Jonás 1 - Tsimane

Jonás ĉaꞌjoyete tsanꞌ Jenꞌ ĉúti

¹ Ayoꞌ jasoꞌmiti tsanꞌ p̂eyacdyeꞌ muꞌ Jonás, Amitaityiꞌ ạvaꞌ muꞌ. Jajiti:

² —Tạij mi därsiꞌĉan bäꞌyedyeꞌ jịjcava Níniveve, jéyacseva muꞌĉan bäꞌyity in junꞌ chuc raꞌ yụ meꞌjeyacsi, ĉaĉaij na anic där ac̣hiꞌ jämꞌtaqui in yụ́siꞌyaꞌ vej in —yi muꞌ Jenꞌ jajiti Jonás.

³ Muꞌ na jam damꞌ p̂ucush chiquepte p̂eyacdyeꞌ muꞌ, meꞌ tsanꞌ jasoꞌmiti p̂eyacdyeꞌ ĉaꞌjodyemꞌ dyijtuiꞌ muꞌ Ayodyes, meij mọmoꞌ jịjcaij Jopeve, yóyaꞌdyemꞌ sojquitiyaꞌ u in marĉantyiꞌ covamba in. Muꞌyaꞌ dạcte yirity covamba aty raꞌ Tarsisve jịjcaijtyiꞌ. Yaꞌityeꞌ muꞌyaꞌ miꞌedyeꞌ muꞌ, muꞌcheꞌ qui dyäch, Tarsisve raꞌ tsanꞌ jịjcaij muꞌ, chat sacti in.

⁴ Aty moch yéjoij in, chat qui muꞌ Ayoꞌ jutete tyiꞌmu tsäquiꞌtyity, därmun vacamꞌquiꞌ ojñiꞌ tsäquiꞌ tyeiꞌ, tupuj patsacjete covamba.

⁵ Muꞌin bächäiꞌtyiꞌ jedyeꞌ in jämꞌ batajyacñi in, ĉaĉaij na noiꞌyi in, cavin cudyiti jämꞌtacdyeꞌcheꞌ tsanꞌ in. Muꞌ na tyiꞌmu jam junꞌ dyäqui, chat qui vaꞌcajquiqui in jedyeꞌ mọꞌĉansiꞌ muꞌin paj qui cheꞌyeban covamba muꞌin. Muꞌ na Jonás ọĉanyascheꞌ piso chạij, muꞌĉan muꞌ säñej ĉọshi.

⁶ Chat qui muꞌ muꞌcheꞌdye ayoꞌ ĉọcte muꞌ Jonás jéte: —¿Junꞌ mi meꞌ ĉọshi u? Vañinyebada tyä, cọdyeme ĉụiꞌtyiꞌ Jenꞌ mi. Vatyquej raꞌ ñịbeꞌ ĉúsinꞌ muꞌ, vatyquej raꞌ jiꞌc̣honsinꞌ.

⁷ Muꞌin bächätety covamba in jämꞌ noiꞌyedyeꞌtum jítidyeij in: —Damꞌdye jämꞌ yụꞌtyejaꞌ majmadyeꞌ, tyis a ĉa juchaj muꞌ ayij ọij jịꞌĉojtyejas q̂uinꞌ. Meꞌdye yụꞌtyeꞌ in majmadyeꞌ muꞌin, Jonáscheꞌ mọꞌ tŝọiꞌ.

⁸ Chat qui jéte in: —Jeshaꞌ jítiĉamꞌ tsun ¿junꞌ buty meꞌjisinꞌ ọij q̂uinꞌ? ¿Junꞌ dash jijtutiĉaꞌ tsun miꞌin? ¿Junatyiꞌ mi u? ¿Jedyeꞌ bäꞌyedyeꞌ um? ¿Tyi caꞌ mi muntyiꞌ? —yi jéte in.

⁹ Vorjeyacsi Jonás: —Hebreo nash yụ, yụ nash cudyitity Jehovácheꞌ, muꞌ mạyedyeꞌchety Jenꞌ, muꞌ jämꞌtyety mar judyeyaꞌ ọij jac —yi jéyacsi muꞌ Jonás.

^10-11 Chimeꞌdye jéyacsi muꞌ Jonás junꞌ chuc ĉaꞌjoyete Ayoꞌ. Aty seꞌvepteyaꞌ p̂eyacdyeꞌ in judyeyaꞌ cạveꞌ in mọꞌ ojñiꞌ dadamꞌ mọjoꞌchaꞌ vacamꞌquiꞌ, dadamꞌ qui mujuꞌchaꞌ bataj tyeij in, jéte qui in: —¿Junꞌ dash meꞌ mi? ¿Junꞌjeyac buty raꞌ mi tupuj paj qui ọij dyäcyiꞌ ojñiꞌ judyeyaꞌ tyiꞌmu? —jéte in.

¹² Vorjeyacsi Jonás: —Damꞌdye jämꞌ vaꞌquicdyiĉaꞌ ojñiꞌĉan yụ miꞌin, chat qui raꞌ dyäquiꞌ ojñiꞌ judyeyaꞌ tyiꞌmu. Chịj nash yụ yụ́dyes ọij ayij jịꞌĉojtyejas q̂uinꞌ yiriꞌyaꞌ —yi muꞌ Jonás jéyacsi.

¹³ Jam tsanꞌ mạꞌjeꞌ vaꞌquecte in, anic tsanꞌ fer joiꞌdyi in mạꞌjeꞌ tsanꞌ cavin sojquiti ĉúti in, jam qui namꞌ junꞌ in, ĉaĉaij na dadamꞌdye mọjoꞌchaꞌ vacamꞌquiꞌ mọꞌ mar.

Vaꞌtacdyeꞌ Jonássiꞌ

¹⁴ Chat qui cọdyete in muꞌ Jehová jéte in: —Mi Ayoꞌ, uts raꞌ vaꞌquecte jụijyaꞌ tsun, ¿junꞌ qui bu raꞌ tsun? Tsun cọdyeyac mi, jam raꞌ junꞌjitiĉaꞌ tsun miꞌin. Meꞌ tsanꞌ mus itŝiꞌ juchaj jụijyaꞌ, jam na ramꞌ tsun soꞌmitiĉaꞌ vaꞌtacdyeꞌ miꞌin sänꞌdyedyes muꞌ, ĉaĉaij na mi Ayoꞌ ĉụiꞌsiꞌyaꞌ dyijyedyeꞌ yi mi junꞌ chuc mạꞌjeꞌ mi, ĉụiꞌsiꞌyaꞌ ferdyeꞌ mi jutete uts tyiꞌmu mi —yi in cọdacdyeꞌyaꞌ muꞌin.

¹⁵ Chat qui tacyejoij ojñiꞌĉan muꞌ Jonás. Pusaijsijte mọmoꞌ in muꞌ, dyäc vatyquej tyeiꞌ ojñiꞌ judyeyaꞌ tyiꞌmu.

¹⁶ Muꞌchety in aty meꞌ cạveꞌ in, jämꞌ irijyi Ayoꞌcheꞌ muꞌin in judyeyaꞌ jiꞌcoꞌshayeꞌ muꞌdyes in. Chimeꞌdye yụꞌtyeyete p̂eyacdyeꞌ muꞌin junꞌ qui chuc raꞌ bäꞌyi in.

¹⁷ Muꞌ na Ayoꞌ cavin juteꞌ yiris tạbedyeꞌ anic chäcdyis paj qui mọꞌ coñinꞌjajiti muꞌ Jonás. Chibin mạyedyeꞌ tyäpi muꞌĉan tạbedyesĉan voꞌco muꞌ Jonás.