Jị'cavacdye' 9 - Tsimane

Jadyiquisdyety boñedyeꞌ in

¹ Ĉanamꞌyity anjer pejtyeꞌ boñedyeꞌ muꞌ. Pejyedyeꞌĉandyemꞌ cạvete yụ yirity ọ́rotaꞌ buꞌyity mạyedyeꞌcheꞌ jijtuijtyiꞌ. Muꞌ soꞌmac c̣hácaquis mọꞌ mochĉansidyes toꞌ,

² vanacjeꞌ mọꞌ mochĉansiꞌ toꞌ, anic tyimꞌdyeiꞌ mọꞌĉan jịꞌsaꞌ shupquiꞌ toꞌĉansiꞌ, jeñej därsiꞌĉansiꞌ jorno, meꞌ tyeiꞌ shupquiꞌ mọꞌĉan. Mọꞌ qui jịꞌsaꞌ tomajtete muꞌ tsun judyeyaꞌ muꞌ tyiꞌmu chimeꞌ.

³ Mọꞌĉandye jịꞌsaꞌĉan shupquiꞌ daiꞌ jeꞌñeñes shíñu in, jaccheꞌ tŝọiꞌ in. Mọꞌin shíñu in anic ferdyeꞌ soꞌmac in paj qui chịꞌ in pachyiꞌ mọꞌin in, yojdyemꞌ ijtyiquij o, meꞌ ĉätinꞌdyeꞌ mọꞌinsiꞌ in.

⁴ Mọꞌin jéyac in paj qui jam biruructyiꞌ in mijam qui däräꞌ jebeiꞌ in, muntyituiꞌ mọmoꞌ in, tyi chuc jam meꞌchuptety in Jenꞌsiꞌ cac̣htacdyeꞌ muꞌ jáficheꞌ muꞌin, muꞌin raꞌ paꞌchacsiꞌ in.

⁵ Mọꞌin shíñu buꞌyis in yụꞌtac raꞌ in ĉanamꞌ ịvaj, meꞌquiꞌ raꞌ paꞌchacsiꞌ muntyiꞌ in, därsiꞌ raꞌ ñịbedyes cạveꞌ in, jam qui na ramꞌ tupuj ijacsiꞌ in, yojdyemꞌ ijtyiquij o, meꞌ raꞌ ĉätinꞌdyeꞌ mọꞌin.

⁶ Aty raꞌ ayijyaꞌ mọꞌ tupudyeꞌ, anic raꞌ där ñịbeꞌ cạveꞌ muntyiꞌ in, mạꞌjeꞌ raꞌ tsanꞌ säñi ĉúti in jam qui na ramꞌ junꞌ dạqueꞌ sänꞌdyeꞌ in, queveꞌ raꞌ tsanꞌ sänꞌdyedyes in, mijam qui na ramꞌ junꞌ buꞌyi dạqueꞌ in paj qui säñi in.

⁷ Mọꞌin shíñu buꞌyis in jeñej buꞌyi cavayo chutidyedyes, meꞌ buꞌyacñiꞌ mọꞌin in. Joꞌnoꞌcheꞌ mọꞌin meꞌchuiꞌ in jeꞌñes ĉästacdyeꞌ oro, vejyaꞌ na in jeꞌñeiꞌ muntyiꞌ in.

⁸ Fin na mọꞌin jeꞌñeiꞌ munsis in, modyin na mọꞌin jeꞌñeij pupujrity, joꞌmeij modyin mọꞌin.

⁹ Eꞌfeyaꞌ na mọꞌin meꞌchuiꞌ in jeꞌñes ñutsyedyes fiyero, judyeyaꞌ fer mạꞌiꞌ pavaj mọꞌin, jeñej yiꞌ chutidyedyes careto in, jiꞌp̂iqueꞌyaꞌ cavayo in, yiꞌ mạꞌiꞌ pavaj mọꞌin.

¹⁰ Mọꞌ na jịj mọꞌin damꞌchechej cọ́di mọꞌin, jeꞌñeiꞌ ijtyiquis cọ́dimꞌ, joꞌmemeiꞌ mọꞌin. Mọꞌyaꞌ ñịbeꞌtacsiꞌ muntyiꞌ in, ĉanamꞌ ịvaj meꞌtacsiꞌ in.

¹¹ Muꞌ ayoꞌ mọꞌin shíñuty in, muꞌ anjer muꞌ ĉọjcaiꞌtyiꞌ mochĉansiꞌ toꞌ, muꞌ ayoꞌ mọꞌin. Hebreosĉan p̂eyacdyeꞌ tịj muꞌ Abadón, griegosĉan na Apolión meꞌ tịj ayos mọꞌin. Apolión yiꞌ ca yiꞌ "Ac̣hiꞌtacsis".

