Jị'cavacdye' 21 - Tsimane

Mụiꞌsis mạyedyeꞌcheꞌ judyeyaꞌ mụiꞌsis jac

¹ Cạveꞌ yụ mạyedyeꞌches jedyeꞌ mụiꞌsis judyeyaꞌ mụiꞌsis jac, mọꞌ na tashches mạyedyeꞌches judyeyaꞌ jac aty mọꞌ räj mọtsiꞌ in, chịmotsiꞌdye mọꞌ mar.

² Yụ cạvepte Jenꞌsiꞌ bäꞌyedyeꞌ muꞌ mọꞌ nash mụiꞌsis Jerusalén, mạyedyeꞌcheꞌ jijtuiꞌ, Jenꞌyas ayij mọꞌ. Jeñej yiris p̂en vämis raꞌ jäꞌmiiꞌtyiꞌ vämedyedyes mọꞌ, meꞌ buꞌyiꞌdye mọꞌ bäꞌyedyeꞌ yụꞌtac.

³ Seꞌveꞌ yụ fersiꞌ mạyedyeꞌches p̂eyacdyeꞌ bäꞌyaquisches, yiꞌ: —Q̂uinꞌ muꞌ Jenꞌ aty jajbuꞌyacsi muntyiꞌ in. Muꞌ raꞌ jajbuꞌyacsi, ĉụiꞌtyiꞌ raꞌ muntyiꞌ shupqui muꞌ. Jenꞌdye raꞌ penꞌdyetucsi, muꞌdye raꞌ Jenꞌ muꞌin.

⁴ Jenꞌ raꞌ jiꞌtätsacsebi táris muꞌin, jadyic raꞌ sänꞌdyeꞌ muꞌin, jadyic raꞌ táredyeꞌ muꞌin judyeyaꞌ vátedyeꞌ chimeꞌ muꞌin, aty raꞌ jam jịꞌĉojtyebanꞌ quivij areꞌredyeꞌ in, räj mọꞌ tashches jịꞌĉojtyeꞌsiꞌ jiquej in, räj raꞌ mọꞌin jịꞌmotsac in —yiꞌ mọꞌ p̂eyacdyeꞌ.

⁵ Ayoscheꞌ bäꞌyaquis bäꞌyity yi p̂eyaqui: —Yụ raꞌ tas yụꞌbanꞌ mụiꞌsis. Chimeꞌdye yi muꞌ jin yụ: —Sáñevaꞌ ọij jämꞌ seꞌves p̂eyacdyeꞌ mi, mọꞌ anicsis, anic raꞌ cạ̈tsiꞌ mọꞌ.

⁶ Chimeꞌdye yi jin yụ: —A toꞌ o tas cạ̈tsiꞌ, yụ nash Tashchety judyeyaꞌ Jäquity. Tyi chuc jajrity in yụ raꞌ fibiꞌyaꞌ jiꞌtyecsi tsạꞌchusisyaꞌ ojñiꞌ, mọꞌ jijmoꞌmojĉan shupquis.

⁷ Tyi chuc jiꞌpeñeꞌtyiꞌ aꞌc̣his dyijyedyeꞌ in, muꞌindyes raꞌ räj jịꞌcätseꞌ yụ ọij q̂uinꞌ p̂eyes yụ, räj raꞌ soꞌmacsi yụ. Yụ raꞌ Jenꞌ muꞌin, muꞌin qui raꞌ ạvaꞌ yụ in, meꞌ buꞌyi raꞌ shupqui in.

⁸ Yoctyiꞌ na jam raꞌ meꞌ in, muꞌin raꞌ vaꞌcac tŝijĉan in, tyijtyi chuc quiquijnaquity in, jam anicjetety Jenꞌ in, judyeyaꞌ ac̣hiꞌyity in, judyeyaꞌ ijacsity in, judyeyaꞌ voꞌvoijtyiꞌ in, judyeyaꞌ cọcojsiꞌnaquity in, judyeyaꞌ jämꞌtacdyeꞌ jenꞌtuiꞌtyiꞌ in, judyeyaꞌ räj muꞌin väväjñity in, räj raꞌ muꞌin meꞌtyity in vaꞌcac raꞌ tŝijĉan in, yóĉandyemꞌ coꞌshaiꞌĉan azufretumsiꞌ o. Mọꞌ nash päräꞌyis sänꞌdyeꞌ jadyiquis —yi jin yụ.

