Juan 15 - Tsimane

Jesús cätidyeꞌ buꞌyi

¹ Jesús jéyacsi: —Yụ nash anicsis cätidyeꞌ buꞌyity, meꞌ buꞌyi yụ, muꞌ na Jenꞌ yụ quịꞌtyiꞌ mọꞌ cätidyeꞌ.

² Muꞌ räj tochjibun dacaꞌ yụ jụꞌñis chuc jam väshiꞌsiꞌ, mọꞌ na väshiꞌsiꞌ dacaꞌ jụijyaꞌ yụ, memꞌ shovꞌjibun yụ, meꞌ buꞌyiꞌ jämꞌ yụꞌtyeꞌ paj qui dadamꞌ mọjoꞌchaꞌ väshiꞌ.

³ Miꞌin aty c̣hiconꞌtactyiꞌ ĉojtyiꞌ ĉaĉaij na ọij p̂eyacdyeꞌ jịꞌchiqueyeyacsiꞌ yụ miꞌin, mọꞌ aty yuꞌtyinac c̣hiconꞌtactyiꞌ miꞌin.

⁴ Yejĉoij raꞌ yụ́tum miꞌin yojdyemꞌ yụ u yejĉoij miꞌintum. Jeshaꞌ yiris dacaꞌ chenꞌ jụijyaꞌ cätidyes mọꞌ, jam junꞌ ĉụiꞌ väshiꞌ mọꞌ. Meꞌdyes miꞌin chimeꞌ jam yejĉoij yụ́tum jụijyaꞌ miꞌin, jam raꞌ junꞌ tupuj Jenꞌdyes bäꞌyi miꞌin.

⁵ Yụ jeñej buꞌyi cätidyeꞌ, miꞌin na jeñej buꞌyi dacaꞌ mọꞌ. Tyi chuc yejĉoij yụ́tum in judyeyaꞌ yụ yejĉoij muꞌintum in, muꞌin raꞌ fer Jenꞌdyes bäꞌyi in, yódyemꞌ foꞌ väshiꞌsiꞌ cätidyeꞌ o, meꞌ buꞌyi raꞌ shupquiꞌ in. Jam yejĉoij yụ́tum jụijyaꞌ miꞌin, a vuty jam junꞌ Jenꞌdyes bäꞌyi u miꞌin, a vuty jam jeñej buꞌyiꞌ väshis cätidyeꞌ o.

⁶ Tyi chuc jam yejĉoij yụ́tum jụijyaꞌ in, muꞌin raꞌ vaꞌcac in, yojdyemꞌ tochtacsiꞌ dacaꞌ o meꞌjeyac raꞌ in. Aty chañej jụijyaꞌ chat qui dụriꞌjeyac judyeyaꞌ jiꞌcoꞌshayac.

⁷ Miꞌin na yejĉoij yụ́tum jụijyaꞌ miꞌin, judyeyaꞌ yejĉoij chäquibutiĉaꞌ p̂eyacdyeꞌ yụs jụijyaꞌ miꞌin, meꞌ raꞌ chat muꞌ Jenꞌ jụjbunac cọdacdyeꞌ miꞌin, jedyeꞌ chuc cọdyetinte jụijyaꞌ miꞌin muꞌ Jenꞌ.

⁸ Yejĉoij yụ́tyidyes Jenꞌ bäꞌyi jụijyaꞌ miꞌin, mọꞌyaꞌ raꞌ jorojĉanjebitinte fer buꞌyedyeꞌ Jenꞌsiꞌ muꞌ, judyeyaꞌ raꞌ anic cäc̣häꞌchutiĉaty shupqui miꞌin.

⁹ Yojdyemꞌ Jenꞌ yụ mạꞌjin u yụ, meꞌdye yụ chimeꞌ mạꞌjeyac miꞌin, yejĉojamꞌ yụ́tum miꞌin paj qui miꞌincheꞌ buꞌyiꞌ mạꞌjitidyes yụ.

¹⁰ Yejĉoij chäquibutiĉaꞌ yụꞌtacdyeꞌ yụs jụijyaꞌ miꞌin chat qui raꞌ yejĉoiꞌ miꞌincheꞌ buꞌyiꞌ mọꞌ mạꞌjitidyes yụ, yojdyemꞌ yụ u chiquebite yụ yụꞌtacdyeꞌ Jenꞌsiꞌ yụ, meꞌ qui yụ́cheꞌ buꞌyiꞌ mạꞌjitidyes muꞌ.

¹¹ Yụ jéyac ọij paj qui maꞌjodyeꞌtum bäꞌyi miꞌin, yojdyemꞌ yụ u maꞌjodyeꞌtum bäꞌyi yụ, meꞌdye raꞌ miꞌin chimeꞌ, cätssistum maꞌjodyeꞌ bäꞌyi miꞌin.

¹² Ọij p̂eyacdyeꞌ yụ yiꞌ: Vaj meij mạꞌjitiĉamꞌ, yojdyemꞌ yụ mạꞌjeyac u, meꞌdye raꞌ miꞌin chimeꞌ mạꞌjeyacsi.

¹³ Mọꞌ mọjoꞌchaꞌ därsiꞌ mạꞌjitidyes, mọꞌ jeñej buꞌyiꞌ yirity muntyiꞌ säñi penꞌdyedyes muꞌ.

¹⁴ Chäquitiĉaꞌ jụijyaꞌ yụ miꞌin, meꞌ raꞌ anictyity penꞌdyeꞌ yụ́tyiꞌ shupqui miꞌin.

