Biblia Todo Logo
Bìoball air-loidhne

- Sanasan -

Josué 4 - Tsimane

1 Aty nobi räj muntyiꞌ in muꞌ Jordán chat qui muꞌ Jenꞌ jajiti muꞌ Josué:

2 —Dyimꞌtacsevac yiriꞌtac päräꞌ jiyi sonꞌ Israeltyiꞌ vóshiꞌ in. Muꞌin yiriꞌtac päräꞌ jiyi ñuruꞌtyity Israeltyiꞌ vóshiꞌ in, cäts ñuruꞌtyity yirity raꞌ sonꞌ yụꞌtac in.

3 Judyeyaꞌ jéyacsi mi paj qui jäcacsi in yiriꞌtac päräꞌ jiyi mij in chidyiꞌĉanyaty cojiro muꞌyaty in yóyaꞌdyemꞌ runꞌquenꞌ buꞌyiyaꞌ muꞌin cudyitity Jenꞌcheꞌ in. Judyeyaꞌ cạcsi in yóyaꞌdyemꞌ raꞌ dyäqui miꞌin u —jajiti Jenꞌ muꞌ Josué.

4 Chat qui muꞌ Josué fayacsi muꞌin yiriꞌtac päräꞌ jiyity Israeltyiꞌ vóshiꞌ in, muꞌin yụꞌtactyiꞌ jiquej yirity sonꞌ yirityĉantyiꞌ ñuruꞌtyity in.

5 Judyeyaꞌ muꞌ Josué jéyacsi: —Chidyiꞌĉanyaꞌ jịjcavac muꞌ cojiro yóyaꞌdyemꞌ mọꞌyaꞌ Jenꞌsiꞌ cajón yụꞌtacdyeꞌtumsiꞌ Ayos miꞌin. Cäts raꞌ yirityityij miꞌin jiꞌcheꞌetinte yirity mij chat vemetinte. Meꞌ raꞌ tsicdyeꞌ muꞌin ñuruꞌtyity Israeltyiꞌ vóshiꞌ in cäts raꞌ shupqui tsicdyeꞌ mij in.

6 Jịꞌĉocdyes raꞌ shupqui muꞌin mij in. Nojnoĉanyaꞌ yocsiꞌĉan yómodyeꞌ ạvaꞌ miꞌin cudyinac raꞌ in: "¿Junꞌ buty yụꞌtac uts mij in?", meꞌ raꞌ cudyinac in.

7 Chat qui raꞌ miꞌin jéyacsi: "Mọꞌ ojñiꞌ cojiroĉansiꞌ jiꞌdyäcac jiquej yoquiꞌdyemꞌ nobiꞌ mọꞌ cajón yụꞌtacdyeꞌtumsiꞌ Ayos muꞌ. Anic dyäqui muꞌ cojiro jiquej", meꞌ raꞌ jéyaqui ạvaꞌ miꞌin. Uts mij in jịꞌĉocdyes raꞌ shupqui muꞌindyes Israeltyidyes vóshiꞌ in —jéyacsi muꞌ Josué.

8 Muꞌin Israeltyiꞌ vóshiꞌ in jụjjepte in Josuésiꞌ p̂eyacdyeꞌ. Chimeꞌ muꞌin jịꞌcätsepte Jenꞌsiꞌ p̂eyacdyeꞌ jayuꞌtyiyitis Josué jiquej. Muꞌin tsimꞌtacsi yiriꞌtac päräꞌ jiyi mij in chidyiꞌĉanyaty Jordán judyeyaꞌ vemacsi in dyäquedyeꞌyaꞌ yóyaꞌdyemꞌ jiꞌc̣hacsi u in.

9 Chimeꞌ Josué runꞌquenꞌjeyacsi yiriꞌtac päräꞌ jiyi mij in chidyiꞌĉanyaꞌ cojiro yóyaꞌdyemꞌ dyäqui muꞌin cudyitity Jenꞌcheꞌ u in mọꞌtum cajón yụꞌtacdyeꞌtumsiꞌ. Tacaꞌ muꞌyaꞌ muꞌin mij in.

10 Muꞌin na cudyitity Jenꞌcheꞌ in cajón cạiꞌtyiꞌ in taĉan chum runꞌquenꞌ buꞌyi in chidyiꞌĉanyaꞌ muꞌ cojiro. Muꞌyaꞌ buꞌyi in junꞌ quiꞌ chuc muꞌin Israeltyiꞌ vóshiꞌ in jịꞌcätsepte räj Jenꞌsiꞌ p̂eyacdyeꞌ jajitis Josué jiquej. Mọꞌdye dyijyedyeꞌ chimeꞌ jayuꞌtyiyitis muꞌ Josué Moisésyaꞌ jiquej. Muꞌin muntyiꞌ cavinyi nobi in.

11 Aty nobiyaꞌ räj muntyiꞌ in chat qui muꞌin cudyitity Jenꞌcheꞌ in cạiꞌtyiꞌ mọꞌ cajón in Ayoꞌsiꞌ chimeꞌ tsävcheꞌ jịjcaij in. Muꞌin na muntyiꞌ in cạvacsi in.

