Jị'cavacdye' 3 - Tsimane

Jịꞌchicacdyes Sardisĉantyidyes in

¹ —Sáñeva anjerdyes, muꞌ ĉọjcacsity muꞌin ñuruꞌtyity yụ́tyiꞌ in Sardisĉan bäꞌyity in, jéme ọij p̂eyacdyeꞌ muꞌindyes in: "Yi muꞌ meꞌchuptety mọꞌ yävätidyeꞌ buꞌyiꞌ shupquis Jenꞌsiꞌ Ạꞌedyeꞌ muꞌ, judyeyaꞌ chiyävätidyeꞌdye ọ́rotaꞌ in meꞌchucsity, yi muꞌ jínac: yụ nash chị́yeyac junꞌ chuc bäꞌyi miꞌin, jeñej tsạꞌtyiꞌ yụ́dyes ĉúnac in, jam na meꞌ miꞌin, säñi buꞌyi qui namꞌ yụ́dyes miꞌin, meꞌ bäꞌyi miꞌin.

² Tsạꞌebajshamꞌ miꞌin yụ́dyesiꞌ feryebadac miꞌin chimeꞌ anꞌdyemꞌ tsạꞌ tacaꞌ miꞌin ĉaĉaij na yụ cạveyac jam rụij bäꞌyi miꞌin Jenꞌsiꞌyaꞌ vej muꞌ.

³ Dyijtubadac jiꞌchäyitidyeꞌ mọꞌ seꞌvetiñes jiquej miꞌin, dyijyebadac juchajcheꞌ chimeꞌ miꞌin, chiquebadac jiꞌchäyitidyeꞌ. Tsạꞌ buꞌjamꞌ, jam jụijyaꞌ meꞌ miꞌin vatyquej raꞌ mọmoꞌ atsij yụ jeñej yirity shushuꞌaty, miꞌincheꞌ raꞌ tŝọij yụ vaꞌtacdyeꞌtum yụ, jam raꞌ méquiꞌ chị́vaꞌjoij miꞌin.

⁴ Pạrej na miꞌinyaꞌ in jam jeñej buꞌyi ọctum yụꞌtaqui quịꞌsiꞌ muꞌin aꞌc̣hisyaꞌ dyijyedyeꞌ muꞌin, meꞌ buꞌyi in, muꞌin meꞌ bäꞌyity in muꞌin raꞌ penꞌdyetun yụ in jaiꞌbatyĉantyiꞌ quịꞌsiꞌ in, ĉaĉaij na muꞌin rụijtyity in.

⁵ Tyi chuc jiꞌpeñeꞌtyiꞌ aꞌc̣his dyijyedyeꞌ in, muꞌin raꞌ soꞌmac jaiꞌbaty quịꞌsiꞌ in, muꞌinsiꞌ raꞌ tịj muꞌin jam junꞌ shac muꞌin, mọꞌ sánacsiꞌ Jenꞌsiꞌcheꞌ quirca muꞌ, mọꞌ jiꞌjäcacsiꞌ muꞌin muꞌyaꞌ raꞌ bäꞌyity in. Yụ raꞌ jiꞌjäcacsebi tịj muꞌin muꞌsiꞌyaꞌ vej muꞌ Jenꞌsiꞌyaꞌ yụ, judyeyaꞌ anjersiꞌyaꞌ vej chimeꞌ muꞌin.

⁶ Tyi chuc chuntumtyiꞌ in paj jämꞌ seꞌveꞌ in ọij p̂eyacdyeꞌ mọꞌ Jenꞌsiꞌ Ạꞌedyeꞌ muꞌ, jéyacsis muꞌin ñuruꞌtyity yụ́yaꞌ in."

Jịꞌchicacdyes Filadelfiaĉantyidyes in

⁷ —Sáñeva anjerdyes, muꞌ ĉọjcacsity muꞌin ñuruꞌtyity yụ́yaꞌ in Filadelfiaĉantyiꞌ in, jéme ọij p̂eyacdyeꞌ muꞌindyes in: "Yi muꞌ Rụijtyity jịꞌcätsaquity p̂eyacdyeꞌ muꞌ, muꞌ raꞌ ferdyeꞌtum buꞌyi ayoꞌbuꞌyi, yojdyemꞌ muꞌ Davidvun ayoꞌbuꞌyi jiquej u. Mijam raꞌ tyi tupuj ñutsjepte dyijyedyeꞌ muꞌ, vanchuiꞌ jụijyaꞌ, mijam raꞌ jụꞌñity tupuj ĉärꞌtebanꞌ chimeꞌ, ĉärꞌjeꞌ na jụijyaꞌ mijam raꞌ jụꞌñity vanactebanꞌ in mọꞌ.

