Josué 13 - Tsimane

Jac jayej chucsis in

¹ Aty anic ishoꞌ muꞌ Josué chat qui muꞌ Ayoꞌ jajiti: —Aty anic ishoꞌ mi judyeyaꞌ tacaꞌ daiꞌ mọꞌyaꞌ jac jambiꞌdyemꞌ chutyetacsis miꞌin.

² Ọij jac jambiꞌdyemꞌ chutyetacsis miꞌin: räj mọꞌ jac muꞌinsiꞌ filisteos in judyeyaꞌ gesureos in.

³ Tiyacchutiyaꞌ muꞌ cojiro Sihor shupquive buꞌyi tsun Egiptove meꞌdye Ecrónsiꞌ jac rocve buꞌyis (räj ọij jac chimeꞌ mọꞌĉan jac Canaán). Ọij jiꞌjäqueꞌ muꞌinsiꞌ jac muꞌin ĉanamꞌ ayoꞌ filisteo in. Muꞌinsiꞌ bäꞌyedyeꞌ in Gaza, Asdod, Ascalón, Gat, judyeyaꞌ Ecrón, yóyaꞌdyemꞌ bäꞌyi muꞌin aveo u in.

⁴ Judyeyaꞌ räj mọꞌ jätisves jac cananeos in tiyacchutiyaꞌ Meharayaꞌ mọꞌĉan sidoniosĉan jac meꞌdye Afec, yóyaꞌdyemꞌ tiyacchutiꞌ mọꞌ jac amorreos u in.

⁵ Judyeyaꞌ muꞌinsiꞌ jac giblita in judyeyaꞌ räj mọꞌ jac Líbano shupquive buꞌyis tsun, tiyacchutiyaꞌ Baal-gad c̣hẹiꞌyaꞌ muꞌ mụcuꞌ Hermón meꞌdye sisdyeꞌyaꞌ Hamat.

⁶ Judyeyaꞌ muꞌin mụcuꞌve bäꞌyity in tiyacchutiyaꞌ Líbano meꞌdye Misrefotmaim, ọij jiꞌjäcacsiꞌ räj muꞌin sidonio in. Yụ raꞌ jiꞌshupcacsi in muꞌyaꞌ Israeltyiꞌyaꞌ vóshiꞌ in. Jemoñeꞌ jiꞌchetetiñeꞌ ọij jac chimeꞌ muꞌindyes Israeltyiꞌ vóshiꞌ in yoj jeyacsidyemꞌ jiquej u in.

⁷ Jiꞌcheteꞌ mọꞌ jac ĉụiꞌdyes muꞌin arajtac ñuruꞌtyitydyes Israeltyiꞌ vóshiꞌ in judyeyaꞌ chimeꞌ muꞌ choc ñuruꞌtyity muꞌin Manaséstyiꞌ vóshiꞌ in.

Jiꞌchetacdyeꞌ jacsiꞌ shupquive tsun Jordán

⁸ Muꞌ yoctyiꞌ choc ñuruꞌtyity Manaséstyiꞌ vóshiꞌ in judyeyaꞌ muꞌin Rubéntyiꞌ vóshiꞌ in judyeyaꞌ muꞌin Gadtyiꞌ vóshiꞌ in aty mọꞌyaꞌ muꞌinsiꞌ jac muꞌin. Mọꞌ jac soꞌmacsis Moisésyaꞌ jiquej shupquive tsun Jordánve. Mọꞌ jac yụꞌtyeyeyacsis jiquej Moisésyaꞌ, Ayoꞌtyiꞌ úñity muꞌ.

⁹ Mọꞌ jac tiyacchutiꞌ Aroeryaꞌ mọꞌ bäꞌyedyeꞌ sinve buꞌyis mọꞌ chạdyeꞌĉan Arnón judyeyaꞌ mọꞌyaꞌ mọꞌ yocsiꞌ bäꞌyedyeꞌ chạdyeꞌĉansiꞌ buꞌyis. Mọꞌĉansiꞌ jac mọꞌyaꞌ räj mọꞌ mojij Medeba meꞌdye Dibónyaꞌ.

¹⁰ Mọꞌĉan jac mọꞌyaꞌ räj mọꞌin bäꞌyedyeꞌ amorreos in. Yoquiꞌdyemꞌ ayoꞌbuꞌyi muꞌ Sehón, muꞌ Hesbónĉantyiꞌ ayoꞌ jiquej u. Räj mọꞌ jac junꞌ quiꞌ chuc tiyacchutiꞌ mọꞌ jac amonitas in.

