Josué 24 - Tsimane

Vajmuꞌyaij in Siquemyaꞌ

¹ Chat qui muꞌ Josué yiriꞌyaꞌ jéyacsi muꞌin Israeltyiꞌ vóshiꞌ in Siquemyaꞌ. Muꞌ fayacsi muꞌin joꞌnoꞌ buꞌyity in, muꞌin tashcheꞌ buꞌyity in, muꞌin jịꞌcäts yụꞌtacsity in judyeyaꞌ muꞌin ayoꞌ buꞌyity in, chat qui muꞌin jiꞌcaviti Ayoꞌyaꞌ in.

² Josué jéyacsi muꞌin muntyiꞌ in: —Muꞌ Jenꞌ Ayoꞌ Israelĉantyiꞌ jínac: "Urucyaꞌ jiquej miꞌintyiꞌ vóshiꞌ in nopej muꞌ cojiro yocsiꞌĉan jac bäꞌyi in. Muꞌin timaꞌcacsi yoctyiꞌ jenꞌ buꞌyity in. Meꞌ bäꞌyi chimeꞌ muꞌ Taré, jenꞌ Abrahamtyiꞌ judyeyaꞌ Nacortyiꞌ.

³ Paj tsanꞌ meꞌ yụ jäcte Abraham, vóshiꞌ miꞌin, muꞌyaꞌdye nopej muꞌ cojiro chat yụꞌteij muꞌ yocsiꞌĉan jac. Yụ jiꞌtashte muꞌ paiꞌ jịjcaij Canaánĉan judyeyaꞌ yụ daiꞌ soꞌmete vóshiꞌ. Yụ soꞌmete Isaac.

⁴ Isaacyaꞌ yụ soꞌmete Jacob judyeyaꞌ Esaú. Yụ yụꞌtyeꞌ Esaúdyes mọꞌ mụcuꞌves jac Seir. Muꞌ qui namꞌ Jacob judyeyaꞌ ạvaꞌ muꞌ muꞌve jịjcaij Egiptove in.

⁵ Chat qui yụ jutacsi Moisés judyeyaꞌ Aarón judyeyaꞌ yụ jịꞌñibeꞌcacsi muꞌin Egiptoĉantyiꞌ in, mọꞌ jịꞌtŝoyacsis yụ jiquej. Chat qui yụ jiꞌshupqueyac miꞌin.

⁶ Shubanyaꞌ muꞌin jenꞌvun miꞌin Egiptoĉan, maryaꞌ venjoij miꞌi in. Judyeyaꞌ muꞌin Egiptoĉantyiꞌ in jäquiꞌve jinchacacsi in Mar Jäijnäsyaꞌ cavayocheꞌ in judyeyaꞌ chutidyestum careto in.

⁷ Chat qui muꞌin fer cọdyetyete Jenꞌ nọ́tacdyeꞌ in. Muꞌ qui Jenꞌ yụꞌtyeꞌ tojmas dyeteꞌĉan miꞌin judyeyaꞌ muꞌin Egiptoĉantyiꞌ in. Muꞌ jịꞌtŝoyacsi marĉansiꞌ ojñiꞌ, jiꞌsubanꞌ mọꞌ mar muꞌincheꞌ in. Ĉụiꞌsiꞌyaꞌ vej miꞌin cạvetiñeꞌ junꞌ chuc yụ meꞌjeyacsi muꞌin Egiptoĉantyiꞌ jiquej. Chat qui men bäꞌyi miꞌin cäjyasĉan jac.

⁸ Yụ tuyac miꞌin muꞌinsiꞌyaꞌ jac amorreossiꞌyaꞌ, muꞌin shupquive tsun Jordánve bäꞌyity in. Muꞌin chunac miꞌin, yụ qui namꞌ unĉan miꞌin soꞌmeyac. Yụ jịꞌmotsacsi yóyaꞌdyemꞌ jịjcaij u miꞌin, chat qui miꞌin ĉụiꞌdyestucsebi jac muꞌin.