⁸ Yi jínac: Yụ nash chị́yeyac junꞌ chuc bäꞌyi miꞌin, chimeꞌdye chị́yebiyac dyijyedyeꞌ damꞌ mọmoꞌ ferdyeꞌ mọꞌyaꞌ miꞌin. Meꞌ tsanꞌ meꞌ miꞌin, miꞌin qui namꞌ cäc̣häꞌchubutiĉaꞌ p̂eyacdyeꞌ yụs miꞌin, mijam méquiꞌ vaꞌquicdyiĉaꞌ yụ miꞌin. Yụ nash vanacjeyeyactyiꞌ chụiꞌdyeꞌ, jam jụꞌñity tupuj ĉärꞌbanꞌ mọꞌ.

⁹ Jeshaꞌ, pạrej fercheꞌ ñutsjinac in, meꞌ tsanꞌ judío naꞌi in, jam qui namꞌ anictyity judío shupqui in, Satanástyiꞌ shupqui in. Yụ qui na ramꞌ yi paj qui muꞌin ĉucnac in paj qui miꞌinsiꞌyaꞌ vej dyụtsyi in, mọꞌyaꞌ raꞌ chịj in junꞌ chuc yụ fer mạꞌjeyac miꞌin.

¹⁰ Miꞌin chäquibutiĉaꞌ yụs p̂eyacdyeꞌ miꞌin, mọꞌ nash jéyac paj qui tyumꞌchutidyeꞌtum bäꞌyi miꞌin, mọꞌdyes yụ raꞌ ñutschuyac miꞌin paj qui jam jịꞌĉojtiñeꞌ mọꞌ därsiꞌ ñịbedyes, ọ́cheꞌ raꞌ mọꞌ tŝọiꞌ, mọꞌ raꞌ jịꞌĉojtacsiꞌ räj jacchety muntyiꞌ in.

¹¹ Cavintum raꞌ atsijban yụ, mọꞌdyes yejĉojamꞌ cäc̣häꞌchuvac mọꞌ p̂eyacdyeꞌ yụ aty meꞌchutiñes q̂uinꞌ miꞌin, paj qui jam jụꞌñity väñädyeꞌyaꞌ seꞌ jaꞌyinac miꞌin, meꞌ jụijyaꞌ miꞌin, itŝiꞌ raꞌ bijodyeꞌ miꞌin.

¹² Tyi chuc jiꞌpeñeꞌtyiꞌ aꞌc̣his dyijyedyeꞌ in, yụ raꞌ yụꞌtacsi paj qui p̂otsoꞌvi buꞌyi in Jenꞌsiꞌĉan acaꞌ muꞌ, mijam raꞌ junꞌ shuban in. Muꞌincheꞌ raꞌ in yụ raꞌ tịj sánaqui Jenꞌsiꞌ yụ, judyeyaꞌ tịj bäꞌyedyes muꞌ, mọꞌ mụiꞌsis Jerusalén, mạyedyeꞌcheꞌ ramꞌ jijtuiꞌ. Chimeꞌdye yụ raꞌ sáñeꞌ muꞌincheꞌ in mụiꞌsis tịj yụ.

¹³ Tyi chuc chuntumtyiꞌ in paj jämꞌ seꞌveꞌ in ọij p̂eyacdyeꞌ Jenꞌsiꞌ Ạꞌedyeꞌ muꞌ, jéyacsis muꞌin ñuruꞌtyity yụ́tyiꞌ in."