¹¹ Mọꞌĉan jac mọꞌyaꞌ mọꞌ Galaad, judyeyaꞌ mọꞌ jac muꞌinsiꞌ Gesurĉantyiꞌ in judyeyaꞌ Maacaĉantyiꞌ in, judyeyaꞌ räj muꞌ mụcuꞌ Hermón, judyeyaꞌ räj mọꞌ Basán meꞌdye Salca.

¹² Mọꞌĉan jac mọꞌyaꞌ räj mọꞌ ayoꞌbuꞌyedyeꞌ Ogsiꞌ jiquej. Muꞌ ayoꞌ buꞌyi mọꞌcheꞌ jac Basán. Muꞌ ayoꞌ buꞌyi mọꞌcheꞌ bäꞌyedyeꞌ in Astarot judyeyaꞌ Edrei. Muꞌ Og yirity jadyiquity refaíta in, därmuntyiꞌ in. Muꞌ Moisés jiꞌpenacsi in judyeyaꞌ jectyetacsiꞌ jac muꞌin jiquej.

¹³ Paj tsanꞌ meꞌ muꞌin Israeltyiꞌ vóshiꞌ in jam jiꞌshupcacsi muꞌin Gesurĉantyiꞌ in judyeyaꞌ muꞌin Maacaĉantyiꞌ in. Meꞌdyes qui muꞌin q̂uinꞌ taĉan bäꞌyi muꞌintum Israeltyiꞌtum vóshiꞌ in.

¹⁴ Muꞌ Moisés jam soꞌmacsi jac muꞌin Levítyiꞌ vóshiꞌ in ĉaĉaij na mọꞌ jiꞌcoꞌshayacdyeꞌ Jenꞌdyes, muꞌ Ayoꞌ Israelĉantyiꞌ, mọꞌ shupquiꞌ muꞌinsiꞌ soꞌmacdyeꞌ yoj jeyacsidyemꞌ jiquej u.

¹⁵ Muꞌ Moisés soꞌmacsi muꞌin ñuruꞌtyity Rubéntyiꞌ vóshiꞌ in ọij jac.

¹⁶ Mọꞌ jac tiyacchuti Aroeryaꞌ, mọꞌ bäꞌyedyeꞌ sinve buꞌyis mọꞌ chạdyeꞌĉan Arnón, judyeyaꞌ mọꞌyaꞌ mọꞌ yocsiꞌ bäꞌyedyeꞌ chạdyeꞌĉansiꞌ chidyiꞌĉanyaꞌ buꞌyis. Mọꞌ jac mọꞌyas räj mọꞌ mojij jiyiꞌyaꞌ Medeba

¹⁷ meꞌdye Hesbón judyeyaꞌ räj mọꞌin bäꞌyedyeꞌ mojijĉansiꞌ in: Dibón, Bamot-baal, Bet-baal-meón,

¹⁸ Jahaza, Cademot, Mefaat,

¹⁹ Quiriataim, Sibma, Zaret-sahar, mụcuꞌcheꞌ buꞌyis mojijĉan,

²⁰ Bet-peor, mọꞌin chạdyeꞌ Pisgasiꞌ in judyeyaꞌ Bet-jesimot.

²¹ Chimeꞌ räj mọꞌin bäꞌyedyeꞌ mojijĉansiꞌ in judyeyaꞌ räj Sehónsiꞌ ayoꞌbuꞌyedyeꞌ. Muꞌ ayoꞌ buꞌyity Hesbónĉan jiquej, muꞌindyes amorreo in. Muꞌ Moisés jiꞌpente muꞌ jiquej judyeyaꞌ muꞌin ayoꞌ Madiánĉantyiꞌ in: Evi, Requem, Zur, Hur judyeyaꞌ Reba, muꞌin ayoty ạvaꞌ in muꞌĉan jac bäꞌyity in, muꞌin yiriꞌyaꞌ in Sehóntum jiquej in.

²² Muꞌyaꞌ yirity damꞌdye ujactyiꞌ muꞌintum chutidyeꞌĉan jiquej muꞌinyaꞌ Israeltyiꞌyaꞌ vóshiꞌ in. Muꞌ Balaam, Beortyiꞌ ạvaꞌ, muꞌ cọcojsiꞌnaquity.

