Juan 6 - Tsimane

Jesús jiꞌsäcsacsi ĉanamꞌ mir muntyiꞌ in

¹ Aty meꞌsiꞌ muꞌ Jesús nopej Mar Galilea jịjcaij, mọꞌdye mọꞌ tsiqueꞌ Tiberias jeꞌ in.

² Anic daiꞌ muntyiꞌ jịjcate in ĉaĉaij na cạvepte in ferdyeꞌ muꞌ jịꞌcaveyacsis, junꞌ chuc jiꞌchäcacseban areꞌreijtyiꞌ muntyiꞌ in.

³ Chat qui muꞌ Jesús bojvete yirity mụcuꞌ muꞌcheꞌ p̂utsquenꞌyi bäꞌyi jịꞌchiyactyiꞌtum muꞌ.

⁴ Aty c̣hẹiꞌyaꞌ tyitiꞌ judíos feshta muꞌin, mọꞌ Jiꞌc̣honacdyedyes.

⁵ Cạvi muꞌ Jesús, daiꞌ muntyiꞌ in cạvacsi jịjcatety in. Jesús yi jéte Felipe: —¿Junaꞌ buty tupuj yaꞌiyeĉaꞌ säcsedyeꞌ utsdyes muntyidyes in? —yi jéte.

⁶ P̂eyacdyeꞌyamꞌ muꞌ Jesús jajiꞌĉujti muꞌ Felipe jätäjyi chuc raꞌ muꞌ, muꞌ na Jesús sadam chịj junꞌ chuc raꞌ muꞌ.

⁷ Felipe vorjete Jesús: —Junꞌ a vuꞌ, meꞌ raꞌ tsanꞌ muꞌyaꞌ päräꞌ quiꞌ cien querec̣ha plata jụijyaꞌ, jam raꞌ junꞌ tupuj damamaj jebeiꞌ in, junꞌdyemꞌ ramꞌ tupujjoiꞌ utsdyes in säcsedyeꞌ in.

⁸ Muꞌ na Andrés chimeꞌdye jịꞌchiyactyiꞌ muꞌ, Simón Pedrotyiꞌ vojity muꞌ, jéte Jesús:

⁹ —Mush úyaꞌ yirity nanaty pantumtyiꞌ —jéte—, muꞌyaꞌ ĉanamꞌ pan muꞌ judyeyaꞌ päräꞌ tạbedyemꞌ, junꞌdyemꞌ raꞌ mọꞌ tupujjoiꞌ utsdyes muntyidyes in —yi jéte.

¹⁰ Jesús vorjeyacsi jịꞌchiyactyiꞌ muꞌ: —Jiꞌbäꞌyacsejamꞌ uts muntyiꞌ mụijyaꞌ in —jéyacsi. Meꞌdye bäꞌyi biruruccheꞌ in, anic tyesyaꞌ biruruc in. Anic daiꞌ muntyiꞌ in, ĉanamꞌ mir rụiꞌcuꞌ in, yedyej mọmoꞌ sonꞌ tsicsi in, jam p̂enmun tsicsi in.

¹¹ Chat qui muꞌ Jesús jäcte muꞌ pan, yoshoropaij jéte Jenꞌ chat qui muꞌ soꞌmacsi jịꞌchiyactyiꞌ muꞌ, muꞌin qui jiꞌcheteyacsi muntyiꞌ in. Tạbedyeꞌ qui jäqueꞌ, quivij yoshoropaij jéte Jenꞌ chat qui q̂uinꞌdyemꞌ soꞌmacsi muntyiꞌ in, junꞌ quiꞌ chuc muꞌin mạꞌjeꞌ in.

¹² Räj c̣hụ́qui in chat qui muꞌ Jesús jéyacsi jịꞌchiyactyiꞌ muꞌ: —Tsimjadac qui jiꞌshucdyidyeꞌ muntyis muꞌin paj qui jam jiꞌmonac säcsedyeꞌ —jéyacsi.

¹³ Meꞌdye tsimjanꞌ muꞌin in jiꞌshucdyidyeꞌ muꞌ ĉanamꞌ pan jiquej in, yiriꞌtac päräꞌ jiyiꞌ ụ́buꞌ shubanꞌ.

