Jị'cavacdye' 7 - Tsimane

Muꞌin cac̣htacdyeꞌtumtyiꞌ Jenꞌsiꞌ in 144,000 in

¹ Aty meꞌsiꞌ cạvacsi yụ vạjpedyeꞌ anjer in, yirity rụiꞌcujcuij tätscäiꞌcheꞌ jac jätisve buꞌyi, yoctyiꞌ na tätscäiꞌcheꞌ jac rocve muꞌ, yoctyiꞌ na tätscäiꞌcheꞌ jac jijtuijve tsun muꞌ, yoctyiꞌ na tätscäiꞌcheꞌ jac siticheꞌ muꞌ tsun. Muꞌin ñutschute in muꞌ vạjpedyeꞌve jijtuijtyiꞌ tyiꞌmu paj qui jam jac fujtyeꞌ, mijam qui fujtyeꞌ mar mijam qui soncheꞌ tŝọij chimeꞌ muꞌ tyiꞌmu.

² Chimeꞌdye yoctyiꞌ cạvete anjer yụ pamꞌve muꞌ jijtuij. Muꞌ meꞌchupte cac̣htaquis Jenꞌsiꞌ muꞌ, muꞌ tsạꞌtyiꞌ Jenꞌ. Muꞌ anjer cạvetety yụ fayacsi muꞌin vạjpedyeꞌtyity anjer in, muꞌin soꞌmacsity ferdyeꞌ in paj qui muꞌin ac̣hiꞌtyeꞌ jac in judyeyaꞌ mar.

³ Fer fayacdyeꞌĉan p̂eyaqui jéyacsi: —Jambiꞌ raꞌ ac̣hiꞌtiñeꞌ mọꞌ jac judyeyaꞌ mar judyeyaꞌ son in, junꞌ quiꞌ chuc tsun cac̣htacdyeꞌ soꞌmacsi jáficheꞌ muꞌin úñity in tsuntyiꞌcheꞌ Jenꞌ —yi jéyacsi muꞌ.

⁴ Chimeꞌdye yụ seꞌveꞌ yiris p̂eyacdyeꞌ p̂eyacsi muꞌin cac̣htacdyeꞌtumtyiꞌ in, muꞌin yiriꞌ cien vạjpedyeꞌ quiꞌtac vạjpedyeꞌ jiyi mirtyity in, meꞌsiꞌ muꞌin in, yedyej Israeltyiꞌ vóshiꞌ in.

⁵ Judátyiꞌ ñuruꞌtyity in, yiriꞌtac päräꞌ jiyi mir in, meꞌsiꞌdye muꞌin cac̣htacdyeꞌtum in, Rubéntyiꞌ ñuruꞌtyity in, yiriꞌtac päräꞌ jiyi mir in, Gadtyiꞌ ñuruꞌtyity in, yiriꞌtac päräꞌ jiyi mir in.

⁶ Asertyiꞌ in, yiriꞌtac päräꞌ jiyi mir in, Neftalítyiꞌ in, yiriꞌtac päräꞌ jiyi mir in, Manaséstyiꞌ in, yiriꞌtac päräꞌ jiyi mir in.

⁷ Simeóntyiꞌ in, yiriꞌtac päräꞌ jiyi mir in, Levítyiꞌ in, yiriꞌtac päräꞌ jiyi mir in, Isacartyiꞌ in, yiriꞌtac päräꞌ jiyi mir in.

⁸ Zabulóntyiꞌ in, yiriꞌtac päräꞌ jiyi mir in, Josétyiꞌ in, yiriꞌtac päräꞌ jiyi mir in, Benjamíntyiꞌ in, yiriꞌtac päräꞌ jiyi mir in, meꞌtumdye in räj cac̣htacdyeꞌtutum in Israeltyiꞌ vóshiꞌ muꞌ, yiriꞌ cien vạjpedyeꞌ quiꞌtac vạjpedyeꞌ jiyi mir in, meꞌsiꞌ shupqui in yedyej cac̣htacdyeꞌtumtyiꞌ in.

