Josué 8 - TsimaneHai jiꞌpenac 1 Chat qui muꞌ Ayoꞌ jajiti Josué: —Jam raꞌ cajotyitim, mijam raꞌ yoquim. Cạcsi ram räj muꞌin sondaro mítum in chat bojveva Haiyaꞌ judyeyaꞌ chucsi miꞌin ĉaĉaij na yụ aty yụꞌte mísĉan un muꞌ ayoꞌ Haiĉantyiꞌ judyeyaꞌ muntyiꞌ muꞌ judyeyaꞌ bäꞌyedyeꞌ muꞌ judyeyaꞌ jac muꞌ. 2 Mi raꞌ meꞌtyeꞌ mọꞌ bäꞌyedyeꞌ Hai judyeyaꞌ ayoꞌ mọꞌ yojdyemꞌ mi meꞌtyeꞌ mọꞌ bäꞌyedyeꞌ Jericó judyeyaꞌ ayoꞌ mọꞌ jiquej u. Paj tsanꞌ meꞌ ọij tupudyeꞌ tupuj miꞌin ĉụiꞌdyestutiñeꞌ mọꞌĉansiꞌ jedyeꞌ in judyeyaꞌ cuꞌdyeꞌ in. Caminve raꞌ jutacsi mi pạrej sondaro in yocve buꞌyiꞌ bäꞌyedyes sisdyeꞌ paj qui jam chịj bäꞌyedyeꞌĉantyiꞌ in muꞌyaꞌ in —jajiti Ayoꞌ. 3 Chat qui Josué judyeyaꞌ räj muꞌin sondaro in sacti in paj qui chuiꞌ in mọꞌ bäꞌyedyeꞌ Hai. Muꞌ dyimꞌtacsi chibin quiꞌtac mir mujuꞌchaty sondaro in judyeyaꞌ tsedyedyeꞌyaꞌ jutacsi in. 4 Josué yụꞌtacsi jéyacsi: —Seꞌvaĉamꞌ, miꞌin raꞌ caminve jịjcaij yocve bäꞌyedyes sisdyeꞌ mọꞌ. Jijmuꞌsitac c̣hẹiꞌyaꞌ mọꞌ bäꞌyedyeꞌ. C̣huꞌc̣huꞌyevac. 5 Yụ judyeyaꞌ muꞌin yụ́tumtyiꞌ in c̣hẹiꞌyaꞌjeꞌ raꞌ tsun mọꞌ bäꞌyedyeꞌ. Aty shupquiyaꞌ muꞌin bäꞌyedyeꞌĉantyiꞌ in yojdyemꞌ jiquej u in, chat qui raꞌ tsun ĉaꞌjoyacsi in. 6 Muꞌin raꞌ cäc̣häꞌchun tsun in junꞌ quiꞌ chuc aty moch jinchaquinyaꞌ tsun in bäꞌyedyeꞌyaꞌ ĉaĉaij na raꞌ yi in, "Muꞌin ĉaꞌjoyisinꞌ tsun in yojdyemꞌ jiquej u in", yi raꞌ in. Judyeyaꞌ tsun raꞌ ĉaꞌjoyacsi in. 7 Miꞌin raꞌ sacti jijmuꞌsitidyeꞌĉantyiꞌ chat jiꞌpentiñeꞌ raꞌ mọꞌ bäꞌyedyeꞌ. Muꞌ Jenꞌ Ayoꞌ miꞌin unĉan raꞌ mọꞌ soꞌminac. 8 Aty jiꞌpentiñeꞌyaꞌ mọꞌ bäꞌyedyeꞌ, jiꞌcoꞌshayevac. Jịꞌcätsebitinte raꞌ Ayos yụꞌtacdyeꞌ muꞌ. ¡Jeshaꞌ! Yụ́dye yụꞌtyeyac —jéyacsi Josué. 9 Chat qui Josué jutacsi in judyeyaꞌ muꞌin venjoij yóyaꞌdyemꞌ jijmuꞌsitiyaꞌ u in. Muꞌyaꞌdye bisaqui in dyeteꞌĉan Betel judyeyaꞌ Hai, jịjcaijcheꞌ tsun Hai. Muꞌ na Josué muꞌyaꞌ ĉọshi muntyiꞌtum muꞌ. 10 Nojno pamꞌ Josué fayacsi muꞌin sondaro in. Muꞌ judyeyaꞌ muꞌin tashcheꞌ buꞌyity in tashi miꞌi sondaroyaꞌ in Haiyaꞌ. 