Mụiꞌsis bäꞌyedyeꞌ Jerusalén

⁹ Atsij yirity yävätidyeꞌyity anjer, muꞌin cạiꞌtyiꞌ pijiꞌ jiquej in, mọꞌ meꞌchuiꞌsiꞌ in jadyiquis yävätidyeꞌyis vaꞌtacdyeꞌ in. Muꞌ anjer ĉúquin yụ chat qui jin yụ: —Atsiva, yụ raꞌ jịꞌcaveyeye mọꞌ p̂en vämis raꞌ Oveca buꞌyitycheꞌ.

¹⁰ Jenꞌsiꞌ qui Ạꞌedyeꞌ muꞌ tŝútyin yụ, muꞌ qui anjer därtyiꞌcheꞌ mụcuꞌ can yụ, jumijĉan yuꞌtyin yụ. Jiꞌcaviyin yụ mọꞌ jämꞌsiꞌ bäꞌyedyeꞌ Jenꞌsiꞌ muꞌ Jerusalén, mọꞌ mạyedyeꞌcheꞌ jijtuiꞌsiꞌ, Jenꞌyaꞌ jijtuiꞌsiꞌ.

¹¹ Anic pashquiꞌ mọꞌ jiꞌcavitiꞌ, Jenꞌsiꞌtum pashquedyeꞌ. Anic där jämꞌsiꞌ pashquedyemꞌ jeñej yaꞌijtyiꞌ mij, tịj muꞌ jaspe, meꞌ buꞌyiꞌ choñemquedyemꞌ.

¹² Cọtoij buꞌyiꞌ mọꞌ bäꞌyedyeꞌ anic därsiꞌ naꞌrumꞌ, mocheꞌ tyeiꞌ mọꞌ. Chụiꞌdyeꞌ namꞌ yiriꞌtac päräꞌ jiyiꞌ mọꞌ. Cäts yirity jịjcaij anjer ĉọjcabiꞌ chụiꞌdyeꞌ in, judyeyaꞌ chimeꞌ chụiꞌdyeꞌcheꞌ tịj sánac muꞌin, cäts yiriꞌtac päräꞌ jiyi muꞌin ñuruꞌtyity in Israeltyiꞌ vóshiꞌ in.

¹³ Pamꞌve chibin buꞌyiꞌ chụiꞌdyeꞌ in, siticheꞌ tsun chichibindye mọꞌcheꞌ, jätisve chichibindye mọꞌve, rocve chichibindye mọꞌve chụiꞌdyeꞌ in, meꞌ buꞌyacñiꞌ chụiꞌdyeꞌ mọꞌ, mọꞌ bäꞌyedyes.

¹⁴ Naꞌru mọꞌ därtyiꞌcheꞌ mij jiꞌtac, yiriꞌtac päräꞌ jiyi mij tibuꞌ in anic chäcdacñity in. Cäts yirity mij jịjcaiꞌ muꞌcheꞌ sánac tịj muꞌin yiriꞌtac päräꞌ jiyity jutactyiꞌ muꞌ Oveca buꞌyitytyiꞌ.

¹⁵ Muꞌ anjer p̂eyaquity yụ́tum muꞌ meꞌchuiꞌ yiris tuputuquis oro, jeꞌñes shuruꞌ joꞌmeiꞌ, mọꞌyaꞌ raꞌ muꞌ tuputuiꞌ mọꞌ bäꞌyedyeꞌ, fajve naꞌru judyeyaꞌ chụiꞌdyeꞌ mọꞌ, meꞌ meꞌ raꞌ tuputucsi.

¹⁶ Meꞌsisij shupquiꞌ tupuj mọꞌ, därvedyemꞌ mọꞌ judyeyaꞌ moc̣hadyemꞌ vaj cäts shupquimꞌ, päräꞌ mir päräꞌ quiꞌ cien quirometro, meꞌquiꞌyaꞌmun moc̣hadyemꞌ judyeyaꞌ därvedyemꞌ, chichimeꞌquiꞌdye moc̣hedyemꞌ bäꞌyedyes.

¹⁷ Naꞌrumun chimeꞌ tuputubiꞌ, jäbän quiꞌtac ĉanamꞌ jiyi metro, meꞌquiꞌcheꞌ moc̣hedyemꞌ. Yódyesdyemꞌ muntyis tuputuquis u tsun, joꞌmesyaꞌ tuputuiꞌ muꞌ anjer mọꞌ bäꞌyedyeꞌ.

¹⁸ Naꞌru mọꞌ yedyej yaꞌijtyiꞌ mij, tịj muꞌ jaspe, meꞌ buꞌyiꞌ jämꞌtac, mọꞌ na bäꞌyedyeꞌ yedyej oro jämꞌtac, chuñemtyiꞌ anic pishyity oro in.