⁹ Muꞌ Balac, Ziportyiꞌ ạvaꞌ, muꞌ ayoꞌ Moabĉantyiꞌ in, sacti paj qui chucsi muꞌin Israeltyiꞌ vóshiꞌ u in. Muꞌ faijte muꞌ Balaam, Beortyiꞌ ạvaꞌ, paj qui muꞌ raꞌ jịꞌñibeꞌcacdyes p̂eyacdyeꞌ soꞌminac miꞌin.

¹⁰ Yụ jam damꞌ seꞌvepte Balaamsiꞌ p̂eyacdyeꞌ. Meꞌdyes qui muꞌ jämꞌsiꞌ mọmoꞌ p̂eyacdyeꞌ soꞌminac, jam tsanꞌ meꞌ mạꞌjeꞌ muꞌ. Meꞌ qui yụ jiꞌc̣honyac miꞌin unĉan muꞌ.

¹¹ Chat qui nobi miꞌin muꞌ Jordán judyeyaꞌ venjoij miꞌin Jericóyaꞌ. Muꞌin Jericóĉantyiꞌ chunac miꞌin. Chimeꞌ yoctyiꞌ chunac miꞌin: muꞌin amorreo in, ferezeo in, cananeo in, heteo in, gergeseo in, heveo in judyeyaꞌ jebuseo in. Yụ qui namꞌ räj soꞌmeyac unĉan miꞌin.

¹² Yụ tashi juteyeyac mọꞌ jeꞌñes bibijoij, mọꞌ qui jiꞌshupqueyeyacsiꞌ muꞌin päräꞌ ayoꞌ amorreo in. Miꞌin jam jiꞌshupcacsi ĉụiꞌsiꞌyaꞌ chutidyes coc̣hino miꞌin, mijam ĉụiꞌsiꞌyaꞌ cọiꞌdyeꞌ miꞌin.

¹³ Yụ soꞌmeyac jac jam jäꞌmiiꞌtyis miꞌin judyeyaꞌ bäꞌyedyeꞌ in jam acaijsiꞌ miꞌin. Chat qui miꞌin bäꞌyi muꞌinsiꞌĉan bäꞌyedyeꞌ in judyeyaꞌ jebetiñeꞌ ova judyeyaꞌ orivo mọꞌin cätidyeꞌ jam cätis miꞌin.

¹⁴ Meꞌdyes qui ạ̈räjjemac muꞌ Ayoꞌ judyeyaꞌ räjĉan carijtaĉamꞌ muꞌdyes. Urucyaꞌ muꞌin vóshiꞌ miꞌin timaꞌcacsi muꞌin jenꞌ buꞌyity in yoquiꞌdyemꞌ bäꞌyi u in nopej muꞌ cojiro yocsiꞌĉan jac judyeyaꞌ jäquiꞌve Egiptoĉan. Yacchucsebivac miꞌin muꞌintyiꞌ jenꞌ buꞌyity in judyeyaꞌ Ayodyes mọmoꞌ carijtaĉamꞌ.

¹⁵ Meꞌ tsanꞌ carij ĉọ́tiñeꞌ jụijyaꞌ miꞌin mọꞌ carijtacdyeꞌ Ayodyes, dyimꞌtyevac miꞌin tyídyes bu raꞌ carijtaqui miꞌin. Vatyquej raꞌ miꞌin carijtaqui muꞌintyidyes vóshiꞌvuntyiꞌ jenꞌ buꞌyity in. Jam jụijyaꞌ vatyquej miꞌin raꞌ carijtaqui muꞌindyes jenꞌ buꞌyity amorreodyes in yojdyemꞌ q̂uinꞌ amorreosĉan jac bäꞌyi u miꞌin. Paj tsanꞌ meꞌ yụ judyeyaꞌ chätidyeꞌ yụ, tsun raꞌ carijtaqui Ayodyes —jéyacsi Josué.