12 Chimeꞌdye muꞌin sonꞌ Rubéntyiꞌ vóshiꞌ in judyeyaꞌ sonꞌ Gadtyiꞌ vóshiꞌ in judyeyaꞌ chocyaꞌ quiꞌ muꞌin sonꞌ Manaséstyiꞌ vóshiꞌ in tashcheꞌ nobi in, chutidyedyestum cofjiti in. Meꞌsiꞌ muꞌin jịꞌcätsepte Moisésvunsiꞌ yụꞌtacdyeꞌ muꞌindyes in.

13 Muꞌyaꞌ jeñej vạjpedyeꞌ quiꞌtac mir rụiꞌcuꞌ in, meꞌsiꞌ tsicdyeꞌ muꞌin tashcheꞌ nobity in Ayoꞌsiꞌyaꞌ vej muꞌ. Muꞌindye tashcheꞌ venjoij yóyaꞌdyemꞌ mọꞌ cätsenꞌ buꞌyis jac c̣hẹiꞌyaꞌ Jericó u. Aty chutidyedyestumtyiꞌ in, chat muꞌyaꞌdye muꞌin dyäqui in judyeyaꞌ mọꞌ chutidyeꞌ biseꞌ in.

14 Ọijĉandye mạyedyeꞌ muꞌ Jenꞌ mujuꞌchaty jayuꞌti muꞌ Josué muntyisyaꞌ vej in judyeyaꞌ muꞌin Israeltyiꞌ vóshiꞌ in ạ̈räjjete Josué räj mạyedyeꞌ jịjcaiꞌ tsạꞌ buꞌyiyaꞌ muꞌ, cäts yojdyemꞌ muꞌin ạ̈räjjise Moisésvun jiquej u in.

15 Muꞌ Jenꞌ jajiti Josué:

16 —Jéyacsevac muꞌin cudyitity Jenꞌcheꞌ in muꞌin cạiꞌtyiꞌ mọꞌ cajón in yụꞌtacdyeꞌtumsiꞌ paj qui bojvi Jordánĉan —jajiti Jenꞌ.

17 Chat qui muꞌ Josué jéyacsi muꞌin cudyitity Jenꞌcheꞌ in: —Miꞌin Jordánĉantyiꞌ, bojvi raꞌ miꞌin —jéyacsi Josué.

18 Chat qui muꞌin cudyitity Jenꞌcheꞌ in bojvi in cạiꞌyaꞌ in mọꞌ cajón yụꞌtacdyeꞌtumsiꞌ Ayos muꞌ. Aty tsävcheꞌ venjoij muꞌin q̂uinꞌdyemꞌ miꞌebanꞌ ojñiꞌ Jordánĉan, bänꞌ jubanꞌ cäts yojdyemꞌ tashcheꞌ jiquej o.

19 Mọꞌ yiriꞌtacyis mạyedyeꞌ tashchesĉan ịvaj muꞌin yacchute muꞌ Jordán in chat qui dyäqui in shupquive tsun mochdye Jericó. Muꞌinsiꞌ dyäquedyeꞌ tätsqueiꞌcheꞌ jac Jericósiꞌ judyeyaꞌ tịj dyäquedyes Gilgal.

20 Judyeyaꞌ Josué runꞌquenꞌ buꞌyi yụꞌtacsi muꞌin yiriꞌtac päräꞌ jiyi mij in, muꞌin jäcactyiꞌ Jordánĉan jiquej.

21 Chat qui muꞌ jéyacsi muꞌin Israeltyiꞌ vóshiꞌ in: —Meꞌ na jụijyaꞌ jábiyatydyes miꞌintyiꞌ vóshiꞌ in cọdacsi raꞌ jenꞌ muꞌin: "¿Junꞌ buty yụꞌtac uts mij in?"

22 Vorjeyaqui raꞌ jenꞌ muꞌin: "Muꞌin Israeltyiꞌ vóshiꞌ in nobi muꞌ Jordán chañescheꞌ jac", meꞌ raꞌ jéyaqui ạvaꞌ muꞌin.

23 Ĉaĉaij na muꞌ Jenꞌ jiꞌchante muꞌ Jordán miꞌindyes junꞌ quiꞌ chuc nobi miꞌin. Muꞌ Jenꞌ meꞌjete muꞌ Jordán yojdyemꞌ muꞌ meꞌtyeꞌ mọꞌ Mar Jäijnäs jiquej yoquiꞌdyemꞌ muꞌ jiꞌchañeꞌ mọꞌ tsundyes junꞌ quiꞌ chuc nobi tsun jiquej.

24 Muꞌ Jenꞌ meꞌ yi paj qui räj jacchety muntyiꞌ in, tupuj chịj in junꞌ chuc muꞌ Jenꞌ ferdyeꞌtumtyiꞌ muꞌ. Judyeyaꞌ paj qui miꞌin räjĉan äräjjetinte muꞌ Jenꞌ Ayoꞌ miꞌin —jéyacsi Josué.

Copyright 2017 Nuevo Testamento en Chimane

Jen'si' P̂eyacdye'

New Tribes Mission
Lean sinn:



Sanasan