11 Räj muꞌin sondaro muꞌtumtyiꞌ in miꞌi in judyeyaꞌ c̣hẹiꞌyaꞌjeꞌ mọꞌ bäꞌyedyeꞌ in. Yocvetaque quic̣henꞌ buꞌyiꞌ mọꞌ chụiꞌdyeꞌ bäꞌyedyesyaꞌ dyäqui in. Rocve buꞌyiꞌ mọꞌ bäꞌyedyeꞌ muꞌyaꞌ dyäqui in. Mọꞌyaꞌ mọꞌ mojij dyeteꞌĉan muꞌin judyeyaꞌ mọꞌ bäꞌyedyeꞌ. 12 Josué aty jutacsi ĉanamꞌ mir sondaro in paj qui jijmuꞌsiti in judyeyaꞌ bisaqui in, muꞌin dyeteꞌĉan Betel judyeyaꞌ Hai, jịjcaijcheꞌ tsun Hai. 13 Meꞌdyes qui muꞌin aty yụꞌtacsi muꞌin sondaro in, muꞌin daiꞌtyiꞌ sondaro rocve buꞌyi mọꞌ bäꞌyedyeꞌ judyeyaꞌ muꞌin jijmuꞌsitity in jịjcaijcheꞌ tsun mọꞌ bäꞌyedyeꞌ. Tsedyedyeꞌĉandye muꞌ Josué siteꞌ mọꞌ mojij. 14 Aty cạvacsiyaꞌ in muꞌ ayoꞌ Haiĉantyiꞌ, muꞌ judyeyaꞌ räj muꞌin sonꞌ bäꞌyedyeꞌĉantyiꞌ in cavinyi in judyeyaꞌ shupqui bäꞌyedyeꞌĉan in. Chat qui venjoij in yóyaꞌdyemꞌ mọꞌyaꞌ vav yụꞌtac chutidyedyesyaꞌ o. Ọij vav quic̣henꞌ buꞌyiꞌ mọꞌ cäjyasĉan jac Arabá jorojĉan nạijyiꞌ. Muꞌ ayoꞌ jam chịj junꞌ chuc muꞌyaꞌ sondaro in jumve buꞌyity yocve c̣hẹiꞌyaꞌ mọꞌ bäꞌyedyeꞌ. 15 Muꞌ Josué judyeyaꞌ muꞌin Israeltyiꞌ sondaro in väñätucsi in jeñej buꞌyi peñity jiꞌĉuti in, chat qui ĉaꞌjoij in cäjyasĉanyaꞌ jac jịjcaij in. 16 Meꞌdyes qui räj sonꞌ Haiĉantyiꞌ in fayac in paj qui cäc̣häꞌchucsi in. Muꞌin qui cäc̣häꞌchute Josué in junꞌ quiꞌ chuc moch yajquiꞌ in mọꞌ bäꞌyedyeꞌ. 17 Mijam yirity sonꞌ muꞌyaꞌ jiꞌyajcati Haiĉan judyeyaꞌ Betelĉan, räj cäc̣häꞌchucsi muꞌin Israeltyiꞌ sondaro in. Vanacjetaqueꞌ in mọꞌ bäꞌyedyeꞌ cäc̣häꞌchucdyeꞌyaꞌ muꞌin Israeltyiꞌ sondaro in. 18 Chat qui muꞌ Ayoꞌ jajiti Josué: —C̣họcoꞌtyevaꞌ yóvedyeꞌ Hai mọꞌyaꞌ shijmisyaꞌ chutidyedyes unĉansiꞌ mi ĉaĉaij na unĉan mi yụ raꞌ soꞌmitim mọꞌ bäꞌyedyeꞌ —jajiti Ayoꞌ. Chat qui Josué c̣họcoꞌtyeꞌ yóvedyeꞌ Hai mọꞌyaꞌ shijmisyaꞌ chutidyedyes unĉansiꞌ muꞌ. 19 Meꞌjeyacdyeꞌyaꞌ Josué chat q̂uinꞌdyemꞌ muꞌin jumvety sondaro in sacti in judyeyaꞌ bäꞌyedyeꞌĉan jịjcaij p̂iqui in. Muꞌin siteꞌ in mọꞌ bäꞌyedyeꞌ, jiꞌpenacsi in, judyeyaꞌ cavin jiꞌjäꞌñeꞌ in. 20 Muꞌin sonꞌ Haiĉantyiꞌ in murujruve cạveban in chat jorojĉan nạijtyeꞌ in jịꞌsaꞌ cheꞌve jịjcaiꞌ bäꞌyedyeꞌyaꞌ. Jam junaꞌ tupuj ĉaꞌjoij muꞌin ĉaĉaij na muꞌin Israeltyiꞌ sondaro cäjyasĉanyaꞌ jac ĉaꞌjoijtyiꞌ in aty camanꞌ chucseban muꞌin jinchacacsity in. 21 Ĉaĉaij na cạveꞌyaꞌ muꞌ Josué judyeyaꞌ räj muꞌin Israeltyiꞌ sondaro in junꞌ chuc muꞌin aty jiꞌpeñeꞌ mọꞌ bäꞌyedyeꞌ judyeyaꞌ jịꞌsaꞌ nạijyiꞌ bäꞌyedyeꞌĉan, chat qui muꞌin camanꞌ chucseban muꞌin sonꞌ Haiĉantyiꞌ in. 22 Muꞌin Israeltyiꞌ sondaro bäꞌyedyeꞌĉantyiꞌ in shupqui in chucseban muꞌin. Meꞌdyes qui pärenꞌve buꞌyi Israeltyiꞌ sondaro in judyeyaꞌ muꞌin Haityiꞌ sonꞌ in chidyiꞌĉanyaꞌ. Muꞌin Israeltyiꞌ sondaro in räj ijacsi in, jam yirity tsạꞌ yụꞌtacsiꞌ in, mijam yirity tupuj ĉaꞌjoij. 23 Muꞌ qui namꞌ ayoꞌ Haityiꞌ tsạꞌ tapjete in cạte Josuéyaꞌ in. 24 Muꞌin Israeltyiꞌ sondaro ijacsi muꞌin Haityiꞌ sonꞌ in mojijĉan judyeyaꞌ cäjyasĉan jac yóyaꞌdyemꞌ jinchacacsiyaꞌ u in. Chat qui aty räj ijacsi chutidyesyaꞌ coc̣hino in muꞌin Israeltyiꞌ sondaro in caꞌñibun Haiyaꞌ judyeyaꞌ ijacsi räj bäꞌyedyeꞌĉantyiꞌ in. 25 Yiriꞌtac päräꞌ jiyi mir sonꞌ judyeyaꞌ p̂en in säñi mọꞌdye mạyedyeꞌ, räj Haiĉan bäꞌyity in. 26 Ĉaĉaij na Josué jam shunjeyaĉan un muꞌ. Muꞌ yejĉoij c̣họcoꞌtyeꞌ mọꞌ bäꞌyedyeꞌ mọꞌyaꞌ shijmisyaꞌ chutidyedyes junꞌ quiꞌ chuc räj Haiĉan bäꞌyity ijac in. 27 Muꞌin na Israeltyiꞌ vóshiꞌ in ĉụiꞌdyestuiꞌ in räj jedyeꞌ Haiĉansiꞌ judyeyaꞌ mọꞌyas cuꞌdyeꞌ chimeꞌ. Chat meꞌsiꞌ muꞌin jịꞌcätsepte Ayos p̂eyacdyeꞌ in mọꞌ jajitis Josué jiquej. 28 Muꞌ na Josué jiꞌcoꞌshayeꞌ Hai judyeyaꞌ mọꞌ shupquiꞌ yiris dụriꞌ patsacdyes. Itŝij tyi muꞌĉan bäꞌyi meꞌdye q̂uinꞌ. 29 Josué soncheꞌ ijate muꞌ ayoꞌ Haityiꞌ, sogayaꞌ titsoꞌjete tujĉan in. Muꞌcheꞌ buꞌyi muꞌ junꞌ quiꞌ chuc yómoꞌ. Aty shocam Josué jutacsi paj qui jäcbibajte in aꞌ muꞌ sonches judyeyaꞌ yụꞌbite sisdyeꞌyaꞌ bäꞌyedyesyaꞌ mọꞌ. Chat qui muꞌin