Josué 1 - Tsimane

Jenꞌ jafaijti Josué

¹ Aty meꞌsiꞌ säñi muꞌ Moisésvun, Ayoꞌtyiꞌ úñity muꞌ, chat qui muꞌ Jenꞌ jafaijti muꞌ Josué, Nuntyiꞌ ạvaꞌ muꞌ, muꞌdye Josué Moisésvuntyiꞌ nọ́taquity jiquej. Jajiti Ayoꞌ:

² —Aty säñi Moisés úñityvun yụ, meꞌdyes qui mi judyeyaꞌ räj uts muntyiꞌ in sacyi ram judyeyaꞌ nobi ram muꞌ cojiro Jordán. Siti ram mọꞌ nopej buꞌyis jac, mọꞌdye jac yụ raꞌ soꞌmacsi muꞌin Israeltyiꞌ vóshiꞌ in.

³ Junaꞌ ĉụiꞌ tŝọiꞌyaꞌ yuj mi mọꞌdye jac, ọijdye jac yụ raꞌ soꞌmeyac yoj jajitidyemꞌ Moisés jiquej u.

⁴ Meꞌ raꞌ tuputucdyemꞌ jacsimꞌ: tiyacchutiyaꞌ mọꞌ cäjyasĉan jac jätisves, rocve raꞌ jịjcaiꞌ meꞌdye mọꞌ jac chaꞌsheꞌ Líbano. Tiyacchutiyaꞌ muꞌ därtyiꞌ cojiro Eufrates siticheꞌ tsun raꞌ jịjcaiꞌ meꞌdye chaꞌsheꞌ mọꞌ Mar Mediterraneo.

⁵ Itŝij tyi raꞌ tupuj ñutsjiĉuñin mi räj mọꞌin mạyedyeꞌ tsạꞌdyemꞌ mi junꞌ quiꞌ chuc jadyic mi. Yojdyemꞌ yụ penꞌdyetute Moisésvun jiquej u, meꞌdye raꞌ yụ penꞌdyetuye. Jam raꞌ yụ fitupjeye, mijam raꞌ yacchuye.

⁶ Fer buꞌva mi, sóñiꞌyeva mi. Mi raꞌ tashi judyeyaꞌ raꞌ jiꞌsitacsi mi uts muntyiꞌ in mọꞌĉandye jac soꞌmacsis yụ vóshiꞌvunyaꞌ jiquej, tsäquiꞌyisyaꞌ p̂eyacdyeꞌ yụ soꞌmacsi.

⁷ Fer buꞌvamꞌ judyeyaꞌ mujuꞌchaꞌ sóñiꞌyeva. Dyijyedyeꞌtum raꞌ chäquibutiꞌ mi mọꞌ yụꞌtacdyeꞌ yụ́siꞌ, mọꞌ yụꞌtac Moisésyaꞌ úñityvunyaꞌ yụ jiquej. Jeñej yirity chụiꞌ jịjcaijtyiꞌ meꞌ raꞌ mi chiquem. Jam raꞌ tacve jịjcaij peñi mi, mijam raꞌ q̂uimve jịjcaij peñi mi. Meꞌ jụijyaꞌ mi chụiꞌ chiqueꞌ mọꞌ, bijoij ram junaꞌ ĉụiꞌ jịjcaij mi.

⁸ Chụꞌĉan mi mọꞌyaꞌ raꞌ ọij yụꞌtacdyes sánacdyeꞌ, jam raꞌ jiꞌmoñem. Mọꞌcheꞌ raꞌ dyijyi mi mạij judyeyaꞌ tsedyedyeꞌ. Meꞌ buꞌyi ram jịꞌcätsaqui räj dyijyedyeꞌ mọꞌĉansim. Chat qui raꞌ bijoij mi, jam raꞌ jayejjoij bäꞌyim.

⁹ ¿Jam adac yụ, mítyiꞌ Jenꞌ, yụꞌtyeyety? Meꞌdyes qui fer buꞌva mi, sóñiꞌyeva. Jam raꞌ noiꞌyi mi, mijam raꞌ cajotyitim ĉaĉaij na yụ, muꞌ Jenꞌ Ayoꞌ mi, penꞌdyetuye raꞌ mi junaꞌ ĉụiꞌ jịjcaijyaꞌ mi —yi muꞌ Jenꞌ jajiti Josué.

Jäꞌmiiꞌtyi in paj qui Canaánĉan jịjcaij in

¹⁰ Josué soꞌmacsi jutacdyeꞌ muꞌin tashcheꞌ buꞌyity in. Yi muꞌ:

¹¹ —Tạij miꞌin, socorꞌjevac räj dyäquedyeꞌyaꞌ, jéyacsevac muntyiꞌ in: "Jämꞌyụꞌtacac säcsedyeꞌ miꞌin ĉaĉaij na chibinyisĉan mạyedyeꞌ nobi raꞌ miꞌin muꞌ cojiro Jordán chat qui raꞌ ĉụiꞌdyestutiñeꞌ miꞌin mọꞌ jac muꞌ Jenꞌ aty soꞌminac miꞌin", meꞌ raꞌ jéyacsi miꞌin —yi muꞌ Josué, jéyacsi muꞌin tashcheꞌ buꞌyity in.

¹² Josué qui jéyacsi muꞌin Rubéntyiꞌ vóshiꞌ in judyeyaꞌ muꞌin Gadtyiꞌ vóshiꞌ in judyeyaꞌ muꞌin chocyaꞌ quiꞌ ñuruꞌtyity Manaséstyiꞌ vóshiꞌ in, jéyacsi:

¹³ —Dyijtubadac miꞌin mọꞌ p̂eyacdyeꞌ jínacsiꞌ jiquej Moisésyaꞌ, muꞌ úñity Jenꞌtyiꞌ muꞌ. Muꞌ Moisés jínac junꞌ chuc muꞌ Jenꞌ soꞌmibunac raꞌ jịꞌjutyitidyes miꞌin ọijĉan jac pamꞌve buꞌyis. Miꞌindyes mọmoꞌ raꞌ shupquiꞌ ọij jac.

¹⁴ P̂en miꞌin judyeyaꞌ ạvaꞌ miꞌin judyeyaꞌ cuꞌdyeꞌ miꞌin taĉan ramꞌ in ọijĉan jac pamꞌve buꞌyi muꞌ cojiro Jordán soꞌminacsiꞌ Moisésyaꞌ jiquej. Paj tsanꞌ meꞌ räj miꞌin sonꞌ sondaro yụꞌtactyiꞌ in, chutidyestumtyiꞌ miꞌin, jemoñeꞌ tashi nobi miꞌin muꞌ cojiro Jordán. Jäquiꞌ raꞌ nobi miꞌintyiꞌ vojity in. Jemoñeꞌ miꞌin nọ́tacsi chutidyeꞌĉan.

¹⁵ Meꞌ ram yejĉoij nọ́tacsi muꞌin junꞌ quiꞌ chuc muꞌ Ayoꞌ soꞌmacsi muꞌin jịꞌjutyitidyeꞌ chutidyeꞌyaꞌ, junꞌ quiꞌ chuc aty itŝiꞌ chutidyeꞌ muꞌinsiꞌĉan jac. Nọ́tacsi ram junꞌ quiꞌ chuc muꞌin aty ĉụiꞌdyestutiñeꞌ mọꞌ jac soꞌminacsiꞌ raꞌ muꞌ Jenꞌ. Chat qui raꞌ caꞌñibun miꞌin ĉụiꞌsiꞌĉan jac. Bäꞌban raꞌ miꞌin ọijĉan jac soꞌminacsiꞌ Moisésvunyaꞌ jiquej Jenꞌtyiꞌ úñity muꞌ. Ọij jac pamꞌve buꞌyis Jordán shupquive tsun —yi muꞌ Josué jéyacsi.

¹⁶ Muꞌin vorjete in Josué, jéte in: —Jụꞌñis ĉụiꞌ yụꞌtacdyeꞌ yuꞌtyitiĉaꞌ mi, mọꞌ raꞌ meꞌjeꞌ tsun judyeyaꞌ junaꞌ ĉụiꞌ jutitiĉaꞌ, muꞌve raꞌ jịjcaij tsun.

¹⁷ Tsun raꞌ chiqueyac cäts yojdyemꞌ chiquete Moisésvun jiquej u tsun. Paj muꞌ Jenꞌ penꞌdyetun cäts yojdyemꞌ muꞌ penꞌdyetute Moisésvun jiquej u.

¹⁸ Tyi chuc yacchubuntyiꞌ p̂eyacdyeꞌ mi, jam damꞌ chäquibun in, paj tsanꞌ jụꞌñis ĉụiꞌ yụꞌtacdyeꞌ mi yụꞌtyeyacsis, uts jam chäquibuntyiꞌ in sänꞌdyeꞌ raꞌ vaꞌtacdyeꞌ soꞌmac muꞌindyes in. Meꞌdyes qui fer buꞌva mi, sóñiꞌyevam —jéte Josué in.