Juan 14 - Tsimane

Jesús majmi buꞌyi jịjcaiꞌsiꞌ Jenꞌyaꞌ

¹ Jéyacsi Jesús: —Jam raꞌ cajotyiti ĉojtyiꞌĉan miꞌin, ĉútiĉamꞌ Jenꞌcheꞌ miꞌin, yụ́cheꞌ chimeꞌ ĉútiĉamꞌ.

² Jenꞌsiꞌcheꞌ bäꞌyedyeꞌ yụ mọꞌyaꞌ daiꞌ vavdyeꞌ in. Muꞌcheꞌ raꞌ jäꞌmij jịjcaij yụ, yụ raꞌ yụꞌtyeyeyac vavdyes miꞌin. Jam meꞌ buꞌyiꞌ jụijyaꞌ, a vuty jam meꞌ jéyac u.

³ Muꞌcheꞌ raꞌ yụ jämꞌ yụꞌtyeyeyac vavdyes miꞌin, a raꞌ meꞌsiꞌ jụijyaꞌ, chat qui raꞌ caꞌñibun yụ jäshadyeyac, muꞌcheꞌ raꞌ penꞌdyetuyac miꞌin, yócheꞌdyemꞌ yụ u.

⁴ Miꞌin aty chị́yetiñeꞌ majmi mọꞌcheꞌ jịjcaiꞌsiꞌ yócheꞌdyemꞌ raꞌ yụ u —jéyacsi Jesús.

⁵ Yi muꞌ Tomás jéte Jesús: —Jịꞌchiyacsity, mijam tsun méquiꞌ chịj junaꞌ chuc raꞌ mi, dadamꞌ tsun jam junꞌ mọꞌ chị́yeꞌ majmi —jéte Tomás.

⁶ Jesús vorjete: —Yụ́dye nash majmi buꞌyi, yụ́dye rụijsis buꞌyi p̂eyacdyeꞌ judyeyaꞌ tsạꞌchucsity chimeꞌ yụ, paj qui Jenꞌyadyety in. Itŝij yoctyiꞌ meꞌ yụꞌtacsity paj qui c̣hẹiꞌyaꞌjete Jenꞌ in, meꞌdye yụmꞌ yirity muꞌyaꞌ.

⁷ Meꞌ aty chäyitiĉaꞌ jụijyaꞌ yụ miꞌin, meꞌdye raꞌ Jenꞌ chimeꞌ chäyibutiĉaꞌ miꞌin. Q̂uinꞌ aty chäyibutiĉaꞌ Jenꞌ miꞌin, ĉaĉaij na aty cạvetinte miꞌin —jéyacsi Jesús.

⁸ Vorjete Felipe: —Jịꞌchiyacsity, jeshaꞌ jiꞌcaviyitiĉamꞌ muꞌ Jenꞌ mi, mọꞌtum raꞌ jụjyi tsun —yi.

⁹ Jesús vorjete: —Yụ jéye mi Felipe, aty men penꞌdyetuyac miꞌin, uts na jambiꞌ méquiꞌ chäyitim tyi buty yụ. Jeshaꞌ yụ aty cavitim, muꞌ chimeꞌ Jenꞌ cạvetem. ¿Junꞌ dash cudyitiꞌ mi paj qui yụ jịꞌcaveyeyac Jenꞌ yụ?

¹⁰ ¿Jam adac anicjitim yụ nash Jenꞌtum buꞌyi judyeyaꞌ muꞌ Jenꞌ yụ́tum buꞌyi chimeꞌ? Ọij jiꞌchäyitidyeꞌ soꞌmeyacsiꞌ yụ miꞌin, mọꞌ jam ĉụiꞌsiꞌ dyijyedyeꞌ yụ. Muꞌ Jenꞌ yụ yụ́tum buꞌyity, muꞌsiꞌ dyijyedyeꞌ carijtyepte yụ.