¹⁴ Muntyiꞌ in cạvepte därsiꞌ ferdyeꞌ in Jesússiꞌ muꞌ, chat qui yi in: —Anicdye uts jasoꞌmitity p̂eyacdyeꞌ Jenꞌ, muꞌ p̂eijtety sánacdyeꞌ yiꞌ úcheꞌ ca raꞌ jijtuij jaccheꞌ —yi muntyiꞌ in.

¹⁵ Muꞌ qui namꞌ Jesús aty chịj muꞌin muntyiꞌ in mạꞌjeꞌ fercheꞌ yụꞌte in paj qui muꞌ ayoꞌbuꞌyi, meꞌdyes qui muꞌ yacchucsi, yirity quimꞌ muꞌ mụcuꞌcheꞌ jịjcaij.

Jesús fajcheꞌ tyeij ojñiꞌ miꞌi

¹⁶ Aty jäꞌdyäijdyety tsun muꞌin jịꞌchiyactyiꞌ Jesústyiꞌ muꞌ tsiqueꞌve jịjcaij in.

¹⁷ Jambiꞌdyemꞌ venchuban muꞌ Jesús, bijti covambacheꞌ in roiꞌjeꞌ tsiqueꞌĉan in, Capernaumve jịjcaij in, nopej tsiqueꞌ, judyeꞌdye mochti in tomajyejoij in.

¹⁸ Fujuꞌjuyeti qui tyiꞌmu fer, vatyquej vacamꞌquiꞌ ojñiꞌ.

¹⁹ Yejĉoij joiꞌdyi in, mochyejoij in, jedac aty ĉanamꞌ quirometro tyivaꞌti in. Ĉụiꞌdye vatyquej jịꞌĉojtuyeĉunꞌte in muꞌ Jesús, fajcheꞌ tyeij ojñiꞌ miꞌi, jeñej onojnodyeꞌ ĉọiꞌ in, tyumꞌ tyeij ĉojtyiꞌ muꞌin anic noiꞌyacñi in.

²⁰ Jesús jéyacsi: —Jam raꞌ noiꞌyi miꞌin, yụ nash —jéyacsi muꞌ.

²¹ Q̂uinꞌdyemꞌ chị́yete in chat qui tiĉunꞌte in chat qui jiꞌbijte in covambacheꞌ. Yiristum vatyquej nopej sojquiti in.

Muꞌin jiꞌsäcsacsity jiquej muꞌin quevjajte in

²² Aty nojno mạyedyeꞌ muꞌin jiꞌyajcatity nopej in quevjajte tsanꞌ in muꞌ Jesús. Chịj muꞌin in yedyety mọmoꞌ muꞌin in jịꞌchiyactyiꞌ muꞌ yoquiꞌdyemꞌ nobiyaꞌ in, mijam yoctyiꞌ muꞌyaꞌ covamba, jeñety tacvedye ĉọ́te in.

²³ Ĉụiꞌdye Tiberiasĉantyiꞌ muntyiꞌ meij jijtuij in, sojquiti muꞌyaꞌ in yóyaꞌdyemꞌ jiꞌsäcsacsiyaꞌ jiquej Jesús u, yóyaꞌdyemꞌ yoshoropaij jéte Jenꞌ u muꞌ.

²⁴ Mijam méquiꞌ muꞌyaꞌ dạquicte in, mijam jịꞌchiyactyiꞌ chimeꞌ muꞌ, mọꞌdyes qui bijbun quivij in covambacheꞌ muꞌin, chimuꞌve jịjcaban in Capernaumve, muꞌve qui quevicte in muꞌ Jesús.

Jesús jeñej buꞌyi tsạꞌchucsis säcsedyeꞌ

²⁵ Muꞌin quevictety in nopej venjoij in muꞌve q̂uinꞌdyemꞌ chaꞌshete in. Jéte in: —Jịꞌchiyacsity ¿junꞌdyeyaꞌ caꞌ venchuij úyaꞌ mi? —jéte in.