Shachtyity muntyiꞌ in jaiꞌbatyĉantyiꞌ quịꞌsiꞌ in

⁹ Chat qui cạvi yụ nạijtacsi yụ anic shachtyity muntyiꞌ in, junꞌtum raꞌ muꞌin rụiꞌcuꞌ in mijam tupuj tyi tsicsi muꞌin in. Yịjyi muntyiꞌ cạvacsi yụ, räj buꞌyity jaccheꞌ bäꞌyity in, yịjyi p̂eyacdyeꞌ in, rụiꞌcujcuquen in tashcheꞌ bäꞌyaquisyaꞌ Jenꞌsiꞌyamꞌ judyeyaꞌ Oveca buꞌyitysiꞌyaꞌ in. Muꞌin na jaiꞌbatyĉantyiꞌ coftyity in, unĉaĉan muꞌin jeꞌñes manaꞌis shan muꞌ.

¹⁰ Räjtum timaꞌquete in fer p̂eyaqui yi in: "Tsuntyiꞌ Jenꞌ muꞌ jiꞌc̣honsinꞌ tsun, muꞌ bäꞌyaquischety judyeyaꞌ muꞌ Oveca buꞌyity."

¹¹ Muꞌin na anjer in cọij buꞌyi muꞌin in muꞌyaꞌ bäꞌyaquisyaꞌ in, judyeyaꞌ tashcheꞌ buꞌyityyaꞌ in judyeyaꞌ mọꞌinyaꞌ vạjpedyeꞌ tsạꞌ buꞌyisyaꞌ in. Dyụtsyi muꞌin muꞌyaꞌ in, täjjequeꞌ jac in jáfiyaꞌ muꞌin timaꞌquete Jenꞌ in.

¹² Yi in: "Paj meꞌ ọij timaꞌcacdyeꞌ Jenꞌdyes. Timaꞌqueja muꞌ Jenꞌ, yoshoropaij jéja, tupuj jiꞌjäcbija därsiꞌ ferdyeꞌ muꞌ, judyeyaꞌ dyijyedyeꞌ muꞌ judyeyaꞌ mạijquedyeꞌmun chimeꞌ muꞌ, mijam raꞌ jụꞌñisĉan mạyedyeꞌ mọtsiꞌ muꞌ. Paj meꞌ", yi in.

¹³ Yirity tashcheꞌ buꞌyity jin yụ: —¿Tyi uts u in jaiꞌbatyĉaĉantyiꞌ quịꞌsiꞌ in cạvacsity mi? ¿Junatyiꞌ buty jijtuij in? —jin yụ.

¹⁴ Vorjete yụ: —Jam yụ chị́yacsi, mi nash chịj. Muꞌdye jiꞌchäquiyin yụ: —Uts nash cạvacsity mi muꞌin nash jiꞌcajñeꞌtyiꞌ därsiꞌ ñịbedyes in, muꞌin nash aty puptactyiꞌ coftyity muꞌin Oveca buꞌyitysiꞌĉan chäsh muꞌ, muꞌsiꞌyaꞌ chäsh muꞌ juiꞌbuij yụꞌtaqui in.

¹⁵ "Mọꞌdyes q̂uinꞌ muꞌin in tashcheꞌ buꞌyi in Jenꞌsiꞌyaꞌ bäꞌyaquis muꞌ, räjĉan úñi Jenꞌdyes in Jenꞌsiꞌĉan acaꞌ muꞌ, mạij judyeyaꞌ tsedyedyeꞌ. Muꞌ bäꞌyaquischety räjĉan raꞌ penꞌdyetucsi judyeyaꞌ raꞌ ñutsjeyacsi.

¹⁶ Meꞌquiꞌdye raꞌ dáquischeꞌ in mijam raꞌ jajrischeꞌ in, meꞌquiꞌdye raꞌ jịꞌĉojbite in tsunsiꞌ areꞌyedyemꞌ, mijam raꞌ juñujñudyeꞌ jịꞌĉojbanꞌ in,

¹⁷ ĉaĉaij na muꞌ Oveca buꞌyity, muꞌ c̣hẹiꞌyaꞌ buꞌyity bäꞌyaquischety, muꞌ qui raꞌ ĉọjcacsi judyeyaꞌ raꞌ cạcsi yóĉandyemꞌ shupquiꞌ tsạꞌchucsis ojñiꞌ o. Muꞌ qui raꞌ Jenꞌ jiꞌtätsacsebi táris muꞌin, meꞌquiꞌdye raꞌ tári bäꞌyi in."