Jịꞌchicacdyes Laodiceaĉantyidyes in

¹⁴ —Sáñeva anjerdyes, muꞌ ĉọjcacsity muꞌin ñuruꞌtyity yụ́tyiꞌ in Laodiceaĉan bäꞌyity in, jéme ọij p̂eyacdyeꞌ muꞌindyes in: "Yi muꞌ rụij jịꞌchiqueyacsity, muꞌ jịꞌcätseꞌtyiꞌ p̂eyacdyeꞌ, yódyetytumdyemꞌ jiquej u muꞌ Jenꞌ räj jämꞌtacsi jedyeꞌ in. Yi muꞌ jínac:

^15-16 Yụ chị́yeyac junꞌ chuc bäꞌyi miꞌin. Jeshaꞌ miꞌin jeñej buꞌyi jushuꞌshuiꞌsiꞌ jam tsịvujyis mijam japacsiꞌ, mọꞌdyes yụ raꞌ mọꞌjeyac jeñejjeyac ojñiꞌ, ĉaĉaij na meꞌ tsanꞌ jam yiristum yacchutiĉaꞌ yụ miꞌin, jam qui namꞌ fer dyijtutiĉaꞌ yụ miꞌin. Damꞌdye jämꞌ yiristum yacchutiĉaꞌ yụ miꞌin.

¹⁷ Ĉụiꞌ vaꞌbunyi yi miꞌin: Yụ nash jedyeꞌtumtyiꞌ, räj jämꞌ yụ́dyes shupquiꞌ, jam yiris jedyeꞌ jayej yụ, yi miꞌin. Mijam qui namꞌ chäyiti ĉụiꞌ miꞌin junꞌ chuc bäꞌyi miꞌin, där ñịbeꞌ cạvetiñeꞌ miꞌin, där ñịbeꞌ miꞌin, räj jedyeꞌ jayej miꞌin, anic tofej bäꞌyi miꞌin judyeyaꞌ anic chimeꞌ cädäj bäꞌyi miꞌin, mijam chäyiti ĉụiꞌ miꞌin.

¹⁸ Mọꞌdyes yụ jéyac miꞌin: yaꞌiyejamꞌ cavin yụ́yaꞌ anictyity oro pị́shety, meꞌ raꞌ chat jedyeꞌtum shupqui miꞌin. Chimeꞌdye yaꞌiyejamꞌ jaiꞌbaty quịꞌsiꞌ paj qui muꞌĉan cäti miꞌin paj qui jam tsị́cadyeꞌtum cädäj bäꞌyi miꞌin. Yaꞌiyejamꞌ chimeꞌ pịñidyeꞌ tomꞌtacdyes vej miꞌin, paj qui naijbunve Jenꞌdyes miꞌin.

¹⁹ Yụ nash fạraꞌjeĉunacsi aꞌc̣hisyaꞌ dyijyedyeꞌ judyeyaꞌ vaꞌtacdyeꞌyaꞌ jịꞌchiyacsi yụ yósiꞌdyemꞌ muꞌin mạꞌjeyacsity u yụ. Mọꞌdyes dyijyevac juchajcheꞌ miꞌin judyeyaꞌ cäc̣häꞌchutiĉaꞌ yụ fer dyijtutiĉam.

²⁰ Jeshaꞌ, yụ nash fayeyac chụiꞌdyeꞌyaꞌ miꞌin. Jụꞌñity chuc seꞌvibun fayacdyeꞌ jụijyaꞌ yụ, judyeyaꞌ vanacjiyin chụiꞌdyeꞌ jụijyaꞌ yụ, yụ raꞌ siste muꞌ judyeyaꞌ jebetyete yụ, judyeyaꞌ raꞌ muꞌ jibityin yụ.

²¹ Tyi chuc jiꞌpeñeꞌtyiꞌ aꞌc̣his dyijyedyeꞌ in, yụ raꞌ yụꞌtacsi paj qui penꞌdyetun yụ in judyeyaꞌ ayoꞌbuꞌyi yụ́tum in, yojdyemꞌ yụ u jiꞌpeñeꞌ yụ räj aꞌc̣his dyijyedyeꞌ judyeyaꞌ penꞌdyetun yụ muꞌ Jenꞌ yụ, ayoꞌbuꞌyi muꞌtum yụ.

²² Tyi chuc chuntumtyiꞌ in paj jämꞌ seꞌveꞌ in ọij p̂eyacdyeꞌ mọꞌ Jenꞌsiꞌ Ạꞌedyeꞌ muꞌ jéyacsis muꞌin ñuruꞌtyity yụ́tyiꞌ in."