²³ Mọꞌ jac muꞌinsiꞌ Rubéntyiꞌ vóshiꞌ in dyäqui tsävyaꞌ Jordánsiꞌ mọꞌ. Mọꞌin bäꞌyedyeꞌ jacĉansiꞌ in, därsiꞌ bäꞌyedyeꞌ in judyeyaꞌ miquis bäꞌyedyeꞌ in, ĉụiꞌdyes shupquiꞌ muꞌindyes ñuruꞌtyity Rubéntyiꞌ vóshiꞌ in.

²⁴ Muꞌ Moisés soꞌmacsi muꞌin ñuruꞌtyity Gadtyiꞌ vóshiꞌ in ọij jac.

²⁵ Mọꞌ jac Jazerĉansiꞌ judyeyaꞌ räj mọꞌin bäꞌyedyeꞌ Galaadĉansiꞌ in. Judyeyaꞌ chocyaꞌ quiꞌ jac amonitas in meꞌdye Aroer, mọꞌ quic̣henꞌ buꞌyis bäꞌyedyeꞌ Rabáyaꞌ.

²⁶ Judyeyaꞌ tiyacchutiꞌyaꞌ Hesbón meꞌdye Ramatmizpa judyeyaꞌ Betonim. Judyeyaꞌ tiyacchutiꞌyaꞌ Mahanaim meꞌdye mọꞌ jac Debirsiꞌ.

²⁷ Judyeyaꞌ mojijĉan: Bet-aram, Bet-nimra, Sucot, Zafón, judyeyaꞌ mọꞌ jac jambiꞌ soꞌmacsis mọꞌĉan ayoꞌbuꞌyedyeꞌ Sehónsiꞌ, Hesbónĉantyiꞌ ayoꞌ jiquej. (Mọꞌ jac shupquive buꞌyis tsun Jordányas meꞌdye jadyicve mọꞌ Mar Galilea.)

²⁸ Mọꞌin bäꞌyedyeꞌ jacches in, därsiꞌmunsiꞌ bäꞌyedyeꞌ in judyeyaꞌ miquiꞌmunsiꞌ bäꞌyedyeꞌ in, ĉụiꞌdyes shupquiꞌ muꞌindyes ñuruꞌtyitydyes Gadtyiꞌ vóshiꞌ in.

²⁹ Muꞌin vóshiꞌ Manaséstyiꞌ in choc buꞌyiꞌ päräꞌ ñuruꞌtyity shupqui in. Muꞌ Moisés soꞌmacsi uts choc ñuruꞌtyity Manaséstyiꞌ vóshiꞌ in ọij jac ĉụiꞌdyes muꞌin, muꞌindyes ñuruꞌtyity in muꞌĉantyiꞌ choc ñuruꞌtyity Manaséstyiꞌ in.

³⁰ Mọꞌ jac tiyacchutiꞌ Mahanaimyaꞌ judyeyaꞌ mọꞌĉan mọꞌyaꞌ räj mọꞌ jac Basán, räj mọꞌ ayoꞌbuꞌyedyeꞌ Ogsiꞌ Basánĉantyiꞌ jiquej judyeyaꞌ räj mọꞌin bäꞌyedyeꞌ Jairsiꞌ Basánĉansiꞌ jiquej, jäbän quiꞌtac bäꞌyedyeꞌ in,

³¹ chocyaꞌ quiꞌ mọꞌ jac Galaad judyeyaꞌ mọꞌin bäꞌyedyeꞌ in Astarot judyeyaꞌ Edrei (mọꞌin ayoꞌsiꞌ bäꞌyedyeꞌ Ogsiꞌ in Basánĉansiꞌ jiquej in). Ọij jac muꞌindyes Maquirtyiꞌ vóshiꞌ in. Muꞌ Maquir ạvaꞌ muꞌ Manaséstyiꞌ. Ọij jac muꞌindyes in chocyaꞌ quiꞌ Maquirtyiꞌ vóshiꞌ in, muꞌin ñuruꞌtyity muꞌĉantyiꞌ in.

³² Ọij jiꞌjäqueꞌ mọꞌ jac soꞌmacsis Moisésyaꞌ jiquej yoquiꞌdyemꞌ muꞌyaꞌ Moisés jiquej u mojijĉan Moabsiꞌ, quic̣henꞌ Jericó, nopej Jordán shupquive buꞌyiꞌ tsun.

³³ Muꞌ Moisés jam soꞌmacsi jac muꞌin Levítyiꞌ vóshiꞌ in. Muꞌ Jenꞌ Ayoꞌ Israelĉantyiꞌ, muꞌdye shupqui muꞌinsiꞌ soꞌmacdyeꞌ yoj jeyacsidyemꞌ jiquej u.