²⁶ Vorjeyacsi Jesús: —Yụ jéyac, meꞌ tsanꞌ quivdyiĉaꞌ yụ miꞌin, jam mọꞌ dyijtubutiĉaꞌ miꞌin mọꞌ ferdyeꞌ yụ cavibutiĉas miꞌin, jedyeꞌ chuc cạiꞌ mọꞌ, mọꞌdyes jam mạꞌjeꞌ anicjitiĉaꞌ yụ miꞌin, junꞌ chuc yụ jutactyiꞌ Jenꞌtyiꞌ muꞌ. Mọmꞌ dyijtutiñeꞌ miꞌin junꞌ chuc jiꞌsäcseyac jiquej junꞌ quiꞌ chuc c̣hụ́qui miꞌin.

²⁷ Jam raꞌ säcsedyemꞌ dyijtutiñeꞌ miꞌin, mọꞌ cavin räꞌis. Dyijtuvac mọꞌ räjĉan tsạꞌchucsis säcsedyeꞌ, mọꞌ yụꞌtacsis paj qui Jenꞌyadyety muntyiꞌ in. Yụ Anictyity Muntyiꞌ yụ meꞌ soꞌmeyac yụ. Muꞌ Jenꞌ Ạvatuntyiꞌ yụ, muꞌ meꞌ ferdyeꞌ soꞌmin yụ, mọꞌ jorojĉan jéyacsiꞌ yụ anictyity Jenꞌtyiꞌ muꞌ.

²⁸ Muꞌin muntyiꞌ jéte in: —¿Jedyeꞌ qui bu raꞌ q̂uinꞌ dyijtuiꞌ carijtaqui tsun paj qui muꞌ Jenꞌ maꞌjotyin tsun?

²⁹ Vorjeyacsi Jesús: —Mọꞌ nash mạꞌjeꞌ Jenꞌ paj qui anicjitiĉaꞌ yụ miꞌin, yụ jutactyiꞌ muꞌ —jéyacsi Jesús.

³⁰ Vorjete in: —Jiꞌcaviyitiĉamꞌ ferdyeꞌ mi paj qui tsun anicjebiyac p̂eyacdyeꞌ mi. Jiꞌcaviyitiĉamꞌ

³¹ yojdyemꞌ Moisés jiquej u, cäjyasĉan jac jiquej vóshiꞌvun tsun soꞌmacsi in mạyedyeꞌches säcsedyeꞌ, yóyidyemꞌ sánacdyeꞌ o: "Muꞌ soꞌmacsi mạyedyeꞌches säcsedyeꞌ jiquej", yiꞌ sánacdyeꞌ —jéte muntyiꞌ in.

³² Vorjeyacsi Jesús: —Yụ jéyac, jam nash Moisésvun soꞌmacsi mạyedyeꞌches säcsedyeꞌ vóshiꞌvundyes jiquej miꞌin, Jenꞌ soꞌmacsi. Muꞌdye Jenꞌ yụ́tyiꞌ mumꞌ tupuj soꞌminac miꞌin mọꞌ anicsis mạyedyeꞌches säcsedyeꞌ.

³³ Mọꞌ anicsis mạyedyeꞌches säcsedyeꞌ yụꞌtyes muꞌ Jenꞌ, mọꞌ tsạꞌchucsis säcsedyeꞌ jacchetydyes muntyiꞌ in —jéyacsi Jesús.

³⁴ Yi cọdyete in muꞌ Jesús: —Jịꞌchiyacsity, räjĉan soꞌmitiĉamꞌ ọij säcsedyeꞌ —jéte in.

³⁵ Jesús jéyacsi: —Yụ́dye u jeñej buꞌyi tsạꞌchucsis säcsedyeꞌ. Tyi chuc cäc̣häꞌchuntyiꞌ yụ in judyeyaꞌ anicjin yụ in, muꞌin raꞌ jam chiqueꞌ dáquis ĉojtyiꞌĉan muꞌin, mijam raꞌ jajri in.

³⁶ A nash jéyac yụ, meꞌ tsanꞌ cavitiĉaꞌ yụ miꞌin, uts na jam anicjitiĉaꞌ yụ miꞌin.

³⁷ Räj muꞌin soꞌmintyiꞌ yụ muꞌ Jenꞌ paj qui yụ́tyiꞌ in, muꞌindye raꞌ cäc̣häꞌchun yụ in, yụ raꞌ jam junꞌ fitopjeĉunacsi.