¹² Jiyiꞌ mọꞌ tashches vaꞌtacdyeꞌ, tacaꞌ qui namꞌ mọꞌyaꞌ päräꞌdyety jayej in.

¹³ Jäbänyity anjer pejtyeꞌ mọꞌ boñedyeꞌ muꞌ. Pejyedyeꞌĉandyemꞌ seꞌveꞌ yụ yiris p̂eyacdyeꞌ, mọꞌĉan shupquis vạjpedyeꞌvesĉan chaꞌras mọꞌsiꞌ jiꞌcoꞌshayacdyeꞌsiꞌ oro, mọꞌ Jenꞌsiꞌyaꞌ buꞌyis vej.

¹⁴ Mọꞌ p̂eyacdyeꞌ seꞌves yụ yiꞌ jéte muꞌ jäbänyity anjer: —Dajjeyacseva muꞌin vạjpedyeꞌtyity anjer in, muꞌin c̣hoc̣hoꞌcocoty därtyiꞌve cojiro in, Eufratesve.

¹⁵ Meꞌdye muꞌ dajtacsi, chat qui muꞌin sacti in, ijacsequi in arajdye chocyaꞌ quiꞌ muntyiꞌ ijacsi in, ĉaĉaij na muꞌin meꞌdyetydye yụꞌtac in aty muꞌin jäꞌmiiꞌtyi in paj qui ujacsi in, aty ayijyaꞌ mọꞌ tupudyeꞌ, junꞌsiꞌ chuc chaꞌsheꞌ in mọꞌ yómodyeꞌ, judyeyaꞌ ịvaj, judyeyaꞌ mạyedyeꞌ judyeyaꞌ mọꞌ hora bisvaꞌques in.

¹⁶ Yụ seꞌveꞌ mọꞌ p̂eyacdyeꞌ juñucsiꞌ chuc muꞌin in cavayochety väc̣häꞌtyity in, anic jiyi daiꞌ muꞌin in, jeñej päräꞌ quiꞌ cien millones in, meꞌtum muꞌin in.

¹⁷ Quivij jịꞌcavac yụ meꞌ cạvacsi yụ jeꞌñeñes cavayo in judyeyaꞌ muꞌcheꞌ foquiquiꞌ väc̣häꞌtyity in. Muꞌin ñutsyedyestum eꞌfeyaꞌ in, anic p̂údyedyes muꞌin judyeyaꞌ yushñuiꞌ muꞌin judyeyaꞌ cotyicotyidyeiꞌ chimeꞌ muꞌin. Mọꞌ na cavayos joꞌnoꞌ mọꞌin jeꞌñeiꞌ pupujris joꞌnomꞌ, joꞌmemeiꞌ mọꞌin in. Chụꞌĉan na mọꞌin tŝij shupquiꞌ jịꞌsaꞌtum judyeyaꞌ azufretum chimeꞌ.

¹⁸ Chụꞌĉansiꞌyaꞌ tŝij judyeyaꞌ jịꞌsaꞌ judyeyaꞌ azufre, mọꞌyaꞌ ijacsiꞌ muntyiꞌ in, arajdye chocyaꞌ quiꞌ muntyiꞌ ijacsiꞌ in.

¹⁹ Cavayos ferdyeꞌ mọꞌin chụꞌĉan shupquiꞌ judyeyaꞌ cọ́dicheꞌ chimeꞌ mọꞌin, damꞌcheꞌ jeñej nassiꞌ joꞌnomꞌ joꞌmeiꞌ, mọꞌyaꞌ cọ́diyaꞌ mọꞌin ñịbeꞌtacsiꞌ muntyiꞌ in.

²⁰ Muꞌin na jiꞌshucdyity jam ijactyiꞌ vaꞌtacdyeꞌyaꞌ jiquej in, mijam muꞌin dyijyeban juchajcheꞌ in, mijam farajjeꞌ in aꞌc̣his dyijyedyeꞌ muꞌin. Yejĉoij mọmoꞌ timaꞌqueꞌ sọyoꞌ in judyeyaꞌ dyụꞌtsacvaꞌjoij jämꞌtacdyeꞌyaꞌ in. Oro jämꞌtacsi in, judyeyaꞌ plata in judyeyaꞌ bronce in, mij in judyeyaꞌ son in, meꞌ meꞌ jämꞌtacsi in. Meꞌ tsanꞌ mọꞌin jam naijtiꞌ in mijam seꞌvaquiꞌ in mijam miꞌiꞌ in, ọij na timaꞌqueꞌ in.

²¹ Yejĉoij ijatidyeij in judyeyaꞌ cọcojsiꞌnaqui in judyeyaꞌ voꞌvoij in judyeyaꞌ shuꞌaij chimeꞌ in, mijam damꞌ dyijyeban juchajcheꞌ in.