ acaꞌ muꞌ paj qui muꞌin tapjete in.

³³ Jesús p̂eyaqui yi: —Damꞌdyety raꞌ penꞌdyetuyac miꞌin, chat qui raꞌ jọban yụ, yụ raꞌ caꞌñibun muꞌyaꞌ jutintyiꞌyaꞌ yụ.

³⁴ Meꞌ raꞌ tsanꞌ quivjudyiĉaꞌ yụ miꞌin, mijam raꞌ junꞌ daĉudyiĉaꞌ yụ miꞌin, ĉaĉaij na jam raꞌ junꞌ venjoij miꞌin, yóĉandyemꞌ raꞌ yụ u —jéyacsi Jesús.

³⁵ Muꞌin judíoty ayoꞌ yi jítidyeij in: —¿Junaꞌ qui buty raꞌ jịjcaij uts Jesús, yoj yi na: "Miꞌin raꞌ jam junꞌ daĉudyiĉaꞌ yụ miꞌin?" yi. Areꞌ raꞌ muꞌve jịjcaij, yoctyisĉan jac in paj qui muꞌve jajbuꞌyacsi muꞌĉantyiꞌ judío in, muꞌĉan qui jịꞌchiyacsi jam judío in. Areꞌ meꞌ dyijyi yocve raꞌ jịjcaij,

³⁶ ĉaĉaij na yi muꞌ jísinꞌ: "Miꞌin raꞌ tsanꞌ quivdyiĉaꞌ yụ miꞌin, jam qui na ramꞌ junꞌ daĉudyiĉaꞌ yụ miꞌin, mijam raꞌ méquiꞌ chaꞌshitiĉaꞌ yụ miꞌin, yócheꞌdyemꞌ raꞌ bäꞌbancheꞌ u yụ", yi muꞌ. ¿Jätäjyiꞌ ọij p̂eyacdyeꞌ umꞌ? —yi jítidyeij in.

Tsạꞌchucsis ojñiꞌ

³⁷ Jadyiquis mạyedyeꞌ feshtas mọꞌ mọjoꞌchaꞌ därsiꞌ. Mọꞌdye mạyedyeꞌ sacyi muꞌ Jesús fer p̂eyaqui jéyacsi: —Tyi chuc jajri jụijyaꞌ, paj yụ́yaꞌ atsij, paj tyeij mọꞌ soꞌmetes raꞌ yụ.

³⁸ Mọꞌdye yiꞌ sánacdyeꞌ: "Tyi chuc anicjintyiꞌ yụ, maj raꞌ shupquiꞌ tsạꞌchucsis ojñimꞌ ĉojtyiꞌĉansiꞌ muꞌ."

³⁹ Mọꞌ cạiꞌ tsạꞌchucsis ojñiꞌ, muꞌ p̂eijbite Jenꞌsiꞌ Ạꞌedyeꞌ muꞌ, soꞌmac raꞌ in muꞌin anicjetety in. Jambiꞌdyemꞌ soꞌmac in Jenꞌsiꞌ Ạꞌedyeꞌ muꞌ, ĉaĉaij na muꞌ Jesús jambiꞌ mạyedyeꞌcheꞌ jịjcaban.

Jam cäts dyijyi Jesúscheꞌ in

⁴⁰ Pạrej na muntyiꞌ in aty seꞌvepte p̂eyacdyeꞌ in, yi in: —Anicdye meꞌ uts Jesús jasoꞌmitity p̂eyacdyeꞌ Jenꞌ, muꞌ bisjaty tsun jiquej —yi in.

⁴¹ Pạrej na muꞌyaꞌ yi in: —Muꞌdye u Jiꞌc̣honacsity Muntyiꞌ —yi in. Muꞌyaꞌ na chimeꞌ yi in: —Jam u muꞌ, muꞌ Jiꞌc̣honacsity Muntyiꞌ jam raꞌ junꞌ muꞌ Galileaĉantyiꞌ muntyiꞌ.

⁴² Meꞌ yiꞌ sánacdyeꞌ, muꞌ ca raꞌ Jiꞌc̣honacsity Muntyiꞌ vóshiꞌ ca raꞌ muꞌ Davidvuntyiꞌ jiquej, Belénĉan ca raꞌ naꞌi, yóĉandyemꞌ Davidvun bäꞌyi jiquej u —yi pạrej in.

⁴³ Jam vaj cäts dyijyedyeꞌ muꞌin.

⁴⁴ Pạrej mạꞌjeꞌ jiꞌĉärꞌte tsanꞌ in, jam qui namꞌ junꞌjete in.

Ayoꞌ in jam anicjete Jesús in

⁴⁵ Muꞌin yụꞌtactyiꞌ ĉọjcaiꞌtyiꞌ in Jenꞌsiꞌ acaꞌ muꞌ jutactyiꞌ ayoty muꞌin caꞌñibun in, muꞌinyaꞌ jijtuban in fariseoyaꞌ in judyeyaꞌ muꞌin tashchety cudyitity Jenꞌcheꞌ in. Muꞌin jéyacsi in: —¿Junꞌ caꞌ jam tutinte muꞌ Jesús? —jéyacsi in.

⁴⁶ Muꞌin yụꞌtactyiꞌ ĉọjcaptety Jenꞌsiꞌ acaꞌ in yi vorjeyacsi in: —Jam tyi chaꞌshepte p̂eyacdyeꞌ Jesússiꞌ muꞌ —yi jéyacsi in.

⁴⁷ Vorjeyacsi fariseo in: —¿Jiꞌcäc̣häꞌyiti adac miꞌinmun chimeꞌ muꞌyaꞌ?

⁴⁸ Jeshaꞌ, mijam yirity tashcheꞌ buꞌyity tsundyes anicjete muꞌ, mijam fariseo anicjete chimeꞌ in.

⁴⁹ Uts anicjetety Jesús q̂uinꞌ in muꞌin jam chị́yeptety Jenꞌsiꞌ sánacdyeꞌ in, muꞌin raꞌ vaꞌtacdyety Jenꞌyaꞌ in —yi fariseo in.

⁵⁰ Muꞌyaꞌ chimeꞌ muꞌ Nicodemo, muꞌ tsedyedyeꞌ ĉọctety Jesús jiquej, fariseodye muꞌ chimeꞌ. Nicodemo yi jéyacsi fariseo in:

⁵¹ —Yiꞌ yụꞌtacdyeꞌ tsunsiꞌ, tsun jam cavin soꞌmeja vaꞌtacdyeꞌ yirity muntyiꞌ jiꞌmeꞌtetyyaꞌ ĉụiꞌ in, jemoñeꞌ tashcheꞌ chum jämꞌ cọdyetyeja p̂eyacdyeꞌ muꞌ, jätäjyi raꞌ muꞌ, judyeyaꞌ jämꞌ chị́yac tashcheꞌ, areꞌ mọꞌyaꞌ juchaj muꞌ, areꞌ itŝiꞌ muꞌ —jéyacsi Nicodemo.

⁵² Vorjete fariseo in: —¿Mi adac chimeꞌ muꞌĉantyiꞌ Galileaĉantyiꞌ muntyiꞌ? Jämꞌtuvaꞌ p̂eyevaꞌ sánacdyeꞌ, meꞌ raꞌ chat chịj mi jam nash junꞌ muꞌĉantyiꞌ Galileaĉantyiꞌ in jasoꞌmitity p̂eyacdyeꞌ Jenꞌ in —jéte in.

⁵³ Aty meꞌsiꞌ in chat qui jọban acaꞌyaꞌ jịjcaban in.