³⁸ Yụ mạyedyeꞌcheꞌ jijtuijtyiꞌ, jam qui na ramꞌ ĉụiꞌsiꞌ dyijyedyeꞌ meꞌchuiꞌ yụ, Jenꞌsimꞌ dyijyedyeꞌ meꞌchupte yụ, muꞌ jutintyiꞌ yụ.

³⁹ Muꞌsiꞌ nash dyijyedyeꞌ muꞌ jutintyis yụ, muꞌ mạꞌjeꞌ paj jam yirity jiꞌmonte yụ muꞌ soꞌmintyiꞌ yụ paj qui yụ́tyiꞌ in, räj raꞌ yụ vañinjeyacseban jadyiquisĉan tupudyeꞌ.

⁴⁰ Meꞌ mạꞌjeꞌ Jenꞌ yụ, paj qui muꞌin cavintyiꞌ yụ in judyeyaꞌ anicjintyiꞌ yụ in, yụ Ạvaꞌ muꞌ, muꞌin raꞌ Jenꞌyaꞌ bäꞌyi in, yụ́dye raꞌ vañinjeyacseban aty jadyiquisĉan raꞌ tupudyeꞌ —jéyacsi muꞌ Jesús.

⁴¹ Aty mọꞌ seꞌvepteyaꞌ p̂eyacdyeꞌ in muꞌin judío in tiyacchuiꞌ ñiñete in muꞌ Jesús, anicdye yi jiꞌchäyitidyeꞌĉan: "Yụ u jeñej buꞌyi mạyedyeꞌches säcsedyeꞌ", jéyacsi.

⁴² Yi jítidyeij in: —¿Jam adac uts Jesús Joséty ạvaꞌ muꞌ? Tsun chị́yepja jenꞌ muꞌ judyeyaꞌ tseꞌ muꞌ. ¿Junꞌ qui buty ĉaĉaij q̂uinꞌ yi: "Yụ mạyedyeꞌcheꞌ jijtuijtyiꞌ"? —jítidyeij in.

⁴³ Jesús jéyacsi: —Jam raꞌ p̂iijdyiĉaꞌ yụ miꞌin.

⁴⁴ Mijam raꞌ jụꞌñity cäc̣häꞌchun yụ in, jam meꞌ soꞌmacsi Jenꞌ dyijyedyeꞌ jụijyaꞌ, muꞌ jutintyiꞌ yụ. Jụꞌñity chuc cäc̣häꞌchun yụ in, muꞌin raꞌ vañinjeyacseban yụ jadyiquisĉan tupudyeꞌ.

⁴⁵ Sánacdyeꞌ muꞌinsiꞌ jasoꞌmititysiꞌ p̂eyacdyeꞌ Jenꞌ jiquej in yiꞌ mọꞌ: "Räj raꞌ muntyiꞌ jịꞌchiyac Jenꞌyaꞌ in", yiꞌ. Anicdye meꞌ q̂uinꞌ, tyi chuc seꞌvepte in Jenꞌsiꞌ jiꞌchäyitidyeꞌ muꞌ, judyeyaꞌ cäc̣häꞌchupte in, chimeꞌdye raꞌ yụ cäc̣häꞌchun yụ in.

⁴⁶ Yụ jam yi pạrej cạvete Jenꞌ in, yụmꞌ yirity cạvete Jenꞌ, meꞌdyes yụ jéyac ĉaĉaij na yụ muꞌyaty atsij jiquej.

⁴⁷ Yụ jéyac, tyi chuc anicjintyiꞌ yụ in, muꞌin raꞌ Jenꞌyaꞌ bäꞌyi in.

⁴⁸ Yụ nash jeñej buꞌyi tsạꞌchucsis mọꞌ säcsedyeꞌ.

⁴⁹ Vóshiꞌvun jiquej miꞌin, cäjyasĉan jac bäꞌyi in jiquej, meꞌ tsanꞌ mọꞌ jebeiꞌ in mạyedyeꞌches säcsedyeꞌ maná, säñi qui namꞌ in.

⁵⁰ Tyi chuc jebeiꞌtyiꞌ mọꞌ mạyedyeꞌches säcsedyeꞌ yódyesdyemꞌ p̂eyeꞌsiꞌ yụ u, muꞌin raꞌ jam junꞌ säñi in.