¹¹ Anicjibutiĉamꞌ p̂eyacdyeꞌ yụ, yi yụ Jenꞌtum yụ yirity mọmoꞌ shupqui tsun. Meꞌ tsanꞌ jam anicjibutiĉaꞌ jụijyaꞌ p̂eyacdyeꞌ yụs miꞌin, mọꞌ qui namꞌ carijtacdyeꞌ yụ mọꞌ chäyibutiĉaꞌ yụ miꞌin paj qui anicjitiĉaꞌ yụ miꞌin.

¹² Yụ anic jéyac: tyi chuc anicjin yụ in, dadamꞌ raꞌ mọjoꞌchaꞌ shupquiꞌ carijtacdyeꞌ muꞌinsiꞌ in, jam jeñej yụs, ọyaꞌyaꞌ, meꞌ qui raꞌ muꞌin in, ĉaĉaij na yụ raꞌ Jenꞌyaꞌ jịjcaban.

¹³ Yụ raꞌ jụjbiyac cọdacdyeꞌ miꞌin, jedyeꞌ chuc cọdaqui jụijyaꞌ miꞌin yụ́siꞌcheꞌ tịj, yụ raꞌ jụjbiyac, paj qui jorojĉanjeyaqui yụ Jenꞌsiꞌ fer buꞌyedyeꞌ yụ.

¹⁴ Jedyeꞌ chuc yụ́siꞌcheꞌ tịj cọdaqui jụijyaꞌ miꞌin yụ raꞌ jụjjebiyac cọdacdyeꞌ miꞌin —yi jéyacsi Jesús.

Jesús jéyacsi juteyeyacsi raꞌ Jenꞌsiꞌ Ạꞌedyeꞌ muꞌ

¹⁵ Jesús jéyacsi: —Mạꞌjitiĉaꞌ jụijyaꞌ yụ miꞌin jemoñeꞌ chäquibutiĉaꞌ miꞌin ọij p̂eyacdyeꞌ yụ.

¹⁶ Yụ raꞌ cọdyete Jenꞌ yụ, muꞌ qui raꞌ jutiyinac yocsiꞌ Nọ́taquis raꞌ, mọꞌ qui raꞌ penꞌdyetunac miꞌin, mijam raꞌ yirisĉan mạyedyeꞌ yajquibunac mọꞌ.

¹⁷ Mọꞌ Nọ́taquis raꞌ mọꞌdye Jenꞌsiꞌ Ạꞌedyeꞌ muꞌ, mọꞌ rụijsis p̂eyacdyeꞌ tuiꞌsiꞌ. Jacchety muntyiꞌ in mijam méquiꞌ jụjjepte in, ĉaĉaij na jam cạvepte in mijam chị́yepte chimeꞌ in. Miꞌin na aty chị́yeptinte ĉaĉaij na aty penꞌdyetunac miꞌin judyeyaꞌ raꞌ taĉan ĉojtyiꞌĉan bäꞌyiꞌ miꞌin.

¹⁸ Meꞌ raꞌ tsanꞌ jọban yụ, yejĉoij qui na ramꞌ dyijtuyac miꞌin, cuvij raꞌ jábiyaꞌ ĉọ́shadyeyac miꞌin.

¹⁹ Damꞌdyety raꞌ cavin yụ in uts jacchety muntyiꞌ in, miꞌin na raꞌ quivij cavibudyiĉaꞌ yụ miꞌin. Yụ raꞌ vañinyeban, meꞌdye raꞌ yụ chimeꞌ vañinjebadyeyac.

²⁰ Aty ayijyaꞌ tupudyeꞌ chat qui raꞌ chịj miꞌin junꞌ chuc yụ Jenꞌtum yụ yirity shupqui yụ, meꞌdye yụ́tum chimeꞌ miꞌin yirity mọmoꞌ shupqui miꞌin.

²¹ Tyi chuc seꞌvibun yụꞌtacdyeꞌ yụ in judyeyaꞌ chäquibun yụ in muꞌin nash mạꞌjintyiꞌ yụ in. Muꞌ Jenꞌ yụ mạꞌjeyacsi muꞌin mạꞌjintyiꞌ yụ in, chimeꞌdye raꞌ yụ mạꞌjeyacsi judyeyaꞌ raꞌ jiꞌcavibun yụ muꞌinyaꞌ in —jéyacsi Jesús.