¹⁶ Muꞌin muntyiꞌ jéte in: —Jam raꞌ junꞌ tsun yacchute muꞌ Ayoꞌ judyeyaꞌ carijtaqui yoctyidyes jenꞌ buꞌyity in.

¹⁷ Muꞌ Jenꞌ Ayoꞌ tsun jiꞌshupjun tsun judyeyaꞌ tsuntyiꞌ jenꞌ jiquej Egiptoĉan. Muꞌdye jiĉun tsun úñedyeꞌĉansiꞌ jac judyeyaꞌ daiꞌ äjyedyes jämꞌtaqui muꞌ ĉụiꞌsiꞌyaꞌ vej cạveꞌ tsun. Muꞌ ĉujcan tsun räjĉan miꞌedyeꞌyaꞌ yoquiꞌdyemꞌ yoctyischeꞌ jac sapaꞌjeyacsebi tsun.

¹⁸ Judyeyaꞌ muꞌ Ayoꞌ jiꞌshupcacsi räj muꞌin jaccheꞌ bäꞌyity in. Muꞌin amorreo muꞌĉan bäꞌyity in chimeꞌ muꞌ jiꞌshupcacsi. Tsun raꞌ chimeꞌ carijtaqui Ayodyes ĉaĉaij na muꞌ tsuntyiꞌ Jenꞌ —yi jéte Josué in.

¹⁹ Muꞌ Josué jéyacsi muꞌin muntyiꞌ in: —Miꞌin jam raꞌ tupuj carijtaqui Ayodyes. Muꞌ nash yirity tsäquiꞌtyity Jenꞌ. Muꞌ Jenꞌ chịj meꞌjeyacsi muꞌin yoctyiꞌcheꞌ irijyity in. Meꞌ jụijyaꞌ juchatutinte muꞌ judyeyaꞌ yacchutinte Ayoꞌ miꞌin, jam raꞌ muꞌ vayacjibunac juchaj miꞌin.

²⁰ Meꞌ jụijyaꞌ miꞌin jam yejĉoij carijtaqui Ayodyes chat qui yoctyiꞌdyes jenꞌ buꞌyity muꞌdyes qui carijtaquiyaꞌ miꞌin, paj tsanꞌ tashcheꞌ muꞌ jämꞌsiꞌ jedyeꞌ soꞌminac miꞌin, muꞌ qui ramꞌ cambiajjeyaĉan dyijyedyeꞌ muꞌ judyeyaꞌ raꞌ vaꞌtacdyeꞌ soꞌminac junꞌ qui chuc jịꞌmotsnac —jéyacsi Josué.

²¹ Muꞌin vorjete in Josué: —Jam raꞌ meꞌ jiyiꞌ. Tsun raꞌ carijtaqui Ayodyes —jéte in.

²² Muꞌ Josué jéyacsi: —Miꞌin aty seꞌvaqui jiꞌmeꞌtacdyeꞌ ĉụiꞌcheꞌ tŝọiꞌsiꞌ junꞌ chuc miꞌin aty dyimꞌtiñeꞌ paj qui carijtaqui Ayodyes —jéyacsi Josué. Muꞌin jébajte in: —Anic meꞌ aty tsun seꞌvaqui jiꞌmeꞌtacdyeꞌ ĉụiꞌsiꞌ tsun —jéte in.

²³ Josué jéyacsi: —Yacchucsevac räj miꞌin jenꞌ buꞌyity miꞌintyiꞌ in judyeyaꞌ vanacjemac ĉojtyiꞌ miꞌin Ayoꞌyaꞌ muꞌ Jenꞌ Israelĉantyiꞌyaꞌ —jéyacsi muꞌ.

²⁴ Judyeyaꞌ muꞌin muntyiꞌ in jébajte Josué in: —Tsun raꞌ carijtaqui muꞌdyes Jenꞌ Ayoꞌ tsun judyeyaꞌ raꞌ chiqueja —jéte in.