⁵¹ Yụ́dye nash mọmoꞌ jeñej buꞌyi mạyedyeꞌches säcsedyeꞌ mọꞌ tsạꞌchucsis, tyi chuc mọꞌ jebeiꞌtyiꞌ, Jenꞌyaꞌ raꞌ bäꞌyi in. Mọꞌ säcsedyeꞌ soꞌmacsis raꞌ yụ, mọꞌ jeñej ĉụiꞌsiꞌ shush yụ, meꞌ raꞌ yụꞌtyeꞌ aꞌ yụ muntyidyes in paj qui mọꞌ tsạꞌchucsiꞌ úchety muntyiꞌ in —jéyacsi Jesús.

⁵² Muꞌin judío in, aty seꞌvepteyaꞌ p̂eyacdyeꞌ in fạ́coij tyeij in, yi jítidyeij in: —¿Junꞌdyemꞌ uts yuꞌtyiyisinꞌ ĉụiꞌsiꞌ shush muꞌ, paj qui tsun jebepja? —jítidyeij in.

⁵³ Jesús cuvij jéyacsi: —Yụ jéyac, jam jibibutiĉaꞌ yụs shush jụijyaꞌ miꞌin, yụ Anictyitysiꞌ Muntyiꞌ yụ, judyeyaꞌ chäsh chimeꞌ jam tyébutiĉaꞌ jụijyaꞌ miꞌin, jam raꞌ junꞌ Jenꞌyaꞌ bäꞌyi miꞌin.

⁵⁴ Tyi chuc jibibuntyiꞌ shush yụ in, judyeyaꞌ chimeꞌ chäsh tyébun yụ in, muꞌin raꞌ Jenꞌyaꞌ bäꞌyi in, yụ raꞌ vañinjeyacseban muꞌin in aty jadyiquisĉan tupudyeꞌ jụijyaꞌ.

⁵⁵ Ọij shush yụ jeñej anicsis säcsedyeꞌ meꞌ buꞌyiꞌ, judyeyaꞌ chäsh yụ jeñej anicsis tyédyeꞌ.

⁵⁶ Tyi chuc jibibuntyiꞌ shush yụ in, judyeyaꞌ tyébuntyiꞌ chimeꞌ chäsh yụ in, muꞌin raꞌ yiriꞌyaꞌ bäꞌyi yụ́tum in, judyeyaꞌ yụ raꞌ yiriꞌyaꞌ bäꞌyi muꞌintum chimeꞌ in.

⁵⁷ Muꞌ tsạꞌtyiꞌ Jenꞌ yụ, muꞌ jutintyiꞌ yụ, muꞌ tsạꞌchun yụ, meꞌdye raꞌ yụ chimeꞌ, tyi chuc jibibuntyiꞌ shush yụ in, muꞌin raꞌ tsạꞌchucsi yụ.

⁵⁸ Mọꞌdyes yi yụ, yụ nash mạyedyeꞌches säcsedyeꞌ, mọꞌ jam jeñej mạyedyeꞌches säcsedyeꞌ jebeiꞌsiꞌ in vóshiꞌvun miꞌin jiquej. Meꞌ tsanꞌ jebeiꞌ in, säñi qui namꞌ in. Tyi chuc jebeiꞌtyiꞌ jụijyaꞌ in ọij säcsedyeꞌ soꞌmacsis raꞌ yụ muꞌin raꞌ jam meꞌ in, Jenꞌyaꞌ raꞌ bäꞌyi in —jéyacsi Jesús.

⁵⁹ Jesús jịꞌchiyacsi ọij p̂eyacdyeꞌ, muꞌĉan vajmuꞌyaijĉan judío in Capernaumĉan.

Jesús yirity meꞌchuiꞌtyiꞌ tsạꞌchucsis p̂eyacdyeꞌ

⁶⁰ Daiꞌ cäc̣häꞌchutety Jesús in seꞌvepte in ọij jiꞌchäyitidyeꞌ muꞌ, chat qui yi in: —Ọij jiꞌchäyitidyeꞌ muꞌ anic jiyiꞌ carijsis muꞌ, jam mạꞌjeꞌ junꞌ jụjjepja tsun —yi in.