¹⁹ Yócheꞌdyemꞌ yútyiꞌcheꞌ o, mọꞌ jämꞌ yụꞌtac jäjämuntyiꞌyaꞌ mij in yaꞌijtyiꞌ in. Muꞌ tashchety shásha mọꞌ jaspe tịj muꞌ, päräꞌyity na shásha mọꞌ zafiro tịj muꞌ, chibinyity na shásha mọꞌ ágata mus tịj, vạjpedyeꞌyity na shásha mọꞌ esmeralda tịj muꞌ.

²⁰ Ĉanamꞌyity na shásha mọꞌ ónice mus tịj, jäbänyity na shásha mọꞌ cornalina tịj muꞌ, yävätidyeꞌyity na shásha mọꞌ crisólito tịj muꞌ, muꞌ na q̂uenꞌĉanyity shásha mọꞌ berilo tịj muꞌ, arajtacyity sháshatuctyiꞌ topacio tịj muꞌ, yiriꞌtacyity na shásha mọꞌ crisoprasa tịj muꞌ, yiriꞌtac yiris jiyity na shásha mọꞌ jacinto tịj muꞌ, judyeyaꞌ muꞌ jadyiquity yiriꞌtac päräꞌ jiyity shásha mọꞌ amatista tịj muꞌ, joꞌmemetyyaꞌ jäjämuntyiꞌyaꞌ mij in jämꞌ yụꞌtac yócheꞌdyemꞌ tyeiꞌcheꞌ naꞌru o.

²¹ Mọꞌin na chụiꞌdyeꞌ bäꞌyedyes in yedyej jäjämuntyiꞌ mij in tịj muꞌ perla, meꞌ meꞌ jämꞌtac in, yirity perla cäts yiris chụiꞌdyeꞌ jämꞌtac. Tashches caye bäꞌyedyes oro jämꞌtac mọꞌ, anic chuñemtyiꞌ muꞌ oro in.

²² Mijam méquiꞌ dạqueꞌ yụ mọꞌcheꞌ Jenꞌsiꞌ acamꞌ, ĉaĉaij na muꞌcheꞌ muꞌ ferdyeꞌtumtyiꞌ Jenꞌ Ayoꞌ tsun judyeyaꞌ muꞌ Oveca buꞌyity, muꞌindyemꞌ muꞌcheꞌ acaꞌ buꞌyi in jimacdyes.

²³ Mọꞌches bäꞌyedyeꞌ jam jemoñeꞌ mạijquedyeꞌ tsunsimꞌ mijam ịvas, ĉụiꞌsimꞌ mạijquedyeꞌ Jenꞌsimꞌ, mọꞌ mạij buꞌyiꞌ mọꞌcheꞌ, judyeyaꞌ muꞌ Oveca buꞌyity mạij buꞌyi muꞌcheꞌ chimeꞌ.

²⁴ Mọꞌsiꞌ qui raꞌ mạijquedyemꞌ räj mạijchucsiꞌ jacchety muntyiꞌ in. Jacchety ayoꞌ in ĉọ́queꞌ raꞌ in mọꞌ bäꞌyedyeꞌ jiquiqueꞌ raꞌ in jedyeꞌ chuc ĉụiꞌsiꞌ muꞌin yaꞌiꞌsiꞌ muꞌin.

²⁵ Mọꞌsiꞌ bäꞌyedyes chụiꞌdyeꞌ mọꞌ vavancacaꞌ raꞌ yụꞌtac in, räjĉan raꞌ meꞌ buꞌyiꞌ mọꞌ, mọꞌcheꞌ itŝiꞌ tsedyedyeꞌ.

²⁶ Jacchety muntyiꞌ in ĉọ́queꞌ raꞌ in mọꞌ bäꞌyedyeꞌ, jiquiqueꞌ raꞌ in daiꞌ yaꞌiꞌsiꞌ jedyeꞌ muꞌin.

²⁷ Mọꞌ qui na ramꞌ aꞌc̣his jedyeꞌ jam junꞌyiꞌ sitiꞌ mọꞌcheꞌ. Tyi chuc aꞌc̣histum tsị́cadyeꞌ bäꞌyi in muꞌin raꞌ jam junꞌ cạ̈näꞌvaqui in mijam väväjñity chimeꞌ in. Muꞌin ramꞌ sánactyiꞌ tịj quircacheꞌ in Oveca buꞌyitysiꞌcheꞌ muꞌ, mọꞌ jiꞌjäcacsis muꞌin Jenꞌyaꞌ raꞌ bäꞌyity in, muꞌin ramꞌ siti muꞌĉan in.