²⁵ Ọijĉan mạyedyeꞌ Siquemyaꞌ muꞌ Josué yụꞌtyeyeyacsi p̂eyacdyeꞌ junꞌ chuc raꞌ rụij bäꞌyi in judyeyaꞌ jedyeꞌ chuc yụꞌtacdyeꞌ muꞌindyes in.

²⁶ Muꞌ Josué sánacsi ọij p̂eyacdyeꞌ in mọꞌĉan ribro Jenꞌsiꞌ yụꞌtacdyeꞌ muꞌ chat qui muꞌ jäcte yirity därtyiꞌ mij chat qui muꞌ yụꞌte muꞌ mij machaĉan c̣hẹiꞌyaꞌdye mọꞌ jac pạrej yụꞌtacsis Ayodyes.

²⁷ Muꞌ Josué jéyacsi muꞌin muntyiꞌ in: —Cạvemac miꞌin uts mij. Muꞌ raꞌ shupqui yirity seꞌveꞌtyiꞌ jiꞌmeꞌtacdyeꞌ tsundyety. Uts mij aty seꞌveꞌ räj mọꞌ p̂eyacdyeꞌ muꞌ Ayoꞌ jísinꞌ tsun. Muꞌ raꞌ shupqui yirity seꞌveꞌtyiꞌ jiꞌmeꞌtacdyeꞌ miꞌincheꞌ meꞌ jụijyaꞌ miꞌin yacchubajtinte muꞌ Ayoꞌ —jéyacsi Josué.

²⁸ Chat qui muꞌ Josué jịꞌjobacseban paj qui ĉụiꞌsiꞌyaꞌ acaꞌ caꞌñibun in.

Nac Josué

²⁹ Meꞌ jiyiꞌ chat jäquiꞌve säñi Josué, Ayoꞌtyiꞌ úñity muꞌ. Josué yiriꞌ cien yiriꞌtac yómodyeꞌ tyitiꞌ muꞌ.

³⁰ Muꞌin nạ́te Josué mọꞌĉan bäꞌyedyeꞌ ĉụiꞌsiꞌĉan muꞌ, mọꞌ Timnatsera, mọꞌ bäꞌyedyeꞌ muꞌinsiꞌĉan jac Efraíntyiꞌĉan vóshiꞌ in, rocve buꞌyiꞌ muꞌ mụcuꞌ Gaas.

³¹ Muꞌin Israeltyiꞌ vóshiꞌ in carijtaqui Ayodyes tsạꞌdyemꞌ Josué meꞌdye säñiyaꞌ muꞌ. Muꞌin yejĉoij carijtaqui Ayodyes tsạꞌdyemꞌ muꞌin tashcheꞌ buꞌyity taĉantyiꞌ in, muꞌindye tashcheꞌ buꞌyity cạveꞌtyiꞌ in räj jämꞌtyes muꞌ Ayoꞌ jiquej muꞌindyes Israeltyidyes vóshiꞌ in.

³² Muꞌin Israeltyiꞌ vóshiꞌ in nabibajte in jinvun muꞌ tubibajtes in Josévunsiꞌ Egiptoĉansiꞌ mọꞌĉandye jac Jacobsiꞌ jiquej, mọꞌ jac yaꞌitacsiꞌ vạjpedyeꞌ quiꞌ cienyaꞌ ficha plata jiquej muꞌinyaꞌ Hamortyiꞌyaꞌ ạvaꞌ muꞌ, Siquemtyiꞌ jenꞌ muꞌ. Mọꞌdye jac ĉụiꞌdyestuiꞌsiꞌ jäquiꞌve muꞌinyaꞌ Josétyiꞌyaꞌ vóshiꞌ in.

³³ Chimeꞌ säñi Eleazar, Aaróntyiꞌ ạvaꞌ muꞌ. Muꞌin nạ́te in Gabaayaꞌ, mọꞌ bäꞌyedyeꞌ soꞌmetes ạvaꞌ muꞌ Finees, mọꞌ mụcuꞌves jac Efraínĉansiꞌ.