¹⁵ Meꞌquiꞌdye jéyac: úñity, jéyac; jeshaꞌ muꞌ úñity jam méquiꞌ chị́yepte dyijyedyeꞌ ayoꞌsiꞌ muꞌ. Yụ aty räj jiꞌjiyeyac mọꞌ p̂eyacdyeꞌ soꞌminsiꞌ Jenꞌ yụ, mọꞌdyes aty jam: úñity, jéyac yụ miꞌin: penꞌdyeꞌ, jéyac q̂uinꞌ yụ.

¹⁶ Miꞌin na jam tsimꞌtiĉaꞌ yụ miꞌin, yoj na yụ tsimꞌtyeyac miꞌin judyeyaꞌ yụꞌtyeyac chimeꞌ paj qui Jenꞌdyes bäꞌyi miꞌin, paj qui jam fibiꞌ bäꞌyi miꞌin. Meꞌ jụijyaꞌ miꞌin Jenꞌ raꞌ jụjjibunac cọdacdyeꞌ, jedyeꞌ chuc cọdyetyetinte jụijyaꞌ miꞌin yụ́scheꞌ tịj.

¹⁷ Q̂uinꞌ jéyac miꞌin: vaj meij mạꞌjitiĉamꞌ —jéyacsi Jesús.

Cäc̣häꞌchutety Jesús in muꞌinmun fạ́cac in jacchetyyaꞌ muntyiꞌ in

¹⁸ Jesús jéyacsi: —Jacchety muntyiꞌ fáquinac jụijyaꞌ in, chị́jamꞌ muꞌindye nash tashi fáquin yụ in.

¹⁹ Miꞌin jụijyaꞌ muꞌinyadyety jacchetydyety miꞌin, a vuty mạꞌjinac muntyiꞌ u in. Miꞌin na jam meꞌ, yụ́tyiꞌ tsimꞌtac miꞌin muꞌinĉantyiꞌ miꞌin paj qui cäc̣häꞌchutiĉaꞌ yụ miꞌin, mọꞌdyes muꞌin fáquinac in ĉaĉaij na aty jam muꞌinyadyety miꞌin.

²⁰ Dyijtubutiĉamꞌ p̂eyacdyeꞌ yụ seꞌvibutiĉas miꞌin, yiꞌ: "Muꞌ úñity jam mujuꞌchaꞌ buꞌyi ayoꞌyaꞌ muꞌ, uyaꞌyaꞌ muꞌ úñity", yi yụ jiquej. Jeshaꞌ muꞌin jịꞌñibeꞌcan yụ in Ayoꞌ miꞌin, chimeꞌjinacdye raꞌ miꞌin jịꞌñibeꞌcanac in. Muꞌyayaj qui namꞌ seꞌvibun p̂eyacdyeꞌ yụ in, muꞌyayajdye raꞌ chimeꞌ seꞌvibunac p̂eyacdyeꞌ miꞌin.

²¹ Meꞌ raꞌ muꞌin in jịꞌñibeꞌcanac in, ĉaĉaij na yụ́yaty miꞌin. Meꞌ raꞌ muꞌin in ĉaĉaij na jam chị́yete Jenꞌ in, muꞌ jutintyiꞌ yụ.

²² Jam atsijyaꞌ jụijyaꞌ yụ judyeyaꞌ chimeꞌ jam jéyacsi p̂eyacdyeꞌ jụijyaꞌ yụ, a vuty itŝiꞌ juchaj ĉọcsebi Jenꞌ u. Muꞌin na aty seꞌvibun tsanꞌ p̂eyacdyeꞌ yụ in, aty jam tupuj yi in "Itŝiꞌ juchaj tsun."

²³ Tyi chuc fáquintyiꞌ yụ in, chimeꞌdye Jenꞌ yụ fáquibun yụ in.

²⁴ Därsiꞌ ferdyeꞌ yụ jịꞌcaveyacsi yụ, mijam raꞌ yoctyiꞌ meꞌ in. Jam meꞌ jụijyaꞌ yụ, a vuty muꞌ Jenꞌ u jam ĉọcsebi juchaj muꞌin. Muꞌin na meꞌ tsanꞌ cavibun ferdyeꞌ yụ in, memꞌ fáquin mọmoꞌ yụ in, judyeyaꞌ Jenꞌ yụ fáquibun chimeꞌ yụ in.

²⁵ Meꞌ raꞌ mọꞌ jiyiꞌ ĉaĉaij na jemoñeꞌ cạ̈tsiꞌ mọꞌ p̂eyacdyeꞌ yụꞌtacdyeꞌĉansiꞌ cạiꞌsiꞌ muꞌin in, yiꞌ: "Fibiꞌ mọmoꞌ fáquin yụ in."

²⁶ Ayij raꞌ mọꞌ Nọ́taquis, mọꞌ Jenꞌsiꞌ Ạꞌedyeꞌ muꞌ, mọꞌ raꞌ juteyebadyeyac yụ, Jenꞌyas raꞌ mọꞌ ayij, mọꞌ raꞌ rụijsis p̂eyacdyeꞌ tuiꞌ. Mọꞌ raꞌ jiꞌjäquin yụ junꞌ chuc yụ.

²⁷ Chimeꞌdye raꞌ miꞌin jiꞌjäcdyiĉaꞌ yụ miꞌin junꞌ chuc yụ, ĉaĉaij na tạꞌcatydye penꞌdyeꞌ yụ miꞌin —jéyacsi Jesús jịꞌchiyactyiꞌ muꞌ.