²² Muꞌ yoctyiꞌ Judas, jam Iscariote, yi jéte: —Jịꞌchiyacsity, ¿junꞌ buty tsunyaꞌ ramꞌ meꞌ jiꞌcavitim? ¿Jam buty raꞌ yoctyiꞌ úchety muntyiꞌ in cavibun chimeꞌ in fer buꞌyedyeꞌ mísiꞌ? —jéte Judas.

²³ Jesús vorjete: —Tyi chuc mạꞌjintyiꞌ yụ in, muꞌin raꞌ chäquibun p̂eyacdyeꞌ yụ in, judyeyaꞌ Jenꞌ yụ chimeꞌ mạꞌjeyacsi muꞌin in. Muꞌinyaꞌ raꞌ jiꞌcaviti yụ, judyeyaꞌ raꞌ yụ Jenꞌtum yụ tsun raꞌ muꞌintum yiriꞌyaꞌ bäꞌyi.

²⁴ Tyi chuc jam mạꞌjintyiꞌ yụ in, muꞌin raꞌ jam junꞌ chäquibun p̂eyacdyeꞌ yụ in. Mọꞌ p̂eyacdyeꞌ yụ seꞌvibutiĉas miꞌin, mọꞌ jam ĉụiꞌsiꞌ dyijyedyeꞌ yụ, Jenꞌsiꞌ nash yụ, muꞌ jutintyiꞌ yụ.

²⁵ Ọij jéyac p̂eyacdyeꞌ anꞌdyemꞌ jambiꞌ yạjquibadyeyac yụ.

²⁶ Yụ raꞌ cọdyete Jenꞌ paj qui muꞌ jutiyinac Ạꞌedyeꞌ muꞌ, mọꞌ Nọ́taquis, mọꞌ raꞌ cambiyadyes yụ́tum. Mọꞌ qui raꞌ räj jiꞌchäyinac judyeyaꞌ mọꞌdye raꞌ jiꞌdyijvibunac mọꞌ p̂eyacdyeꞌ mọꞌ soꞌmeyacsiꞌ yụ.

²⁷ Yụ raꞌ ĉojtyiꞌĉansiꞌ maꞌjodyes soꞌmetacyac, yojdyesdyemꞌ meꞌchuiꞌ yụ u, mọꞌ raꞌ soꞌmetacyac miꞌin, mọꞌ jam jacches maꞌjodyes. Jam raꞌ noiꞌyi miꞌin mijam raꞌ cajotyiti chimeꞌ miꞌin.

²⁸ A nash jéyac yụ, meꞌ raꞌ tsanꞌ jọban yụ, quivij qui na ramꞌ caꞌñibun yụ miꞌinyaꞌ. Mạꞌjitiĉaꞌ jụijyaꞌ yụ miꞌin, a vuty maꞌjoij u miꞌin ĉaĉaij na raꞌ yụ Jenꞌyaꞌ jịjcaban yụ, muꞌ mujuꞌchaꞌ buꞌyityyaꞌ, uyaꞌyaꞌ yụ.

²⁹ Yụ jäꞌmij jéyac, ọij jambiꞌdyemꞌ cạ̈tsiꞌ, paj qui miꞌin anicjitiĉaꞌ yụ miꞌin aty cạ̈tsiꞌyaꞌ mọꞌ.

³⁰ Damꞌdyety raꞌ jéyac miꞌin ĉaĉaij na aty meij jijtuiꞌ sọyoꞌ, mọꞌ ayoꞌbuꞌyis q̂uinꞌ úcheꞌ jaccheꞌ, yụ qui namꞌ jam tupuj bächän yụ mọꞌ.

³¹ Jenꞌ na yụ räj chiquete yụ junꞌ chuc jin yụ, meꞌ chicaqui Jenꞌ yụ paj qui räj muntyiꞌ chịj in yụ anic fer mạꞌjeyaqui Jenꞌ yụ. Jụdyej sacyebadac jọbajshaꞌ úyaty tsun —jéyacsi Jesús.