Israeltyiꞌ sondaro in daiꞌ mij in yụꞌtyeyete in aꞌcheꞌ muꞌ. Yiris därsiꞌ dụriꞌ shupquiꞌ, tacaꞌ mọꞌyaꞌ q̂uinꞌ. Vajmuꞌyaij in mụcuꞌyaꞌ Ebal 30 Chat qui Josué jämꞌtyeꞌ yiris jiꞌcoꞌshayaquis Jenꞌdyes, muꞌdyes Ayoꞌ Israelĉantyidyes, muꞌcheꞌ mụcuꞌ Ebal. 31 Yoj jeyacsidyemꞌ muꞌ Moisés, Jenꞌtyiꞌ úñity muꞌ, yụꞌtacsiyaꞌ muꞌin Israeltyiꞌ vóshiꞌ jiquej u in. Josué jämꞌtyeꞌ mọꞌ yoj yiꞌdyemꞌ mọꞌ yụꞌtacdyeꞌ Jenꞌsiꞌ mọꞌ jasoꞌmitis Moisés jiquej u: yiris jiꞌcoꞌshayacdyeꞌ jämꞌtac mijyaꞌ in, jam jaiꞌdactyiꞌ fiyeroyaꞌ in. Mọꞌcheꞌ muꞌin jiꞌcoꞌshayete Ayodyes p̂udaij jiꞌtyeꞌsiꞌ jiꞌcoꞌshayacdyeꞌ in judyeyaꞌ jämꞌjitidyedyes in. 32 Josué mijcheꞌ in sáñepte Jenꞌsiꞌ yụꞌtacdyeꞌ sánac Moisésyaꞌ jiquej. Meꞌ yi muꞌ muꞌinsiꞌyaꞌ vej in Israeltyiꞌyaꞌ vóshiꞌ in. 33 Räj muꞌin Israeltyiꞌ vóshiꞌ muꞌyaꞌ in: muꞌin yoctyiꞌdye in judyeyaꞌ muꞌin Israeltyiꞌ vóshiꞌ naꞌity in, muꞌin tashcheꞌ buꞌyity in, ayoꞌ in judyeyaꞌ jịꞌruij yụꞌtacsity in. Päräꞌĉan ñuruꞌ runꞌquenꞌ buꞌyi in judyeyaꞌ chidyiꞌĉanyaꞌ mọꞌyaꞌ Jenꞌsiꞌ cajón yụꞌtacdyeꞌtumsiꞌ. Räj muꞌin cạvacsi muꞌin cudyitity Jenꞌcheꞌ in cạiꞌtyiꞌ Jenꞌsiꞌ cajón in, Levíty vóshiꞌ in. Chocyaꞌ quiꞌ muꞌin muntyiꞌ in runꞌquenꞌ buꞌyi quic̣henꞌ muꞌ mụcuꞌ Gerizim judyeyaꞌ chocyaꞌ quiꞌ muꞌin runꞌquenꞌ buꞌyi quic̣henꞌ muꞌ mụcuꞌ Ebal. Meꞌ yi muꞌin paj qui jịꞌcätsepte in muꞌsiꞌ yụꞌtacdyeꞌ jiquej muꞌ Moiséssiꞌ, Ayoꞌtyiꞌ úñity muꞌ. Muꞌ Moisés jéyacsi jiquej paj qui meꞌ buꞌyi muꞌin vaj muꞌyaijyaꞌ in paj qui yụꞌtyeyacsi p̂eyacdyeꞌ muꞌindyes Israeltyidyes vóshiꞌ in. 34 Chat qui Josué p̂eyeyacsi räj mọꞌ p̂eyacdyeꞌ yụꞌtacdyeꞌĉansiꞌ, mọꞌ p̂eyacdyeꞌ p̂eyeꞌsiꞌ Jenꞌsiꞌ ñịbeꞌjitidyes judyeyaꞌ mọꞌ p̂eyacdyeꞌ p̂eyeꞌsiꞌ Jenꞌsiꞌ vaꞌtacdyeꞌ, yoj yiꞌdyemꞌ sánacdyeꞌ Jenꞌsiꞌĉan yụꞌtacdyeꞌ o. 35 Muꞌ p̂eyebibajte Moiséssiꞌ yụꞌtacdyeꞌ muꞌindyes Israeltyidyes vóshiꞌ in, mijam yiris p̂eyacdyeꞌ jayej. Chimeꞌ mọꞌyaꞌ p̂en in judyeyaꞌ ạvaꞌ in judyeyaꞌ yoctyiꞌdye muntyiꞌ muꞌintum bäꞌyity in. |