⁶¹ Muꞌ na ĉụiꞌ chịj ĉojtyiꞌĉan muꞌ junꞌ chuc ñiñete in, judyeyaꞌ p̂eijte in, mọꞌdyes qui muꞌ jéyacsi: —Anicdye meꞌ miꞌin, ¿ọij jiꞌchäyitidyeꞌ yụ jiꞌfajquiyitiĉaꞌ yụ miꞌin?

⁶² Cavibutiĉaꞌdye raꞌ ferdyeꞌ yụs miꞌin, mạyedyeꞌcheꞌ raꞌ jịjcaban yụ, Anictyity Muntyiꞌ yụ, yócheꞌdyemꞌ bäꞌyi jiquej u yụ, chimuꞌcheꞌdye raꞌ jịjcaban yụ cuvij.

⁶³ Jenꞌsiꞌ Ạꞌedyeꞌ muꞌ mọꞌ mọmoꞌ yiris tsạꞌchucsis, muntyis na ạꞌedyeꞌ muꞌin, jam jedyedyes, mọꞌ jam tupuj tsạꞌchucsiꞌ muntyiꞌ in. Ọij p̂eyacdyeꞌ jéyacsiꞌ yụ miꞌin, mọꞌ tupuj tsạꞌchucsiꞌ judyeyaꞌ soꞌmacsiꞌ Jenꞌsiꞌ Ạꞌedyeꞌ muꞌ.

⁶⁴ Muꞌyaꞌ qui namꞌ miꞌin jam méquiꞌ anicjibutiĉaꞌ yụs p̂eyacdyeꞌ miꞌin —jéyacsi Jesús. Muꞌ qui namꞌ Jesús tashcheꞌdye räj chị́yacsi tyijtyi chuc raꞌ jam anicjete in, judyeyaꞌ chimeꞌ chị́yete tyi chuc raꞌ jajiꞌmincatity.

⁶⁵ Yi jéyacsi Jesús: —Muꞌin jam anicjibuntyiꞌ p̂eyacdyeꞌ yụ in, muꞌin mọmoꞌ jiꞌjäcacsi yụ jéyac yụ jiquej: "Mijam raꞌ jụꞌñity cäc̣häꞌchun yụ in jam meꞌ soꞌmacsi Jenꞌ dyijyedyeꞌ jụijyaꞌ" —jéyacsi muꞌ Jesús.

⁶⁶ Aty meꞌsiꞌ muꞌin cäc̣häꞌchutety in pạrej yacchute in, aty jam mạꞌjeꞌ cäc̣häꞌchute in, mọꞌ jiꞌchäyitidyeꞌ muꞌ jịꞌfajqueyete in.

⁶⁷ Chat qui muꞌ Jesús jéyacsi muꞌ jịꞌchiyactyiꞌ muꞌ muꞌin yiriꞌtac päräꞌ jiyity in, jéyacsi: —¿Miꞌinmun bu raꞌ chimeꞌ farajjitiĉaꞌ yụ miꞌin? —jéyacsi.

⁶⁸ Vorjete Simón Pedro: —Jam junꞌ, mi nash tsuntyiꞌ Ayoꞌ, mijam raꞌ tyi jịjcate yoctyiꞌ tsun, ĉaĉaij na itŝij yirity yoctyiꞌ meꞌ meꞌchuiꞌ p̂eyacdyeꞌ paj qui Jenꞌyaꞌ bäꞌyi tsun.

⁶⁹ Tsun aty anicjeyac mi judyeyaꞌ chị́yeyac mi nash Jutactyiꞌ Jenꞌtyiꞌ muꞌ —yi Pedro jéte.

⁷⁰ Vorjeyacsi Jesús: —Yụ nash tsimꞌtyeyac miꞌin yiriꞌtac päräꞌ jiyity miꞌin. Meꞌ tsanꞌ meꞌ yirity qui namꞌ miꞌinĉan q̂uinꞌ muꞌ meꞌchuiꞌtyiꞌ Sọyoꞌ —jéyacsi.

⁷¹ Judas jiꞌjäcte muꞌ Jesús, Simón Iscariotety ạvaꞌ muꞌ. Meꞌ tsanꞌ ĉụiꞌtyiꞌ jịꞌchiyactyiꞌ muꞌ, muꞌ qui ramꞌ jajiꞌmincati.